Simbaha ang Diyos “Diha sa Espiritu”

“Kang kinsa ninyo ipakasama ang Diyos? Unsang larawan ang inyong mamugna kaniya?”—ISAIAS 40:18, “THE JERUSALEM BIBLE”

TINGALI ikaw kombinsido gayod nga ang paggamit ug mga imahen dalawaton sa pagsimba sa Diyos. Tingali imong gibati nga makapasuod kini kanimo sa Tigpaminaw sa pag-ampo, kinsa dili makita ug daw walay personalidad ug tulukibon.

Apan kita ba may bug-os nga kagawasan sa pagpili sa atong kaugalingong paagi sa pagduol sa Diyos? Dili ba Diyos mismo ang may kinalabwang awtoridad sa pagsulti kon unsay dalawaton ug dili? Gipatin-aw ni Jesus ang panglantaw sa Diyos sa maong butang sa dihang siya miingon: “Ako mao ang Dalan, ang Kamatuoran ug ang Kinabuhi. Walay makaabot sa Amahan gawas nga pinaagi kanako.” (Juan 14:6) a Kanang mga pulonga lamang nagdili na sa paggamit ug mga imahen o sa bisan unsang sagradong mga butang.

Oo, dunay espesipikong matang sa pagsimba nga dawaton ni Jehova nga Diyos. Unsa man kana? Sa laing okasyon, si Jesus mipatin-aw: “Moabot ang takna—sa pagkamatuod karon mao na—sa dihang ang matuod nga mga magsisimba magasimba sa Amahan diha sa espiritu ug kamatuoran: kana ang matang sa magsisimba nga buot sa Amahan. Ang Diyos espiritu, ug kadtong magasimba kinahanglang magasimba diha sa espiritu ug kamatuoran.”—Juan 4:23, 24.

Ang Diyos, nga usa ka “espiritu,” mahawasan kaha sa usa ka larawan? Dili. Bisag unsa pa tingali ka makapahingangha ang usa ka imahen, kini dili gayod makatumbas sa himaya sa Diyos. Busa ang usa ka imahen sa Diyos dili gayod makahawas kaniya sa matinud-anong paagi. (Roma 1:22, 23) Ang usa kaha ka tawo ‘nagasimba diha sa kamatuoran’ kon siya moduol sa Diyos pinaagi sa usa ka imahen nga hinimo sa tawo?

 Usa ka Klaro nga Pagtulon-an sa Bibliya

Ang Balaod sa Diyos nagdili sa paggamag mga larawan ingong mga butang sa pagsimba. Ang ikaduha sa Napulo ka Sugo nagbaod: “Dili ka magbuhat alang sa imong kaugalingon ug linilok nga larawan o sa bisan unsang dagwaya sa bisan unsang butang sa langit o sa ilalom sa yuta o sa tubig sa ilalom sa yuta; dili ka moyukbo kanila o mag-alagad kanila.” (Exodo 20:4, 5) Ang inspirado nga Kristohanong Kasulatan nagsugo usab: “Kamo kinahanglang maglikay sa pagsimba sa diyosdiyos.”—1 Corinto 10:14.

Tinuod, daghan ang nangatarongan nga ang ilang paggamit ug mga larawan sa pagsimba dili pagsimbag diyosdiyos. Ang Ortodoksong mga Kristiyano, pananglitan, kasagarang moingon nga wala gayod nila simbaha ang mga imahen nga atubangan niini sila nagyukbo, nagluhod, ug nag-ampo. Usa ka Ortodoksong pari misulat: “Kami nagtahod niini tungod kay kini maoy balaang mga butang, ug tungod kay among gipasidunggan ang gihawasan sa maong mga Imahen.”

