Imo Bang Huptan ang Imong Integridad?

PILA ka goryon ang namatay gahapon? Walay nasayod, ug tingali pipila ra ka tawo ang nahingawa tungod kay daghan man kaayong langgam. Apan, si Jehova nahingawa gayod. Sa paghisgot bahin niining daw walay bili nga mga langgam, giingnan ni Jesus ang iyang mga tinun-an: “Walay usa kanila ang mahulog sa yuta nga dili mahibaloan sa inyong Amahan.” Siya midugang: “Ayaw kamo kahadlok: kamo labaw pag bili kay sa daghang goryon.”—Mateo 10:29, 31.

Sa ulahi mas nasabtan ug maayo sa mga tinun-an kon unsa ka dako sa pagpabili ni Jehova kanila. Usa kanila, si apostol Juan, misulat: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya.” (1 Juan 4:9) Si Jehova wala lamang magtagana sa lukat kondili nagpasalig usab sa matag usa sa iyang mga alagad: “Dili ko gayod ikaw pagabiyaan ni sa bisan unsang paagi pagatalikdan.”—Hebreohanon 13:5.

Tin-aw nga dili-matarog ang gugma ni Jehova alang sa iyang katawhan. Apan, motungha ang pangutana, ‘Kita ba suod kaayo kang Jehova mao nga dili gayod kita mobiya kaniya?’

Mga Paningkamot ni Satanas sa Pagbungkag sa Atong Integridad

Sa dihang si Satanas gisultihan ni Jehova mahitungod sa integridad ni Job, si Satanas mitubag: “Mosimba kaha si Job kanimo kon wala siyay makuhang kapuslanan gikan niini?” (Job 1:9, Today’s English Version) Siya dili direktang miingon nga ang pagkamaunongon sa mga tawo ngadto sa Diyos nag-agad lamang sa ‘kapuslanan nga ilang makuha gikan niini.’ Kon tinuod kini, nan ang integridad sa tagsa ka Kristohanon mahimo diayng makompromiso—basta ang tanyag makatental kaayo.

Sa kaso ni Job, sa sinugdanan si Satanas nangangkon nga mawala ang pagkamaunongon ni Job sa Diyos kon mawad-an siya sa mga butang nga iyang gipakamahal pag-ayo. (Job 1:10, 11) Sa dihang kining maong insulto napamatud-ang bakak, si Satanas nangangkon: “Ihatag sa tawo ang tanan nga iyaha aron lang makapabiling buhi.” (Job 2:4, TEV) Bisan ug mahitabo tingali sa ubang mga tawo ang pangangkon ni Satanas, si Job midumili sa pagkompromiso sa iyang integridad. Gipamatud-an kana sa rekord sa kasaysayan. (Job 27:5; 42:10-17) Sama ba usab niana ang imong pagkamaunongon? O tugotan ba nimo si Satanas sa pagbungkag sa imong integridad? Hunahunaa ang imong kaugalingon samtang atong susihon ang pipila ka kamatuoran nga naglangkit sa tagsa ka Kristohanon.

Si apostol Pablo nagtuo nga ang tinuod nga Kristohanong pagkamaunongon posible nga mahimong lig-on kaayo. Siya misulat: “Kombinsido ako nga dili ang kamatayon ni kinabuhi . . . ni mga butang nga ania karon ni mga butang nga moabot . . . ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus nga atong Ginoo.” (Roma 8:38, 39) Mahimo natong mabatonan ang susamang determinasyon kon hugot ang atong gugma kang Jehova. Ang maong gugma maoy dili-mabungkag nga bugkos nga bisan ang kamatayon dili makabuntog niini.

