Unsa ba Gayod ang Impiyerno?

BISAN kon unsang ideyaha ang ipatungha sa pulong “impiyerno” diha sa imong hunahuna, ang impiyerno kasagarang giisip nga usa ka dapit nga silotanan tungod sa sala. Mahitungod sa sala ug sa epekto niini, ang Bibliya nag-ingon: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Ang Kasulatan nag-ingon usab: “Ang suhol nga ginabayad sa sala mao ang kamatayon.” (Roma 6:23) Sanglit ang silot sa sala maoy kamatayon, ang paninugdang pangutana aron matino ang matuod nga kahulogan sa impiyerno mao: Unsay mahitabo kanato sa dihang mamatay kita?

Ang usa ba ka matang sa kinabuhi, diha sa usa ka matang sa dagway, magpadayon human sa kamatayon? Unsay impiyerno, ug unsang matanga sa mga tawo ang moadto didto? May paglaom ba kadtong atua sa impiyerno? Ang Bibliya mohatag ug matinud-anon ug makapatagbawng mga tubag niining mga pangutanaha.

Kinabuhi Human sa Kamatayon?

Aduna bay butang nga anaa sa sulod nato, sama sa usa ka kalag o usa ka espiritu, nga magpadayong buhi inigkamatay sa lawas? Palandonga kon sa unsang paagi ang unang tawo, si Adan, nabuhi. Ang Bibliya nag-ingon: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi.” (Genesis 2:7) Bisan tuod ang iyang kinabuhi nagpadayon pinaagi sa pagginhawa, ang paghuyop ug “gininhawa sa kinabuhi” ngadto sa mga buho sa iyang ilong dili lamang kay yanong paghuyop ug hangin ngadto sa iyang mga baga. Kana nagkahulogan nga ang Diyos nagbutang diha sa walay-kinabuhing lawas ni Adan sa kidlap sa kinabuhi—“ang puwersa sa kinabuhi,” nga nagalihok diha sa tanang linalang sa yuta. (Genesis 6:17; 7:22) Ang Bibliya nagtawag niining nagapalihok nga puwersa ingong “espiritu.” (Santiago 2:26) Ang maong espiritu ikatandi sa koryente sa elektrisidad nga mopaandar sa usa ka makina o aplayans ug makapaarang niini sa pag-obra. Ingon nga ang koryente dili gayod makabaton sa mga katakos sa kasangkapan nga gipaandar niini, ang puwersa sa kinabuhi dili makabaton sa bisan unsang mga kinaiya sa mga linalang nga gipalihok niini. Kini walay personalidad ug katakos sa paghunahuna.

Unsay mahitabo sa espiritu inigkamatay sa tawo? Ang Salmo 146:4 nag-ingon: “Mogula ang iyang espiritu, mobalik siya sa iyang yuta; nianang adlawa mahanaw ang iyang mga hunahuna.” Inigkamatay sa usa ka tawo, ang iyang walay-personalidad nga espiritu dili magpadayon sa paglungtad diha sa laing kalibotan ingong espiritung linalang. Kini “mobalik sa matuod nga Diyos nga maoy naghatag niini.” (Ecclesiastes 12:7) Nagkahulogan kini nga ang bisan unsang paglaom bahin sa umaabot nga kinabuhi alang nianang tawhana bug-os nga nagdepende karon sa Diyos.

Ang karaang Gregong mga pilosopo nga si Socrates ug Plato nagtuo nga ang usa ka kalag nga anaa sa sulod sa usa ka tawo magpadayong buhi human  sa kamatayon ug dili gayod mamatay. Unsay gitudlo sa Bibliya mahitungod sa kalag? Si Adan ‘nahimong usa ka buhing kalag,’ matod sa Genesis 2:7. Wala siya makadawat ug usa ka kalag; siya maoy usa ka kalag—usa ka bug-os nga persona. Ang Kasulatan naghisgot bahin sa usa ka kalag ingong nagbuhat, nangandoy ug pagkaon, gidagit, wala makatulog, ug uban pa. (Levitico 23:30; Deuteronomio 12:20; 24:7; Salmo 119:28) Oo, ang tawo mismo maoy usa ka kalag. Inigkamatay sa usa ka tawo, ang maong kalag mamatay.—Ezequiel 18:4.

