“Magpadayon sa Pagsunod Kanako”

“Niini nga dalan kamo gipanagtawag, tungod kay bisan si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob.”—1 PEDRO 2:21.

1, 2. Nganong ang hingpit nga panig-ingnan ni Jesus ingong magtutudlo dili taas ra kaayo nga dili nato masundog?

 SI Jesu-Kristo mao ang labing bantogang Magtutudlo nga nabuhi sukad sa yuta. Dugang pa, siya hingpit, wala gayod makasala sulod sa iyang tibuok kinabuhi ingong tawo. (1 Pedro 2:22) Apan, nagpasabot ba kana nga ang panig-ingnan ni Jesus ingong magtutudlo taas ra kaayo nga dili nato masundog ingong mga tawong dili hingpit? Dili gayod.

² Sa nasabtan nato sa nag-unang artikulo, ang pasukaranan sa pagtulon-an ni Jesus mao ang gugma. Ug ang gugma maoy usa ka butang nga maugmad natong tanan. Ang Pulong sa Diyos kanunayng nag-awhag kanato sa pagpadako ug pagpauswag sa atong gugma sa uban. (Filipos 1:9; Colosas 3:14) Si Jehova wala gayod magkinahanglan gikan sa iyang mga linalang sa dili nila mahimo. Gani, tungod kay “ang Diyos gugma” ug naghimo kanato sa iyang dagway, ikaingon nga kita iyang gidisenyo aron magpakita ug gugma. (1 Juan 4:8; Genesis 1:27) Busa sa dihang mabasa nato ang mga pulong ni apostol Pedro nga nasulat diha sa atong temang teksto, kita makasanong nga masaligon. Masunod nato pag-ayo ang mga tunob ni Kristo. Gani, matuman nato ang sugo mismo ni Jesus: “Magpadayon sa pagsunod kanako.” (Lucas 9:23) Hisgotan nato kon sa unsang paagi masundog nato ang gugma nga gipakita ni Kristo, una alang sa mga kamatuoran nga iyang gitudlo, dayon sa mga tawo nga iyang gitudloan.

Pag-ugmad ug Gugma Alang sa mga Kamatuoran nga Atong Nakat-onan

3. Nganong ang uban malisdan sa pagtuon, apan unsang tambag ang makita diha sa Proverbio 2:1-5?

³ Aron atong mahigugma ang mga kamatuoran nga atong itudlo sa uban, kinahanglang mahigugma kita sa pagtuon sa maong mga kamatuoran. Sa kalibotan karon, kanang matanga sa gugma dili daling ugmaron. Ang kakulang sa edukasyon ug dili maayong batasan nga naugmad sa pagkabatan-on  maoy nakaingon nga daghan ang dili gayod gustong magtuon. Apan, hinungdanon nga mokat-on kita gikan kang Jehova. Ang Proverbio 2:1-5 nag-ingon: “Anak ko, kon dawaton mo ang akong mga pulong ug tipigan mo ang akong mga sugo diha kanimo, aron sa paghatag ug pagtagad sa kaalam pinaagi sa imong igdulungog, aron ikiling mo ang imong kasingkasing sa katakos sa pag-ila; dugang pa, kon ikaw magasangpit sa pagsabot ug ikaw magapatugbaw sa imong tingog alang sa katakos sa pag-ila, kon ikaw magapadayon sa pagpangita niini ingon sa plata, ug ingon sa tinagong mga bahandi ikaw magapadayon sa pagpangita niini, nan imong masabtan ang pagkahadlok kang Jehova, ug imong makaplagan ang mismong kahibalo sa Diyos.”

4. Unsay buot ipasabot sa ‘pagkiling’ sa kasingkasing, ug unsang panglantaw ang motabang kanato sa pagbuhat niana?

⁴ Matikdi nga sa mga bersikulo 1 hangtod sa 4, kita sublisubling giawhag sa pagpaningkamot nga dili lamang ‘modawat’ ug ‘magtipig’ kondili “magpadayon sa pagpangita.” Apan, unsa ang magpalihok kanato sa paghimo niining tanan? Aw, matikdi ang mga pulong “ikiling mo ang imong kasingkasing sa katakos sa pag-ila.” Usa ka reperensiya nag-ingon nga kining maong tambag “dili lamang usa ka sinserong hangyo nga mohatag ug pagtagad; kini maoy pagpangayo sa usa ka matang sa tinamdan: usa ka maikagong pagdawat sa mga pagtulon-an.” Ug unsay makapahimo kanatong madinawaton ug maikagon nga mokat-on sa ginatudlo ni Jehova kanato? Ang atong panglantaw. Kinahanglan isipon nato ang “kahibalo sa Diyos” ingong “plata” ug ingong “tinagong mga bahandi.”

