Yoga—Ehersisyo Lang o May Lain pa nga Nalangkit?

ANG pagbaton sa dili-tambok ug mahimsog nga lawas kanunayng gihunahuna sa mga tawo karon. Tungod niana daghang tawo modangop sa mga gymnasium ug sa mga klab bahin sa maayong panglawas alang sa tabang. Tungod sa samang hinungdan, libolibong tawo sa kanasoran sa Kasadpan mingdangop sa Sidlakanhong arte sa yoga.

Ang mga tawo nga mobatig kapit-osan, depresyon, ug kapakyasan modangop usab sa yoga alang sa paghupay ug mga solusyon. Sukad ilabina sa katuigang 1960, ang dekada sa mga hippie ug sa flower children o mga batan-on nga nagduso sa gugma, katahom ug kalinaw, ang interes bahin sa mga relihiyon sa Sidlakan ug sa misteryosong mga tulumanon niini mikaylap sa tibuok Kasadpan. Ang transcendental meditation, nga naggikan sa yoga, gipabantog sa mga bituon sa puting tabil ug sa rock nga mga musikero. Tungod sa nagdakong kaikag sa yoga, kita makasukna: ‘Ang yoga ba ehersisyo lang nga makahatag ug mahimsog, dili-tambok nga lawas ug kalinaw sa hunahuna sa tig-ehersisyo? Mahimo ba nga buhaton ang yoga nga walay relihiyosong mga kalangkitan? Ang yoga angay ba sa mga Kristohanon?’

Ang Sinugdanan sa Yoga

Ang gigikanan sa pulong nga “yoga” konektado sa iya sa Ingles nga pulong “yoke.” Kini mahimong magpasabot sa pag-usa o pagyugo sa tingob o pagbutang ilalom sa usa ka yugo, pagyugo o paggahom. Alang sa Hindu, ang yoga maoy usa ka teknik o sistema sa pagdisiplina nga mosangpot sa pakig-usa uban sa dakong labaw-kinaiyanhong puwersa o espiritu. Gibatbat kini ingong “pagyugo sa tanang puwersa sa lawas, hunahuna ug kalag ngadto sa Diyos.”

Kanus-a nagsugod ang kasaysayan sa yoga? Ang mga pigura sa mga tawong nagyaka sa nagkalainlaing mga posisyon sa yoga makita diha sa mga prangkeyo nga makaplagan sa Indus Valley, diha sa presenteng-adlaw nga Pakistan. Gipetsahan sa mga arkeologo ang sibilisasyon sa Indus Valley nga maoy tali sa ikatulo ug ikaduhang mga milenyo W.K.P., nga duol sa panahon sa kultura sa Mesopotamia. Ang karaang mga butang nga gikan sa maong duha ka dapit naghulagway sa usa  ka lalaki, nga maoy hawas sa usa ka diyos, nga nagkoronag mga sungay sa hayop ug gilibotan sa mga hayop, nga magpahinumdom kang Nimrod, ang “gamhanang mangangayam.” (Genesis 10:8, 9) Ang mga Hindu nag-ingon nga ang mga pigurang nagyaka diha sa mga posisyon sa yoga maoy mga hulagway sa diyos nga si Siva, ang ginoo sa kahayopan ug ginoo sa yoga, kinsa sagad gisimba nga ginamit ang lingam, nga maoy simbolo sa kinatawo. Busa, ang librong Hindu World nagtumong sa yoga ingong “usa ka hugpong sa mga tulumanon sa paghikaw sa kaugalingon, nga naggikan ilabina una pa sa panahong Aryan, nga adunay mga tulumanong iya sa daghang karaang mga tinuohan ug mga selebrasyon.”

