Ipuno ang Diyosnong Pagkamahinalaron sa Inyong Pagkamainantoson

“Ipuno sa inyong pagtuo . . . ang pagkamainantoson, sa inyong pagkamainantoson ang diyosnong pagkamahinalaron.”—2 PEDRO 1:5, 6.

1, 2. (a) Unsang matanga sa pagtubo ang gidahom sa usa ka bata? (b) Unsa ka hinungdanon ang espirituwal nga pagtubo?

 ANG pagtubo hinungdanon sa usa ka bata, apan dili kay pisikal nga pagtubo lang ang gitinguha. Ang mental ug emosyonal nga pagtubo gidahom usab. Ngadtongadto, ihiklin sa bata ang dili-hamtong nga mga paagi niini ug mahimong hingkod nga lalaki o babaye. Gihisgotan kini ni apostol Pablo sa dihang siya misulat: “Sa dihang ako bata pa, ako nagasulti ingon sa usa ka bata, naghunahuna ingon sa usa ka bata, nangatarongan ingon sa usa ka bata; apan karon nga ako hingkod na, ako nang giwagtang ang mga kinaiya sa usa ka bata.”—1 Corinto 13:11.

² Gipunting ni Pablo ang usa ka hinungdanong punto bahin sa espirituwal nga pagtubo. Ang mga Kristohanon kinahanglang mouswag gikan sa pagkahimong espirituwal nga mga bata ngadto sa pagkahimong ‘hingkod sa mga gahom sa pagsabot.’ (1 Corinto 14:20) Sila kinahanglang manglimbasog ug maningkamot nga makadangat “sa gidak-on nga iya sa kabug-osan ni Kristo.” Unya sila dili na “mga bata, nga samag gituyatuya sa mga balod ug gidala ngadto-nganhi sa matag hangin sa pagtulon-an.”—Efeso 4:13, 14.

3, 4. (a) Unsay angay natong buhaton aron mahimong hingkod sa espirituwal? (b) Unsang diyosnong mga hiyas ang angay natong ipasundayag, ug unsa kini ka hinungdanon?

³ Sa unsang paagi kita mahimong hingkod sa espirituwal? Bisan tuod ang pisikal nga pagtubo halos awtomatikong magpadayon ilalom sa normal nga mga sirkumstansiya, ang espirituwal nga pagtubo nagkinahanglan ug tinuyong paningkamot. Kini magsugod sa pagbaton ug tukmang kahibalo sa Pulong sa Diyos ug paglihok nga kaharmonya sa atong nakat-onan. (Hebreohanon 5:14; 2 Pedro 1:3) Sa baylo, kini makapaarang kanato sa pagpasundayag ug diyosnong mga hiyas. Sama sa pisikal nga pagtubo ug sa nalangkit nga mga bahin niini, ang pagtubo diha sa lainlaing diyosnong mga hiyas kasagarang mahitabo sa samang higayon. Si apostol Pedro misulat: “Pinaagi sa inyong pag-amot agig pagsanong sa tanang tim-os nga paningkamot, ipuno sa inyong pagtuo ang kaligdong, sa inyong kaligdong ang kahibalo, sa inyong kahibalo ang pagpugong-sa-kaugalingon, sa inyong pagpugong-sa-kaugalingon ang pagkamainantoson, sa inyong pagkamainantoson ang diyosnong pagkamahinalaron, sa inyong diyosnong pagkamahinalaron ang inigsoong pagbati, sa inyong inigsoong pagbati ang gugma.”—2 Pedro 1:5-7.

⁴ Hinungdanon ang matag hiyas nga gilista ni Pedro, ug walay mahimong kuhaon. Siya midugang: “Kon kining mga butanga anaa kaninyo ug nagaawas, kini magpugong kaninyo sa pagkahimong dili aktibo o dili-mabungahon labot sa tukmang kahibalo sa atong Ginoong Jesu-Kristo.” (2 Pedro 1:8) Ipunting nato ang atong pagtagad diha sa panginahanglan sa pagdugang sa diyosnong pagkamahinalaron ngadto sa atong pagkamainantoson.

