Mga Pangutana Gikan sa mga Magbabasa

Sa unsang mga kahimtang nga tukma alang sa usa ka Kristohanong babaye nga magpandong tungod sa espirituwal nga mga prinsipyo?

“Ang matag babaye nga nagaampo o nagapanagna nga walay pandong sa iyang ulo nagapakaulaw sa iyang ulo,” misulat si apostol Pablo. Ngano? Tungod sa prinsipyo sa Bibliya sa pagkaulo: “Ang ulo sa usa ka babaye mao ang lalaki.” Ang pag-ampo o pagsangyaw diha sa Kristohanong kongregasyon maoy normal nga kaakohan sa lalaki. Busa, kon ang usa ka Kristohanong babaye magdumala sa mga buluhaton maylabot sa pagsimba nga sagad himoon sa iyang bana o sa usa ka bawtismadong lalaki, siya kinahanglang magpandong.—1 Corinto 11:3-10.

Ang mga kahimtang nga ang Kristohanong babaye angayng magpandong tingali motungha diha sa iyang relasyon sa kaminyoon. Pananglitan, sa dihang ang pamilya magtuon sa Bibliya o mangaon, ang bana sagad maoy manguna sa pagtudlo kanila o sa paghawas kanila diha sa pag-ampo ngadto sa Diyos. Apan, kon siya dili-magtutuo, kini nga kaakohan mahimong dumalahon sa iyang asawa. Busa, kon mag-ampo nga kusog alang sa iyang kaugalingon ug sa uban o kon magdumalag pagtuon sa Bibliya uban sa iyang mga anak nga anaa ang iyang bana, ang Kristohanong babaye angayng magpandong. Kon wala diha ang iyang bana, ang asawa dili angayng magpandong, kay siya giawtorisahan sa Diyos sa pagtudlo sa iyang mga anak.—Proverbio 1:8; 6:20.

Apan unsa na man kon ang usa ka batan-ong anak lalaki diha sa pamilya maoy dedikado, bawtismadong alagad  ni Jehova nga Diyos? Sanglit ang anak lalaki maoy membro sa Kristohanong kongregasyon, siya angayng modawat ug instruksiyon gikan sa mga lalaking membro sa kongregasyon. (1 Timoteo 2:12) Kon ang iyang amahan maoy usa ka magtutuo, ang amahan maoy angay nga motudlo sa anak lalaki. Apan, kon wala diha ang amahan, nan ang inahan kinahanglang magpandong kon siya ang magdumalag pagtuon sa Bibliya uban sa batan-on nga bawtismadong anak lalaki ug sa ubang mga anak. Ang inahan ang mag-igo kon paampoon ba niya ang bawtismadong anak lalaki sa maong pagtuon o sa pagpangaon. Basin mobati siya nga ang iyang anak dili pa gayod makahimo ug siya modesidir nga siya na lang ang mag-ampo. Kon siya modesidir nga maoy mag-ampo sa maong kahimtang, siya kinahanglang magpandong.

Samtang makigbahin diha sa pipila ka kalihokan sa kongregasyon, ang Kristohanong mga babaye angayng magpandong. Pananglitan, sa tigom sa dayon nang pagsangyaw sa tungatunga sa semana, basin ang presente mao ra ang Kristohanong mga babaye ug walay bawtismadong mga lalaki. Tingali may ubang mga kahimtang nga walay bawtismadong mga lalaki nga presente sa usa ka tigom sa kongregasyon. Kon ang usa ka igsoong babaye maoy magdumala sa mga kalihokan nga sagad himoon sa usa ka igsoong lalaki diha sa tigom nga gihikay sa kongregasyon o tigom sa dayon na ang pagsangyaw, siya kinahanglang magpandong.

Angay bang magpandong ang Kristohanong mga babaye sa dihang maghatag ug binaba o sign language nga paghubad sa mga pakigpulong sa Bibliya o sa dihang magbasa ug mga parapo diha sa publiko gikan sa usa ka tabang sa pagtuon sa Bibliya nga gigamit sa tigom sa kongregasyon? Dili. Ang mga igsoong babaye nga magdumala niining mga buluhatona wala man manguna o manudlo. Sa susama, dili angayng magpandong ang mga igsoong babaye kon maghatag ug mga pasundayag, mga kasinatian, o mga bahin sa estudyante diha sa Teokratikanhong Tunghaan sa Ministeryo.

Bisan tuod ang pagtudlo sulod sa kongregasyon angayng himoon sa bawtismadong mga lalaki, ang mga lalaki ug babaye adunay kaakohan sa pagsangyaw ug pagtudlo sa gawas sa kongregasyon. (Mateo 24:14; 28:19, 20) Busa kon ang Kristohanong babaye makigsulti sa mga dili-Saksi bahin sa Pulong sa Diyos nga anaay bawtismadong lalaki, dili kinahanglan nga siya magpandong.

Bisan pa niana, lahi ang kahimtang sa dihang ang regular, gieskedyul nga pagtuon sa Bibliya himoon diha sa balay nga anaay dedikado, bawtismadong lalaki. Kini maoy gihikay-daan nga sesyon sa pagtudlo diin ang igsoon nga nagadumala sa pagtuon mao gayoy modumala. Sa maong mga kahimtang, ang pagtuon mahimong ekstensiyon sa kongregasyon. Kon ang usa ka bawtismadong babaye maoy modumala sa maong pagtuon nga anaay bawtismadong lalaki, angay nga siya magpandong. Apan, ang bawtismadong lalaki kinahanglang maoy mag-ampo. Ang usa ka igsoong babaye dili maoy moampo nga anaay bawtismadong lalaki gawas lang kon dunay talagsaong rason, pananglit kon ang lalaki nawad-an sa iyang paningog.

May kahimtang tingali nga ang usa ka Kristohanong babaye kuyogan sa usa ka di-bawtismadong lalaki nga magmamantala sa Gingharian sa usa ka pagtuon sa Bibliya. Kon buot niya, mahimong hangyoon niya ang lalaki nga maoy modumala sa pagtuon. Apan sanglit ang lalaki sa tukmang paagi dili makahawas sa bawtismadong babaye diha sa pag-ampo kang Jehova, mas maayo nga ang mag-ampo sa maong pagtuon mao ang babaye. Kon siya ang magdumala sa pagtuon ug unya mag-ampo, ang babaye kinahanglang magpandong. Bisan kon ang lalaking magmamantala dili pa bawtismado, ang mga tagagawas maglangkit kaniya sa kongregasyon tungod sa iyang buluhatong pagsangyaw.

“Ang babaye angay magbaton ug timaan sa awtoridad diha sa iyang ulo tungod sa mga manulonda,” misulat si apostol Pablo. Oo, ang Kristohanong mga babaye adunay pribilehiyo nga mahimong maayong mga panig-ingnan sa milyonmilyong manulonda nga padayong nagpasakop nga maunongon kang Jehova. Pagkatukma gayod nga ang diyosnong mga babaye maghatag ug nahiangayng pagtagad sa pagpandong kon maoy gikinahanglan sa kahimtang!

[Mga hulagway sa panid 26]

Ang pagpandong maoy ilhanan sa pagtahod sa pagkaulo