Kon sama niana ang atong relasyon uban sa Diyos, dili gayod kita mangutana, ‘Mag-alagad pa  ba gihapon ako kang Jehova pipila ka tuig gikan karon?’ Ang maong pagduhaduha magpasabot nga ang atong pagkamaunongon sa Diyos nag-agad sa kon unsay mahimong mahitabo kanato samtang kita nagkinabuhi. Ang tinuod nga integridad dili maapektohan sa panggawas nga mga kahimtang. Kini nag-agad sa kon unsa ang atong pangsulod nga pagkatawo. (2 Corinto 4:16-18) Kon atong gihigugma si Jehova sa bug-os natong kasingkasing, dili gayod nato siya pakyason.—Mateo 22:37; 1 Corinto 13:8.

Apan, angay natong hinumdoman nga si Satanas kanunayng maningkamot sa pagbungkag sa atong integridad. Tingali tentalon niya kita nga magpadala sa mga tinguha sa unod, magpadaog sa pagpit-os sa isigkaingon, o ipahinabo ang usa ka matang sa kalisdanan nga mahimong hinungdan sa atong pagbiya sa kamatuoran. Ang kalibotan nga nahimulag sa Diyos mao ang pangunang kaalyado ni Satanas niining maong pag-atake, apan ang atong kaugalingong pagkadili-hingpit maoy makapasayon sa iyang pag-atake. (Roma 7:19, 20; 1 Juan 2:16) Bisan pa niana, kita duna gayoy daghang bentaha niining maong pakig-away, ug ang pangunang bentaha mao nga kita nahibalo sa mga laraw ni Satanas.—2 Corinto 2:11.

Unsa ang mga laraw ni Satanas? Gihubit kini ni Pablo diha sa iyang sulat sa mga taga-Efeso ingong “malipatlipatong kaugdahan,” o “malansisong mga buhat.” a (Efeso 6:11, potnot sa New World Translation of the Holy Scriptures—With References) Si Satanas nagbutang ug malipotong mga himan diha sa atong dalan sa pagbungkag sa atong integridad. Maayo na lang, atong mailhan kining maong malansisong mga buhat, tungod kay ang mga pamaagi sa Yawa gitala man alang kanato diha sa Pulong sa Diyos. Ang mga paningkamot ni Satanas sa pagdaot sa integridad ni Jesus ug ni Job nagpasundayag sa pipila ka mga paagi nga iyang gamiton sa pagbungkag sa atong Kristohanong integridad.

Ang Integridad ni Jesus Dili Mabungkag

Sa sinugdanan sa ministeryo ni Jesus, mapangahasong gitental ni Satanas ang Anak sa Diyos pinaagi sa paghagit kaniya nga himoong tinapay ang bato. Pagkamalansison! Si Jesus walay kaon sa 40 ka adlaw, busa siya seguradong gigutom pag-ayo. (Lucas 4:2, 3) Si Satanas misugyot nga tagbawon ni Jesus dihadiha ang iyang kinaiyanhong tinguha, sa paagi nga supak sa kabubut-on ni Jehova. Karon usab, ang propaganda sa kalibotan nagdasig sa dihadihang pagtagbaw sa tinguha, nga wala kaayo maghunahuna sa mga sangpotanan. Ang mensahe mao, ‘Angkona kini, karon dayon,’ o yanong, ‘Buhata bisag unsay imong gusto!’

Kon gitagbaw pa ni Jesus ang iyang kagutom nga walay paghunahuna sa mga sangpotanan, milampos unta si Satanas sa iyang tuyo nga mokompromiso si Jesus sa iyang integridad. Gilantaw ni Jesus ang maong kahimtang sa espirituwal nga paagi, busa siya lig-ong mitubag: “Kini nahisulat, ‘Ang tawo mabuhi, dili sa tinapay lamang.’”—Lucas 4:4; Mateo 4:4.