5, 6. (a) Unsay lagmit nga mahitabo sa paglabay sa panahon, ug sa unsang paagi mapugngan nato nga mahitabo kana? (b) Nganong padayon natong dugangan ang mga bahandi sa kahibalo nga atong nakaplagan diha sa Bibliya?

⁵ Dili lisod ang pagbaton sa maong panglantaw. Pananglitan, ang “kahibalo sa Diyos” nga imong nakat-onan lagmit nga naglakip sa kamatuoran nga katuyoan ni Jehova nga ang matinumanong katawhan mabuhi sa walay kataposan sa Paraiso sa yuta. (Salmo 37:28, 29) Sa dihang una nimong nakat-onan ang maong kamatuoran, sa walay duhaduha giisip nimo kini ingong tinuod nga bahandi, usa ka tipik sa kahibalo nga naghatag paglaom ug kalipay sa imong hunahuna ug kasingkasing. Komosta karon? Sa paglabay sa panahon, ang pagpabili ba sa imong bahandi milubad na? Nan, sulayi pagbuhat ang duha ka butang. Una, bag-oha ang imong apresasyon, sa ato pa, lab-asa kanunay diha sa imong hunahuna kon nganong gipabilhan nimo ang matag kamatuoran nga gitudlo ni Jehova kanimo, bisan kadtong imong nakat-onan katuigan kanhi.

⁶ Ikaduha, dugangi kanunay ang imong bahandi. Kon buot hunahunaon, kon may nakalotan kang bililhong mutya, basta na lang bang isulod nimo kana sa bulsa ug mobiya ka nga kontento na? O mokalot ka pa aron sa pagsusi kon duna pay lain? Ang Pulong sa Diyos puno sa mga mutya  ug bililhong mga bahin sa kamatuoran. Bisag unsa pa ka daghan ang imong nakaplagan, makakita ka pa ug lain. (Roma 11:33) Samtang makakalot ka ug usa ka bililhong kamatuoran, pangutan-a ang imong kaugalingon: ‘Unsay nakapahimo niana nga usa ka bahandi? Naghatag ba kini kanako ug mas lalom nga pagsabot sa kinaiya ni Jehova o sa iyang mga katuyoan? Naghatag ba kini ug praktikal nga giya nga makatabang kanako sa pagsunod sa mga tunob ni Jesus?’ Ang pagpalandong nianang mga pangutanaha motabang kanimo sa pag-ugmad sa imong gugma alang sa mga kamatuoran nga gitudlo ni Jehova kanimo.

Pagpakita ug Gugma Alang sa mga Kamatuoran nga Atong Gitudlo

7, 8. Unsa ang pipila ka paagi diin ikapakita nato sa uban nga atong gihigugma ang mga kamatuoran nga atong nakat-onan gikan sa Bibliya? Paghatag ug panig-ingnan.

⁷ Samtang gitudloan nato ang uban, sa unsang paagi ikapakita nato nga atong gihigugma ang mga kamatuoran nga atong nakat-onan gikan sa Pulong sa Diyos? Sa pagsunod sa panig-ingnan ni Jesus, kita mosalig gayod sa Bibliya diha sa atong pagsangyaw ug pagpanudlo. Di pa dugay, ang katawhan sa Diyos sa tibuok kalibotan gidasig sa pagpauswag sa paggamit sa Bibliya diha sa ilang publikong ministeryo. Samtang gipadapat nimo kanang maong sugyot, pangita ug mga paagi sa pagpahibalo sa tagbalay nga ikaw mismo nagpabili sa imong gipaambit gikan sa Bibliya.—Mateo 13:52.

