Ang mga Depekto sa Lawas Nag-apektar sa Daghan

SI Christian, nga nagpuyo diha sa usa ka nasod sa Aprika, gikidnap sa mga sundalo kinsa mipugos kaniya sa pagsundalo, apan midumili siya tungod sa iyang binansay-sa-Bibliya nga tanlag. Busa gidala siya sa mga sundalo ngadto sa usa ka kampo militar diin, human siya gikulata sa upat ka adlaw, gipusil siya sa usa kanila sa tiil. Nakahimo ra sa pag-adto sa ospital si Christian, apan kinahanglang putlon ang iyang bitiis. Diha sa laing nasod sa Aprika, bisan ang gagmayng mga bata naputlan ug mga kasway sa armadong mga rebelde. Ug gikan sa Cambodia ngadto sa mga nasod sa Balkan, gikan sa Afghanistan ngadto sa Angola, ang gilubong nga mga bomba padayon nga nahimong hinungdan sa pagkapungkol ug sa mga depekto sa lawas sa mga batan-on ug tigulang.

Nakahatag usab ug kadaot ang mga depekto sa lawas nga ipahinabo sa mga aksidente ug sakit, sama sa diabetes. Bisan ang mga hilo sa palibot mahimong moresulta sa depekto sa lawas. Pananglitan, diha sa kasilinganan sa usa ka siyudad sa Sidlakang Uropa, daghang bata ang nangatawo nga wala ang usa sa ilang ubos nga bukton. Ang ilang bukton kutob lang sa ubos sa siko. Ang ebidensiya nagpakita nga ang hinungdan maoy pagkadaot sa mga gene tungod sa kemikal nga polusyon. Daghan pang ubang mga tawo ang kompleto pag mga kasway apan may depekto ra gihapon sa lawas tungod sa paralisis o ubang mga sakit. Sa pagkatinuod, ang mga depekto sa lawas nag-apektar sa daghan.

Bisag unsa pay hinungdan, ang mga depekto sa lawas makapaguol gayod. Si Junior giputlan sa iyang walang bitiis sa edad nga 20. Siya miingon sa ulahi: “Daghan akog emosyonal nga mga kalisdanan. Nagsige kog hilak tungod kay dili na gayod mahibalik kanako ang akong bitiis. Wala ko masayod kon unsay buhaton. Nalibog ko.” Apan, sa paglabay sa panahon ang tinamdan ni Junior nausab pag-ayo. Siya nagsugod sa pagtuon sa Bibliya ug nakakat-on ug mga butang nga dili lamang nakatabang kaniya sa pagsagubang kondili usab nakahatag kaniyag nindot nga paglaom sa usa ka malipayong kaugmaon dinhi mismo sa yuta. Kon ikaw may depekto sa lawas, gusto ka bang makabaton usab niana nga paglaom?

Kon gusto ka, nan palihog basaha ang sunod nga artikulo. Among isugyot nga imong basahon ang reperensiyang mga Kasulatan diha sa imong kaugalingong Bibliya aron imong mapamatud-an mismo kon unsay tagana sa Maglalalang alang niadtong motuon bahin sa iyang katuyoan ug magpasibo sa ilang kinabuhi ngadto niini.