“Sila Nangahulog”

“Ang nagabul-og nga mga tubig mitabon kanila; sila mitidlom ngadto sa kahiladman sama sa usa ka bato.”

UBAN nianang mga pulonga, gisaulog ni Moises ug sa mga Israelinhon pinaagig awit ang ilang kaluwasan tabok sa Pulang Dagat ug ang kalaglagan sa naggukod kanila nga Ehiptohanong mga kaaway—si Paraon ug ang iyang kasundalohan.—Exodo 15:4, 5.

Alang ni bisan kinsa nga nakasaksi nianang talagsaong panghitabo, ang pagtulon-an sayon nga masabtan. Walay usa ang molampos sa paghagit o pagsukol sa awtoridad ni Jehova ug mabuhi. Apan, pipila lang ka bulan sa ulahi, ang iladong mga Israelinhon—si Kore, Datan, Abiram, ug 250 ka tigpaluyo—dayag nga mihagit sa hinatag-sa-Diyos nga awtoridad ni Moises ug Aaron.—Numeros 16:1-3.

Sa pagtultol ni Jehova, gipasidan-an ni Moises ang mga Israelinhon nga magpalayo sa mga tolda sa mga rebelde. Si Datan ug Abiram, nga gilibotan sa mga membro sa ilang panimalay, mahagitong midumili sa pag-usab sa ilang tinamdan. Dayon gipahibalo ni Moises nga klarong ipakita ni Jehova, sa Iyang kaugalingong paagi, nga kining mga tawhana “wala magtahod kang Jehova.” Nianang yugtoa, gipabuka ni Jehova ang yuta nga ilang gibarogan. “Busa sila nangahulog, ug ang tanan nga ila, nga buhi ngadto sa Sheol, ug ang yuta nagtabon kanila.” Unsay nahitabo kang Kore ug sa ubang mga rebelde? “Ang kalayo migula gikan kang Jehova ug milamoy sa duha ka gatos ug kalim-an ka tawo nga naghalad ug insenso.”—Numeros 16:23-35; 26:10.

Si Paraon ug ang iyang kasundalohan, maingon man kadtong mga rebelde sa kamingawan, nangahanaw tanan tungod kay wala nila ilha ang awtoridad ni Jehova ug ang iyang kaikag sa mga kalihokan sa iyang katawhan. Busa, dinalian alang sa tanang buot nga makabaton sa panalipod ni Jehova niining malisod nga mga panahon nga mokat-on ug motuman kang Jehova ingong “ang Labing Hataas” ug ang “Usa nga Labing Gamhanan.” Sa pagbuhat niana, makasalig gayod sila niining mga pulonga ni Jehova: “Usa ka libo mapukan sa imong kiliran ug napulo ka libo sa imong tuong kamot; kanimo kini dili makaabot. Pinaagi lamang sa imong mga mata ikaw magatan-aw ug makakita sa balos sa mga daotan. Tungod kay ikaw miingon: ‘Si Jehova mao ang akong dalangpanan,’ imong gihimo ang Labing Hataas nga imong puloy-anan.”—Salmo 91:1, 7-9.