Ang mga metodo sa yoga sa sinugdan gipasa sa binabang paagi. Unya gisulat kana nga detalyado sa Indian nga makinaadmanon sa yoga nga si Patañjali ingong Yoga Sutra, nga nagpadayon nga pangunang basahon sa instruksiyon sa yoga. Sumala ni Patañjali, ang yoga maoy “sistematikong panlimbasog sa pagkab-ot sa kahingpitan, pinaagi sa pagkontrolar sa nagkalainlaing mga bahin sa kinaiyanhong katakos sa tawo, nga lawasnon ug may kalabotan sa kaisipan.” Sukad sa pagsugod niini hangtod karon, ang yoga maoy di-malaksing bahin sa mga relihiyon sa Sidlakan, ilabina karon ang Hinduismo, Jainismo, ug Budhismo. Ang pipila ka tig-ehersisyo sa yoga nagtuo nga kini moagak kanila sa pagkab-ot sa moksha, o kagawasan, pinaagi sa pagpakighiusa sa motuhop-sa-tanan nga espiritu.

Busa kita mosukna na usab: ‘Mahimo bang buhaton ang yoga ingon lang nga lawasnong ehersisyo aron maugmad ang mahimsog nga lawas ug relaks nga kaisipan, nga walay kalangkitan sa relihiyon?’ Tungod sa sinugdanan niini, ang tubag maoy dili gayod.

Asa Ka Dad-on sa Yoga?

Ang tumong sa yoga ingong sistema sa pagdisiplina mao ang pagdala sa usa ka tawo ngadto sa espirituwal nga kasinatian sa ‘pagkanayugo’ o pagkanahiusa sa usa ka labaw-tawhanong espiritu. Apan unsa ba ang maong espiritu?

Sa Hindu World, ang awtor nga si Benjamin Walker nag-ingon bahin sa yoga: “Kini mahimong usa ka karaang sistema sa mga rituwal sa salamangka, ug sa kahulogan niini ang yoga may diwa gihapon sa okultismo ug panagna.” Moadmitir ang mga pilosopong Hindu nga ang pagbuhat sa yoga makahatag ug labaw-kinaiyanhong mga puwersa, bisan pag sila sagad moingon nga dili kini ang pangunang tumong sa yoga. Pananglitan, diha sa librong Indian Philosophy, ang kanhi presidente sa India, si Dr. S. Radhakrishnan, nag-ingon bahin sa tawong nagyoga nga “ang pagkontrolar sa lawas pinaagi sa mga posisyon mosangpot nga ang usa dili mobati sa sobrang kainit ug kabugnaw. . . . Ang tawong nagyoga makakita ug makadungog sa layo . . . Posible ang pagpasa sa ideya gikan sa usa ka tawo ngadto sa lain nga wala gamita ang naandang mga katakos sa pagkomunikar. . . . Mahimo sa tawong nagyoga nga ang iyang lawas himoong dili makita.”

Ang dayag nga pananglitan sa usa ka nagyoga nga naghigda sa mga lansang o naglakaw sa nagsigang mga baga mahimong daw panglansis alang sa pipila ug kataw-anan alang sa uban. Apan kini kasagarang mga hitabo sa India, sama ra sa batasan sa pagtindog nga ginamit ang usa ka tiil samtang direktang nagtutok sa adlaw sa daghang oras ug sa pag-utong nga mahimong posible ang paglubong sa usa ka tawo diha sa balas sa hataas nga panahon. Sa Hunyo 1995, ang The Times of India mitaho nga ang usa ka batang babaye nga tulo ka tuig ug tunga ang edad naghayang nga wala sa kaugalingong panghunahuna samtang gipaagi sa iyang dughan ang sakyanang may timbang nga kapin sa 750 ka kilo. Sa katingala sa panon sa katawhan, sa iyang pagmata siya wala gayod maunsa. Ang taho midugang: “Kadto gahom gayod sa salamangka.”

Sa walay duhaduha, walay tawong normal ang makahimo sa bisan hain nianang lisod nga mga buhat. Busa, ang usa ka Kristohanon makasukna: Ilhanan sa unsa kanang talagsaong mga hitabo? Gikan ba kana ni Jehova nga Diyos, “ang Labing Hataas ibabaw sa tibuok nga yuta,” o gikan ba kana sa laing tinubdan? (Salmo 83:18) Ang Bibliya tin-aw niining puntoha. Sa dihang ang mga Israelinhon hapit nang mosulod sa Yutang Saad, nga gipuy-an sa mga taga-Canaan, si Jehova nagsugo sa mga anak sa Israel pinaagi ni Moises: “Dili ka magtuon sa pagbuhat sumala sa dulumtanang mga butang sa maong mga nasod.” Unsang “dulumtanang mga butang”? Si Moises nagpasidaan batok kang “bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga  barangan.” (Deuteronomio 18:9, 10) Kining mga butanga maoy dulumtanan sa Diyos tungod kay kini maoy mga buhat sa mga demonyo ug sa makasasalang unod.—Galacia 5:19-21.

