Dakong Pag-uswag Nanginahanglag Dinaliang Pagpalapad
“Umari Kanako, . . . ug Ako Magapalagsik Kaninyo”
Dakong Pag-uswag Nanginahanglag Dinaliang Pagpalapad
“UMARI kanako, . . . ug ako magapalagsik kaninyo,” matod ni Jesu-Kristo. (Mateo 11:28) Pagkamakapadasig nga pagdapit gikan sa Ulo sa Kristohanong kongregasyon! (Efeso 5:23) Kon atong palandongon kanang mga pulonga, mapabilhan gayod nato ang tinuod nga tinubdan sa pagpalagsik—ang pagpakig-uban sa atong espirituwal nga mga igsoon diha sa Kristohanong mga tigom. Kita mouyon gayod sa salmista nga miawit: “Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!”—Salmo 133:1.
Sa pagkatinuod, ang atong mga kaubanan sa maong mga tigom sa pagsimba maoy labing maayong mga kauban, ug ang espirituwal nga atmospera luwas ug hayahay. Busa, may maayong katarongan nga ang usa ka batan-ong Kristohanon miingon: “Ako nagatungha sa tibuok adlaw, ug kini nakapaluya kanako. Apan ang mga tigom nahisamag lunhawng dapit sa desyerto, diin ako mapalagsik aron makasugakod sa sunod adlaw nga tingtungha.” Usa ka batan-ong babaye sa Nigeria nag-ingon: “Akong nakaplagan nga ang pagpakigsuod niadtong nahigugma kang Jehova nakatabang kanako sa pagpabiling suod kaniya.”
Ang lokal nga Kingdom Hall sa mga Saksi ni Jehova nagasilbi gayod nga sentro sa tinuod nga pagsimba diha sa katilingban. Sa kadaghanang dapit, ang mga tigom ginahimo diha sa Kingdom Hall labing menos kaduha sa usa ka semana, ug ang mga estudyante sa Bibliya gidasig sa pagtambong dayon aron makabenepisyo sa makapalagsik nga panag-ubanay didto.—Hebreohanon 10:24, 25.
Dinaliang Panginahanglan
Apan, maayong matikdan nga dili tanang Saksi ni Jehova nagpahimulos ug angay nga Kingdom Hall. Ang dakong pag-uswag sa mga magwawali sa Gingharian sa tibuok yuta nagpahinabog dinaliang panginahanglan. Libolibong Kingdom Hall ang gikinahanglan gihapon, ilabina diha sa nagaugmad nga kayutaan.—Isaias 54:2; 60:22.
Sa pag-ilustrar: Duna lamay napulo ka Kingdom Hall alang sa 290 ka kongregasyon sa kaulohan sa Democratic Republic of Congo. Dinalian ang panginahanglan sa daghang Kingdom Hall nianang nasora. Sa Angola, ang kadaghanang kongregasyon nagtigom sa gawas sa balay kay limitado lamang ang gidaghanon sa mga Kingdom Hall. Sama niana ang panginahanglan sa daghang ubang kanasoran.
Busa, sukad sa 1999, ang organisadong paningkamot gihimo aron motabang sa pagtukod ug Kingdom Hall sa kayutaan nga limitado lamang ang kahinguhaan. Aron matabangan ang pag-atiman sa pagpanukod sa maong kayutaan, ang eksperyensiyadong mga Saksi miboluntaryo sa ilang mga serbisyo. Sa dihang ang maong mga paningkamot giduyogan sa kinabubut-ong espiritu ug sa lokal nga mga boluntaryo nga daling makatabang, ang mga resulta makapadasig kaayo. Sa baylo, ang lokal nga mga Saksi makabenepisyo sa pagbansay nga ilang madawat. Kining tanan nakatabang nga matagan-an ang mga panginahanglan sa pagtukod ug Kingdom Hall sa ilang mga nasod.
