Si Jehova Nagpatahom sa Iyang Katawhan Pinaagi sa Kahayag

“Tindog, Oh babaye, sidlak, kay ang imong kahayag miabot ug diha kanimo ang mismong himaya ni Jehova misidlak.”—ISAIAS 60:1.

1, 2. (a) Unsay kahimtang sa katawhan? (b) Kinsay nakaingon sa kangitngit sa katawhan?

 “OH, pagkadako sa atong panginahanglan alang sa usa ka tawo nga sama kang Isaias o San Pablo!” Mao kana ang masulub-ong gipatugbaw ni Presidente Harry Truman sa T.B. niadtong katuigan sa 1940. Nganong gilitok man niya kadtong mga pulonga? Tungod kay gibati niya ang panginahanglan alang sa ekselenteng mga lider sa moralidad sa kalibotan sa iyang panahon. Ang katawhan bag-o lang nakalabang sa labing mangiob nga yugto sa ika-20ng siglo, ang ikaduhang gubat sa kalibotan. Apan, bisan pag nahuman na ang gubat, ang kalibotan dili malinawon. Nagpadayon ang kangitngit. Gani, 57 ka tuig human matapos kadtong gubata, ang kalibotan anaa gihapon sa kangitngit. Kon buhi pa karon si Presidente Truman, sa walay duhaduha makita gihapon niya ang panginahanglan alang sa mga lider sa moralidad nga samag kalibre ni Isaias o ni apostol Pablo.

² Ambot kon nahibalo ba niini si Presidente Truman, apan si apostol Pablo naghisgot bahin sa kangitngit nga naghampak sa katawhan, ug siya nagpasidaan batok niana diha sa iyang mga sinulat. Pananglitan, iyang gipasidan-an ang mga isigkamagtutuo: “Kita adunay pakigdumog, dili batok sa dugo ug unod, kondili batok sa mga kagamhanan, batok sa mga awtoridad, batok sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.” (Efeso 6:12) Niining mga pulonga gipakita ni Pablo nga dili lang kay nahibalo siya nga ang espirituwal nga kangitngit naglimin sa kalibotan kondili usab nahibalo siya sa tinuod nga tuboran niini—ang gamhanang demonyohanong mga puwersa nga gihubit ingong “mga magmamando sa kalibotan.” Tungod kay ang gamhanang mga espiritu mao may nakaingon sa kangitngit sa kalibotan, unsay mahimo sa mga tawo lamang sa pagwagtang niana?

3. Bisan pa sa mangiob nga kahimtang sa katawhan, unsay gitagna ni Isaias alang sa mga matinumanon?

³ Si Isaias naghisgot usab bahin sa kangitngit nga naghampak sa katawhan. (Isaias 8:22; 59:9) Apan, nga naglantawng daan sa atong adlaw, siya gidasig sa pagtagna nga bisan niining mangiob nga mga panahon, si Jehova magpasanag sa palaaboton niadtong gusto sa kahayag. Oo, bisan tuod dili nato kauban si Pablo o si Isaias, nabatonan nato ang ilang inspiradong mga sinulat aron sa paggiya kanato. Aron makita kon unsa ka dakong panalangin kana alang niadtong nahigugma kang Jehova, tagdon nato ang matagnaong mga pulong ni Isaias nga makita diha sa ika-60ng kapitulo sa iyang basahon.

Ang Usa ka Matagnaong Babaye Nagpasidlak ug Kahayag

4, 5. (a) Unsay gisugo ni Jehova nga buhaton sa usa ka babaye, ug unsay iyang gisaad? (b) Unsang makapahinam nga impormasyon ang anaa sa Isaias kapitulo 60?

⁴ Ang unang mga pulong sa Isaias 60 gitumong ngadto sa usa ka babaye nga anaa sa masulub-ong kahimtang—naghay-ad sa yuta diha sa kangitngit. Sa kalit lang ang kahayag milagbas sa kangitngit, ug si Jehova mitawag: “Tindog, Oh babaye, sidlak, kay ang imong kahayag miabot ug diha kanimo ang mismong himaya ni Jehova misidlak.” (Isaias 60:1) Ang panahon miabot na nga ang babaye motindog ug magpabanaag sa kahayag sa Diyos, sa iyang himaya. Ngano? Makita nato ang tubag sa mosunod nga bersikulo: “Tan-awa! ang kangitngit mismo motabon sa yuta, ug ang bagang kangiob sa nasodnong mga pundok; apan diha kanimo si Jehova mosidlak, ug diha kanimo ang iyang kaugalingong himaya makita.” (Isaias 60:2) Kon ang babaye motuman sa sugo ni Jehova, siya gipasaligan ug usa ka kahibulongang resulta. Si Jehova nag-ingon: ‘Ang mga nasod tinong manganha  sa imong kahayag, ug ang mga hari nganha sa kasanag sa imong pagsidlak.’—Isaias 60:3.