Nan, unsa man ang kahimtang sa patay? Sa dihang nagpahayag sa silot kang Adan, si Jehova miingon: “Kay abog ikaw ug sa abog ikaw mopauli.” (Genesis 3:19) Diin ba si Adan sa wala pa siya umola sa Diyos gikan sa abog sa yuta ug sa wala pa hatagig kinabuhi? Aw, siya yanong wala maglungtad! Sa dihang namatay siya, si Adan mibalik nianang kahimtang sa bug-os nga pagkawalay-kinabuhi. Ang kahimtang sa patay gitin-aw sa Ecclesiastes 9:5, 10, diin atong mabasa: “Ang mga patay walay nahibaloan . . . Sa lubnganan, diin ikaw moadto, walay pagbuhat ni pagplano ni kahibalo ni kaalam.” (New International Version) Sumala sa Kasulatan, ang kamatayon maoy kahimtang sa pagkawala-maglungtad. Ang patay walay kaamgohan, walay mga pagbati, walay mga hunahuna.

Dili-Matapos nga Pagsakit o Komon nga Lubnganan?

Sanglit ang patay wala man maglungtad ug walay panimuot, ang impiyerno dili mahimong usa ka nagdilaab nga dapit sa pagsakit diin mag-antos ang daotan human sa kamatayon. Nan, unsa ba ang impiyerno? Ang pagsusi kon unsay nahitabo kang Jesus human siya mamatay makatabang sa pagtubag sa maong pangutana. Ang magsusulat sa Bibliya nga si Lucas nag-asoy: ‘Si Jesus wala biyai sa Hades [impiyerno, King James Version] ni moagi sa pagkadunot ang iyang unod.’ a (Buhat 2:31) Diin man ang impiyerno nga giadtoan gani ni Jesus? Si apostol Pablo misulat: “Akong gipasa kaninyo . . . nga si Kristo namatay alang sa atong mga sala sumala sa Kasulatan; ug nga siya gilubong, oo, nga siya gibangon sa ikatulo ka adlaw sumala sa Kasulatan.” (1 Corinto 15:3, 4) Busa si Jesus didto sa impiyerno, ang lubnganan, apan wala siya biyai didto, kay siya gibangon, o gibanhaw.

Palandonga usab ang kahimtang sa matarong nga tawo nga si Job, kinsa nag-antos pag-ayo. Kay buot makaikyas sa iyang pag-antos, siya nangaliyupo: “Kinsa bay mohatag kanako niini, nga ikaw magpanalipod unta kanako diha sa impiyerno [Sheol], ug tagoan ako hangtod moagi ang imong kapungot?” b (Job 14:13, Douay Version) Pagkadili-makataronganon ang paghunahuna nga si Job gustong moadto sa init kaayong dapit alang sa panalipod! Alang kang Job, ang “impiyerno” mao lamang ang lubnganan, diin matapos na ang iyang pag-antos. Ang impiyerno diay sa Bibliya mao ang komon nga lubnganan sa katawhan diin ang maayo ug daotang mga tawo moadto.

Impiyerno nga Kalayo—Maut-oton sa Tanan?

Mahimo kaha nga ang kalayo sa impiyerno  maoy simbolo sa maut-oton-sa-tanan, o bug-os, nga kalaglagan? Sa pagpalain sa kalayo gikan sa Hades, o impiyerno, ang Kasulatan nag-ingon: “Gitambog ang kamatayon ug ang Hades ngadto sa linaw nga kalayo.” Ang “linaw” nga gihisgotan dinhi maoy simboliko, sanglit ang kamatayon ug impiyerno (Hades) nga gitambog niini dili man literal nga masunog. ‘Kining linaw nga kalayo nagkahulogan sa ikaduhang kamatayon’—kamatayon nga wala nay paglaom sa pagkabanhaw.—Pinadayag 20:14.

