Ang Paglakaw Diha sa mga Dalan ni Jehova Magdalag Dagayang mga Ganti

NAKABAKTAS ka na ba sukad sa kabukiran? Kon mao, lagmit mibati ka nga morag duol ka na sa langit. Pagkamakapahupay ang paghanggab sa preskong hangin, pag-aninaw ngadto sa halayo, pagtagamtam sa katahom sa kinaiyahan! Tingali ang imong mga kabalaka sa didto ka pa sa ubos daw dili na mahinungdanon.

Alang sa kadaghanang tawo ang maong makapalipayng mga panaw talagsa rang mahimo, apan kon ikaw usa ka dedikadong Kristohanon, lagmit nagbaktas ka na sa hataas nga bukid sa dugaydugay nang panahon—sa espirituwal nga diwa. Sama sa salmista sa karaan, ikaw sa walay duhaduha nag-ampo: “Ipaila kanako ang imong mga dalan, Oh Jehova; tudloi ako sa imong mga alagianan.” (Salmo 25:4) Nahinumdom ka pa ba sa imong gibati sa dihang ikaw unang mitungas sa bukid sa balay ni Jehova ug misugod pagtaak sa hatag-as nga mga dapit? (Miqueas 4:2; Habacuc 3:19) Sa walay duhaduha, imo dayong nasabtan nga ang pagsubay niining hatag-as nga mga alagianan sa putling pagsimba nakahatag kanimog panalipod ug kalipay. Nasinati mo usab ang gibati sa salmista: “Malipayon ang katawhan nga nakaila sa singgit sa kalipay. Oh Jehova, sa kahayag sa imong nawong sila nagpadayon sa paglakaw.”—Salmo 89:15.

Apan, usahay, ang mga magbabaktas sa kabukiran kinahanglang maningkamot pagsubida sa tag-as, titip nga mga bakilid. Mosugod pagsakit ang ilang mga paa, ug sila kapoyon. Kita usab makasinatig mga kalisdanan sa atong pag-alagad sa Diyos. Di pa dugay, basin ang atong linaktan medyo bug-at. Sa unsang paagi mabatonan nato pag-usab ang atong kalagsik ug kalipay? Ang unang tikang mao ang pag-ila sa pagkasuperyor sa mga dalan ni Jehova.

Ang Hatag-as nga mga Balaod ni Jehova

Ang mga dalan ni Jehova ‘mas taas kay sa mga dalan sa tawo,’ ug ang iyang pagsimba ‘lig-ong natukod ibabaw sa kabukiran ug kini natuboy ibabaw sa kabungtoran.’ (Isaias 55:9; Miqueas 4:1) Ang kaalam ni Jehova mao “ang kaalam nga gikan sa itaas.” (Santiago 3:17) Ang iyang mga balaod maoy superyor kay sa tanang ubang mga balaod. Pananglitan, niadtong panahon nga ang mga Canaanhon mapintasong naghalad ug mga bata, si Jehova naghatag sa mga Israelinhon ug mga balaod nga may hataas nga moralidad ug nailado tungod sa kaluoy niini. Iyang giingnan sila: “Dili ka magpihigpihig sa timawa, ug dili mo palabihon ang dakong tawo. . . . Ang langyaw nga pumoluyo . . . kinahanglang mahisama sa lumad taliwala kaninyo; ug higugmaon mo siya ingon sa imong kaugalingon.”—Levitico 19:15, 34.

Kalim-an ka siglo sa ulahi, si Jesus naghatag ug dugang mga pananglitan sa ‘halangdong balaod’ ni Jehova. (Isaias 42:21) Diha sa Wali sa Bukid, iyang giingnan ang iyang mga tinun-an: “Magpadayon  sa paghigugma sa inyong mga kaaway ug sa pag-ampo alang sa mga nagalutos kaninyo; aron inyong mapamatud-an ang inyong kaugalingon nga mga anak sa inyong Amahan nga anaa sa mga langit.” (Mateo 5:44, 45) “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila,” siya midugang. “Sa pagkatinuod, mao kini ang kahulogan sa Balaod ug sa mga Manalagna.”—Mateo 7:12.

