Pagpakigbisog—Kanus-a Kini Gantihan ni Jehova?

“PALAKTA ako, kay midangat na ang kaadlawon.”

“Dili ako magpalakat kanimo hangtod nga ako imong panalanginan.”

“Unsa ang imong ngalan?”

“Jacob.”

“Ang imong ngalan dili na pagatawgong Jacob kondili Israel, kay ikaw nakigtigi sa Diyos ug sa mga tawo mao nga ikaw sa kataposan midaog.”—Genesis 32:26-28.

Ang maong makaiikag nga sultiay maoy resulta sa talagsaong pasundayag sa lawasnong kaabtik sa 97-anyos nga si Jacob. Bisan pag ang Bibliya wala magbatbat nga siya maoy atleta, siya nakigdumog o nakiglayog sa tibuok gabii sa usa ka manulonda. Ngano? Si Jacob dulot nga nabalaka sa saad ni Jehova ngadto sa iyang katigulangan—nga iyang panulondon.

Daghang katuigan nga sayosayo pa nakuha ni Jacob ang katungod sa pagkapanganay gikan sa iyang igsoong lalaki nga si Esau baylo sa usa ka panaksang sabaw. Karon si Jacob nakabalita nga si Esau nagsingabot uban ang 400 ka lalaki. Kay nabalaka, si Jacob nagtinguhag kalig-onan sa saad ni Jehova nga ang iyang banay mouswag diha sa yuta tabok sa Suba sa Jordan. Nahiuyon sa iyang mga pag-ampo, si Jacob milihok dayon. Siya nagpadalag daghang gasa ngadto sa nagsingabot nga si Esau. Siya nangandam usab sa pagdepensa, nga nagbahin sa iyang kampo sa duha ug nagpatabok sa iyang mga asawa ug mga anak sa labanganan sa Jabbok. Uban ang pagpakigbisog ug daghang luha, siya karon dugang nanlimbasog pinaagi sa pagpakiglayog sa usa ka manulonda sa tibuok gabii aron ‘siya makapangamuyog pabor alang sa iyang kaugalingon.’—Oseas 12:4; Genesis 32:1-32.

Tagda ang mas naunang pananglitan, si Raquel, ang ikaduha ug labing hinigugmang asawa ni Jacob. Si Raquel nahibalo gayod sa saad ni Jehova sa pagpanalangin kang Jacob. Ang iyang igsoong babaye nga si Lea, ang unang asawa ni Jacob, nanganak ug upat ka anak lalaki samtang si Raquel nagpabiling apuli. (Genesis 29:31-35) Inay mobatig kaluoy sa kaugalingon, siya nagpadayon sa pagpangamuyo kang Jehova diha sa pag-ampo ug milihok nga nahiuyon sa iyang mga pag-ampo. Sama sa gibuhat sa iyang katigulangang si Sara kang Hagar, si Raquel nagdala sa iyang sulugoong babayeng si Bilha ug nagtanyag kaniya ngadto kang Jacob ingon nga segundaryong asawa aron nga, sumala sa giingon ni Raquel, “Ako, bisan ako, makabaton  ug mga anak gikan kaniya.” a Si Bilha nanganak ug duha ka anak lalaki kang Jacob—si Dan ug Neptali. Sa pagkatawo ni Neptali gipahayag ni Raquel ang gidak-on sa iyang emosyonal nga pakigbisog: “Uban ang makigbisogong mga pakigdumog ako nakigdumog sa akong igsoong babaye. Ako migula usab nga mananaog!” Si Raquel dugang gipanalanginan ug duha ka anak lalaki nga iyaha mismo, si Jose ug si Benjamin.—Genesis 30:1-8; 35:24.

Nganong gipanalanginan ni Jehova ang lawasnon ug emosyonal nga mga pagpakigbisog ni Jacob ug Raquel? Ilang giuna ang kabubut-on ni Jehova ug gimahal ang ilang panulondon. Tim-os silang nag-ampo alang sa iyang pag-uyon diha sa ilang mga kinabuhi ug milihok dayon nga nahiuyon sa kabubut-on sa Diyos ug sa ilang mga hangyo.

