“Ako Nagtagana ug Sumbanan Alang Kaninyo”

“Kamo angay na unta nga mahimong mga magtutudlo tungod sa panahon.”—HEBREOHANON 5:12.

1. Nganong ang mga pulong sa Hebreohanon 5:12 medyo makapabalaka sa usa ka Kristohanon?

 SAMTANG gibasa nimo ang inspiradong mga pulong sa atong temang teksto, medyo nabalaka ka ba bahin sa imong kaugalingon? Kon mao, wala ka mag-inusara. Ingong mga sumusunod ni Kristo, kita nahibalo nga kita kinahanglang mahimong mga magtutudlo. (Mateo 28:19, 20) Kita nahibalo nga tungod sa mga panahon nga atong gikinabuhian dinalian nga mahimo kitang hanas nga mga magtutudlo kutob sa atong maarangan. Ug kita nahibalo nga ang atong pagpanudlo magkahulogan pa gani ug kinabuhi o kamatayon alang niadtong atong gitudloan! (1 Timoteo 4:16) Nan, makataronganon nga pangutan-on tingali nato ang atong kaugalingon: ‘Ako ba gayod nahimo nang magtutudlo ingon sa gidahom kanako? Sa unsang paagi ako mouswag?’

2, 3. (a) Sa unsang paagi gipatin-aw sa usa ka magtutudlo ang pundasyon sa maayong pagpanudlo? (b) Unsang sumbanan ang gihatag ni Jesus kanato maylabot sa pagpanudlo?

² Ang maong mga kabalaka dili angayng magpaluya sa atong buot. Kon isipon nato ang pagpanudlo ingong usa ka butang nga nagkinahanglan ug pipila ka linaing teknikal nga mga kahanas, basin malisdan kita pag-ayo sa pag-uswag. Apan, ang pundasyon sa maayong pagpanudlo dili ang pamaagi kondili usa ka butang nga mas hinungdanon pa niana. Matikdi kon unsay gisulat sa usa ka eksperyensiyadong magtutudlo diha sa usa ka libro bahin sa maong ulohan: “Ang maayong pagpanudlo wala magdepende sa espesipikong mga pamaagi o mga estilo, mga plano o mga lihok. . . . Ang pagpanudlo sa panguna nagdepende sa gugma.” Siyempre, ang iyang panglantaw mao kanang iyaha sa sekular nga magtutudlo. Bisan pa niana, ang iyang punto mahimong mas mapadapat pa sa pagpanudlo nga atong gihimo ingong mga Kristohanon. Sa unsang paagi?

³ Ang atong Ehemplo nga magtutudlo walay lain kondili si Jesu-Kristo, kinsa miingon sa iyang mga sumusunod: “Ako nagtagana ug sumbanan alang kaninyo.” (Juan 13:15) Ang iyang gitumong mao ang iyang panig-ingnan sa pagpakitag pagkamapainubsanon, apan ang sumbanan nga gihatag ni Jesus alang kanato tinong naglakip sa iyang labing hinungdanong buluhaton ingong tawo dinhi sa yuta—kanang pagtudlo sa mga tawo sa maayong balita sa Gingharian sa Diyos. (Lucas 4:43) Tungod niini, kon mopili ka ug usa ka pulong sa paghubit sa ministeryo ni Jesus, lagmit ang pilion nimo mao ang pulong nga “gugma,” dili ba? (Colosas 1:15; 1 Juan 4:8) Ang gugma ni Jesus alang sa iyang langitnong Amahan, si Jehova, mao ang kinalabwan. (Juan 14:31) Apan, ingong magtutudlo, si Jesus nagpakita ug gugma sa duha pa ka paagi. Gihigugma niya ang mga kamatuoran nga iyang gitudlo, ug gihigugma niya ang mga tawo nga iyang gitudloan. Hatagan natog dakong pagtagad kining duha ka bahin sa sumbanan nga iyang gihatag kanato.

