Kinabuhi nga Gigamhan sa Patuotuo

NAKASUGAT ka ug tawo sa dihang migawas ka sa imong balay. Napandol ka sa bato. Usa ka matang sa langgam mipiyakpiyak sa gabii. Duna kay nagbalikbalik nga damgo. Kini maoy simple, dili-makadaot nga mga hitabo alang sa daghang tawo. Apan alang sa ubang mga tawo sa Sidlakang Aprika, kini mahimong isipon ingong mga tilimad-on, merida, o mga mensahe nga gikan sa kalibotan sa espiritu. Mahimong suwerte o dimalas ang moabot, depende sa tilimad-on ug sa paghubad niini.

Sa pagkamatuod, ang mga patuotuo gituohan dili lamang sa Aprika. Bisan pag nagkinabuhi sa daghang tuig diha sa usa ka katilingban nga walay giilang diyos, ubay-ubayng mga tawo sa Tsina ug sa mga republika sa kanhing Unyon Sobyet nagtuo gihapon sa mga patuotuo. Diha sa Kasadpang kalibotan, daghan ang mokonsulta sa ilang horoskopyo, mahadlok sa ika-13ng adlaw sa Biyernes, ug maglikay sa itom nga mga iring. Ang ubang mga tawo sa Halayong Amihanan naglantaw sa northern lights ingong merida sa gubat ug kamatay. Sa India, ang AIDS gipakaylap sa mga drayber sa trak kinsa nagtuo nga sila kinahanglang makigsekso aron makapabiling bugnaw ang lawas sa alangiing nga mga adlaw. Sa Japan, ang mga trabahante sa tunel nagtuo nga makadimalas kon mosulod ang babaye sa usa ka tunel nga wala pa mahuman. Ang mga patuotuo daghan usab diha sa propesyonal nga dula. Usa ka magdudulag volleyball miingon nga sunodsunod nga nakadaog siya tungod sa iyang pagsul-ob ug itom nga medyas imbes puti. Ang listahan walay kataposan.

Ikaw komosta? Duna ka bay natago, dili-ikaasoy nga kahadlok? Ikaw ba naapektohan sa “pagtuo, medyo gamayng pagtuo, o batasan nga morag walay makataronganong kahulogan”? Ang imong tubag magpakita kon ang imong kinabuhi gigamhan ba sa patuotuo, kay mao kanay paghubit sa usa ka basahon sa pulong “patuotuo.”

Ang usa ka tawo nga magpaimpluwensiya sa patuotuo diha sa iyang mga desisyon ug sa adlaw-adlawng gimbuhaton nagtugot nga magamhan sa usa ka butang nga wala gayod niya hisabti. Maalamon ba kini? Angay bang magpasakop kita sa ingon niana nga walay-klaro ug tingali daotang impluwensiya? Ang patuotuo ba maoy usa ka kahuyangan nga dili makadaot o makadaot?