Sama kang Jacob ug Raquel, daghan karong adlawa ang makapamatuod nga ang pakigbisog gikinahanglan aron madawat ang panalangin ni Jehova. Ang ilang mga panlimbasog kasagarang inubanan sa mga luha, pagkaluya, ug pagbati sa kapakyasan. Usa ka inahang Kristohanon, si Elizabeth, nahinumdom sa pagpakigbisog nga gikinahanglan aron makabalik sa pagtambong nga regular sa Kristohanong mga tigom tapos sa taas nga panahong walay tambongtambong. Kay may lima ka gagmayng mga batang lalaki, dili-magtutuo nga bana, ug 30-kilometros nga biyahe paingon sa kinadul-ang Kingdom Hall, kadto lisod kaayo. “Ang pagpaningkamot nga makatambong nga regular sa mga tigom nagkinahanglag dakong disiplina-sa-kaugalingon, nga akong nahibaloang makaayo kanako ug sa akong mga anak. Nakatabang kadto kanila sa pagsabot nga kini maoy dalan nga angayng subayon.” Gipanalanginan ni Jehova ang iyang mga paningkamot. Sa iyang tulo ka anak lalaki nga aktibo diha sa Kristohanong kongregasyon, ang duha anaa sa bug-os-panahong pag-alagad. Kay nalipay sa ilang espirituwal nga pag-uswag, siya miingon: “Nalupigan nila ako sa espirituwal nga pag-uswag.” Pagkatalagsaong ganti sa iyang pagpakigbisog!

Pagpakigbisog nga Pagagantihan ni Jehova

Ang pagpakigbisog ug pagpaningkamot tino nga may mga balos. Kon mas dako ang atong panlimbasog sa usa ka proyekto o asaynment, mas dako ang katagbawan nga atong madawat isip balos. Kini mao ang paagi sa pagbuhat ni Jehova kanato. “Ang matag tawo angay nga mokaon ug moinom ug magpahimulos sa tanan niyang kahago. Kini ang gasa sa Diyos,” misulat si Haring Solomon. (Ecclesiastes 3:13; 5:18, 19) Apan aron madawat ang panalangin gikan sa Diyos, kinahanglang atong tinoon nga husto ang tumong sa atong mga paningkamot. Pananglitan, makataronganon ba ang pagdahom nga panalanginan ni Jehova ang estilo sa kinabuhi nga ang espirituwal nga mga butang gibutang sa ikaduhang dapit? Ang nagpahinungod nga Kristohanon makalaom ba sa pag-uyon ni Jehova kon siya modawat ug trabaho o promosyon nga magpasabot nga siya dili makapahimulos nga regular sa mopalig-on-sa-pagtuo nga panag-uban ug instruksiyon sa Kristohanong mga tigom?—Hebreohanon 10:23-25.

Ang tibuok-kinabuhi nga paghago sa pagpangagpas ug sekular nga karera o materyal nga kadato dili gayod mosangpot nga “makakita ug maayo” ang usa ka tawo kon kana himoon nga kalimtan na lang ang espirituwal nga mga butang. Si Jesus nagbatbat sa mga resulta sa paningkamot nga sayop pagkapunting diha sa iyang ilustrasyon bahin sa magpupugas. Mahitungod sa binhi nga “napugas taliwala sa mga sampinit,” si Jesus misaysay nga “mao kini siya nga nakadungog sa pulong, apan ang kabalaka niining sistema sa mga butang ug ang malimbongong gahom sa mga bahandi motuok  sa pulong, ug siya dili mamunga.” (Mateo 13:22) Si Pablo nagpasidaan usab sa samang lit-ag ug midugang nga kadtong mosubay sa materyalistikong dalan “mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” Unsa ang pangontra sa maong pagkinabuhi nga makadaot sa espirituwal? Si Pablo nagpadayon: ‘Kalagiw gikan niining mga butanga ug ibutang ang imong paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.’—1 Timoteo 6:9, 11, 17.

