Mga Pangutana Gikan sa mga Magbabasa

Sa dihang nakita ni Juan ang “dakong panon” nga naghatag ug sagradong pag-alagad diha sa templo ni Jehova, unsang bahina sa templo nga gibuhat nila kini?—Pinadayag 7:9-15.

Makataronganon ang pag-ingon nga ang dakong panon nagsimba kang Jehova diha sa usa sa yutan-ong mga sawang sa iyang dakong espirituwal nga templo, sa espesipiko ang sawang nga katumbas sa gawas nga sawang sa templo ni Solomon.

Sa una, giingon nga ang dakong panon anaa sa usa ka espirituwal nga katumbas, o matagnaong katumanan, sa Sawang sa mga Hentil nga naglungtad sa adlaw ni Jesus. Apan, ang dugang panukiduki nagpadayag ug labing menos lima ka rason kon nganong dili ingon niana ang ipasabot. Una, dili tanang bahin sa templo ni Herodes ang dunay matagnaong katumanan diha sa dakong espirituwal nga templo ni Jehova. Pananglitan, ang templo ni Herodes dunay Sawang sa mga Babaye ug Sawang sa Israel. Ang mga lalaki ug babaye makasulod sa Sawang sa mga Babaye, apan ang mga lalaki lamang ang pasudlon sa Sawang sa Israel. Sa yutan-ong mga sawang sa dakong espirituwal nga templo ni Jehova, ang mga lalaki ug babaye magkauban sa ilang pagsimba. (Galacia 3:28, 29) Busa, walay katumbas sa Sawang sa mga Babaye ug sa Sawang sa Israel diha sa espirituwal nga templo.

Ikaduha, walay Sawang sa mga Hentil diha sa gihatag sa Diyos nga mga plano sa arkitektura sa templo ni Solomon o sa templo sa panan-awon ni Ezequiel; ni dihay Sawang sa mga Hentil sa templo nga gitukod pag-usab ni Zorobabel. Busa, walay sukaranan sa paghinapos nga ang Sawang sa mga Hentil kinahanglang dunay katumbas diha sa kahikayan sa dakong espirituwal nga templo ni Jehova sa pagsimba, ilabina sa dihang konsiderahon ang mosunod nga punto.

Ikatulo, ang Sawang sa mga Hentil gitukod sa Edomihanon nga Haring Herodes aron sa paghimaya sa iyang kaugalingon ug sa pag-angkon sa pabor sa Roma. Gisugdan ni Herodes ang pag-ayo sa templo ni Zorobabel tingali sa 18 o 17 W.K.P. Ang The Anchor Bible Dictionary nagpatin-aw: “Tungod kay ang imperyal nga gahom sa Kasadpan [Roma] mahiligon sa klasikal nga mga butang . . . gikinahanglan ang usa ka templo nga mas dako niadtong anaa sa susama nianang mga siyudad sa sidlakan.” Apan, ang mga sukod sa templo mismo gitino na. Ang diksiyonaryo nagpatin-aw: “Samtang ang Templo mismo kinahanglan nga samag sukod sa nag-una niining mga templo [kang Solomon ug Zorobabel], ang Bantawan sa Templo walay limite sa mahimong gidak-on niini.” Busa, gipadak-an ni Herodes ang templo pinaagi sa pagdugang sa gitawag sa modernong panahon nga Sawang sa mga Hentil. Ngano god nga ang usa ka tinukod nga ingon nianag sinugdanan makabaton mag matagnaong katumanan diha sa kahikayan sa espirituwal nga templo ni Jehova?

Ikaupat, halos si bisan kinsa—ang mga buta, bakol, ug dili-tinuli nga mga Hentil—makasulod sa Sawang sa mga Hentil. (Mateo 21:14, 15) Tinuod, ang sawang gigamit sa daghang dili-tinuling mga Hentil nga gustong mohalad ngadto sa Diyos. Ug didto si Jesus namulong usahay sa mga tawo ug kaduha nagpalagpot sa mga tig-ilis ug salapi ug magpapatigayon, nga nag-ingon nga wala nila pasidunggi ang balay sa iyang Amahan. (Mateo 21:12, 13; Juan 2:14-16) Bisan pa niana, ang The Jewish Encyclopedia nag-ingon: “Kining gawas nga sawang, sa pagkatinuod, dili bahin sa Templo. Ang yutang gitarokan niini dili balaan, ug si bisan kinsa mahimong mosulod niini.”

Ikalima, ang Gregong pulong (hi·e·ron’) nga gihubad ug “templo” nga gigamit maylabot sa Sawang  sa mga Hentil “nagtumong sa tibuok pundok sa mga tinukod, inay kay nagtumong lamang sa Templo mismo,” nag-ingon ang A Handbook on the Gospel of Matthew, ni Barclay M. Newman ug Philip C. Stine. Sa kasukwahi, ang Gregong pulong (na·os’) nga gihubad ug “templo” diha sa panan-awon ni Juan sa dakong panon mas espesipiko. Bahin sa templo sa Jerusalem, kasagaran nagtumong kini sa Balaan sa mga Balaan, sa templo mismo, o sa hawanan sa templo. Usahay gihubad kini ug “sangtuwaryo.”—Mateo 27:5, 51; Lucas 1:9, 21; Juan 2:20.

Ang mga membro sa dakong panon nagpasundayag ug pagtuo sa halad lukat ni Jesus. Sila hinlo sa espirituwal, kay ilang “gilabhan ang ilang tag-as nga mga besti ug gipaputi kini sa dugo sa Kordero.” Busa, sila gipahayag nga matarong nga may paglaom nga mahimong mga higala sa Diyos ug makalabang-buhi sa dakong kasakitan. (Santiago 2:23, 25) Sa daghang paagi, sila sama sa mga kinabig sa Israel nga nagpailalom sa Balaod sa pakigtugon ug nagsimba duyog sa mga Israelinhon.

Siyempre, kadto nga mga kinabig wala mag-alagad sa sulod nga sawang, diin ang mga saserdote naghimo sa ilang mga katungdanan. Ug ang mga membro sa dakong panon wala sa sulod nga sawang sa dakong espirituwal nga templo ni Jehova, kansang sawang naghawas sa kahimtang sa hingpit, matarong nga tawhanong pagkaanak sa mga membro sa “balaang pagkasaserdote” ni Jehova samtang dinhi pa sila sa yuta. (1 Pedro 2:5) Apan sumala sa giingon sa ansiyano sa langit ngadto kang Juan, ang dakong panon anaa gayod sa templo, wala sa gawas sa hawanan sa templo sa usa ka dapit nga giisip nga maoy espirituwal nga Sawang sa mga Hentil. Pagkadakong pribilehiyo kana! Ug nagpasiugda gayod kana sa panginahanglan sa matag usa sa pagpabiling putli sa espirituwal ug moral sa tanang panahon!

[Diagram/Hulagway sa panid 31]

(Alang sa aktuwal nga pagkahan-ay, tan-awa ang publikasyon)

Templo ni Solomon

1. Templo

2. Sulod nga Sawang

3. Gawas nga Sawang

4. Hagdanan Paingon sa Sawang sa Templo