Ang Panginahanglan nga Molahutay

5. Nganong kinahanglan kitang molahutay?

⁵ Gilambigit ni Pedro ug Pablo ang diyosnong pagkamahinalaron sa pagkamainantoson. (1 Timoteo 6:11) Ang pagkamainantoson nagpasabot ug labaw pa kay sa pagpakita lamang ug kalig-on ilalom sa kalisdanan ug pagpabiling determinado. Kini naglangkit ug pagpailob, kaisog, ug pagkamaunongon, nga dili mawad-ag paglaom sa dihang nag-atubang ug mga pagsulay, babag, tentasyon, o paglutos. Tungod kay kita nagkinabuhi “uban ang diyosnong pagkamahinalaron kalangkit ni Kristo Jesus,” dahomon nato nga kita lutoson. (2 Timoteo 3:12) Kita kinahanglang molahutay aron mapamatud-an nato ang atong gugma alang kang Jehova ug maugmad ang mga hiyas nga gikinahanglan aron maluwas. (Roma 5:3-5; 2 Timoteo 4:7, 8; Santiago  1:3, 4, 12) Kon dili kita molahutay, dili nato maangkon ang kinabuhing walay kataposan.—Roma 2:6, 7; Hebreohanon 10:36.

6. Ang paglahutay hangtod sa kataposan nagpasabot ug pagbuhat sa unsa?

⁶ Bisan unsa pa ka maayo ang atong pagsugod, ang labing hinungdanon sa kataposan mao nga kita nakalahutay. Matod ni Jesus: “Siya nga nakalahutay hangtod sa kataposan mao ang maluwas.” (Mateo 24:13) Oo, kita kinahanglang molahutay hangtod sa kataposan, kana man hangtod sa kataposan sa atong presenteng kinabuhi o sa kataposan niining daotang sistema sa mga butang. Sa bisan hain niana, kinahanglang huptan nato ang atong integridad sa Diyos. Apan, kon dili ipuno ang diyosnong pagkamahinalaron ngadto sa atong pagkamainantoson dili nato mapahimut-an si Jehova, ug dili nato maangkon ang kinabuhing walay kataposan. Apan unsa ba ang diyosnong pagkamahinalaron?

Kon Unsay Kahulogan sa Diyosnong Pagkamahinalaron

7. Unsa ang diyosnong pagkamahinalaron, ug magtukmod kini kanato sa pagbuhat sa unsa?

⁷ Ang diyosnong pagkamahinalaron maoy personal nga kataha, pagsimba, ug pag-alagad kang Jehova nga Diyos tungod sa pagkamaunongon ngadto sa iyang unibersohanong pagkasoberano. Aron matuman ang diyosnong pagkamahinalaron maylabot kang Jehova, kita nagkinahanglan ug tukmang kahibalo bahin kaniya ug sa iyang mga dalan. Kita angayng magtinguha nga makaila sa Diyos sa personal, sa bug-os. Kini magtukmod kanato sa pag-ugmad ug kinasingkasing nga pagkasuod kaniya, kanang gipakita sa atong mga lihok ug paagi sa pagkinabuhi. Kita angayng magtinguha nga mahisama kang Jehova kutob sa maarangan—nga mosundog sa iyang mga paagi ug magbanaag sa iyang mga hiyas ug kinaiya. (Efeso 5:1) Sa pagkatinuod, ang diyosnong pagkamahinalaron magtukmod kanato sa pagtinguha nga pahimut-an ang Diyos sa tanan natong buhaton.—1 Corinto 10:31.

