Mga Pangutana Gikan sa mga Magbabasa

Nahibalo ba si Abel nga gikinahanglan ang usa ka halad nga hayop aron maangkon ang pag-uyon sa Diyos?

Ang asoy sa Bibliya bahin sa paghimo ni Cain ug Abel sa ilang mga halad maoy mubo kaayo. Sa Genesis 4:3-5, atong mabasa: “Nahitabo sa pagkatapos sa pipila ka panahon nga si Cain nagdalag pipila ka bunga sa yuta ingong halad kang Jehova. Apan kon bahin kang Abel, siya usab nagdalag pipila ka panganay sa iyang panon sa mga hayop, bisan sa ilang matambok nga mga bahin. Karon samtang si Jehova nagtan-aw nga may pag-uyon kang Abel ug sa iyang halad, siya wala magtan-aw nga may pag-uyon kang Cain ug sa iyang halad.”

Wala maghisgot ang Bibliya nga sa wala pa ang maong panghitabo si Jehova mihatag ug espesipikong impormasyon bahin sa mga halad o kon unsang matanga sa mga halad ang dalawaton kaniya. Busa, lagmit ilang kabubut-on lamang nga si Cain ug Abel naghimo sa ilang mga halad. Sila gidid-an pagsulod sa orihinal nga Paraisong puy-anan sa ilang mga ginikanan; gibati na nila ang mga epekto sa sala; ug nabulag na sila sa Diyos. Tungod sa ilang makasasala ug alaot nga kahimtang, ilang gibati gayod nga sila kinahanglang modangop sa Diyos alang sa tabang. Ang pagtanyag ug gasa sa Diyos lagmit maoy kinabubut-ong buhat sa ilang bahin aron maangkon ang pag-uyon sa Diyos.

Ang resulta mao, ang halad ni Abel gidawat sa Diyos apan ang kang Cain wala. Ngano? Tungod ba kay si Abel mihalad sa tukmang mga butang ug si Cain wala? Dili kita makapaneguro nga ang matang sa halad walay kalangkitan bahin sa maong mga butang, sanglit bisan kinsa kanila wala man sultihi kon unsay dalawaton ug kon unsay dili. Hinuon, posible nga dalawaton ang bisan unsang matang. Sa Balaod nga ngadtongadto gihatag ni Jehova sa nasod sa Israel, ang dalawatong mga halad naglakip dili lang sa mga hayop o mga bahin sa hayop kondili ang sinanlag nga lugas, mga binangan nga sebada, pino nga harina, mga tinapay, ug bino gidawat usab. (Levitico 6:19-23; 7:11-13; 23:10-13) Lagmit, ang pisikal nga materyal sa mga halad ni Cain ug Abel dili lang mao ang hinungdan nga ang Diyos midawat sa usa ka halad ug misalikway sa lain.—Itandi ang Isaias 1:11; Amos 5:22.

Kasiglohan sa ulahi, si apostol Pablo miingon: “Tungod sa pagtuo si Abel naghalad sa Diyos ug usa ka halad nga mas labaw ug bili kay sa kang Cain, nga pinaagi niini nga pagtuo siya gipamatud-an nga matarong, nga ang Diyos nagpamatuod labot sa iyang mga gasa.” (Hebreohanon 11:4) Busa, maoy tungod sa pagtuo nga ang Diyos nag-ila nga si Abel maoy matarong. Apan pagtuo sa unsa? Pagtuo sa saad ni Jehova nga iyang itagana ang Binhi, nga maoy ‘magsamad sa ulo sa halas’ ug magpasig-uli sa kalinaw ug kahingpitan nga gipahimuslan sa sinugdan sa tawo. Gikan sa pahayag nga ang Binhi ‘magsamad sa tikod,’ si Abel tingali nangatarongan nga ang usa ka halad nga naglakip sa pag-ula ug dugo mao ang gikinahanglan. (Genesis 3:15) Bisan pa niana, ang kamatuoran mao nga ang pagpahayag sa pagtuo ni Abel maoy naghimo sa iyang halad nga “usa ka halad nga mas labaw ug bili kay sa kang Cain.”

Sa susamang diwa, si Cain gisalikway, dili tungod kay siya naghalad sa sayop nga matang sa halad, kondili tungod kay siya kulang ug pagtuo, sumala sa gipadayag sa iyang mga lihok. Si Jehova tin-awng nagsulti kang Cain: “Kon magbuhat ka ug maayo, dili ba adunay pagbayaw?” (Genesis 4:7) Ang Diyos wala magsalikway kang Cain tungod kay wala mahimuot sa iyang halad. Sa pagkatinuod, kadto maoy “tungod kay ang iyang mga buhat maoy daotan”—nga gipadayag sa kasina, pagdumot, ug sa kataposan pagpatay—nga si Cain gisalikway sa Diyos.—1 Juan 3:12.