Ang linaw nga kalayo adunay kahulogan nga sama nianang sa “nagkalayong Gehenna [impiyerno nga kalayo, King James Version]” nga gihisgotan ni Jesus. (Mateo 5:22; Marcos 9:47, 48) Ang Gehenna makita ug 12 ka beses diha sa Kristohanon Gregong Kasulatan, ug nagtumong kini sa walog sa Hinnom, nga anaa sa gawas sa mga paril sa Jerusalem. Sa dinhi si Jesus sa yuta, kining waloga gigamit nga labayanan ug basura, “diin gilabay ang patayng mga lawas sa mga kriminal, ug mga patayng hayop, ug tanang ubang matang sa hugaw.” (Smith’s Dictionary of the Bible) Ang kalayo nagpadayon sa pagdilaab tungod kay gidugangan ug asupre aron masunog ang basura. Gigamit ni Jesus ang maong walog ingong tukmang simbolo sa walay-kataposang kalaglagan.

Sama sa Gehenna, ang linaw nga kalayo nagsimbolo sa walay-kataposang kalaglagan. Ang kamatayon ug Hades “gitambog” niana sa pagkaagi nga kana mahanaw sa dihang ang katawhan mapahigawas na gikan sa sala ug sa pagkasinilotan sa kamatayon. Ang tinuyo, dili-mahinulsolong mga makasasala makabaton usab sa ilang “bahin” diha sa maong linaw. (Pinadayag 21:8) Sila usab pagalaglagon sa walay kataposan. Sa laing bahin, kadtong anaa sa handomanan sa Diyos nga atua sa impiyerno—ang komon nga lubnganan sa katawhan—adunay makapahinganghang kaugmaon.

Impiyerno Gikuhaag Sulod!

Ang Pinadayag 20:13 nag-ingon: “Ang dagat mitugyan sa mga patay nga diha niini, ug ang kamatayon ug ang Hades mitugyan sa mga patay nga diha kanila.” Oo, ang impiyerno sa Bibliya kuhaan ug sulod. Sumala sa gisaad ni Jesus, ‘ang takna nagsingabot nga ang tanan nga anaa sa handomanang mga lubnganan makadungog sa tingog ni Jesus ug manggula.’ (Juan 5:28, 29) Bisan pag sa pagkakaron wala na maglungtad diha sa bisan unsang porma, ang milyonmilyong patay nga anaa sa handomanan ni Jehova nga Diyos pagabanhawon, o ibalik sa kinabuhi, diha sa gipasig-uli nga yutan-ong paraiso.—Lucas 23:43; Buhat 24:15.

Sa bag-ong kalibotan sa Diyos, ang binanhaw nga mga tawong nagsunod sa iyang matarong nga mga balaod dili na gayod mamatay pag-usab. (Isaias 25:8) Si Jehova ‘magapahid sa tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.’ Sa tinuoray, “ang unang mga butang nangagi na.” (Pinadayag 21:4) Pagkatalagsaong panalangin ang gitagana alang niadtong anaa sa impiyerno—ang “handomanang mga lubnganan”! Kini nga panalangin sa pagkamatuod maoy igong hinungdan nga kita magkuhag dugang kahibalo bahin kang Jehova nga Diyos ug sa iyang Anak, si Jesu-Kristo.—Juan 17:3.

[Mga footnote]

[Hulagway sa panid 5]

Si Job miampo alang sa panalipod didto sa impiyerno

[Hulagway sa panid 6]

Nagdilaab nga Gehenna—usa ka simbolo sa walay-kataposang kalaglagan

[Hulagway sa panid 7]

‘Kadtong anaa sa handomanang mga lubnganan manggula’