Mga Pangutana Gikan sa mga Magbabasa

Gikinahanglan ba ang bug-os nga pagtuslob sa tubig kon ang usa ka tawo gusto nga magpabawtismo apan duna siyay grabeng depekto o luya kaayo ang panglawas, nga maoy magpalisod sa pagtuslob?

Ang pulong “bawtismo” gikuha sa Gregong berbo nga baʹpto, nga nagkahulogang “ituslob.” (Juan 13:26) Sa Bibliya, ang “pagbawtismo” samag kahulogan sa “pagtuslob.” Mahitungod sa bawtismo sa Etiopianong yunuko nga gihimo ni Felipe, ang The Emphasised Bible ni Rotherham nag-ingon: “Nanaog silang duha ngadto sa tubig, si Felipe ug ang yunuko,—ug iyang gituslob siya.” (Buhat 8:38) Sa ingon, ang tawong bawtismohan sa pagkatinuod ituslob ngadto sa tubig.—Mateo 3:16; Marcos 1:10.

Gisugo ni Jesus ang iyang mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila.” (Mateo 28:19, 20) Tungod niana, ang mga Saksi ni Jehova mohikay ug mga bawtismo diha sa mga pool, lanaw, suba, o ubang mga dapit nga dunay igong tubig alang sa bug-os nga pagtuslob. Sanglit ang bawtismo pinaagig bug-os nga pagtuslob maoy usa ka Kasulatanhong kinahanglanon, ang mga tawo walay awtoridad sa pagpahigawas sa usa ka tawo sa bawtismo. Sa ingon, ang usa ka tawo kinahanglang bawtismohan bisan pag ang wala maandi nga mga lakang kinahanglang himoon tungod sa iyang kahimtang. Pananglitan, ang mga bawtismo diha sa dagkong mga bathtub nakatabang niadtong edaran na o niadtong may huyang kaayong panglawas. Mahimong init-init nga tubig ang ibutang sa tub, ang kandidato sa bawtismo hinayhinay ug anam-anam nga ibutang sa tubig ug, sa dihang makondisyon na ang iyang lawas, himoon ang aktuwal nga pagbawtismo.

Nabawtismohan bisan ang mga tawo nga dunay grabeng mga depekto. Pananglitan, ang mga tawo nga gioperahan aron buslotan ang tutonlan ug, tungod niini, dunay permanenteng bangag diha sa tutonlan, o kadtong kinahanglang mogamit ug demakina nga respirator, natuslob sa tubig. Tinuod, kinahanglang himoon ang bug-os nga mga pagpangandam alang sa tanang ingon niana nga mga bawtismo. Maalamon nga presente ang usa ka lisensiyadong nars o doktor kon posible. Apan, kon himoon ang linaing pag-amping o panagana, mahimo ang pagbawtismo sa halos tanang kahimtang. Busa, ang tanang makataronganong paningkamot angayng himoon sa pagbawtismo sa usa ka tawo diha sa tubig kon mao kini ang sinserong tinguha sa maong tawo ug kon mosugot siya nga dawaton ang mga risgo nga nalangkit.