Kining hatag-as nga mga balaod nakatandog sa kasingkasing sa masanongong mga tawo, nga maoy nagpalihok kanila sa pagsundog sa Diyos nga ilang gisimba. (Efeso 5:1; 1 Tesalonica 2:13) Tagda ang kausaban nga nahitabo kang Pablo. Sa atong unang pagkadungog bahin kaniya, siya “miuyon sa pagbuno” kang Esteban ug ‘nagdaot sa kongregasyon.’ Apan pipila lamang ka tuig sa ulahi, siya malumong nagtratar sa mga Kristohanon sa Tesalonica sama sa “usa ka nagpasusong inahan nga nagpangga sa iyang kaugalingong mga anak.” Ang pagtulon-an sa Diyos nakausab kang Pablo gikan sa pagkamaglulutos ngadto sa usa ka mabinationg Kristohanon. (Buhat 8:1, 3; 1 Tesalonica 2:7) Mapasalamaton gayod siya nga ang iyang personalidad naumol sa pagtulon-an ni Kristo. (1 Timoteo 1:12, 13) Sa unsang paagi ang samang pagkamapasalamaton motabang nato sa pagpadayon sa pagsubay sa hatag-as nga mga alagianan sa Diyos?

Nagalakaw nga Mapasalamaton

Ang mga magbabaktas mahimuot sa talagsaong mga talan-awon nga ilang makita diha sa hataas nga bukid. Makakat-on usab sila pagdayeg sa gagmayng mga butang ubay sa agianan, sama sa usa ka talagsaong bato, matahom nga bulak, o pagkakita ug usa ka ihalas nga mananap. Sa espirituwal nga paagi, angay kitang magmaigmat sa mga ganti—dagko ug gagmay—nga modangat gumikan sa atong paglakaw uban sa Diyos. Ang maong kaigmat makapadasig sa atong paglakang ug makahimo sa bug-at nga linaktan ngadto sa usa ka abtik nga paglakaw. Kita mouyon sa mga pulong ni David: “Sa buntag ipadungog kanako ang imong mahigugmaong-kalulot, kay kanimo gibutang ko ang akong pagsalig. Ipahibalo kanako ang dalan nga akong pagalaktan.”—Salmo 143:8.

Si Mary, nga naglakaw sa mga alagianan ni Jehova sa daghan nang katuigan, miingon: “Inigtan-aw nako sa kalalangan ni Jehova, akong makita dili lamang ang kakuti sa disenyo kondili ang mainitong personalidad sa Diyos. Kana man usa ka hayop, langgam, o insekto, ang matag usa kanila may talagsaong mga hiyas, nga makabibihag gayod kaayo. Ingon usab niana ang kalipay nga modangat tungod sa espirituwal nga mga kamatuoran nga mas natin-aw paglabay sa katuigan.”

Sa unsang paagi mapalalom nato ang atong pagkamapasalamaton? Ang usa ka paagi mao ang dili pagbalewala sa gibuhat ni Jehova kanato. “Pag-ampo nga walay-hunong,” misulat si Pablo. “Pagpasalamat sa tanang butang.”—1 Tesalonica 5:17, 18; Salmo 119:62.

Ang personal nga pagtuon makatampo sa usa ka mapasalamatong espiritu. Giawhag ni Pablo ang mga Kristohanon sa Colosas: “Magpadayon sa paglakaw nga nahiusa [kang Kristo Jesus], . . . nga manag-awas sa pagtuo diha sa pagpasalamat.” (Colosas 2:6, 7) Ang pagbasa sa Bibliya ug pagpamalandong sa atong mabasa magpalig-on sa atong pagtuo ug magpasuod kanato sa Awtor sa Bibliya. Diha sa mga panid niini anaa ang mga bahandi nga makadasig kanato nga ‘magmapasalamaton pag-ayo.’

Ang pag-alagad kang Jehova duyog sa atong mga igsoon makapasayon usab sa pagsubay sa dalan. Ang salmista miingon bahin sa iyang kaugalingon: “Kauban ako sa tanan nga nahadlok kanimo.” (Salmo 119:63) Ang uban sa atong makapalipay kaayong mga gutlo gigugol diha sa Kristohanong mga asembliya o sa ubang mga okasyon duyog sa atong mga igsoon. Atong giila nga ang atong bililhon nga tibuok-kalibotang Kristohanong pamilya naglungtad tungod kang Jehova ug sa iyang hatag-as nga mga dalan.—Salmo 144:15b.

 Gawas pa sa pagkamapasalamaton, ang pag-ila sa atong responsabilidad magpalig-on kanato nga mopadayon sa pag-uswag subay sa hatag-as nga mga alagianan ni Jehova.

Nagalakaw sa Responsableng Paagi

Ang mga magbabaktas nga nagaila sa ilang responsabilidad nahibalo nga kinahanglang maglakaw nga maampingon aron sila dili mahisalaag o mahitipas paingon sa titip nga mga bakilid. Ingong mga tawo nga may kagawasan sa pagpili, si Jehova naghatag kanatog makataronganong sukod sa kagawasan ug inisyatibo. Apan ang maong kagawasan nanginahanglan sa pag-ila sa atong responsabilidad samtang tumanon nato ang atong Kristohanong mga obligasyon.