Usa ka Dugay Nang Gugma sa mga Kamatuoran nga Gikan sa Diyos

4. Sa unsang paagi si Jesus nakaugmad ug gugma alang sa mga pagtulon-an ni Jehova?

⁴ Ang tinamdan sa magtutudlo ngadto sa iyang itudlo dunay dakong epekto sa kalidad sa iyang pagtudlo. Ang bisan unsang kakulang sa interes lagmit  nga makita ug makatakod sa iyang mga estudyante. Si Jesus duna gayoy interes sa bililhong mga kamatuoran nga iyang gitudlo bahin kang Jehova ug sa Iyang Gingharian. Dako kaayo ang gugma ni Jesus alang niini. Naugmad na niya ang maong gugma sa estudyante pa siya. Latas sa dugayng panahon sa wala pa siya maglungtad ingong tawo, ang bugtong Anak maoy maikagon nga tigkat-on. Nasulat sa Isaias 50:4, 5 kining haom nga mga pulong: “Ang Soberanong Ginoong Jehova naghatag kanako sa dila sa mga tinudloan, aron ako mahibalo kon unsaon pagtubag sa gikapoy pinaagig pulong. Siya nagapukaw kada buntag; siya nagapukaw sa akong igdulungog aron makadungog sama sa mga tinudloan. Ang Soberanong Ginoong Jehova nagbukas sa akong igdulungog, ug ako, sa akong bahin, dili masuklanon. Wala ako moliko sa sukwahing direksiyon.”

5, 6. (a) Unsay dayag nga naeksperyensiyahan ni Jesus sa iyang bawtismo, uban sa unsang epekto nganha kaniya? (b) Nganong lahi si Jesus kang Satanas maylabot sa paggamit sa Pulong sa Diyos?

⁵ Samtang nagdako ingong tawo dinhi sa yuta, si Jesus nagpadayon sa pagpakitag gugma ug diyosnong kaalam. (Lucas 2:52) Dayon, sa panahon sa iyang bawtismo, diha siyay talagsaong eksperyensiya. “Ang langit nabuksan,” matod pa sa Lucas 3:21. Dayag nga nahinumdoman ni Jesus niadtong tungora ang panahon sa wala pa siya maglungtad ingong tawo. Human niana siya migugol ug 40 ka adlaw nga nagpuasa sa kamingawan. Lagmit gayong nahimuot siya pag-ayo sa pagpalandong sa daghang higayon nga gitudloan siya ni Jehova didto sa langit. Apan, wala madugay ang iyang gugma alang sa mga kamatuoran sa Diyos gisulayan.

⁶ Sa dihang si Jesus gikapoy ug gigutom, si Satanas naningkamot sa pagtental kaniya. Pagkalahi niining duha ka anak sa Diyos! Silang duha mikutlo gikan sa Hebreohanong Kasulatan—apan uban sa lahi gayod nga tinamdan. Gituis ni Satanas ang Pulong sa Diyos, nga dili-matinahorong naggamit niana sa pagpalambo sa iyang kaugalingong mga katuyoan. Sa pagkatinuod, kanang maong rebelde nagtamay gayod sa mga kamatuoran nga gikan sa Diyos. Sa laing bahin, gikutlo ni Jesus ang Kasulatan uban ang dayag nga gugma, nga mainampingong naggamit sa Pulong sa Diyos sa matag tubag. Si Jesus naglungtad na sa wala pa gisulat kanang inspiradong mga pulong, bisan pa niana gitahod niya kini pag-ayo. Kini maoy bililhong mga kamatuoran gikan sa iyang langitnong Amahan! Giingnan niya si Satanas nga ang maong mga pulong gikan kang Jehova mas hinungdanon pa kay sa pagkaon. (Mateo 4:1-11) Oo, gihigugma ni Jesus ang tanang kamatuoran nga gitudlo ni Jehova kaniya. Apan, sa unsang paagi gipakita niya ang maong gugma ingong magtutudlo?

Gugma Alang sa mga Kamatuoran nga Iyang Gitudlo

7. Nganong naglikay si Jesus sa pagmugna sa iyang kaugalingong mga pagtulon-an?

⁷ Ang gugma ni Jesus alang sa mga kamatuoran nga iyang gitudlo kanunayng nadayag. Kon buot hunahunaon, lagmit dali ra siyang makamugna sa iyang kaugalingong mga ideya. Nabatonan niya ang dako kaayong kahibalo ug kaalam. (Colosas 2:3) Bisan pa niana, sublisubling gipahinumdoman niya ang iyang mga mamiminaw nga ang tanan nga iyang gitudlo naggikan, dili kaniya, kondili sa iyang langitnong Amahan. (Juan 7:16; 8:28; 12:49; 14:10) Gihigugma niya pag-ayo ang mga kamatuoran gikan sa Diyos nga dili niya kini pulihan sa iyang kaugalingong panghunahuna.

