Panahon sa Pagbutyag sa Kompidensiyal nga Butang

Ang dili pagbutyag sa pipila ka kompidensiyal nga mga butang mahimong magkahulogan ug pakigdait o panagbingkil. Apan aduna bay panahon sa pagbutyag sa kompidensiyal nga butang? Matikdi ang giingon sa manalagnang si Amos bahin sa iyang Diyos: “[Si] Jehova dili mobuhat sa usa ka butang gawas kon gikapadayag niya ang iyang kompidensiyal nga butang ngadto sa iyang mga alagad nga mga manalagna.” (Amos 3:7) Gikan niining mga pulonga, atong masabtan ang usa ka butang bahin sa pagkakompidensiyal. Mahimong dili una ibutyag ni Jehova ang pipila ka mga butang sulod sa usa ka yugto sa panahon ug sa ngadtongadto ibutyag kana ngadto sa pipila ka tawo. Sa unsang paagi atong masundog si Jehova niining bahina?

Usahay, makaplagan sa tinudlong mga magbalantay diha sa Kristohanong kongregasyon nga makaayo ang dili una pagbutyag sa usa ka butang. (Buhat 20:28) Pananglitan, nga naghunahuna sa kaayohan sa kongregasyon, sila tingali mohukom nga dili una ibutyag ang mga detalye sa pipila ka kahikayan o mga kausaban sa mga kaakohan diha sa kongregasyon hangtod sa takdang panahon.

Apan, sa maong kaso, hinungdanon nga klarohon ngadto sa mga tawong nalangkit kon kanus-a, ug sa unsang paagi ibutyag ang maong butang. Ang pagkahibalo kon kanus-a ibutyag ang maong butang ngadto sa publiko makatabang kanila nga mahuptan kini nga kompidensiyal.—Proverbio 25:9.