⁵ Ang makapahinam nga mga pulong niining tulo ka bersikulo maoy pasiuna ug sumaryo sa unod sa nahibiling bahin sa Isaias kapitulo 60. Kini nagtagna bahin sa mga eksperyensiya sa usa ka matagnaong babaye ug nagpatin-aw kon sa unsang paagi kita makapuyo diha sa kahayag ni Jehova bisan pa sa kangitngit nga midangat sa katawhan. Apan, unsay gihawasan sa mga simbolo niining tulo ka pasiunang mga bersikulo?

6. Kinsa ang babaye sa Isaias kapitulo 60, ug kinsa ang naghawas kaniya dinhi sa yuta?

⁶ Ang babaye sa Isaias 60:1-3 mao ang Zion, ang langitnong organisasyon ni Jehova sa espiritung mga linalang. Karon, ang Zion gihawasan dinhi sa yuta sa nanghibilin sa “Israel sa Diyos,” ang internasyonal nga kongregasyon sa dinihogan-sa-espiritu nga mga Kristohanon, nga adunay paglaom nga magmando uban kang Kristo sa langit. (Galacia 6:16) Kining espirituwal nga nasod sa ngadtongadto may katibuk-ang gidaghanon nga 144,000 ka membro, ug ang modernong katumanan sa Isaias kapitulo 60 nasentro niadtong buhi pa sa yuta panahon “sa kataposang mga adlaw.” (2 Timoteo 3:1; Pinadayag 14:1) Daghan usab ang gihisgotan diha sa tagna bahin sa mga kauban niining dinihogang mga Kristohanon, ang “dakong panon” sa “ubang mga karnero.”—Pinadayag 7:9; Juan 10:16.

7. Unsay kahimtang sa Zion sa 1918, ug sa unsang paagi kini gitagna?

⁷ Diha bay panahon nga ang “Israel sa Diyos” naghay-ad diha sa kangitngit, ingon sa gilandongan nianang matagnaong babaye? Oo, nahitabo kini kapin sa 80 ka tuig kanhi. Panahon sa unang gubat sa kalibotan, ang dinihogang mga Kristohanon nanglimbasog sa pagpadayon sa buluhatong pagsangyaw. Apan sa 1918, sa kataposang tuig sa gubat, ang organisado nga buluhatong pagsangyaw halos nahunong. Si Joseph F. Rutherford, kinsa maoy nagdumala sa tibuok-kalibotang buluhaton nga pagsangyaw, ug ang ubang prominenteng mga Kristohanon gisentensiyahan ug dugayng pagkabilanggo pinasukad sa bakak nga mga sumbong. Sa basahon sa Pinadayag, ang dinihogang mga Kristohanon nga dinhi pa sa yuta matagnaong gihubit ingong mga patay nga naghay-ad “sa halapad nga dalan sa dakong siyudad nga sa espirituwal nga diwa gitawag ug Sodoma ug Ehipto.” (Pinadayag 11:8) Kadto maoy mangiob gayod nga panahon alang sa Zion, nga gihawasan sa iyang dinihogang mga anak dinhi sa yuta!

8. Unsang dakong kausaban ang nahitabo sa 1919, uban sa unsang resulta?

⁸ Apan, sa tuig 1919 nahitabo ang dakong kausaban. Si Jehova nagpasidlak sa kahayag nganha sa Zion! Ang buhi pang mga sakop sa Israel sa Diyos nanindog aron sa pagbanaag sa kahayag sa Diyos, nga maisogong nagmantala pag-usab  sa maayong balita. (Mateo 5:14-16) Tungod sa nabag-ong kasibot niining maong mga Kristohanon, ang uban nadani sa kahayag ni Jehova. Sa sinugdan, ang mga bag-ong nangabot gidihogan ingong dugang mga membro sa Israel sa Diyos. Sila gitawag ug mga hari diha sa Isaias 60:3, tungod kay sila mahimong kaubang mga magmamando ni Kristo sa langitnong Gingharian sa Diyos. (Pinadayag 20:6) Sa ulahi, ang usa ka dakong panon sa ubang mga karnero nagsugod sa pagkadani ngadto sa kahayag ni Jehova. Mao kini ang “mga nasod” nga gihisgotan sa tagna.