8. Sa sinugdanan sa iyang ministeryo, sa unsang paagi naghatag si Jesus ug sumbanan sa pagsalig sa Pulong sa Diyos?

⁸ Sa dihang gisugdan ni Jesus ang iyang publikong ministeryo, naghatag dayon siya ug sumbanan. Tagda ang paagi nga una niyang gipahibalo sa katawhan sa Diyos nga siya mao ang gisaad nga Mesiyas. Basta ba lang siyang mitungha atubangan sa mga panon sa katawhan, nga nagmantala sa iyang kaugalingon nga mao ang Kristo, ug dayon naghimog talagsaong mga milagro aron sa pagpamatuod niana? Wala. Miadto siya sa sinagoga, diin nabatasan sa katawhan sa Diyos ang pagbasa gikan sa Kasulatan. Didto siya nagbasa ug kusog sa tagna sa Isaias 61:1, 2 ug nag-ingon nga kining matagnaong mga kamatuoran mapadapat kaniya. (Lucas 4:16-22) Ang iyang daghang milagro nakatabang sa pagpalig-on nga siya gipaluyohan ni Jehova. Bisan pa niana, kanunay siyang nagsalig sa Pulong sa Diyos diha sa iyang pagpanudlo.

9. Sa iyang mga pakiglabot sa mga Pariseo, sa unsang paagi gipakita ni Jesus ang iyang maunongong gugma alang sa Pulong sa Diyos?

⁹ Sa dihang gihagit si Jesus sa relihiyosong mga kaaway, wala siya makigtigi kanila maylabot sa kahibalo, bisan tuod dali ra siyang makadaog sa maong panagtigi. Hinunoa, iyang gitugotan ang Pulong sa Diyos nga maoy mopanghimakak kanila. Hinumdomi, pananglitan, sa dihang nag-akusar ang mga Pariseo nga ang mga sumusunod ni Jesus milapas sa balaod sa Igpapahulay  pinaagi sa pagpangutlo ug pipila ka uhay diha sa uma ug pagkaon niana samtang nanglabay sila. Si Jesus mitubag: “Wala ba kamo makabasa sa gibuhat ni David sa dihang gigutom siya ug ang mga tawo nga kauban niya?” (Mateo 12:1-5) Siyempre, kadtong nagpakamatarong-sa-kaugalingon nga mga tawo lagmit nakabasa na nianang inspiradong asoy nga nasulat diha sa 1 Samuel 21:1-6. Kon mao, napakyas sila sa pagsabot sa hinungdanong leksiyon niini. Apan, labaw pa ang gihimo ni Jesus kay sa pagbasa lamang sa asoy. Gipalandong niya kana ug gitisok sa kasingkasing ang mensahe niana. Gihigugma niya ang mga prinsipyo nga gitudlo ni Jehova pinaagi sa maong bahin sa Kasulatan. Busa gigamit niya ang maong asoy, maingon man ang usa ka pananglitan gikan sa Moisesnong Balaod, aron sa pagpadayag sa balanseng espiritu sa Balaod. Sa susama, ang maunongong gugma ni Jesus nagtukmod kaniya sa pagdepensa sa Pulong sa Diyos batok sa mga paningkamot sa relihiyosong mga lider sa pagtuis niana alang sa ilang kaayohan o tagoan kana ilalom sa makapalibog nga tawhanong mga tradisyon.

10. Sa unsang paagi gituman ni Jesus ang mga tagna maylabot sa kalidad sa iyang pagpanudlo?

¹⁰ Ang gugma ni Jesus sa kamatuoran nga iyang gitudlo dili gayod magtugot kaniya sa pagtudlo nga wala lamay paghunahuna, sa paagi nga makalaay o walay gipakitang emosyon. Ang inspiradong mga tagna nagsugyot nga ang Mesiyas mosulti uban ang ‘kamadanihon sa mga ngabil,’ ginamit ang “mga pulong nga hamili.” (Salmo 45:2; Genesis 49:21) Gituman ni Jesus kanang maong mga tagna pinaagi sa paghimo sa iyang mensahe nga makaiikag ug buhi, nga naggamit ug “madanihong mga pulong” samtang siya nagtudlo sa mga kamatuoran nga gihigugma niya pag-ayo. (Lucas 4:22) Sa walay duhaduha ang iyang kadasig nagpabuhi sa mga ekspresyon sa iyang nawong, ug ang iyang mga mata midan-ag uban ang buhing interes sa iyang itudlo. Pagkamakalilipay gayod kaha ang pagpaminaw kaniya, ug pagkamaayong sumbanan nga sundon nato sa dihang makigsulti kita sa uban bahin sa atong nakat-onan!

