Mga Magmamantala sa Gingharian Nagtaho

‘Ang Pulong sa Diyos Gamhanan’

DIHA sa mainit nga Caribbeanong isla sa Jamaica, kadaghanan sa mga tawo sinati sa Bibliya. Gani, ang King James Version makaplagan halos sa tanang balay, ug naeksperyensiyahan sa pipila ka tawo nga “ang pulong sa Diyos buhi ug gamhanan.” (Hebreohanon 4:12) Kining gahoma makapausab ug mga kinabuhi, sama sa gipakita sa mosunod nga kasinatian.

Mao pay pagpauli gikan sa trabaho sa usa ka tawo nga ginganlag Cleveland sa dihang usa sa mga Saksi ni Jehova ang miduaw kaniya. Human makapaambit ug pipila ka punto gikan sa Kasulatan, gibinlan siya sa Saksi ug tabang sa pagtuon sa Bibliya nga Kahibalo nga Motultol sa Kinabuhing Walay Kataposan. Wala maamgohi ni Cleveland nga ang Pulong sa Diyos mahimong gamhanan diha sa iyang kinabuhi.

Si Cleveland tig-ampo katulo sa usa ka adlaw, nga naghangyo sa Diyos nga tabangan siya sa pagkaplag sa hustong paagi sa pagsimba Kaniya. Kombinsido si Cleveland nga ang iyang mga ginikanan wala magsimba sa hustong paagi, apan human masusi ang ubang mga relihiyon, siya nahigawad. Bisag nakabati na siya bahin sa mga Saksi ni Jehova, nagduhaduha siya kon anaa ba kanila ang kamatuoran. Bisan pa sa iyang mga pagduhaduha, miuyon si Cleveland nga magtuon sa Bibliya uban sa Saksi nga miduaw sa iyang balay. Ngano? Tungod kay buot niyang pamatud-an nga sayop ang mga Saksi!

Sa wala madugay nakat-onan ni Cleveland nga ang iyang imoral nga relasyon uban sa duha ka lainlaing babaye wala makapahimuot sa Diyos. (1 Corinto 6:9, 10) Human sa duha lang ka pagtuon, nakabaton siyag kaisog sa pagputol sa iyang relasyon uban sa mga babaye. Misugod na usab siya sa pagtambong sa Kristohanong mga tigom diha sa Kingdom Hall. Apan nahimo kining lain pang pagsulay.

Aktibo kaayo si Cleveland sa tem sa saker sa iyang komunidad, ug ang mga dula niini nakabalda sa iyang pagtambong sa mga tigom. Unsay iyang buhaton? Bisan pa sa grabeng pagpit-os gikan sa iyang mga kauban sa tem, tigbansay, ug mga higala, nakahukom si Cleveland nga mobiya sa maong tem sa saker. Oo, ang Pulong sa Diyos nagsugod sa paggahom, pag-impluwensiya kaniya alang sa iyang kaayohan!

Ang gahom sa Pulong sa Diyos nadayag na usab sa dihang nagsugod si Cleveland sa pagpaambit sa iyang kahibalo sa Bibliya ngadto sa uban. (Buhat 1:8) Tungod niini, duha sa iyang kanhing mga kauban sa tem nagsugod sa pagtambong sa mga tigom sa mga Saksi ni Jehova. Human mokuwalipikar si Cleveland nga mahimong magmamantala sa maayong balita, nakaplagan niya ang tumang kalipay diha sa ministeryo, nga naggamit sa Pulong sa Diyos sa pagtabang sa uban.

Tungod kay padayong gipalihok sa gahom sa Pulong sa Diyos, sa ngadtongadto si Cleveland nagpasimbolo sa iyang pagpahinungod kang Jehova pinaagi sa pagpabawtismo sa tubig ug nakapribilehiyo sa pag-alagad ingong bug-os-panahong ministro ug usa ka ministeryal nga alagad sa kongregasyon.

Sa Jamaica ug sa tibuok kalibotan, libolibo ka tawo ang nakakat-on nga, sa pagkatinuod, ang Pulong sa Diyos “buhi ug gamhanan.”

[Mapa/Hulagway sa panid 8]

(Alang sa aktuwal nga pagkahan-ay, tan-awa ang publikasyon)

JAMAICA

[Credit Line]

Map and globe: Mountain High Maps® Copyright © 1997 Digital Wisdom, Inc.