Ang mga Anak sa Babaye Namauli!

9, 10. (a) Unsang talagsaong talan-awon ang nakita sa babaye, ug unsay gihulagwayan niini? (b) Unsay hinungdan sa kalipay sa Zion?

⁹ Karon, si Jehova nagsugod sa pagtagana ug dugang mga detalye sa impormasyon nga gihatag diha sa Isaias 60:1-3. Siya naghatag sa babaye ug laing sugo. Pamati sa iyang giingon: “Iyahat ang imong mga mata sa palibot ug tan-awa!” Ang babaye mituman, ug pagkamakapadasig nga talan-awon ang iyang nakita! Ang iyang mga anak namauli. Ang teksto nagpadayon sa pag-ingon: “Silang tanan natigom; sila nanganha kanimo. Gikan sa halayo ang imong mga anak nga lalaki nagpadayon sa pagpangabot, ug ang imong mga anak nga babaye nga pagaatimanon nga kinugos.” (Isaias 60:4) Ang tibuok-kalibotang pagmantala sa Gingharian nga nagsugod sa 1919 nakadani ug libolibong bag-ohan sa pag-alagad kang Jehova. Sila usab nahimong “mga anak nga lalaki” ug “mga anak nga babaye” sa Zion, dinihogang mga membro sa Israel sa Diyos. Busa, gipatahom ni Jehova ang Zion pinaagi sa pagdala sa kataposang mga sakop sa 144,000 ngadto sa kahayag.

¹⁰ Mahanduraw ba nimo ang kalipay sa Zion sa dihang nakauban na niya ang iyang mga anak? Bisan pa niana, si Jehova naghatag sa Zion ug dugang mga hinungdan nga malipay. Atong mabasa: “Nianang panahona ikaw makakita ug tinong magmagilawon, ug ang imong kasingkasing sa pagkatinuod mangurog ug modako, tungod kay ang kabahandianon sa dagat mopaingon kanimo; ang mismong mga kahinguhaan sa kanasoran moabot kanimo.” (Isaias 60:5) Kaharmonya nianang matagnaong mga pulong, sukad sa katuigan sa 1930, panonpanon sa mga Kristohanon kansang paglaom mao ang pagkinabuhi sa yuta sa walay kataposan ang nanghugop ngadto sa Zion. Sila nanggula gikan “sa dagat” sa katawhan nga nahimulag sa Diyos ug naghawas sa mga kahinguhaan sa mga nasod. Sila mao “ang tilinguhaong mga butang sa tanang kanasoran.” (Haggeo 2:7; Isaias 57:20) Matikdi usab nga kining “tilinguhaong mga butang” wala mangadto sa pag-alagad kang Jehova nga ang matag usa sa iyang kaugalingong paagi. Wala, sila modugang sa katahom sa Zion pinaagi sa pagsimba kauban sa ilang dinihogang mga igsoon, nga mahimong “usa ka panon” uban kanila ilalom sa “usa ka magbalantay.”—Juan 10:16.

Ang mga Magpapatigayon, Magbalantay, ug mga Negosyante Mangabot sa Zion

11, 12. Hubita ang panon nga nakita nga nagaabante paingon sa Zion.

¹¹ Ang resulta niining gitagna nga pagpanigom mao ang talagsaong pag-uswag sa gidaghanon sa mga magdadayeg ni Jehova. Gitagna kini sa mosunod nga mga pulong sa tagna. Handurawa nga ikaw nagtindog uban sa matagnaong babaye didto sa Bukid sa Zion. Motan-aw ka sa sidlakan, ug unsay imong makita? “Ang nagabul-og nga panon sa mga kamelyo motabon kanimo, ang mga nating laking kamelyo sa Midian ug sa Epa. Ang tanan niadtong gikan sa Sheba—sila mangabot. Sila magdalag bulawan ug kamangyan. Ug ang mga pagdayeg kang Jehova ilang ipahibalo.” (Isaias 60:6) Panonpanon sa mga magpapatigayon ang naggiya sa ilang panon sa mga kamelyo subay sa mga dalan nga paingon sa Jerusalem. Aw, ang mga kamelyo susamag baha nga nagtabon sa yuta! Ang mga negosyante nagdalag bililhong mga gasa, “bulawan ug kamangyan.” Ug kining maong mga magpapatigayon moduol sa kahayag sa Diyos aron sa pagdayeg kaniya atubangan sa mga tawo, ‘sa pagpahibalo sa mga pagdayeg kang Jehova.’

