Ayaw Pagpalimbong

ANG panglimbong halos sama ka tigulang sa tawo. Usa sa unang mga hitabo nga narekord sa kasaysayan mao ang buhat sa panglimbong. Kadto nahitabo sa dihang gilimbongan ni Satanas si Eva didto sa tanaman sa Eden.—Genesis 3:13; 1 Timoteo 2:14.

Bisan tuod kaylap ang panglimbong sa yuta sukad niadto, mas kaylap kini karon. Naglantaw sa modernong mga panahon, ang Bibliya nagpasidaan: “Ang mga tawong daotan ug mga impostor mosamot pa kangil-ad, nga nagapahisalaag ug nahisalaag.”—2 Timoteo 3:13.

Ang mga tawo nalimbongan sa daghang nagkalainlaing katarongan. Limbongan sa mga mangingilad ang mga biktima aron makuha ang ilang kuwarta. Limbongan sa ubang mga politiko ang ilang mga sakop, aron magpabilin diha sa ilang katungdanan bisag unsa pay mahitabo. Limbongan pa gani sa mga tawo ang ilang kaugalingon. Inay dawaton ang dili makapahimuot nga mga kamatuoran, ilang kombinsihon ang ilang kaugalingon nga dili ra makadaot ang paghimo sa peligrosong mga buhat, sama sa pagpanabako, pag-abuso sa droga, o seksuwal nga imoralidad.

Unya anaa ang panglimbong maylabot sa relihiyosong mga butang. Ang relihiyosong mga pangulo sa panahon ni Jesus naglimbong sa mga tawo. Mahitungod sa maong mga limbongan, si Jesus miingon: “Sila maoy mga buta nga tiggiya. Nan, kon ang usa ka buta nga tawo magagiya sa usa ka buta nga tawo, silang duha mangahulog sa gahong.” (Mateo 15:14) Dugang pa, ang mga tawo naglimbong sa ilang kaugalingon maylabot sa relihiyosong mga butang. Ang Proverbio 14:12 nag-ingon: “Adunay dalan nga matul-id atubangan sa usa ka tawo, apan ang kataposan niana mao ang mga dalan sa kamatayon.”

Sama sa panahon ni Jesus, dili ikatingala nga daghan ang nalimbongan karong adlawa maylabot sa relihiyosong mga butang! Si apostol Pablo nag-ingon nga si Satanas “nagbuta sa mga hunahuna sa mga dili-magtutuo, aron nga ang kahayag sa mahimayaong maayong balita bahin kang Kristo, nga mao ang larawan sa Diyos, dili makadan-ag.”—2 Corinto 4:4.

Kon kita malimbongan sa usa ka mangingilad, mawad-an kitag kuwarta. Kon usa ka politiko ang maglimbong kanato, mahimong mawad-an kita sa atong kagawasan tungod niana. Apan kon si Satanas ang maglimbong kanato mao nga atong isalikway ang kamatuoran bahin kang Jesu-Kristo, dili nato maangkon ang kinabuhing walay kataposan! Busa ayaw pagpalimbong. Sa walay pagpihig konsideraha ang dili-malalis nga tinubdan sa relihiyosong kamatuoran, ang Bibliya. Dako kaayo ang mawala kon dili nato buhaton kana.—Juan 17:3.