Dili Pilionon sa mga Kristohanon

Bisan pag ang mga instruktor bahin sa maayong panglawas tingali dili mouyon sa gipahayag sa itaas, ang yoga dili lang lawasnong mga ehersisyo. Ang librong Hindu Manners, Customs and Ceremonies nag-asoy sa mga kasinatian sa duha ka bag-ohang tumutuon sa yoga nga giniyahan sa usa ka guru. Ang usa nakutlong miingon: “Gihimo ko ang labaw-tawhanong mga paningkamot sa pag-utong kutob sa maarangan, ug miginhawa lamang sa dihang kakuyapon na ako. . . . Usa ka adlaw, sa udtong tutok, sa akong hunahuna ako nakakita ug dan-ag nga bulan, nga daw nag-abante ug nagkilingkiling. Sa laing higayon sa akong hunahuna ako gibukotan ug bagang kangitngit sa udtong tutok. Ang akong direktor . . . nalipay kaayo sa gisugilon ko kaniya kining mga panan-awona. . . . Dili madugay, gipasaligan niya ako, makasinati na gayod akog mas makapahinganghang mga resulta sa akong debosyon.” Miasoy ang ikaduhang lalaki: “Gisugo niya ako sa pagtutok sa langit kada adlaw nga walay pagpamilok o pag-usab sa akong posisyon. . . . May higayon nga sa akong hunahuna ako nakakitag mga kidlap sa kalayo diha sa kahanginan; sa laing mga higayon ako daw nakakitag nagdilaab nga linginong mga butang ug ubang mga bulalakaw. Nalipay kaayo ang akong magtutudlo sa kalamposan sa akong mga paningkamot.”

Ang talagsaong mga talan-awon lagmit mao ang giisip sa mga guru nga angayng mga resulta nga motultol sa tinuod nga tumong sa mga ehersisyo sa yoga. Oo, ang pangunang tumong sa yoga mao ang moksha, nga gipatin-aw ingon nga pagpakig-usa uban sa walay-personalidad nga dakong espiritu. Kini gibatbat ingong “ang (tinuyong) pagpahunong sa kinaiyanhong katakos sa kaisipan.” Kini tin-aw nga kasukwahi sa tumong nga gipahayag alang sa mga Kristohanon, kinsa gitambagan: “Itugyan ang inyong mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pagpangatarongan. Ug hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”—Roma 12:1, 2.

Ang pagpili sa lawasnong ehersisyo nga himoon maoy butang pagahukman sa matag usa. Bisan pa niana, dili itugot sa mga Kristohanon ang bisan unsang butang—mahimong lawasnong pagbansay, pagkaon, pag-inom, besti, kalingawan, o laing butang—nga magdaot sa ilang relasyon uban kang Jehova nga Diyos. (1 Corinto 10:31) Alang niadtong mag-ehersisyo alang lamang sa ilang kahimsog, adunay daghang metodo nga masunod nga dili mailalom sa impluwensiya sa espiritismo ug okultismo. Pinaagi sa paglikay sa mga tulumanon ug mga tinuohan nga nagsukad sa bakak nga relihiyon, kita makapanglantaw sa panalangin sa Diyos sa matarong nga bag-ong sistema sa mga butang diin kita makapahimulos sa hingpit nga maayong lawas ug kaisipan hangtod sa hangtod.—2 Pedro 3:13; Pinadayag 21:3, 4.

[Mga hulagway sa panid 22]

Daghan nagpahimulos sa makapahimsog nga mga ehersisyo nga wala mailalom sa impluwensiya sa espiritismo