⁸ Pananglitan, human sa pag-atake sa mga terorista sa New York City sa miaging tuig, usa ka Kristohanong sister ang nagpaambit sa Salmo 46:1, 11 sa mga tawo nga iyang nahibalag diha sa iyang ministeryo. Gipangutana una niya ang mga tawo kon giunsa nila pagsagubang pagkahuman sa trahedya. Siya namati pag-ayo sa ilang tubag, nagpasalamat niana, dayon miingon: “Mahimo ko bang ipaambit nimo ang usa ka teksto nga nakapahupay gayod kanako sulod niining malisod nga panahon?” Pipila lang ang mibalibad, ug daghang maayo kaayong mga panaghisgot ang miresulta. Sa pagpakigsulti sa mga batan-on, ang mao gihapong sister kasagarang moingon: “Ginatudlo nako ang Bibliya sulod na sa 50 ka tuig, ug abi nimo? Wala pa gayod ako makasugat ug problema nga wala makatabang kining basahona sa pagsulbad.” Pinaagi sa paggamit ug sinsero, madasigon nga paagi, atong gipakita sa mga tawo nga atong gipabilhan ug gihigugma ang atong nakat-onan gikan sa Pulong sa Diyos.—Salmo 119:97, 105.

9, 10. Nganong hinungdanon nga gamiton ang Bibliya sa dihang motubag sa mga pangutana bahin sa atong mga tinuohan?

⁹ Sa dihang ang mga tawo mangutana kanato bahin sa atong mga tinuohan, kita adunay maayong kahigayonan sa pagpakita nga atong gihigugma ang Pulong sa Diyos. Sa pagsundog sa panig-ingnan ni Jesus, dili kay basta ipasukad lang nato ang atong mga tubag sa atong kaugalingong mga ideya. (Proverbio 3:5, 6) Hinunoa, gamiton nato ang Bibliya sa pagtubag. Mahadlok ka ba nga basin dunay mangutana kanimo nga dili nimo matubag? Tagda ang duha ka positibong mga lakang nga imong mahimo.

¹⁰ Buhata ang imong maarangan nga mahimong andam. Si apostol Pedro misulat: “Balaana si Kristo ingong Ginoo diha sa inyong mga kasingkasing, nga andam kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.” (1 Pedro 3:15) Andam ka bang modepensa sa imong mga tinuohan? Pananglitan, kon dunay gustong mahibalo kon nganong dili ka makigbahin sa usa ka dili-kasulatanhong kostumbre o tulumanon, ayaw pag-ingon lamang ug, “Supak kini sa akong relihiyon.” Ang maong tubag mahimong magsugyot nga imong gitugotan ang uban nga modesisyon alang kanimo ug busa lagmit ikaw maoy membro sa usa ka kulto. Mas maayong moingon, “Ang Pulong sa Diyos, ang Bibliya, nagdili niana” o, “Dili kana makapahimuot sa akong Diyos.” Dayon isaysay kon ngano.—Roma 12:1.

11. Unsang galamiton sa pagpanukiduki ang makatabang kanato nga mahimong andam sa pagtubag sa mga pangutana bahin sa mga kamatuoran sa Pulong sa Diyos?

¹¹ Kon gibati nimo nga dili ka andam, nganong dili mogugol ug panahon sa pagtuon sa librong Nangatarongan Pinasukad sa Kasulatan? a Pagpili ug pipila ka ulohan nga lagmit nga ipangutana sa mga tawo, ug pagmemorya ug pipila ka Kasulatanhong punto. Dad-a kanunay ang imong librong Nangatarongan ug ang imong Bibliya. Ayaw pagpanuko sa paggamit nianang duha, nga sultihan ang nangutana nga ikaw adunay galamiton sa pagpanukiduki nga gusto nimong gamiton sa pagtabang sa pagpangita sa tubag sa Bibliya sa mga pangutana.

12. Sa unsang paagi kita makatubag kon kita wala mahibalo sa tubag sa usa ka pangutana sa Bibliya?

¹² Paningkamoti nga dili mabalaka nga wala kinahanglana. Walay dili-hingpit nga tawo nga makatubag sa tanang pangutana. Busa sa dihang suknaon ka ug pangutana sa Bibliya nga dili nimo matubag, makatubag ka niining paagiha: “Salamat sa pagpatungha nianang makaiikag nga pangutana. Sa pagkatinuod, wala ko mahibalo sa tubag, apan nakaseguro ko nga gitubag sa Bibliya kining butanga. Malingaw ko sa pagdukiduki sa Bibliya, busa susihon nako kining pangutanaha ug mobalik ko nimo.” Ang maong prangka, makasaranganon nga paagi mahimong mag-andam sa dalan alang sa dugang mga panaghisgot.—Proverbio 11:2.