11. Nganong ang mga katakos ni Jesus ingong magtutudlo wala gayod maghimo kaniyang mapagarbohon?

¹¹ Ang daghan bang nasabtan ni Jesus sa mga kamatuoran nga gikan sa Diyos ug ang iyang makapadaning sinultihan nagtukmod kaniya sa pagpasigarbo? Kana maoy kasagarang mahitabo sa kaso sa tawhanong mga magtutudlo. Apan, hinumdomi nga si Jesus maoy maalamon sa diyosnong paagi. Ang maong kaalam dili motugot ug pagkamapahitas-on, kay “ang kaalam anaa sa mga makasaranganon.” (Proverbio 11:2) Diha pay lain nga nakapugong kang Jesus sa pagkahimong mapagarbohon o mapahitas-on.

Gihigugma ni Jesus ang mga Tawo nga Iyang Gitudloan

12. Sa unsang paagi gipakita ni Jesus nga dili niya buot nga ang iyang mga sumusunod mobating ubos ug mahadlok kaniya?

¹² Ang halalom nga gugma ni Jesus alang sa mga tawo kanunayng makita diha sa iyang pagpanudlo. Ang iyang pagpanudlo wala gayod mopabati sa mga tawo nga ubos o nahadlok, dili sama nianang sa garbosong mga tawo. (Ecclesiastes 8:9) Human makakita sa usa sa mga milagro ni Jesus, si Pedro nahingangha pag-ayo, ug siya mihapa sa tiilan ni Jesus. Apan dili gusto ni Jesus nga ang iyang mga sumusunod mobati ug dili-maayong matang sa kahadlok kaniya. Maluloton siyang miingon, “Ayaw na kahadlok” ug dayon gisultihan niya si Pedro bahin sa kulbahinam nga buluhaton nga paghimog tinun-an nga niana siya makigbahin. (Lucas 5:8-10) Buot ni Jesus nga ang iyang mga sumusunod mapalihok sa ilang kaugalingong gugma sa bililhong mga kamatuoran bahin sa Diyos, dili sa kahadlok sa ilang instruktor.

13, 14. Sa unsang mga paagi nga si Jesus nagpasundayag ug empatiya alang sa katawhan?

¹³ Ang gugma ni Jesus alang sa katawhan nga  iyang gitudloan nadayag usab sa empatiya nga iyang gibati alang kanila. “Sa pagkakita sa mga panon sa katawhan siya naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) Siya mibatig kaluoy sa ilang miserableng kahimtang ug napalihok sa pagtabang kanila.

¹⁴ Matikdi ang pagpakita ni Jesus ug empatiya sa laing higayon. Sa dihang ang usa ka babaye nga may talinugo miduol kaniya taliwala sa panon ug mihikap sa sidsid sa iyang besti, ang babaye naayo sa milagrosong paagi. Gibati ni Jesus nga ang gahom mibiya kaniya, apan wala niya makita kon kinsay naayo. Miinsistir siya nga pangitaon ang babaye. Ngano? Dili aron badlongon siya tungod sa paglapas sa Balaod o sa mga lagda sa mga eskriba ug mga Pariseo, nga maoy iyang gikahadlokan. Hinunoa, siya miingon kaniya: “Anak, ang imong pagtuo nakapaayo kanimo. Lakaw nga malinawon, ug mamaayo na ang imong lawas gikan sa imong grabeng sakit.” (Marcos 5:25-34) Matikdi ang empatiya nga gipakita nianang mga pulonga. Dili kay basta miingon lamang siya, “Mamaayo ka.” Hinunoa, siya miingon: “Mamaayo na ang imong lawas gikan sa imong grabeng sakit.” Dinhi gigamit ni Marcos ang usa ka pulong nga literal nga nagpasabot ug “paglapdos,” usa ka matang sa paglatigo nga kasagarang gigamit ingong pagsakit. Busa, giila ni Jesus nga ang iyang sakit nagpaantos kaniya, tingali grabeng pisikal ug emosyonal nga kasakit. Si Jesus nagpakitag empatiya kaniya.

15, 16. Unsang mga hitabo sa ministeryo ni Jesus ang nagpasundayag nga nangita siya ug maayong hiyas diha sa mga tawo?