¹² Dili kay ang mga magpapatigayon ra ang nagaabante. Ang mga magbalantay usab nanghugop ngadto sa Zion. Ang tagna nagpadayon sa pag-ingon: “Ang tanang panon sa kahayopan sa Kedar—sila matigom kanimo. Ang laking mga karnero sa Nebaiot—sila mag-alagad kanimo.” (Isaias 60:7a) Ang tighayopan nga mga tribo nangabot sa balaang siyudad aron sa pagtanyag sa kinamaayohan sa ilang mga panon ngadto kang  Jehova. Gitanyag pa gani nila ang ilang kaugalingon aron sa pag-alagad sa Zion! Sa unsang paagi dawaton ni Jehova kining maong mga langyaw? Ang Diyos mismo mitubag: “Sila mosaka sa akong halaran uban ang pag-uyon, ug akong patahomon ang akong balay nga matahom.” (Isaias 60:7b) Si Jehova mapuangorong modawat sa mga halad ug pag-alagad niining maong mga langyaw. Ang ilang presensiya nagpatahom sa iyang templo.

13, 14. Unsay nakita nga nangabot gikan sa kasadpan?

¹³ Karon lingi ug aninawa ang kapunawpunawan sa kasadpan. Unsay imong nakita? Sa halayo, adunay morag puting panganod nga mitabon sa ibabaw sa dagat. Si Jehova misukna sa pangutana nga anaa sa imong hunahuna: “Kinsa ba kini silang nangabot nga naglupad ingon sa usa ka panganod, ug sama sa mga salampati ngadto sa mga lungag sa ilang balaybalay?” (Isaias 60:8) Gitubag ni Jehova ang iyang pangutana: “Ang kapuloan magpadayon sa paglaom kanako, ang mga barko sa Tarsis usab sama sa una, aron sa pagdala sa imong mga anak gikan sa halayo, ang ilang plata ug ang ilang bulawan uban kanila, ngadto sa ngalan ni Jehova nga imong Diyos ug ngadto sa Balaang Usa sa Israel, kay siya magpatahom kanimo.”—Isaias 60:9.

¹⁴ Mahanduraw ba nimo ang esena? Kanang puting panganod nagkaduol ug karon mora nag pundok sa mga tulbok sa halayong kasadpan. Mora kinig panon sa kalanggaman nga nagpautaw-utaw sa mga balod. Apan samtang nagkaduol pa kini, makita nimo nga kini maoy mga barko nga ang mga layag niini gibukhad nga pabor sa hangin. Daghan kaayong barko ang naglawig paingon sa Jerusalem nga kini susamag panon sa mga salampati. Gikan sa halayong mga dunggoanan, ang pundok sa mga barko tulin kaayong naglawig, nga nagdalag mga magtutuo ngadto sa Jerusalem aron mosimba kang Jehova.

Ang Organisasyon ni Jehova Milambo

15. (a) Unsang pag-uswag ang gitagna sa Isaias 60:4-9? (b) Unsang espiritu ang ipasundayag sa tinuod nga mga Kristohanon?

¹⁵ Pagkatin-aw nga matagnaong hulagway ang gipahayag sa mga bersikulo 4 hangtod sa 9 bahin sa tibuok-kalibotang paglambo nga nagakahitabo sukad sa 1919! Nganong gipanalanginan ni Jehova ang Zion ug ingon nianang pag-uswag? Tungod kay sukad sa 1919, ang Israel sa Diyos matinumanon ug padayon nga nagpasidlak sa kahayag ni Jehova. Apan, namatikdan ba nimo nga sumala sa bersikulo 7, ang mga bag-ong nangabot ‘mosaka sa halaran sa Diyos’? Ang usa ka halaran maoy dapit diin himoon ang paghalad, ug kini nga bahin sa tagna nagpahinumdom kanato nga ang pag-alagad kang Jehova naglakip ug paghalad. Si apostol Pablo misulat: “Ako nangaliyupo kaninyo . . . nga itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan.” (Roma 12:1) Kaharmonya sa giingon ni Pablo, ang tinuod nga mga Kristohanon dili matagbaw sa pagtambong lamang sa relihiyosong mga seremonyas kas-a sa usa ka semana. Ilang gigamit ang ilang panahon, kusog, ug mga kahinguhaan aron sa pagpausbaw sa matuod nga pagsimba. Dili ba ang presensiya nianang debotadong mga magsisimba magpatahom sa balay ni Jehova? Ang tagna ni Isaias nag-ingon nga kini magpatahom niana. Ug makaseguro kita nga ang maong masibotong mga magsisimba, sa baylo, maoy matahom sa mga mata ni Jehova.