8. Sa unsang paagi nalambigit pag-ayo ang diyosnong pagkamahinalaron ug bug-os nga pagkamahinalaron?

⁸ Aron matuman ang tinuod nga diyosnong pagkamahinalaron, kita kinahanglang mosimba lamang kang Jehova, nga dili tugotan ang bisan unsa nga mopuli sa iyang dapit diha sa atong kasingkasing. Ingong atong Maglalalang, siya adunay katungod nga magkinahanglan sa atong bug-os nga pagkamahinalaron. (Deuteronomio 4:24; Isaias 42:8) Bisan pa niana, dili kita pugson ni Jehova sa pagsimba kaniya. Gitinguha niya ang atong kinabubut-ong pagkamahinalaron. Ang atong gugma sa Diyos, nga pinasukad sa tukmang kahibalo kaniya, ang magtukmod kanato sa paghinlo sa atong kinabuhi ug paghimog walay-kondisyon nga pagpahinungod kaniya ug dayon pagkinabuhi sumala niana.

Ugmara ang Relasyon Uban sa Diyos

9, 10. Sa unsang paagi maugmad ug mahuptan nato ang suod nga relasyon uban sa Diyos?

⁹ Human sa pagpasimbolo sa atong pahinungod ngadto sa Diyos pinaagi sa pagpabawtismo, kinahanglang ugmaron gihapon nato ang mas suod nga relasyon uban kaniya. Busa ang atong tinguha sa pagbuhat niini ug sa pag-alagad kang Jehova nga matinumanon magtukmod kanato sa pagpadayon sa pagtuon sa iyang Pulong ug pagpamalandong niana. Samtang atong gitugotan ang espiritu sa Diyos nga mag-impluwensiya sa atong hunahuna ug kasingkasing, molalom ang atong gugma alang kang Jehova. Ang atong relasyon uban kaniya padayon nga mahimong labing hinungdanong butang sa atong kinabuhi. Atong giisip si Jehova ingong atong kinasuorang Higala ug buot natong pahimut-an siya sa tanang panahon. (1 Juan 5:3) Ang atong kalipay diha sa maanindot nga relasyon uban sa Diyos motubo, ug kita mapasalamaton nga siya mahigugmaong nagsugo kanato ug nagtul-id kanato diin gikinahanglan.—Deuteronomio 8:5.

¹⁰ Gawas kon kita kanunayng maningkamot sa pagpalig-on sa atong bililhong relasyon uban kang Jehova, kini mahimong maluya. Kon mahitabo kana, dili kana sala sa Diyos, kay “siya dili halayo gikan sa matag usa kanato.” (Buhat 17:27) Pagkamalipayon nato nga wala himoa ni Jehova nga malisod ang pagduol kaniya! (1 Juan 5:14, 15) Siyempre, kinahanglang maningkamot kita sa paghupot ug suod nga personal nga relasyon uban kang Jehova. Apan, siya motabang kanato sa pagduol kaniya pinaagi sa paghatag kanato sa tanang tabang nga atong gikinahanglan aron maugmad ug mahuptan nato ang diyosnong pagkamahinalaron. (Santiago 4:8) Sa unsang paagi magamit nato sa bug-os kining tanang mahigugmaong mga tabang?

Magmalig-on sa Espirituwal

11. Unsa ang pipila ka pagpasundayag sa atong diyosnong pagkamahinalaron?

¹¹ Ang atong nakagamot-pag-ayo nga gugma alang sa Diyos magtukmod kanato sa pagpasundayag sa gidak-on sa atong diyosnong pagkamahinalaron, nga kaharmonya sa tambag ni Pablo: “Buhata ang kutob sa imong maarangan nga itanyag ang imong kaugalingon sa Diyos ingong inuyonan, usa ka mamumuo nga walay angayng ikaulaw,  nga nagagamit sa pulong sa kamatuoran sa hustong paagi.” (2 Timoteo 2:15) Aron mahimo kini kinahanglan nga atong huptan ang maayong rutina sa regular nga pagtuon sa Bibliya, pagtambong sa tigom, ug pagpakig-ambit sa pagsangyaw sa kanataran. Makapabilin usab kitang suod kang Jehova pinaagi sa “pag-ampo nga walay-hunong.” (1 Tesalonica 5:17) Kini maoy makahuloganong mga pagpasundayag sa atong diyosnong pagkamahinalaron. Ang pagpasagad sa bisan hain niini mahimong magpahinabo ug espirituwal nga sakit ug maghimo kanatong daling madala sa mga laraw ni Satanas.—1 Pedro 5:8.