Sa ingon gitagana ang praktikal nga tabang sa mapailin-ilinong paagi sa pagtukod ug Kingdom Hall ginamit ang lokal nga mga paagi ug mga materyales. Ang tumong dili lamang aron matagan-an ang dakong panginahanglan alang sa mga Kingdom Hall kondili ang pag-ugmad usab ug programa sa pagmentinar nga nahiangay sa lokal nga mga kahimtang.—2 Corinto 8:14, 15.
Makapadasig nga mga Kaugmaran
Unsay epekto niining mga paningkamot sa pagtaganag mga dapit sa pagsimba? Sayo sa 2001, ang taho gikan sa Malawi nag-ingon: “Dalayegon kaayo ang nalampos dinhing nasora. Sa mosunod nga duha ka bulan, mahuman namo ang dugang nga mga Kingdom Hall.” (Mga hulagway 1 ug 2) Sa Togo, ang mga boluntaryo nakatukod ug daghang kasarangang mga Kingdom Hall sa miaging mga bulan. (Hulagway 3) Maayo usab ang nahimo sa kinabubut-ong mga boluntaryo sa pagtabang sa pagtaganag angay nga mga Kingdom Hall sa Mexico, Brazil, ug sa ubang kayutaan.
Namatikdan sa mga kongregasyon nga sa dihang matukod ang usa ka Kingdom Hall, masabtan sa lokal nga mga tawo nga ang mga Saksi ni Jehova magpabilin sa ilang lugar. Daghang tawo ang daw nagpanuko sa pagpakig-uban sa mga Saksi hangtod aduna
nay angay nga dapit sa pagsimba. Ang Kongregasyon sa Nafisi sa Malawi nagtaho: “Karon nga kami aduna nay angay nga Kingdom Hall, kini mitultol sa maayong pagpamatuod. Busa, sayon na lang ang pagsugod ug mga pagtuon sa Bibliya.”Ang mga membro sa Kongregasyon sa Krake sa Benin gibiaybiay pag-ayo sa miagi kay ang kanhing Kingdom Hall kinaraan kon itandi sa ubang mga simbahan. (Hulagway 4) Karon ang kongregasyon aduna nay maayong bag-ong Kingdom Hall nga naghawas sa tinuod nga pagsimba diha sa kasarangan apan dungganong paagi. (Hulagway 5) Kining kongregasyona adunay 34 ka magmamantala sa Gingharian nga may aberids nga nagtambongan nga 73 sa mga tigom sa Dominggo, apan 651 ang mitambong sa pagdedikar sa Kingdom Hall. Ang kadaghanan kanila maoy mga lungsoranon nga nakadayeg
pag-ayo sa pagkakita nga ang mga Saksi nakatukod ug tigomanan sa mubong panahon. Naghisgot sa nangaging mga kalamboan niining bahina, ang sangang buhatan sa Zimbabwe misulat: “Sulod sa usa ka bulan nga pagtukod sa usa ka bag-ong Kingdom Hall, ang tumatambong sagad midoble.”—Hulagway 6 ug 7.Segurado, ang daghang bag-ong mga Kingdom Hall nakatabang sa pagtaganag mga dapit alang sa espirituwal nga kahupayan sa dedikadong mga Kristohanon ug sa interesadong mga tawo. “Kami nalipay pag-ayo,” matod sa usa ka Saksi sa Ukraine human nga ang lokal nga kongregasyon misugod paggamit sa bag-ong Kingdom Hall. “Among nasaksihan kon giunsa pagtabang ni Jehova ang iyang katawhan.”
[Kahon/Mga hulagway sa panid 10, 11]
Kinabubut-ong Pagpaluyo Gipabilhan
Ang mga Saksi ni Jehova nahinam sa paglantaw sa kusog nga pag-uswag nga gihimo aron matagan-an ang dinaliang panginahanglan alang sa bag-ong mga Kingdom Hall sa tibuok globo. Ang padayong pag-uswag sa gidaghanon sa mga magsisimba ni Jehova sa nagkalainlaing kanasoran nagkinahanglan nga daghang bag-ong mga Kingdom Hall ang tukoron sa umaabot. Aw, sa aberids, sa 2001 nga tuig sa pag-alagad, 32 ka bag-ong mga kongregasyon ang naporma kada semana! Ang maong mga kongregasyon nagkinahanglag mga dapit alang sa pagtigom ug pagsimba.