Giusab dayon ni Satanas ang iyang taktika. Sa sayop nga pagpadapat sa Kasulatan, nga gikan niana si Jesus nagkutlo, gidasig sa Yawa si Jesus sa paglukso gikan sa ibabaw nga bahin sa paril sa templo. ‘Luwason ka sa manulonda,’ matod ni Satanas. Dili tuyo ni Jesus nga iinsistir sa iyang Amahan nga panalipdan siya sa milagrosong paagi aron makakuhag atensiyon. “Dili mo ibutang si Jehova nga imong Diyos sa pagsulay,” matod ni Jesus.—Mateo 4:5-7; Lucas 4:9-12.

 Ang kataposang taktika nga gigamit ni Satanas maoy mas direkta. Gisulayan niyang makigsabot kang Jesus alang sa usa ka kahikayan nga silang duha ang makapahimulos pinaagi sa pagtanyag kaniya sa tibuok kalibotan ug sa himaya niini ug ang kondisyon maoy usa lang ka buhat sa pagsimba. Halos mao na kini ang tanang ikatanyag ni Satanas. Apan makaako ba si Jesus sa paghimog usa ka buhat sa pagsimba ngadto sa pangunang kaaway sa iyang Amahan? Dili gayod! “Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad,” si Jesus mitubag.—Mateo 4:8-11; Lucas 4:5-8.

Human mapakyas kadtong tulo ka paningkamot, si Satanas ‘mibiya kang Jesus hangtod sa laing angay nga higayon.’ (Lucas 4:13) Kini nagpakita nga si Satanas kanunayng mangitag kahigayonan aron masulayan ang integridad ni Jesus. Mitungha ang kombenyenteng panahon mga duha ka tuig ug tunga sa ulahi sa dihang si Jesus nagsugod sa pag-andam sa iyang mga tinun-an alang sa iyang nagsingabot nga kamatayon. Si apostol Pedro miingon: “Magmaluloton ka sa imong kaugalingon, Ginoo; dili gayod mahitabo kanimo kini nga dulnganan.”—Mateo 16:21, 22.

Posible kahang nakaangay si Jesus sa maong maayog-tuyo apan sayop nga tambag, tungod kay naggikan kini sa usa sa iyang mga tinun-an? Nasabtan dayon ni Jesus nga kadtong mga pulonga nagpabanaag sa hunahuna ni Satanas, dili sa iyaha ni Jehova. Si Kristo lig-ong mitubag: “Magpalikod ka kanako, Satanas! Ikaw maoy kapandolan kanako, tungod kay ikaw naghunahuna, dili sa mga hunahuna sa Diyos, kondili nianang sa mga tawo.”—Mateo 16:23.

Tungod sa hugot nga gugma ni Jesus kang Jehova, si Satanas wala makabungkag sa iyang integridad. Walay bisan unsang ikatanyag ang Yawa, walay pagsulay, bisag unsa ka grabe, nga makapaluya sa pagkamaunongon ni Jesus sa iyang langitnong Amahan. Sama kaha niana ang atong determinasyon sa dihang ang mga kahimtang magpalisod kanato nga huptan ang atong integridad? Ang panig-ingnan ni Job makatabang kanato nga masabtan ug maayo ang makalilisang nga mga kalisdanan nga tingali atong maatubang.

Pagkamaunongon Atubangan sa Kalisdanan

Sama sa nadiskobrehan ni Job, ang mga kalisdanan mahitabo kanato sa bisan unsang panahon. Siya may malipayong kaminyoon uban ang napulo ka anak ug siya may maayong espirituwal nga rutina. (Job 1:5) Apan walay-kalibotan si Job nga ang iyang integridad sa Diyos gilalisan didto sa langitnong sawang, ug si Satanas nakahukom sa pagpukan kaniya sa bisan unsang paagi nga iyang mahimo.

Kalit nga nawala kang Job ang iyang materyal nga bahandi. (Job 1:14-17) Bisan pa niana, ang integridad ni Job nakasugakod sa maong pagsulay tungod kay wala gayod niya ibutang ang iyang pagsalig sa salapi. Nahinumdom sa panahong adunahan pa siya, si Job miingon: “Kon ang bulawan gihimo ko nga akong paglaom, . . . kon ako nagamaya tungod kay daghan ang akong kabtangan, . . . kana usab usa ka sayop . . . , kay igalimod ko unta ang matuod nga Diyos sa itaas.”—Job 31:24, 25, 28.