Bisan pa niana, ang pangutana nagpabilin: Ang Diyos mouyon ba sa paggamit ug mga imahen bisan alang sa gitawag ug dili-direktang paghimaya? Walay mabasa diha sa Bibliya nga nagtugot sa maong buhat. Sa dihang ang mga Israelinhon naghimo ug larawan sa usa ka nating baka, nga ang tuyo kono maoy paghimaya kang Jehova, iyang gipahayag nga siya wala gayod mouyon ug miingon nga sila nag-apostata.—Exodo 32:4-7.

Ang Nagpahiping Kapeligrohan

Ang paggamit ug makita nga mga butang sa pagsimba maoy usa ka peligrosong buhat. Kini daling makatental sa mga tawo sa pagsimba sa butang inay kay sa Diyos nga maoy gihawasan konohay sa maong butang. Sa laing pagkasulti, ang imahen mao na ang gisimba.

 Nahitabo kana sa ubay-ubayng mga butang sa mga adlaw sa mga Israelinhon. Pananglitan, sa ilang pagbaktas latas sa kamingawan, si Moises naghimog usa ka bitin nga tumbaga. Sa sinugdanan, ang larawan sa bitin diha sa usa ka poste nagsilbing instrumento sa pagkaayo. Kadtong gipaak sa bitin agig silot mahimong motutok sa bitin nga tumbaga ug makadawat sa tabang sa Diyos. Apan human mahiluna ang mga tawo didto sa Yutang Saad, mopatim-aw nga kining posteng larawan gihimo nila nga usa ka diyosdiyos, nga mora bag ang bitin nga tumbaga mismo may gahom sa pag-ayo. Sila nagsunog ug insenso ngadto niini ug ginganlan pa gani nila kini nga Nehustan.—Numeros 21:8, 9; 2 Hari 18:4.

Ang mga Israelinhon misulay usab paggamit sa arka sa pakigtugon ingong anting-anting batok sa ilang mga kaaway, uban ang malaglagong mga resulta. (1 Samuel 4:3, 4; 5:11) Ug sa adlaw ni Jeremias, ang mga lungsoranon sa Jerusalem mas dakog pagtagad sa templo kay sa Diyos nga ilang gisimba didto.—Jeremias 7:12-15.

Ang kiling sa pagsimba ug mga butang imbes sa Diyos kaylap gihapon kaayo. Ang tigpanukiduki nga si Vitalij Ivanovich Petrenko miingon: “Ang imahen . . . mao nay gisimba ug nameligrong mahimong diyosdiyos . . . Dili ikapangulipas nga kini maoy usa gayod ka paganong ideya nga nahimong pagsimba sa imahen pinaagi sa popular nga mga tinuohan.” Sa susama, ang Gregong Ortodoksong pari nga si Demetrios Constantelos nag-ingon diha sa iyang librong Understanding the Greek Orthodox Church: “Posible nga simbahon sa usa ka Kristiyano ang imahen.”

Kuwestiyonable kaayo ang pag-ingon nga ang mga imahen maoy mga tabang lamang sa relatibong pagsimba. Ngano man? Buweno, dili ba tinuod nga ang partikular nga mga imahen ni Maria o sa “mga santos” tingali giisip nga takos sa mas dakong debosyon ug nga mas  mapuslanon kay sa ubang mga imahen nga naghawas sa samang indibiduwal nga dugay nang namatay? Pananglitan, ang usa ka partikular nga imahen nga naghawas kang Maria sa Tínos, Gresya, dunay iyang kaugalingong debotado nga Ortodoksong mga sumusunod, nga lahi sa matinuohon usab nga mga debotos sa imahen nga naghawas kang Maria sa Soumela, sa amihanang Gresya. Kining duha ka grupo nagtuo nga ang ilang masigkaimahen maoy superyor, nga ang usa naghimog mas talagsaong mga milagro kay sa lain, bisan pag kining duha naghawas sa samang indibiduwal nga dugay nang namatay. Sa ingon, pinaagi sa buhat gipakita sa mga tawo nga sila nagtuo nga dunay tinuod nga gahom ang partikular nga mga imahen ug nagsimba kanila.

Pag-ampo Ngadto sa “mga Santos” o Kang Maria?