12. Sa unsang paagi molampos kita sa pagsagubang sa mga pagsulay?

¹² Ang pagpabiling lig-on ug aktibo sa espirituwal motabang usab kanato sa pag-atubang sa daghang pagsulay nga modangat kanato. Ang mga pagsulay mahimong maggikan sa lainlaing mga tinubdan nga makasulay pag-ayo kanato. Ang kawalay-pagtagad, pagsupak, ug paglutos mas lisod antoson kon kini maggikan sa suod nga mga membro sa pamilya, paryente, o silingan. Ang malipotong mga pagpit-os nga mokompromiso sa atong Kristohanong mga prinsipyo mahimong motungha diha sa atong trabahoan o eskuylahan. Ang kahigawad, sakit, ug depresyon makapaluya kanato sa pisikal ug makapalisod sa pagsagubang sa mga pagsulay sa pagtuo. Apan molampos kita sa pagsagubang sa mga pagsulay kon kita molahutay “diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova.” (2 Pedro 3:11, 12) Ug mahuptan nato ang atong kalipay sa pagbuhat niana, nga masaligon sa panalangin sa Diyos.—Proverbio 10:22.

13. Unsay angay natong buhaton aron padayon natong matuman ang diyosnong pagkamahinalaron?

¹³ Bisan tuod maoy gipuntirya ni Satanas kadtong nagtuman sa diyosnong pagkamahinalaron, dili kita kinahanglang mahadlok. Ngano? Tungod kay “si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay.” (2 Pedro 2:9) Aron makaantos sa mga pagsulay ug makaeksperyensiya sa maong kaluwasan, kinahanglang ‘isalikway nato ang pagkadili-diyosnon ug kalibotanong mga tinguha ug . . . magkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.’ (Tito 2:12) Ingong mga Kristohanon, kita kinahanglang magbantay aron ang bisan unsang kahuyangan nga naglangkit sa unodnong mga tinguha ug mga kalihokan dili makababag sa atong diyosnong pagkamahinalaron ug makadaot niana. Karon tagdon nato ang pipila niini nga mga kapeligrohan.

Pagbantay sa mga Butang nga Magpameligro sa Diyosnong Pagkamahinalaron

14. Unsay angay natong hinumdoman kon kita mahaylo sa bitik sa materyalismo?

¹⁴ Daghan ang nabitik sa materyalismo. Tingali malimbongan nato bisan ang atong kaugalingon, ‘nga maghunahunang ang diyosnong pagkamahinalaron maoy usa ka paagi nga makaganansiya sa materyal.’ Busa, kita makabaton ug kaisog sa pagpahimulos sa dili maayong paagi sa pagsalig nga gipakita sa mga isigkamagtutuo. (1 Timoteo 6:5) Basin ganig sayop kitang mohinapos nga husto ang pagpamugos nga mangutang sa usa ka adunahan nga Kristohanon nga lagmit dili nato mabayran. (Salmo 37:21) Apan ang diyosnong pagkamahinalaron, dili ang pagbaton ug materyal nga mga butang, ang ‘naghupot ug saad sa kinabuhi karon ug sa umaabot.’ (1 Timoteo 4:8) Tungod kay ‘kita walay gidalang bisan unsa nganhi sa kalibotan ug dili makadala ug bisan unsa sa atong paggawas niini,’ magmadeterminado pa kita sa pagtinguha sa “diyosnong pagkamahinalaron inubanan sa pagkakontento” ug ‘magmakontento sa pagkaon ug besti.’—1 Timoteo 6:6-11.