Karon, posible usab nga mawala kanato ang halos tanan natong kabtangan sa usa lang ka pamilok. Usa ka negosyanteng Saksi ni Jehova nalimbongan ug dako kaayong kantidad sa salapi, nga halos nakapabangkarota kaniya. Siya prangka nga miadmitir: “Hapit kong giatake sa kasingkasing. Ang tinuod, nagtuo ko nga atakehon gayod ako kon dili pa tungod sa akong relasyon sa Diyos. Bisan pa niana, kining maong kasinatian nakapaamgo nako nga wala nako unaha ang espirituwal nga mga prinsipyo diha sa akong kinabuhi. Ang ubang mga butang morag naawngan sa kahinam nga mokitag salapi.” Sukad niadto gimenosan na sa maong Saksi ang iyang kalihokan sa negosyo, ug siya regular nga nag-alagad ingong oksilyare payunir, nga naggugol ug 50 ka oras o kapin pa kada bulan diha sa Kristohanong ministeryo. Apan, ang ubang mga problema mas labi pang makapahugno kay sa pagkawala sa mga kabtangan.

Wala pa gani makatuhop kang Job ang balita bahin sa pagkawala sa iyang bahandi, gibalitaan na usab siya nga ang iyang napulo ka anak namatay. Miinsistir gihapon siya: “Padayong dayegon ang ngalan ni Jehova.” (Job 1:18-21) Ato bang huptan ang atong integridad kon kalit nga mawala ang pipila ka membro sa atong pamilya? Si Francisco, usa ka Kristohanong magtatan-aw sa Espanya, namatyan sa iyang duha ka anak diha sa usa ka makapasubong aksidente sa bus. Nahupay siya pinaagi sa pagpakigsuod pa ug dugang kang Jehova ug pagpauswag sa iyang kalihokan diha sa Kristohanong ministeryo.

 Bisan human sa makapakugang nga kamatayon sa iyang mga anak, wala pa matapos ang mapait nga pagsulay ni Job. Gihampak siya ni Satanas ug mangil-ad, masakit nga balatian. Nianang higayona, si Job nakadawat ug sayop nga tambag gikan sa iyang asawa. “Tungloha ang Diyos ug magpakamatay!” siya naghulhog kaniya. Wala tagda ni Job ang iyang tambag, ug siya wala “makasala pinaagi sa iyang mga ngabil.” (Job 2:9, 10) Ang iyang integridad wala magdepende sa pagpaluyo sa iyang pamilya, kondili sa iyang personal nga relasyon kang Jehova.

Si Flora, kansang bana ug panganay nga anak nga lalaki mibiya sa Kristohanong dalan kapin na sa napulo ka tuig kanhi, nakasabot sa gibati ni Job. “Sakit kaayo kon kalit kang mawad-an sa pagpaluyo sa imong pamilya,” siya miadmitir. “Apan nasayod ko nga dili ko makakaplag ug kalipay sa gawas sa organisasyon ni Jehova. Busa ako mibarog nga malig-on ug giuna si Jehova samtang naningkamot sa pagpadayon nga mahimong maayong asawa ug inahan. Kanunay akong mag-ampo, ug si Jehova nagpalig-on kanako. Malipayon ako tungod kay, bisan pa sa hugot nga pagsupak sa akong bana, nakakat-on ako nga mosalig sa bug-os kang Jehova.”

Ang sunod nga pamaagi ni Satanas sa pagbungkag sa integridad ni Job naglakip sa iyang tulo ka kauban. (Job 2:11-13) Pagkamakapasubo gayod sa dihang gisaway nila siya. Kon mituo pa siya sa ilang mga pangatarongan, mawala gayod unta ang iyang pagsalig kang Jehova nga Diyos. Ang ilang makapaluya nga tambag nakapalugda ug nakabungkag unta sa iyang integridad, ug sa ingon ang laraw ni Satanas milampos unta.