Walay pagsapayan sa atong edad o gidugayon sa atong pag-alagad kang Jehova, kitang tanan makakuhag kaayohan sa pagsundog sa pakigbisog nga gipasundayag ni Jacob ug Raquel. Sa ilang tinguha nga uyonan sa Diyos, wala gayod nila hikalimti ang ilang panulondon, bisan pa sa pagkamakalilisang o pagkamakapahiubos tingali sa ilang mga kahimtang. Karong adlawa, ang mga kalisdanan ug mga suliran nga atong giatubang basin sama ka makalilisang, makapahiubos, o makapaguol kaayo. Ang tentasyon mao ang paghunong sa pagpakigbisog ug mahimong laing biktima sa pag-atake ni Satanas. Basin iyang gamiton ang bisan unsang paagi nga magamit niya, mahimong kalingawan o lulinghayaw, mga esport o mga pasatiempo, mga karera o materyal nga kadato, aron makab-ot ang iyang mga katuyoan. Ang tilinguhaong mga resulta sagad isaad apan panagsa rang matuman. Kadtong nalimbongan o nahaylo sa pagtinguha sa maong mga pangagpas kadaghanan makadiskobre nga kana kasagarang mosangko sa kahiubos. Sama kang Jacob ug Raquel sa kakaraanan, atong ugmaron ang espiritu sa tinuod nga pagkamakigbisogon ug magmadaogon batok sa mga panglansis ni Satanas.

Gusto gayod sa Yawa nga makakitang atong dawaton ang kapildihan, nga kita mobati nga ‘ang kahimtang wala nay paglaom. Wala nay mahimo. Wala nay kapuslanan.’ Nan, pagkabililhon nga kitang tanan magbantay batok sa pag-ugmad ug tinamdan nga mosurender na, nga maghunahuna nga ‘walay bisan kinsa nga nahigugma kanako’ ug ‘si Jehova nakalimot na kanako.’ Ang pagpadaog nianang mga hunahunaa makadaot sa kaugalingon. Mahimo kahang gipasabot niana nga surender na kita ug wala na makigbisog hangtod nga atong madawat ang panalangin? Hinumdomi, panalanginan ni Jehova ang atong pagpakigbisog.

Magpadayon sa Pagpakigbisog Alang sa Panalangin ni Jehova

Ang atong pagkalig-on sa espirituwal nagdepende pag-ayo sa pagkasabot nato sa duha ka pangunang kamatuoran bahin sa atong pagkinabuhi isip alagad ni Jehova. (1) Dili kay usa lang ka tawo ang may mga suliran, mga sakit, o may lisod nga mga kahimtang sa kinabuhi, ug (2) si Jehova mamati sa mga pagtuaw niadtong tim-os modangop kaniya alang sa tabang ug panalangin.—Exodo 3:7-10; Santiago 4:8, 10; 1 Pedro 5:8, 9.

Bisan kon unsa ka lisod ang imong kahimtang o limitado ka sa imong hunahuna, ayaw pagpadaog sa “sala nga daling makasabod kanato”—ang kakulang sa pagtuo. (Hebreohanon 12:1) Ipadayon ang pagpakigbisog hangtod nga imong madawat ang panalangin. Magpailob, nga mahinumdom sa tigulang nga si Jacob, nga nakigdumog sa tibuok gabii aron mabatonan ang panalangin. Sama sa mag-uuma nga magpugas sa tingpamulak ug maghulat sa pagpangani, mapailobong hulata ang panalangin ni Jehova diha sa imong espirituwal nga kalihokan, bisan pag unsa ka diyutay ang imong mabuhat sumala sa imong hunahuna. (Santiago 5:7, 8) Ug hinumdomi kanunay ang mga pulong sa salmista: “Kadtong nagapugas ug binhi uban ang mga luha magaani gayod uban ang hugyaw sa kalipay.” (Salmo 126:5; Galacia 6:9) Barog nga malig-on, ug magpabiling nahiapil sa mga nagpakigbisog.

[Footnote]