Usa ka Leksiyon Gikan sa Cigueña

“BISAN ang cigueña sa kalangitan—kini nahibalo pag-ayo sa iyang tinudlong kapanahonan . . . Apan kon bahin sa akong katawhan, sila wala mahibalo sa paghukom ni Jehova.” (Jeremias 8:7) Pinaagi sa maong mga pulong, gimantala ni manalagnang Jeremias ang paghukom ni Jehova batok sa apostatang katawhan sa Juda, kinsa mibiya kang Jehova nga ilang Diyos ug miliso sa pagsimba sa langyawng mga diyos. (Jeremias 7:18, 31) Nganong gipili man ni Jeremias ang cigueña ingong pananglitan alang sa dili-matinumanong mga Hudiyo?

Ang cigueña, ilabina ang puti nga cigueña, kanunayng makit-an sa mga Israelinhon samtang molalin kini latas sa mga kayutaan sa Bibliya. Ang Hebreohanong ngalan alang niining dako, tag-as-ug-bitiis nga langgam nga tig-ubog mao ang peminino nga porma sa pulong nga nagkahulogang “maunongon; usa nga adunay mahigugmaong-kalulot.” Haom kini, tungod kay dili sama sa kadaghanang ubang mga langgam, ang laki ug baye nga puting mga cigueña magkaparis hangtod sa kamatayon. Human makapalabay sa tingtugnaw diha sa mas init nga mga rehiyon, kadaghanan sa mga cigueña mobalik tuigtuig, kasagaran ngadto sa mao gihapong salag nga ilang gigamit kaniadto.

Ang kinaiyanhong paggawi sa mga cigueña nag-ilustrar sa hiyas nga pagkamaunongon sa ubang talagsaong mga paagi. Ang laki ug baye nga mga langgam mag-ambitay sa paglumlom sa mga itlog ug sa pagpakaon sa mga piso. Ang librong Our Magnificent Wildlife nag-ingon: “Ingong mga ginikanan, talagsaon ang pagkamatinumanon sa mga cigueña sa usag usa. Usa ka laki nga cigueña sa Alemanya milupad ngadto sa mga alambre sa koryente ug nakoryentehan. Ang paris niini padayong naglumlom sa mga itlog nga nag-inusara sulod sa 3 ka adlaw, nga sa maong panahon mobiya lamang kini sa salag kausa sa makadiyot nga panahon aron mangitag pagkaon. . . . Sa laing kaso, sa dihang ang baye nga cigueña napusilan, ang amahan mao ang nag-atiman sa mga piso.”

Sa pagkatinuod, tungod sa kinaiyanhong pagpakita ug pagkamaunongon ngadto sa tibuok-kinabuhing paris niini ug malulotong pag-atiman sa mga piso niini, ang cigueña nagtuman sa kahulogan sa ngalan niini—“maunongon.” Busa, ang mga cigueña nagsilbing haom kaayong pananglitan alang sa dili-matinumanon ug gahian nga mga Israelinhon.

Alang sa daghang tawo karong adlawa, ang pagkamaunongon maoy kinaraan na nga ideya—dalayegon apan dili praktikal. Ang pagkaylap sa diborsiyo, pag-abandonar, pagdispalko ug salapi, ug ubang mga matang sa panglimbong nagpaila nga ang pagkamaunongon wala na pabilhi. Sa kasukwahi, ang Bibliya nagpabili pag-ayo sa pagkamaunongon nga gitukmod sa gugma ug kalulot. Kusganong gidasig niini ang mga Kristohanon nga “magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” (Efeso 4:24) Oo, ang bag-ong pagkatawo motabang kanato nga magmaunongon, apan makakat-on usab kitag leksiyon bahin sa pagkamaunongon gikan sa cigueña.