16. Kinsay mitabang sa pagtukod pag-usab nga buluhaton sa karaang mga panahon, ug kinsay nagbuhat niana sa modernong mga panahon?

¹⁶ Ang mga bag-ong nangabot gustong motrabaho. Ang tagna nagpadayon sa pag-ingon: “Ang mga langyaw magatukod sa imong mga paril, ug ang ilang mga hari moalagad kanimo.” (Isaias 60:10) Sa unang katumanan niining mga pulonga balik sa mga adlaw sa pagpauli gikan sa pagkadestiyero sa Babilonya, ang mga hari ug ang uban pa gikan sa mga nasod aktuwal nga mitabang sa pagtukod pag-usab sa templo ug siyudad sa Jerusalem. (Esdras 3:7; Nehemias 3:26) Sa modernong katumanan, ang dakong panon mitabang sa dinihogang nanghibilin sa pagtukod sa matuod nga pagsimba. Sila mitabang sa pagtukod sa Kristohanong mga kongregasyon ug sa ingon nagpalig-on sa samag-siyudad nga “mga paril” sa organisasyon ni Jehova. Sila usab nakigbahin sa literal nga pagpanukod nga buluhaton—ang pagtukod ug mga Kingdom Hall, Assembly Hall, ug mga pasilidad sa Bethel. Niining tanang paagi, ilang gitabangan ang ilang dinihogang mga igsoon sa pag-atiman sa mga panginahanglan sa nagalambo nga organisasyon ni Jehova!

17. Unsa ang usa ka paagi nga si Jehova nagpatahom sa iyang katawhan?

¹⁷ Pagkamakapadasig sa hinapos nga mga pulong sa Isaias 60:10! Si Jehova nag-ingon: “Sa akong kasuko ako maghampak kanimo, apan sa akong maayong kabubut-on ako tinong maluoy kanimo.” Oo, balik niadtong 1918/19, gidisiplina ni Jehova ang iyang katawhan. Apan sa miagi kadto. Karon na ang panahon sa pagpakita ni Jehova ug kaluoy ngadto sa iyang dinihogang mga alagad ug sa ilang kauban nga ubang mga karnero. Ang pamatuod nga gipakitaan silag kaluoy mao ang pagpanalangin ni Jehova kanila ug talagsaong pag-uswag, nga ‘nagpatahom kanila,’ ingnon ta.

18, 19. (a) Unsay gisaad ni Jehova maylabot sa mga bag-ohan nga nanulod sa iyang organisasyon? (b) Unsay gitug-an kanato sa nahibiling mga bersikulo sa Isaias kapitulo 60?

¹⁸ Matag tuig, gatosan ka libong dugang “mga langyaw” ang nakig-uban sa organisasyon ni Jehova, ug ang dalan magpabiling bukas alang sa mas daghan pa nga mosunod kanila. Si Jehova miingon sa Zion: “Ang imong mga ganghaan pagabuksan sa kanunay; kini dili pagasirhan  bisan sa adlaw o sa gabii, aron dad-on kanimo ang mga kahinguhaan sa kanasoran, ug ang ilang mga hari magapanguna.” (Isaias 60:11) Ang pipila ka magsusupak naningkamot sa pagsira nianang maong “mga ganghaan,” apan kita nahibalo nga dili sila molampos. Si Jehova mismo nag-ingon nga sa usa ka paagi o sa lain, ang mga ganghaan magpabiling bukas. Magpadayon ang pag-uswag.

¹⁹ Aduna pay ubang mga paagi nga si Jehova nagpanalangin sa iyang katawhan, nagpatahom kanila, niining kataposang mga adlaw. Ang nahibiling mga bersikulo sa Isaias 60 matagnaong nagpadayag kon unsa kanang mga paagiha.

 Makapatin-aw Ka Ba?

• Kinsa ang “babaye” sa Diyos, ug kinsay naghawas kaniya dinhi sa yuta?

• Kanus-a naghay-ad ang mga anak sa Zion, ug kanus-a ug sa unsang paagi sila ‘mitindog’?

• Ginamit ang lainlaing mga simbolo, sa unsang paagi gitagna ni Jehova ang pag-uswag karon sa mga magmamantala sa Gingharian?

• Sa unsang mga paagi gipadan-ag ni Jehova ang iyang kahayag ibabaw sa iyang katawhan?

[Mga Pangutana sa Pagtuon]

[Hulagway sa panid 10]

Ang “babaye” ni Jehova gisugo sa pagtindog

[Hulagway sa panid 12]

Ang panon sa mga barko morag mga salampati tan-awon diha sa kapunawpunawan