Gugma Alang sa mga Tawo nga Atong Gitudloan

13. Nganong angay natong huptan ang positibong panglantaw mahitungod niadtong atong gisangyawan?

¹³ Si Jesus nagpakita ug gugma alang sa mga tawo nga iyang gitudloan. Sa unsang paagi atong masundog siya niining bahina? Dili gayod nato ugmaron ang pagkadili-mabination ngadto sa mga tawo sa atong palibot. Ibutang ta, ang “gubat sa dakong adlaw sa Diyos nga Labing Gamhanan” mas nagkaduol, ug daghan taliwala sa bilyonbilyong katawhan  ang pagalaglagon. (Pinadayag 16:14; Jeremias 25:33) Bisan pa niana, wala kita mahibalo kon kinsay mabuhi ug kinsay mamatay. Ang paghukom mahitabo sa umaabot ug himoon lamang sa usa nga gitudlo ni Jehova, si Jesu-Kristo. Hangtod nga himoon ang maong paghukom, isipon nato ang matag indibiduwal nga dunay paglaom nga mahimong alagad ni Jehova.—Mateo 19:24-26; 25:31-33; Buhat 17:31.

14. (a) Sa unsang paagi masusi nato ang atong kaugalingon kon kita ba adunay empatiya sa mga tawo? (b) Sa unsang praktikal nga mga paagi nga mahimo natong ipakita ang empatiya ug personal nga interes sa uban?

¹⁴ Busa, sama kang Jesus maningkamot kita sa pagpakitag empatiya sa mga tawo. Mahimo natong pangutan-on ang atong kaugalingon: ‘May simpatiya ba ako sa mga tawo nga nalimbongan sa inantigong kabakakan ug mga panglimbong sa relihiyoso, politikanhon, ug komersiyal nga mga elemento niining kalibotana? Kon morag dili sila mamati sa mensahe nga atong gidala kanila, maningkamot ba ako sa pagsabot kon nganong mibati sila ug ingon niana? Giila ba nako nga ako, o ang uban nga nag-alagad kang Jehova nga matinumanon karon, mibati usab ug ingon niana kanhi? Gipasibo ba nako ang akong paagi sa pagsangyaw? O giisip ba nako kining mga tawhana nga wala nay paglaom?’ (Pinadayag 12:9) Sa dihang mamatikdan sa mga tawo ang atong tiunay nga empatiya, lagmit gayod nga mosanong sila sa atong mensahe. (1 Pedro 3:8) Ang empatiya magtukmod usab kanato sa pagpakita ug dugang interes sa mga tawo nga atong mahibalag diha sa atong ministeryo. Mahimong hisgotan nato ang ilang mga pangutana ug mga gikabalak-an. Sa pagbalik nato, mahimo natong ipakita kanila nga naghunahuna kita bahin sa ilang mga komento sa atong miaging pagduaw. Ug kon duna silay dinaliang panginahanglan nianang tungora, makatanyag kita ug praktikal nga tabang.

15. Nganong mangita kita ug maayong hiyas diha sa mga tawo, ug sa unsang paagi himoon nato kana?

¹⁵ Sama kang Jesus, mangita kitag maayong hiyas diha sa mga tawo. Tingali ang usa ka nag-inusarang ginikanan naghimog dalayegong paningkamot sa pagmatuto sa iyang mga anak. Hayan ang usa ka tawo nanglimbasog sa pagsuportar sa iyang pamilya. Ang usa ka tigulang nga tawo nagpakitag interes sa espirituwal nga mga butang. Namatikdan ba nato ang maong mga hiyas diha sa mga tawo nga atong nahibalag ug gidayeg sila? Sa pagbuhat niana, atong gipasiugda nga dunay pareho natong gikaikagan ug mahimong magbukas sa dalan alang sa paghatag ug pamatuod bahin sa Gingharian.—Buhat 26:2, 3.