Ang pangutana tingali motungha, ‘Giunsa man namo pagtagana ang panalapi sa maong mga proyekto sama sa pagtukod ug bag-ong mga Kingdom Hall, ilabina sa mga nasod diin ang mga igsoon adunay limitadong kahinguhaan sa panalapi?’ Ang tubag naglangkit sa pagpaluyo sa Diyos ug kamanggihatagon sa tawo.
Sumala sa iyang saad, si Jehova magbubo sa iyang balaang espiritu sa iyang mga alagad, nga magpaarang nila “nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit.” (1 Timoteo 6:18) Ang espiritu sa Diyos nagpalihok sa mga Saksi ni Jehova sa pagpaluyo sa buluhatong pagsangyaw sa Gingharian sa tanang paagi—nga nagdeboto sa ilang panahon, kusog, personal nga pagbudlay, ug ubang kahinguhaan alang sa Kristohanong mga buluhaton.
Ang espiritu sa kinabubut-ong paghatag nagdasig sa mga Saksi ug sa uban nga motabang sa pagpalapad ug pagpanukod sa pinansiyal nga paagi. Gawas pa sa pagtabang sa paghulip sa regular nga mga galastohan sa lokal nga kongregasyon, sila moamot alang sa pagpanukod sa ubang mga bahin sa yuta.
Sa matag kongregasyon, dunay mga kahon nga gimarkahag “Contributions for the Worldwide Work—Matthew 24:14.” Dinha ang mga indibiduwal makahulog ug kinabubut-ong mga amot kon buot nila. (2 Hari 12:9) Ang tanang amot gipasalamatan, dako man o diyutay. (Marcos 12:42-44) Kining mga pondoha gamiton sa daghang paagi sumala sa panginahanglan, lakip na ang pagtukod ug mga Kingdom Hall. Ang maong mga pondo wala gamita sa pagsuweldog mga manedyer kay walay ingon niana ang mga Saksi ni Jehova.
Ang mga amot alang sa tibuok-kalibotang buluhaton nakapalampos ba sa katuyoan niini? Oo. Ang sangang buhatan sa Liberia—usa ka nasod nga gidaot sa gubat sibil—nagtaho nga ang kadaghanang Saksi didto nagsagubang ug kawalay-trabaho ug grabeng kalisod sa panalapi. Sa unsang paagi ang katawhan ni Jehova niining nasora makabatog nindot nga mga dapit sa pagsimba? “Ang kinabubut-ong mga amot sa mga igsoon sa ubang kayutaan maoy gastohon sa buluhaton,” matod sa sangang buhatan. “Pagkamaalamon ug pagkamahigugmaon nga kahikayan!”
Ang lokal nga mga igsoon nag-amot usab, bisan sa ilang diyutayng mahimo. Ang Aprikanhong nasod sa Sierra Leone nagtaho: “Ang lokal nga mga igsoon maoy nagpaluyo niini ug nalipay sa paggamit sa ilang kusog ug sa bisan unsang pinansiyal nga mga amot nga ilang maarangan sa pagsuportar sa pagtukod ug mga Kingdom Hall.”
Sa kataposan, kining maong pagpanukod magdalag kadayeganan ni Jehova. Ang mga igsoon sa Liberia madasigong nag-ingon: “Ang pagtukod ug nindot nga mga dapit sa pagsimba sa tibuok nasod magpakita sa mga tawo nga ang tinuod nga pagsimba magpabilin sa Liberia ug magpasidungog ug magdayandayan sa dakong ngalan sa atong Diyos.”