¹⁵ Si Jesus nagpakita usab ug gugma alang sa katawhan pinaagi sa pagpangita ug maayong mga hiyas diha kanila. Tagda kon unsay nahitabo sa dihang nahimamat niya si Natanael, nga sa ulahi nahimong apostol. “Nakita ni Jesus si Natanael nga nagpaingon kaniya ug nag-ingon bahin kaniya: ‘Tan-awa, tino nga usa ka Israelinhon, nga kaniya walay limbong.’” Sa milagrosong paagi, nakita ni Jesus ang kasingkasing ni Natanael, busa daghan siyag nahibaloan bahin kaniya. Siyempre, si Natanael dili gayod hingpit. Siya may mga sayop, sama kanatong tanan. Gani, sa dihang nakadungog siya bahin kang Jesus, siya pintok nga miingon: “Aduna bay maayo nga gikan sa Nasaret?” (Juan 1:45-51) Apan, sa tanang butang nga mahimong isulti bahin kang Natanael, si Jesus mipili ug dalayegong butang nga maoy hatagag dakong pagtagad, ang pagkamatinud-anon sa maong tawo.

¹⁶ Sa susama, sa dihang ang usa ka opisyal sa kasundalohan—tingali usa ka Hentil, usa ka Romano—miduol ug mihangyo kang Jesus nga ayohon ang iyang nagmasakiton nga ulipon, si Jesus nahibalo nga ang sundalo may mga sayop. Ang usa ka opisyal sa kasundalohan niadtong panahona lagmit adunay kanhing estilo sa kinabuhi nga napuno sa daghang buhat sa kapintasan, pag-ula ug dugo, ug bakak nga pagsimba. Bisan pa niana, gihatagan ni Jesus ug dakong pagtagad ang usa ka butang nga maayo—ang talagsaong pagtuo sa maong tawo. (Mateo 8:5-13) Sa ulahi, sa dihang si Jesus misulti ngadto sa mamumuhat ug daotan nga nagbitay sa estaka sa pagsakit tupad kaniya, wala badlonga ni Jesus ang tawo tungod sa iyang kriminal nga kagahapon kondili gidasig siya uban ang paglaom sa umaabot. (Lucas 23:43) Nahibalo gayod si Jesus nga ang pagbaton ug negatibo, mahukmanon nga panglantaw sa uban makapaluya lamang sa ilang buot. Sa walay duhaduha ang iyang mga paningkamot sa pagpangitag maayong hiyas diha sa uban makadasig sa daghan nga mouswag.

Pagkaandam nga Moalagad sa mga Tawo

17, 18. Sa pagdawat sa asaynment nga moanhi sa yuta, sa unsang paagi gipakita ni Jesus ang pagkaandam nga moalagad sa uban?

¹⁷ Ang laing kusganong pamatuod sa gugma ni Jesus alang sa mga tawo nga iyang gitudloan mao ang iyang pagkaandam nga moalagad kanila. Sa wala pa siya maglungtad ingong tawo, ang Anak sa Diyos kanunay nang nahinangop sa mga tawo.  (Proverbio 8:30, 31) Ingong “Pulong,” o tigpamaba, ni Jehova, tingali kadaghan na siyang nakiglabot sa mga tawo. (Juan 1:1) Apan, sa bahin aron sa pagtudlo sa mga tawo nga mas direkta, “iyang gihaw-asan ang iyang kaugalingon ug gihuptan ang dagway sa usa ka ulipon,” nga gibiyaan ang iyang taas nga posisyon sa langit. (Filipos 2:7; 2 Corinto 8:9) Samtang dinhi sa yuta, wala magdahom si Jesus nga silbihan. Sa kasukwahi, siya miingon: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat baylo sa daghan.” (Mateo 20:28) Gituman ni Jesus kanang mga pulonga.

¹⁸ Si Jesus mapaubsanong nag-atiman sa mga panginahanglan niadtong iyang gitudloan, nga walay pag-ukon-ukon nga mitugyan sa iyang kaugalingon alang kanila. Mipanaw siya sa Yutang Saad nga nagbaktas ug gatosan ka kilometros aron sa pagsangyaw sa paningkamot nga maabot ang daghang tawo kutob sa mahimo. Dili sama sa garbosong mga Pariseo ug mga eskriba, siya nagpabiling mapaubsanon ug daling duolon. Ang tanang matang sa mga tawo—mga dagkong tawo, sundalo, abogado, babaye, bata, kabos, masakiton, bisan ang mga sinalikway sa katilingban—wala magpanuko sa pagduol kaniya, wala mahadlok. Bisan tuod hingpit, si Jesus tawhanon, nga kapoyon ug gutomon. Bisan pag siya gikapoy o nagkinahanglag pahulay o panahon sa kahilom aron mag-ampo, hinunoa, iyang giuna ang mga panginahanglan sa uban kay sa iyaha.—Marcos 1:35-39.