15. Unsay atong mahimo kon ang pagpangagpas sa kalingawan peligrong mopuli sa atong diyosnong pagkamahinalaron?

¹⁵ Ang pagpangagpas sa kalingawan mahimong mopuli sa diyosnong pagkamahinalaron. Dili kaha kinahanglang mohimo kitag dihadihang mga kausaban niining bahina? Itugot ta, dunay diyutayng benepisyo nga makuha gikan sa lawasnong pagbansay ug paglingawlingaw. Apan, ang maong mga ganti gamay ra kon itandi sa kinabuhing walay kataposan. (1 Juan 2:25) Karon, daghan ang “mga mahigugmaon sa kalipayan inay nga mga mahigugmaon sa Diyos, nga nagbaton sa dagway sa diyosnong pagkamahinalaron apan nagpanghimakak sa gahom niini,” ug kita kinahanglang magpahilayo sa maong mga tawo. (2 Timoteo 3:4, 5) Kadtong naghatag ug dakong pagtagad sa diyosnong pagkamahinalaron ‘maampingong nagtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.’—1 Timoteo 6:19.

16. Unsang makasasalang mga tinguha ang nagpugong sa pipila sa pagkinabuhi sumala sa matarong nga mga sukdanan sa Diyos, ug sa unsang paagi mabuntog nato kining maong mga tinguha?

¹⁶ Ang pag-abuso sa alkoholikong ilimnon ug droga, imoralidad, ug makasasalang mga tinguha makadaot sa atong diyosnong pagkamahinalaron. Ang pagpadala niini makapugong kanato sa pagkinabuhi sumala sa matarong nga mga kinahanglanon sa Diyos. (1 Corinto 6:9, 10; 2 Corinto 7:1) Bisan si Pablo kinahanglang molahutay sa padayon nga pagpakigbugno batok sa makasasalang unod. (Roma 7:21-25) Ang kusganong mga lakang gikinahanglan aron mawagtang ang sayop nga mga tinguha. Sa usa ka bahin, kita kinahanglang magmadeterminado nga magpabiling hinlo sa moral. Giingnan kita ni Pablo: “Patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog, nga maoy idolatriya.” (Colosas 3:5) Ang pagpatay sa atong mga sangkap sa lawas maylabot nianang makasasalang mga butang nagkinahanglag determinasyon aron mapapha kini, mawagtang kini. Ang kinasingkasing nga pag-ampo alang sa tabang sa Diyos makapaarang kanato sa pagsalikway sa sayop nga mga tinguha ug pagtinguha sa pagkamatarong ug diyosnong pagkamahinalaron taliwala niining daotang sistema sa mga butang.

17. Sa unsang paagi isipon nato ang disiplina?

¹⁷ Ang kahigawad makapahuyang sa atong pagkamainantoson ug makadaot sa atong diyosnong pagkamahinalaron. Daghan sa mga alagad ni Jehova ang nakaeksperyensiya ug kahigawad. (Numeros 11:11-15; Esdras 4:4; Jonas 4:3) Ang kahigawad ilabinang makadaot kanato kon kini duyogan sa kayugot tungod kay kita nasilo o gipahamtangan ug bug-at nga pagbadlong o disiplina. Apan, ang pagbadlong ug disiplina maoy pamatuod sa kaikag ug mahigugmaong kahangawa sa Diyos. (Hebreohanon 12:5-7, 10, 11) Ang disiplina angayng isipon nga dili lamang silot kondili maoy usa ka paagi sa pagbansay kanato diha sa dalan sa pagkamatarong. Kon kita mapaubsanon, atong pabilhan ug dawaton ang tambag, nga nakaamgo nga “ang mga pagbadlong sa disiplina maoy dalan sa kinabuhi.” (Proverbio 6:23) Kini makatabang kanato sa paghimog maayong espirituwal nga pag-uswag sa atong pagtinguha sa diyosnong pagkamahinalaron.

