Mga Pangutana Gikan sa mga Magbabasa

Kon maghikog ang usa ka tawo, mahimo ba nga ang usa ka Kristohanong ministro mohatag sa pakigpulong sa serbisyo sa paglubong?

Ang matag Kristohanong ministro angayng modesisyon mismo kon siya uban ang hinlong tanlag makahatag ba ug pakigpulong sa serbisyo sa paglubong alang sa usa ka tawo nga gituohang naghikog. Sa dihang mohimog desisyon, angay niyang tagdon ang mosunod nga mga pangutana: Unsay panglantaw ni Jehova sa paghikog? Ang mao bang kamatayon usa gayod ka gipahinabo-sa-kaugalingon nga pagbuno? Ang mental o emosyonal nga suliran ba maoy nagtukmod kaniya nga maghikog? Sa unsang paagi gilantaw ang paghikog diha sa lokal nga komunidad?

Ingong mga Kristohanon, interesado kita kon unsay panglantaw ni Jehova sa paghikog. Alang kang Jehova ang kinabuhi sa tawo maoy bililhon ug sagrado. (Genesis 9:5; Salmo 36:9) Ang tinuyong pagpatay sa kaugalingon maoy pagbuno sa kaugalingon, ug busa kini dili makapahimuot sa mga mata sa Diyos. (Exodo 20:13; 1 Juan 3:15) Ang mao bang kamatuoran nagdili sa paghatag ug pakigpulong sa serbisyo sa paglubong alang sa tawong naghikog?

Tagda ang kaso ni Haring Saul sa Israel. Sa dihang naamgohan niya nga dili siya makasugakod sa iyang kataposang pagpakiggubat batok sa mga Filistehanon, inay tugotan ang iyang mga kaaway sa pagpasipala kaniya, “gikuha ni Saul ang espada ug miubo niini.” Sa dihang nakaplagan sa mga Filistehanon ang iyang patayng lawas, gigaid nila kini sa paril sa siyudad sa Bet-san. Human mahibaloi ang gihimo sa mga Filistehanon, gikuha sa mga molupyo sa Jabes-gilead ang patayng lawas ug gisunog kini. Dayon ilang gikuha ang iyang mga bukog ug gilubong kini. Nagpuasa pa gani sila sulod sa pito ka adlaw, ang naandang rituwal sa pagbangotan taliwala sa mga Israelinhon. (1 Samuel 31:4, 8-13; Genesis 50:10) Sa dihang nahibaloan ni David, nga dinihogan ni Jehova, ang gibuhat sa mga molupyo sa Jabes-gilead, siya miingon: “Panalanginan unta kamo ni Jehova, tungod kay inyong gipakita kining mahigugmaong-kalulot sa inyong ginoo, kang Saul, kay siya inyong gilubong. Ug karon hinaot si Jehova magpakita kaninyo ug mahigugmaong-kalulot ug pagkakasaligan.” (2 Samuel 2:5, 6) Wala ipaila diha sa Bibliya nga ang mga molupyo sa Jabes-gilead gihukman tungod sa paghikay sa matawag nga rituwal sa paglubong alang kang Haring Saul. Itandi kana sa kaso niadtong wala ilubong tungod sa ilang daotang nabuhat. (Jeremias 25:32, 33) Mahimong tagdon sa usa ka Kristohanong ministro ang asoy bahin kang Saul sa dihang modesisyon kon makahatag ba siyag pakigpulong sa paglubong alang sa usa ka biktima sa paghikog.

Mahimong tagdon usab sa ministro ang katuyoan sa maong pakigpulong sa serbisyo sa paglubong. Dili sama sa mga tawo nga nagtuo sa pagkadili-mamatay sa kalag, ang mga Saksi ni Jehova dili mohatag ug mga pakigpulong sa serbisyo sa paglubong uban ang sayop nga ideya nga ang namatay miadto na sa laing kalibotan. Inay alang sa kaayohan sa namatay, ang pangunang katuyoan sa serbisyo sa paglubong mao ang paghupay sa nagbangotan ug pagpamatuod bahin sa kahimtang sa patay alang niadtong nanambong. (Ecclesiastes 9:5, 10; 2 Corinto 1:3-5) Ang laing hinungdanong rason sa paghatag ug pakigpulong sa serbisyo sa paglubong mao ang pagtabang sa tanang nanambong sa pagpalandong sa pagkaumalagi lamang sa kinabuhi. (Ecclesiastes 7:2) Makab-ot ba kini nga mga katuyoan pinaagi sa paghatag ug pakigpulong sa paglubong alang sa tawong naghikog?

Tinuod, ang uban mobati tingali nga ang tawo tinuyong naghunos sa iyang kinabuhi, nga bug-os nasayod nga siya nakasala batok kang Jehova. Apan mapamatud-an ba gayod ang maong pagbati? Dili kaha kadto nabuhat lang nga mahinaykon? Ang uban nga misulay sa paghikog nagbasol ug wala na mopadayon sa paghikog. Ang usa ka tawo dili na makahinulsol sa iyang nahimo kon patay na siya.

Ang laing hinungdanong butang mao ang mental ug emosyonal nga mga suliran nga nalangkit sa daghang paghikog. Kini matawag gayod nga mga biktima sa paghikog. Sumala sa pipila ka estadistika, 90 porsiyento  niadtong naghikog adunay usa ka matang sa suliran sa mental, emosyonal, o sa pagkagiyan. Pasayloon kaha ni Jehova ang mga tawo nga naghunos sa ilang kaugalingong kinabuhi nga anaa sa maong kahimtang sa panghunahuna? Wala kitay katungod sa paghukom kon ang namatay nakahimo bag sala nga dili mapasaylo sa mga mata ni Jehova. Mahimong tagdon sa Kristohanong ministro ang mga kahimtang ug medikal nga rekord sa namatay sa dihang iyang tagdon kon mohatag ba siyag pakigpulong sa serbisyo sa paglubong alang sa biktima sa paghikog.

Adunay usa pa ka butang nga angayng tagdon: Unsay panghunahuna sa mga tawo diha sa komunidad bahin sa paghikog ug sa kamatayon sa maong tawo? Kini ang ilabinang tagdon sa mga ansiyano, kinsa interesado sa reputasyon sa lokal nga kongregasyon sa mga Saksi ni Jehova. Depende sa katibuk-ang tinamdan bahin sa paghikog diha sa lokal nga komunidad, ug ilabina bahin sa nalangkit nga kaso sa paghikog, ang mga ansiyano mahimong mopalabi nga dili mouyon nga mohatag sa maong pakigpulong sa serbisyo sa paglubong diha sa publiko o diha sa Kingdom Hall.

Bisan pa niana, kon ang usa ka Kristohanong ministro hangyoon nga maoy modumala sa serbisyo sa paglubong nga gihikay sa ubang mga tawo, mahimong bation niya nga sa kaugalingong desisyon, makahimo siya niana. Kon modesisyon siya nga mohimo niana, siya kinahanglang magmaalamon nga dili mohimog bisan unsang tinong mga pamulong kon posible ba ang pagkabanhaw niining kahimtanga. Ang bisan unsang kalaoman sa umaabot sa namatay nahasandig lamang kang Jehova, ug walay mausa ang may katungod sa pag-ingon kon ang namatay banhawon ba o dili. Ang ministro mahimong maghisgot lamang sa mga kamatuoran sa Bibliya bahin sa kamatayon ug magtanyag ug kahupayan alang sa namatyan.