Apan, komosta man ang bahin sa pagsimba sa mga indibiduwal, sama kang Maria o sa “mga santos”? Si Jesus, agig sanong sa tentasyon ni Satanas, mikutlo sa Deuteronomio 6:13 ug miingon: “Ikaw kinahanglang magsimba sa Ginoo nga imong Diyos, ug siya lamang ang imong alagaran.” (Mateo 4:10) Sa ulahi siya miingon nga ang matuod nga mga magsisimba magasimba “sa Amahan,” ug wala nay lain. (Juan 4:23) Kay nahibalo niini, gibadlong sa usa ka manulonda si apostol Juan tungod kay misulay siya sa pagsimba kaniya, nga nag-ingon: “Ayaw ug buhata kana . . . Ang Diyos maoy angay nimong simbahon.”—Pinadayag 22:9.

Husto ba nga moampo sa yutan-ong inahan ni Jesus, si Maria, o sa partikular nga “mga santos,” nga maghangyo kanila nga maoy mangatubang sa Diyos alang kanato? Ang direktang tubag sa Bibliya mao: “Dunay usa lang ka tigpataliwala tali sa Diyos ug sa mga tawo, usa ka tawo mismo, si Kristo Jesus.”—1 Timoteo 2:5.

Ampingi ang Imong Relasyon sa Diyos

Ang paggamit ug mga imahen sa pagsimba, sanglit supak sa klarong pagtulon-an sa Bibliya, dili makatabang sa mga tawo sa pagbaton sa pag-uyon sa Diyos ug sa pag-angkon ug kaluwasan. Sa kasukwahi, si Jesus nag-ingon nga ang kinabuhing walay kataposan nag-agad sa atong pagkuha ug kahibalo bahin sa bugtong matuod nga Diyos, pagsinati sa iyang dili-hitupngang kinaiya maingon man sa iyang mga katuyoan ug pagpakiglabot sa mga tawo. (Juan 17:3) Ang mga imahen nga dili makakita, makabati, o makasulti dili makatabang sa usa sa pagsinati sa Diyos ug sa pagsimba kaniya sa dalawatong paagi. (Salmo 115:4-8) Kanang labing hinungdanong edukasyon mabatonan lamang pinaagi sa pagtuon sa Pulong sa Diyos, ang Bibliya.

Gawas nga walay ikahatag nga kaayohan, ang pagsimba sa imahen mahimong makadaot sa espirituwalidad. Sa unsang paagi? Labaw sa tanan, makadaot kini sa atong relasyon kang Jehova. Mahitungod sa Israel, kinsa “nakapasuko kaniya tungod sa ilang makaluod nga mga diyosdiyos,” ang Diyos nagtagna: “Ako magatago sa akong nawong gikan kanila.” (Deuteronomio 32:16, 20, The New American Bible) Ang pagpasig-uli pag-usab sa ilang relasyon uban sa Diyos nagpasabot sa ilang ‘pagsalikway sa makasasalang mga diyosdiyos.’—Isaias 31:6, 7, NAB.

Busa, pagkatukma gayod sa tambag sa Kasulatan: “Minahal nga mga anak, pagbantay kamo batok sa mga diyosdiyos”!—1 Juan 5:21, NAB.

[Footnote]

[Kahon sa panid 6]

Natabangan sa Pagsimba “Diha sa Espiritu”