Pananglitan, si Jehova may pagsalig sa iyang mga alagad nga tumanon nila ang ilang mga obligasyon sa responsableng paagi. Wala siya magtakda kon unsa ka dakong kusog ug panahon ang angay natong gugolon diha sa Kristohanong mga kalihokan o kon unsa ka dako ang atong iamot nga salapi o ikatabang sa ubang mga paagi. Sa kasukwahi, ang mga pulong ni Pablo sa mga taga-Corinto mapadapat kanatong tanan: “Ipabuhat sa matag usa ang sumala sa iyang gihukom diha sa iyang kasingkasing.”—2 Corinto 9:7; Hebreohanon 13:15, 16.

Ang responsableng paagi sa paghatag nga gihimo sa mga Kristohanon naglakip sa pagpaambit sa maayong balita ngadto sa uban. Ikapakita usab nato nga kita responsable pinaagi sa pag-amot sa tibuok-kalibotang buluhaton sa Gingharian. Human motambong sa usa ka asembliya sa Sidlakang Uropa, gidugangan ug dako ni Gerhardt, nga usa ka ansiyano, ug sa iyang asawa ang ilang mga amot. “Among nakita nga ang among mga igsoon didto diyutay ra kaayo ug kahinguhaan; apan ilang gipabilhan pag-ayo ang among literatura sa Bibliya,” siya miingon, “busa nakahukom kami nga ihatag ang among maarangan sa pagsuportar sa among nanginahanglang mga igsoon sa ubang kayutaan.”

Pagpalig-on sa Atong Pagkamalahutayon

Ang pagbaktas diha sa hataas nga bukid nagkinahanglag kalig-on. Ang mga magbabaktas mag-ehersisyo bisan kanus-a nga mahimo nila kana. Daghan gani ang magbaktasbaktas sa makadiyot isip pagpangandam sa lagyong mga pagbaktas. Sa susama, girekomendar ni Pablo nga magmapuliki kita sa teokratikanhong mga buluhaton aron mamentinar ang atong kahimsog sa espirituwal. Kadtong buot “magalakaw nga takos kang Jehova” ug ‘mahimong gamhanan,’ si Pablo miingon, kinahanglang ‘magpadayon nga magapamunga sa tanang maayong buhat.’—Colosas 1:10, 11.

Ang motibasyon makatampo sa pagkamalahutayon sa magbabaktas. Sa unsang paagi? Makapadasig ang pagrumbo kanunay sa klarong mga tumong, sama sa usa ka halayong bukid. Ug sa dihang ang magbabaktas makaabot na sa ilhanang mga lugar, masukod na niya ang iyang nalakaw padulong sa iyang girumbo nga destinasyon. Sa dihang siya molingi sa gilay-on nga iyang nabaktas, siya mobatig katagbawan.

Sa susama, ang atong paglaom sa walay-kataposang kinabuhi nagpalig-on ug nagpalihok kanato. (Roma 12:12) Sa kasamtangan, samtang kita molakaw diha sa mga dalan ni Jehova, kita molampos diha sa paghimo ug dayon sa pagkab-ot sa Kristohanong mga tumong. Ug pagkadakong kalipay ang atong bation sa dihang atong pamalandongon ang katuigan sa matinumanong pag-alagad o mamatikdan ang mga kausaban nga atong nahimo sa atong personalidad!—Salmo 16:11.

Aron makabaktas ug layo ug makadaginot ug kusog, ang mga magbabaktas moabante nga mapinadayonon. Sa samang paagi, ang usa ka maayong rutina nga maglakip sa regular nga mga tigom ug pag-alagad sa kanataran motabang kanato nga magpadayon gayod sa pagkab-ot sa atong tumong. Busa, si Pablo nagdasig sa mga isigka-Kristohanon: “Magpadayon kita sa paglakaw nga mahusay niining samang rutina.”—Filipos 3:16.

Siyempre, kita dili mag-inusara sa pagsubay sa mga alagianan ni Jehova. “Magmahunahunaon kita kon unsaon nato pagdasig ang usag usa sa paghigugma ug maayong mga buhat,” misulat si Pablo. (Hebreohanon 10:24, New International Version) Ang maayong espirituwal nga kaubanan makapasayon sa pagmentinar sa atong paso samtang kita maglakaw duyog sa atong mga isigkamagtutuo.—Proverbio 13:20.

Sa kataposan, ug mao ang labing hinungdanon, dili gayod nato kalimtan ang gahom nga ihatag ni Jehova. Sila kansang kusog anaa kang Jehova “maglakaw gikan sa pagkakusganon ngadto sa pagkakusganon.” (Salmo 84:5, 7) Bisan usahay moagi kitag lisod nga mga kahimtang, sa tabang ni Jehova kita makahimo sa pagsagubang niana.