19. Sa unsang paagi si Jesus nagtagana ug sumbanan sa pagpakiglabot nga mapaubsanon, mapailobon, ug maluloton sa iyang mga tinun-an?

¹⁹ Si Jesus andam usab nga moalagad sa iyang mga tinun-an. Gibuhat niya kana pinaagi sa pagtudlo kanila nga maluloton ug mapailobon. Sa dihang hinay silang mosabot sa pipila ka hinungdanong mga leksiyon, siya wala molunga, masuko, o mangasaba kanila. Siya nagpadayon sa pagpangitag bag-ong mga paagi sa pagtabang kanila nga makasabot. Pananglitan, hunahunaa ra kon unsa ka subsob nga mag-away ang mga tinun-an kon kinsay labing dako taliwala kanila. Sa makadaghan, hangtod sa gabii una siya patya, si Jesus nakakaplag ug bag-ong mga paagi sa pagtudlo kanila sa pagpakiglabot nga mapaubsanon sa usag usa. Mahitungod sa pagkamapaubsanon, sama sa tanang ubang mga butang, si Jesus hustong makaingon: “Ako nagtagana ug sumbanan alang kaninyo.”—Juan 13:5-15; Mateo 20:25; Marcos 9:34-37.

20. Unsang paagi sa pagtudlo ang nakapalahi kang Jesus sa mga Pariseo, ug nganong epektibo ang maong paagi?

²⁰ Matikdi nga si Jesus wala lang mosulti sa mga tinun-an kon unsa ang sumbanan; siya “nagtagana ug sumbanan.” Siya nagtudlo kanila pinaagi sa panig-ingnan. Siya wala magsulti sa paagi nga mobati silang ubos, nga daw siya nag-isip nga importante kaayo nga dili na kinahanglang mobuhat sa mga butang nga iyang gipabuhat kanila. Mao kana ang paagi sa mga Pariseo. “Sila mosulti apan dili mobuhat,” miingon si Jesus bahin kanila. (Mateo 23:3) Si Jesus mapaubsanong nagpakita sa iyang mga estudyante sa eksaktong paagi kon unsay kahulogan sa iyang mga pagtulon-an pinaagi sa pagkinabuhi sumala niana. Busa sa dihang giawhag niya ang iyang mga sumusunod sa pagkinabuhing yano nga wala mababagi sa materyalismo, dili kinahanglang tag-anon nila kon unsay iyang gipasabot. Makita nila ang katinuoran sa iyang mga pulong: “Ang mga irong ihalas adunay mga lungib ug ang mga langgam sa langit adunay mga batoganan, apan ang Anak sa tawo walay dapit nga kapahilunaan sa iyang ulo.” (Mateo 8:20) Gialagaran ni Jesus ang iyang mga tinun-an pinaagi sa pagtagana ug sumbanan alang kanila.

21. Unsay tun-an sa sunod nga artikulo?

²¹ Klaro nga si Jesus mao ang labing bantogang Magtutudlo nga nabuhi sukad! Ang iyang gugma alang sa iyang gitudlo ug ang iyang gugma alang sa mga tawo nga iyang gitudloan nadayag sa tanang matinud-anog-kasingkasing nga mga tawo nga nakakita ug nakadungog kaniya. Sama ra kini ka dayag alang kanato karon nga nagtuon sa sumbanan nga iyang gihatag. Apan, sa unsang paagi masunod nato ang hingpit nga panig-ingnan ni Kristo? Ang sunod nga artikulo maghisgot nianang pangutanaha.

Unsaon Nimo Pagtubag?

• Unsa ang pundasyon sa maayong pagpanudlo, ingon sa gipasundayag ni kinsa?

• Sa unsang mga paagi nga si Jesus nagpakita ug gugma alang sa mga kamatuoran nga iyang gitudlo?

• Sa unsang paagi gipakita ni Jesus ang gugma alang sa mga tawo nga iyang gitudloan?

• Unsang mga panig-ingnan ang nagpakita sa mapaubsanong pagkaandam ni Jesus nga moalagad niadtong iyang gitudloan?

[Mga Pangutana sa Pagtuon]

[Hulagway sa panid 12]

Sa unsang paagi gipakita ni Jesus nga iyang gihigugma ang mga prinsipyo nga makita diha sa Pulong sa Diyos?