Hinunoa, si Job miinsistir: “Hangtod nga ako mamatay dili ko wad-on ang akong integridad gikan kanako!” (Job 27:5) Wala siya moingon, ‘Dili ako motugot nga daoton ninyo ang akong integridad!’ Nasayod si Job nga ang iyang integridad nag-agad kaniya ug sa iyang gugma kang Jehova.

Karaang Lit-ag sa Pagbitik ug Bag-ong Biktima

Si Satanas mogamit gihapon sa sayop nga tambag o wala-hunahunaang mga komento sa mga higala ug mga isigkamagtutuo. Kon ang hinungdan sa pagkawala sa kadasig maggikan sa sulod sa kongregasyon, kini mas daling makapaluya sa atong pagsalig kay sa paglutos nga maggikan sa gawas sa kongregasyon. Usa ka Kristohanong ansiyano nga nakasinati kaniadto ug kombate ingong sundalo nagtandi niana sa kasakit nga iyang giantos tungod sa wala-hunahunaang mga pulong ug mga buhat sa pipila ka mga isigka-Kristohanon. Bahin niana, siya miingon: “Kini ang kinalisorang kahimtang nga akong naeksperyensiyahan.”

Sa laing bahin, kita mahimong mabalisa pag-ayo sa pagkadili-hingpit sa mga isigkamagtutuo mao nga makigbungol na kita sa pipila kanila o dili na kita motambong sa Kristohanong mga tigom. Tingali ang labing hinungdanon alang kanato mao nga mahuwasan kita sa atong kahiubos. Apan, pagkasubo kon ingon niana ka mubo ang atong panglantaw ug tugotan ang atong labing bililhong bahandi—ang atong relasyon kang Jehova—nga mohuyang tungod sa himoon o isulti sa uban. Kon atong tugotan kana nga mahitabo, kita mabitik sa usa sa karaang mga lit-ag ni Satanas.

Tinuod, kita naglaom ug taas nga mga sukdanan diha sa Kristohanong kongregasyon. Apan kon kita magdahom ug dako gikan sa atong mga isigkamagsisimba, kinsa dili pa hingpit, kita segurado gayod nga mahigawad. Sa kasukwahi, si Jehova realistiko sa kon unsay iyang gidahom sa iyang mga alagad. Kon atong sundogon ang iyang panig-ingnan, andam natong antoson ang ilang pagkadili-hingpit. (Efeso 4:2, 32) Si apostol Pablo mihatag niini nga tambag: “Kon masuko kamo, bantayi nga dili kamo makasala, ug ayaw palungtara ang inyong kasuko sa tibuok adlaw. Ayaw hatagig lugar ang Yawa.”—Efeso 4:26, 27, Ang Maayong Balita Bibliya.

Sumala sa tin-awng gipakita sa Bibliya, si Satanas mogamit ug daghan kaayong malipotong mga himan aron madiskobrehan—kon iyang maarangan—ang paagi sa pagbungkag sa integridad sa usa ka Kristohanon. Ang pipila sa iyang mga lit-ag makapadani sa makasasala nga unod, ang uban makahatag ug kasakit. Niini nga panaghisgot, imong masabtan kon nganong ikaw dili gayod angay nga makalitan o dili makapangandam. Uban sa imong gugma sa Diyos nga lig-ong natisok diha sa imong kasingkasing, magmadeterminado nga pamatud-ang bakakon ang Yawa ug lipaya ang kasingkasing ni Jehova. (Proverbio 27:11; Juan 8:44) Hinumdomi, ang tinuod nga Kristohanong integridad kinahanglang dili gayod ikompromiso, bisag unsa pang pagsulay ang atong maatubang.

[Footnote]