Pagpaubos Hinungdanon sa Pagpakita ug Gugma

16. Nganong hinungdanon nga magpabiling malumo ug matinahoron ngadto niadtong atong gisangyawan?

¹⁶ Ang gugma alang sa mga tawo nga atong gitudloan magpalihok kanato sa pagpatalinghog sa maalamong pasidaan sa Bibliya: “Ang kahibalo nagapaburot, apan ang gugma nagapalig-on.” (1 Corinto 8:1) Si Jesus daghan kaayog nahibaloan, apan dili gayod siya mapahitas-on. Busa samtang ipaambit nimo ang imong mga pagtulon-an, likayi ang pagpakiglantugi o pagpasiatab. Ang atong tumong mao ang pag-abot sa kasingkasing ug pagdani sa mga tawo ngadto sa mga kamatuoran nga atong gihigugma pag-ayo. (Colosas 4:6) Hinumdomi, sa dihang gitambagan ni Pedro ang mga Kristohanon nga magmaandam sa paghimog depensa, iyang gilakip ang pahinumdom nga angay natong himoon kana “uban ang kalumo sa buot ug halawom nga pagtahod.” (1 Pedro 3:15) Kon kita malumo ug matinahoron, lagmit gayong madani nato ang mga tawo ngadto sa Diyos nga atong gialagaran.

17, 18. (a) Sa unsang paagi kita mosanong sa mga pagsaway bahin sa atong mga kuwalipikasyon ingong mga ministro? (b) Nganong ang kahibalo sa karaang mga pinulongan sa Bibliya dili hinungdanon alang sa mga estudyante sa Bibliya?

¹⁷ Dili kinahanglang magpadayeg kita sa mga tawo tungod sa atong kahibalo o edukasyon. Kon dunay pipila diha sa imong teritoryo nga dili mamati ni bisan kinsa nga walay silid o mga titulo sa unibersidad, ayaw tugoting maluya ang imong buot tungod sa ilang tinamdan. Wala panumbalinga ni Jesus ang pagsupak nga wala siya makatungha sa inilang rabbiniko nga mga eskuylahan sa iyang adlaw; ni nagpadala siya sa popular nga mga pagpihig pinaagi sa pagtinguha nga dayegon siya sa mga tawo tungod sa iyang dakong kahibalo.—Juan 7:15.

¹⁸ Ang pagkamapaubsanon ug gugma mas hinungdanon alang sa Kristohanong mga ministro kay sa bisan unsang gidak-on sa sekular nga edukasyon. Ang Dakong Edukador, si Jehova, nagkuwalipikar kanato alang sa ministeryo. (2 Corinto 3:5, 6) Ug bisan unsa pay isulti sa pipila ka klero sa Kakristiyanohan, dili kinahanglang makat-onan nato ang karaang mga pinulongan sa Bibliya aron mahimong mga magtutudlo sa Pulong sa Diyos. Giinspirar ni Jehova ang Bibliya nga isulat sa klaro ug espesipiko nga mga pulong nga halos tanan makasabot  sa bililhong mga kamatuoran niini. Kanang mga kamatuorana wala mausab bisan pag gihubad ngadto sa gatosan ka pinulongan. Busa ang kahibalo sa karaang mga pinulongan, bisan tuod mapuslanon usahay, dili kinahanglanon. Dugang pa, ang pagpasigarbo sa pagkabaton ug katakos nga makasultig lainlaing mga pinulongan makapawala sa usa ka kinaiya diha sa usa ka tawo nga hinungdanon sa matuod nga mga Kristohanon—pagkadaling tudloan.—1 Timoteo 6:4.

19. Sa unsang diwa nga ang atong Kristohanong ministeryo usa ka pag-alagad?

¹⁹ Walay duhaduha nga ang atong Kristohanong ministeryo maoy buluhaton nga nagkinahanglan ug mapaubsanong tinamdan. Kanunay natong giladlad ang atong kaugalingon sa pagsupak, pagkawalay-pagtagad, ug bisan gani sa paglutos. (Juan 15:20) Bisan pa niana, pinaagi sa matinumanong pagbuhat sa atong ministeryo, atong ginahimo ang hinungdanong pag-alagad. Kon magpadayon kita sa mapaubsanong pag-alagad sa uban niining buluhatona, atong ginasundog ang gugma nga gipakita ni Jesu-Kristo ngadto sa mga tawo. Tagda kini: Kon kinahanglan kitang mosangyaw ngadto sa usa ka libo ka dili-matinagdanon o masinupakon nga mga tawo aron makaabot sa usa ka tawong karnerohon, dili ba takos kana sa paningkamot? Takos gayod! Busa pinaagi sa pagpadayon niining buluhatona, nga dili gayod molunga, kita matinumanong nag-alagad sa mga karnerohon nga ato pang adtoon. Sa walay duhaduha seguroon ni Jehova ug ni Jesus nga daghan pa nianang bililhong mga tawo ang makaplagan ug matabangan sa dili pa moabot ang kataposan.—Hageo 2:7.

