Ginaihap ba Nimo ang Bili?

ITANYAG ni Jesu-Kristo sa iyang mga tinun-an ang paglaom nga kinabuhing walay kataposan, apan giagda usab niya sila nga iphon ang bili sa pagkahimong Kristohanon. Iyang giilustrar ang punto pinaagi sa pagpangutana: “Kinsa kaninyo nga buot magtukod ug torre nga dili una molingkod ug kuwentahon ang gasto [o, iphon ang bili], aron tan-awon kon siya aduna bay igo aron sa paghuman niini?” (Lucas 14:28) Unsa nga bili ang gipasabot ni Jesus?

Ang tanang Kristohanon makaatubang ug mga pagsulay—nga ang pipila niana seryoso. (Salmo 34:19; Mateo 10:36) Busa, kita kinahanglang andam sa mental ug espirituwal aron dili kita makuratan sa dihang modangat kanato ang pagsupak o ubang mga problema. Kinahanglang nakuwenta na natong daan ang maong mga problema sumala sa bili sa pagkahimong tinun-an ni Kristo, nga nahibalo nga ang ganti—kaluwasan gikan sa sala ug kamatayon—maoy takos gayod kay sa bisan unsang butang nga ikatanyag kanato niining presenteng sistema. Oo, walay bisan unsa nga tugotan sa Diyos—bisan ang kamatayon—nga permanenteng makadaot kanato kon mopadayon lamang kita sa pag-alagad kaniya.—2 Corinto 4:16-18; Filipos 3:8.

Sa unsang paagi mahimong ingon niana ka lig-on ang atong pagtuo? Ang atong pagtuo magakalig-on sa matag panahon nga makahimo kitag hustong desisyon, lig-ong mobarog alang sa Kristohanong mga prinsipyo, o mohimog lakang nga uyon sa kabubut-on sa Diyos—ilabina kon kita pugson nga buhaton ang sukwahi niana. Sa dihang personal natong masinati ang panalangin ni Jehova ingong resulta sa atong matinumanong dalan, ang atong pagtuo mas pang molig-on ug molalom. Nianang paagiha, ginasunod nato ang panig-ingnan ni Jesus, sa iyang unang mga tinun-an, ug ang tanang lalaki ug babaye sa pagtuo kinsa latas sa nagkalainlaing yugto sa kasaysayan hustong ‘nakaihap sa bili’ sa pag-alagad sa Diyos.—Marcos 1:16-20; Hebreohanon 11:4, 7, 17, 24, 25, 32-38.