“Ikaw Maayo Kaayo nga Babaye”

Kining mga pulonga sa pagdayeg gipamulong ngadto sa usa ka batan-ong Moabihanon. Siya usa ka balo nga ginganlag Ruth, ang umagad sa usa ka Israelinhong babaye, si Noemi. Nagpuyo sa Israel mga 3000 ka tuig na kanhi, sa dihang ang mga maghuhukom maoy nagmando, si Ruth nabantog ingong maayo kaayo nga babaye. (Ruth 3:11) Sa unsang paagi nabatonan niya kining maong reputasyon? Kinsay makabenepisyo sa iyang panig-ingnan?

Kay siya dili mokaon “sa tinapay sa pagkatapolan,” si Ruth nagtrabaho sa daghang oras ug kugihang nanghagdaw diha sa kaumahan, ug tungod sa maong pagkakugihan nabatonan niya ang komendasyon. Bisag dihay gitanyag nga kahikayan aron mapagaan ang iyang trabaho, siya nagpadayon sa paghago, nga naghimo ug labaw kay sa gidahom kaniya. Sa talagsaong paagi, siya mihaom sa kahubitan sa Bibliya sa usa ka dalayegon, may katakos, kugihan nga asawa.—Proverbio 31:10-31; Ruth 2:7, 15-17.

Ang espirituwal nga mga hiyas ni Ruth—ang iyang mapaubsanon, nagsakripisyo-sa-kaugalingon nga tinamdan ug ang iyang maunongong gugma—mao ang dagkong mga hinungdan sa maayong reputasyon nga iyang natagamtam. Gibiyaan ang iyang mga ginikanan ug ang iyang yutang natawhan, nga may gamay lang nga kalaoman nga makabaton sa kasegurohan nga ikatanyag sa kaminyoon, siya miunong kang Noemi. Sa samang higayon, gipahayag ni Ruth ang iyang tinguha sa pag-alagad kang Jehova, ang Diyos sa iyang ugangang babaye. Sa pagpasiugda sa iyang bili, ang asoy sa Kasulatan nag-ingon nga siya “labi pang maayo [alang kang Noemi] kay sa pito ka anak nga lalaki.”—Ruth 1:16, 17; 2:11, 12; 4:15.

Bisan tuod ang mga kauban ni Ruth nagdayeg kaniya ingong maayo kaayong babaye, mas dakog importansiya ang paborableng panghunahuna sa Diyos bahin sa iyang mga hiyas ug ang iyang pagganti kaniya sa pribilehiyo nga mahimong katigulangan ni Jesu-Kristo. (Mateo 1:5; 1 Pedro 3:4) Pagkamaayong panig-ingnan si Ruth dili lamang alang sa Kristohanong mga babaye kondili alang sa tanang nag-angkon nga nagsimba kang Jehova!