20. Unsa ang pipila ka paagi nga kita makatudlo pinaagi sa panig-ingnan?

²⁰ Ang pagtudlo pinaagig panig-ingnan maoy laing paagi sa pagpakita sa atong pagkaandam nga moalagad sa uban. Pananglitan, buot natong tudloan ang mga tawo nga ang pag-alagad kang Jehova, ang “malipayong Diyos,” mao ang kinamaayohan, labing makapatagbaw nga dalan sa kinabuhi nga masubay. (1 Timoteo 1:11) Samtang naniid sila sa atong panggawi ug sa atong mga pakiglabot sa atong mga silingan, kauban sa tunghaan, ug mga kauban sa trabaho, makita ba nila nga kita malipayon ug tagbaw? Sa susama, atong itudlo sa mga estudyante sa Bibliya nga ang Kristohanong kongregasyon maoy dangpanan diin adunay gugma diha sa dili-mabination, mabangis nga kalibotan. Dayag bang makita sa atong mga estudyante nga kita nahigugma sa tanan diha sa kongregasyon ug nanglimbasog sa pagmentinar sa pagdinaitay sa usag usa?—1 Pedro 4:8.

21, 22. (a) Ang pagsusi sa kaugalingon maylabot sa atong ministeryo motultol kanato sa pagpahimulos sa unsang mga kahigayonan? (b) Unsay hisgotan sa mga artikulo sa sunod nga isyu sa Ang Bantayanang Torre?

²¹ Usahay, ang atong pagkaandam diha sa ministeryo magpalihok kanato sa pagsusi pag-usab sa atong kaugalingon. Sa pagbuhat niana nga matinud-anon, nakaplagan sa daghan nga anaa sila sa kahimtang nga makapasangkad pa sa ilang pag-alagad pinaagi sa pagsulod sa bug-os-panahong ministeryo o pinaagi sa pagbalhin aron moalagad diin mas dako ang panginahanglan. Ang uban nakahukom sa pagtuon ug langyawng pinulongan aron sa pag-alagad sa nagkadaghang lalin diha mismo sa ilang teritoryo. Kon bukas kanimo ang maong mga kapilian, hatagi kini ug mainampingon ug mainampoon nga pagpalandong. Ang kinabuhi nga nag-alagad makahatag ug dakong kalipay, katagbawan, ug kalinaw sa hunahuna.—Ecclesiastes 5:12.

²² Sa tanang paagi, magpadayon kita sa pagsundog kang Jesu-Kristo pinaagi sa pag-ugmad sa atong gugma alang sa mga kamatuoran nga atong gitudlo ug alang sa mga tawo nga atong gitudloan. Ang pag-ugmad ug pagpasundayag ug gugma niining duha ka bahin motabang kanato sa pagpahiluna ug maayong pundasyon sa pagkahimong samag-Kristo nga mga magtutudlo. Apan, sa unsang paagi makatukod kita ibabaw nianang maong pundasyon? Sa sunod nga isyu sa Ang Bantayanang Torre, ang usa ka serye sa mga artikulo maghisgot sa pipila ka espesipikong mga paagi sa pagpanudlo nga gigamit ni Jesus.

[Footnote]

Unsaon Nimo Pagtubag?

• Unsang pasalig ang atong nabatonan nga ang panig-ingnan ni Jesus ingong magtutudlo dili taas ra kaayo nga dili nato masundog?

• Sa unsang paagi ikapakita nato nga atong gihigugma ang mga kamatuoran nga atong nakat-onan gikan sa Bibliya?

• Nganong hinungdanon ang pagpabiling mapaubsanon samtang mouswag ang atong kahibalo?

• Unsa ang pipila ka paagi diin ikapakita nato ang gugma alang sa mga tawo nga gipaningkamotan natong tudloan?

[Mga Pangutana sa Pagtuon]

[Mga hulagway sa panid 16]

Himoa ang imong maarangan aron mahimong andam

[Mga hulagway sa panid 16, 17]

Kon gipabilhan nimo “ang kahibalo sa Diyos,” magamit nimo ang Bibliya sa epektibong paagi

 [Hulagway sa panid 18]

Atong gipakita ang gugma alang sa mga tawo pinaagi sa pagpaambit kanila sa maayong balita