Si Olivera maoy usa ka debotadong membro sa Ortodoksong Iglesya sa Albania. Sa dihang gidili sa nasod ang relihiyon niadtong 1967, gipadayon ni Olivera sa tago ang iyang relihiyosong mga buhat. Gigamit niya ang dakong bahin sa iyang gamayng pensiyon sa pagpalit ug mga imahen nga bulawan ug plata, insenso, ug mga kandila. Gitago niya kini diha sa iyang kama ug kasagarang matulog diha sa lingkoranan sa duol kay nahadlok nga basin kini makita o kawaton. Sa dihang giduaw siya sa mga Saksi ni Jehova sa sayong bahin sa katuigang 1990, nakita ni Olivera nga ang ilang mensahe nga gikan sa Bibliya maoy tinuod. Iyang nasabtan ang gisulti sa Bibliya nga ang matuod nga pagsimba maoy “diha sa espiritu,” ug iyang natun-an kon unsay pagbati sa Diyos bahin sa paggamit ug mga imahen. (Juan 4:24, The Jerusalem Bible) Namatikdan sa Saksing nagtuon sa Bibliya uban kaniya nga nagkadiyutay ang mga imahen matag higayon nga siya moduaw sa balay ni Olivera. Sa kataposan, wala nay nabilin. Human sa iyang bawtismo, si Olivera mikomento: “Karon, imbes sa walay-pulos nga mga imahen, ako nagbaton sa balaang espiritu ni Jehova. Mapasalamaton kaayo ako nga akong mabatonan ang balaang espiritu ni Jehova bisag dili mogamit ug mga imahen.”

Si Athena, nga taga-isla sa Lesbos sa Gresya, maoy aktibo kaayong membro sa Ortodoksong Iglesya. Membro siya sa koro ug matinuorong nagsunod sa relihiyosong tradisyon, lakip na sa paggamit ug mga imahen. Ang mga Saksi ni Jehova nagtabang kang Athena sa pagkaamgo nga dili tanang gitudlo kaniya maoy nahiuyon sa Bibliya. Apil niini ang paggamit ug mga imahen ug mga krus sa pagsimba. Miinsistir si Athena nga mohimog kaugalingon niyang panukiduki bahin sa sinugdanan niining relihiyosong mga butang. Human nga makapanukiduki pag-ayo sa lainlaing mga reperensiya, nakombinsir siya nga dili Kristohanon ang sinugdanan niadtong mga butanga. Ang iyang tinguha sa pagsimba sa Diyos “diha sa espiritu” miresulta sa iyang pagwagtang sa iyang mga imahen, bisan pag mahalon kaayo kini. Apan, si Athena nalipay sa pagdawat sa bisan unsang kapildihan aron lang masimba ang Diyos sa paagi nga hinlo sa espirituwal ug dalawaton.—Buhat 19:19.

[Kahon/Hulagway sa panid 7]

Ang mga Imahen ba mga Buhat Lang sa Arte?

Sa dili pa dugayng katuigan, ang Ortodoksong mga imahen gikolekta gikan sa tibuok kalibotan. Ang mga kolektor kasagarang nag-isip sa imahen, dili ingong usa ka sagrado nga relihiyosong butang, kondili ingong usa ka buhat sa arte nga nagpabanaag sa kultura sa Byzantium. Dili talagsaong makakita ug daghang relihiyosong mga imahen nga giadorno diha sa balay o opisina sa usa ka tawo nga nag-angkong ateyista.

Apan, ang sinserong mga Kristohanon wala malimot sa pangunang katuyoan sa imahen. Kini maoy usa ka butang sa pagsimba. Bisan tuod ang mga Kristohanon wala mokuwestiyon sa katungod sa uban sa pagpanag-iya ug mga imahen, sa personal sila wala magbaton ug mga imahen, bisan ug koleksiyon lang. Kini maoy uyon sa prinsipyo nga makaplagan sa Deuteronomio 7:26, sa The Jerusalem Bible: “Dili ka magpasulod sa imong balay ug usa ka dulumtanang butang [mga larawan nga gigamit sa pagsimba] kay ikaw, sama niini, pagalaglagon usab. Kinahanglan nga imo kining isipon nga mahugaw ug makaluod.”

[Hulagway sa panid 7]

Wala itugot sa Diyos ang paggamit ug mga larawan sa pagsimba

[Hulagway sa panid 8]

Ang kahibalo gikan sa Bibliya motabang kanato sa pagsimba sa Diyos diha sa espiritu