Malipayon nga Sila Nakakat-on sa Pagbasa!

SA PIPILA ka bahin sa Solomon Islands, mga 80 porsiyento kanila nga karon maoy mga Saksi ni Jehova nagsagubang sa suliran sa pagkadi-makamaong mobasa ug mosulat. Tungod niadto dili lamang limitado ang ilang pagpakigbahin sa senemanang mga tigom sa kongregasyon kondili mas nalisdan usab sila sa pagtudlo sa mga kamatuoran sa Gingharian ngadto sa uban. Posible kaha nga makakat-on pagbasa ug pagsulat ang mga tigulang nga wala pa sukad makagunit ug lapis?

Ang brosyur nga Apply Yourself to Reading and Writing, nga gipatik sa mga Saksi ni Jehova, maoy gigamit sa mga klase sa pagbasa ug pagsulat diha sa halos tanang kongregasyon sa mga Saksi ni Jehova sa tibuok Solomon Islands. Ang mosunod nga mga kasinatian mag-ilustrar kon sa unsang paagi ginatos ang natabangan sa pag-ugmad sa ilang katibuk-ang katakos pinaagi niining programaha. Mas hinungdanon pa, ang pagkakat-on sa pagbasa nakapaarang nila sa pagpamatuod ug maayo bahin sa ilang pagtuo.—1 Pedro 3:15.

Usa ka misyonaryo nga naasayn sa kongregasyon nga may kapin sa usa ka gatos ka magmamantala sa Gingharian nakamatikod nga sa senemanang pagtuon sa Bibliya ginamit Ang Bantayanang Torre, pipila ra ang dunay kaugalingong kopya sa magasin ug mas diyutay pa ang mangomento. Ang rason? Pagkadili-makamaong mobasa ug mosulat. Sa dihang gipahibalo sa kongregasyon ang pagmugna sa usa ka tunghaan bahin sa pagtudlo sa pagbasa ug pagsulat, ang misyonaryo nalipay sa pagboluntaryo nga mahimong magtutudlo. Sa sinugdan, pipila ra ka estudyante ang miabot, apan sa wala madugay kapin sa 40 ka tawo nga lainlain ang pangedaron ang misugod pagtambong.

Unsay mga resulta? Ang misyonaryo miasoy: “Wala madugay human magsugod ang klase, namalengke ako sa alas-sayis sa buntag aron sa pagpalit ug pagkaon alang sa puy-anan sa mga misyonaryo. Nakita nako didto ang pipila ka estudyante, bisan ang mga bata pa ka kaayo, nga namaligyag  mga lubi ug mga utanon. Ngano? Tungod kay gusto silang makabatog igong salapi nga ikapalit ug lapis ug notbok nga gamiton sa klase! Ang pagtambong usab sa klase maoy nahimong usa ka hinungdan sa pagbaton ug personal nga kopya sa Bantayanang Torre.” Siya midugang: “Karon panahon sa Pagtuon sa Bantayanang Torre sa kongregasyon, ang mga batan-on ug mga tigulang nakigbahin, ug bibo ang among mga panaghisgot.” Puwerteng lipaya sa misyonaryo sa dihang upat ka membro sa klase misukna kon makasangyaw na ba sila diha sa publiko, kay matod pa nila, sila “dili na mahadlok.”

Ang mapuslanong mga epekto diha sa mga estudyante sa mga klase milabaw pa kay sa pagkakat-on lamang sa pagbasa ug pagsulat. Pananglitan, sa daghang tuig ang di-magtutuong asawa sa usa ka Saksi maoy hinungdan sa kabalaka sa kongregasyon. Iyang batoon ang mga tawo bisag mapikal lamang ug diyutay ug mamunal pa gani sa mga babaye. Sa dihang siya motambong panalagsa sa Kristohanong mga tigom uban sa iyang bana, siya manelos kaayo kaniya. Busa nag-sunglass na lang ang bana aron siya dili maakusahan sa iyang asawa nga nagtan-aw sa laing mga babaye.

Apan, wala madugay human magsugod ang mga klase sa pagbasa ug pagsulat, kining bayhana hilom nga mihangyo: “Mahimo bang moapil ako sa klase?” Mahimo kaayo. Sukad niadto wala na siya mosipyat sa klase ug sa tigom sa kongregasyon. Nagtuon siya pag-ayo sa iyang mga leksiyon sa pagbasa ug kusog nga miuswag, nga nakapalipay niya pag-ayo. Ang sunod niyang gihangyo mao: “Mahimo ba akong magtuon sa Bibliya?” Ang iyang bana malipayong misugod pagtuon kaniya, ug siya nagpadayon sa pag-uswag sa iyang katakos sa pagbasa ug pagsulat ug sa iyang kahibalo sa Bibliya.

Alang sa usa ka 50 anyos nga wala pa sukad makagunit ug lapis, ang paggunit lamang sa lapis ug pagsulat sa mga letra sa alpabeto maoy subidahon kaayo. Naluthan ang mga tudlo sa pipila tungod sa ilang hugot nga paggunit sa lapis panahon sa unang mga ang-ang sa pagtuon. Human ang mga semana sa pagpaningkamot sa paggunit ug pagkontrolar sa lapis, ang ubang mga estudyante mipatugbaw nga mapahiyomon kaayo: “Gaan na ang akong kamot sa pagsulat sa papel!” Nakapalipay sa mga instruktor ang paglantaw sa pag-uswag sa mga estudyante. Usa ka instruktor miingon: “Ang pagtudlo sa klase maoy usa ka dakong kalipay, ug ang tim-os nga pagpabili sa mga estudyante niining tagana gikan kang Jehova sagad gipahayag pinaagi sa pagpakpak inigkatapos sa usa ka klase.”

Duyog sa mga misyonaryo, malipayon na gayod kining mga igsoona nga karon makamao nang mobasa ug mosulat. Ngano? Tungod kay magamit na nila karon ang ilang katakos sa pagbasa ug pagsulat sa pagpasidungog kang Jehova.

[Mga hulagway sa panid 9]

Ang mga batan-on ug mga tigulang nagpabili sa mga klase sa pagbasa ug pagsulat