18. Unsay atong responsibilidad maylabot sa personal nga mga kasaypanan?

¹⁸ Ang mga dili-pagsinabtanay ug personal nga  mga kasaypanan mahimong usa ka hagit sa atong diyosnong pagkamahinalaron. Kini mahimong magpahinabo ug kabalaka o magtukmod sa pipila sa paghimog dili-maalamong lakang sa pagpalain sa ilang kaugalingon gikan sa ilang espirituwal nga mga igsoong lalaki ug babaye. (Proverbio 18:1) Apan, angay natong hinumdoman nga ang paghambin ug kahiubos o kayugot ngadto sa uban makadaot sa atong relasyon uban kang Jehova. (Levitico 19:18) Ngani, “siya nga wala mahigugma sa iyang igsoon, nga iyang nakita, dili makahimo sa paghigugma sa Diyos, nga wala niya makita.” (1 Juan 4:20) Sa iyang Wali sa Bukid, gipasiugda ni Jesus ang panginahanglan nga mohimog dihadihang mga lakang sa pagsulbad sa personal nga mga kasungian. Giingnan niya ang iyang mga mamiminaw: “Nan, kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon, ug unya, sa makabalik ka na, ihalad ang imong gasa.” (Mateo 5:23, 24) Ang pagpangayog pasaylo makatabang tingali sa pag-alim sa samad nga gipahinabo sa dili-malulotong mga pulong o mga lihok. Ang kadaot sa relasyon mahimong maalim ug ang malinawong relasyon mapasig-uli kon kita mangayog pasaylo ug modawat nga atong gidumala ang mga butang sa dili-hustong paagi. Si Jesus naghatag usab ug ubang mga tambag bahin sa pagdumala sa mga kalisdanan. (Mateo 18:15-17) Pagkadako sa atong kalipay kon molampos ang mga paningkamot sa pagsulbad sa mga suliran!—Roma 12:18; Efeso 4:26, 27.

Sunda ang Panig-ingnan ni Jesus

19. Nganong hinungdanon kaayo nga sundogon ang panig-ingnan ni Jesus?

¹⁹ Ang mga pagsulay tinong modangat kanato, apan dili kinahanglang malinga kita niini gikan sa lumba alang sa kinabuhing walay kataposan. Hinumdomi nga si Jehova makaluwas kanato gikan sa pagsulay. Samtang atong ‘tangtangon ang tanang kabug-at’ ug ‘modagan nga malahutayon sa lumba nga gibutang sa atong atubangan,’ ‘motutok kita kanunay sa Pangulong Ahente ug Maghihingpit sa atong pagtuo, si Jesus.’ (Hebreohanon 12:1-3) Ang pagsusi pag-ayo sa panig-ingnan ni Jesus ug pagpaningkamot sa pagsundog kaniya sa pulong ug sa buhat motabang kanato sa pag-ugmad ug diyosnong pagkamahinalaron ug pagpasundayag niana sa mas bug-os nga sukod.

20. Unsang mga ganti ang moresulta gumikan sa pagtinguha sa pagkamainantoson ug diyosnong pagkamahinalaron?

²⁰ Ang pagkamainantoson ug diyosnong pagkamahinalaron nalambigit pag-ayo sa pagtabang nga maseguro ang atong kaluwasan. Pinaagi sa pagpasundayag niining bililhong mga hiyas, kita makapadayon nga matinumanon sa atong sagradong pag-alagad sa Diyos. Bisan pag nailalom sa pagsulay, magmalipayon kita samtang atong naeksperyensiyahan ang malumong pagbati ug panalangin ni Jehova tungod kay kita milahutay ug nagatuman sa diyosnong pagkamahinalaron. (Santiago 5:11) Dugang pa, si Jesus mismo nagpasalig kanato: “Pinaagi sa paglahutay sa inyong bahin mabatonan ninyo ang inyong mga kalag.”—Lucas 21:19.

Unsaon Nimo Pagtubag?

• Nganong hinungdanon ang pagkamainantoson?

• Unsa ang diyosnong pagkamahinalaron, ug sa unsang paagi kini gipasundayag?

• Sa unsang paagi maugmad ug mahuptan nato ang suod nga relasyon uban sa Diyos?

• Unsa ang pipila ka butang nga magpameligro sa atong diyosnong pagkamahinalaron, ug sa unsang paagi malikayan nato kini?

[Mga Pangutana sa Pagtuon]

 [Mga hulagway sa panid 12, 13]

Ang diyosnong pagkamahinalaron gipasundayag sa daghang paagi

[Mga hulagway sa panid 14]

Pagbantay sa mga butang nga magpameligro sa inyong diyosnong pagkamahinalaron