Mga Pangutana Gikan sa mga Magbabasa

Unsang giya ang gihatag sa Kasulatan bahin sa pagmatuto sa bata kon ang usa ka ginikanan Saksi ni Jehova ug ang usa dili-Saksi?

Duha ka hinungdanong mga prinsipyo sa Kasulatan ang maghatag ug giya bahin sa pagmatuto sa bata alang sa usa ka ginikanan nga Saksi nga may kapikas nga dili-Saksi. Ang usa mao: “Among sugton ang Diyos ingong magmamando inay ang mga tawo.” (Buhat 5:29) Ang lain mao: “Ang bana maoy ulo sa iyang asawa ingon nga si Kristo usab maoy ulo sa kongregasyon.” (Efeso 5:23) Kining ulahing teksto mapadapat dili lamang sa Saksi nga mga asawa nga may Saksi nga mga bana, kondili sa mga asawa usab nga may mga bana nga dili-Saksi. (1 Pedro 3:1) Unsaon man pagbalanse sa usa ka ginikanan nga Saksi kining mga prinsipyoha sa dihang magatudlo sa iyang mga anak?

Kon ang bana usa ka Saksi ni Jehova, siya ang responsable sa pagtagana sa espirituwal ug pisikal nga mga panginahanglan sa iyang pamilya. (1 Timoteo 5:8) Bisan tuod ang dili-magtutuong inahan mogugol ug mas dakong panahon uban sa iyang mga anak, ang amahan nga Saksi kinahanglang magtudlo sa iyang mga anak pinaagi sa paghatag ug espirituwal nga pagbansay diha sa balay ug sa pagkuyog kanila ngadto sa Kristohanong mga tigom, diin sila makabenepisyo sa instruksiyon bahin sa moral ug sa maayong panag-ubanay.

Komosta kon ang dili-magtutuong asawa moinsistir sa pagdala sa iyang mga anak ngadto sa iyang simbahan o sa pagtudlo kanila sa iyang mga tinuohan? Ang balaod sa yuta tingali maghatag kaniyag katungod sa pagbuhat niana. Ang posibilidad nga ang mga bata madani sa pagsimba didto mahimong mag-agad ug dako sa kalidad sa espirituwal nga pagtudlo sa amahan. Samtang magtubo ang mga anak, ang Kasulatanhong pagtudlo sa ilang amahan angayng magtabang kanila sa pagsubay sa kamatuoran sa Pulong sa Diyos. Pagkamalipayon sa magtutuong bana kon ang iyang mga anak mobarog dapig sa kamatuoran!

Kon ang inahan usa ka Saksi ni Jehova, angay niyang tahoron ang prinsipyo sa pagkaulo samtang magmabalak-on usab siya bahin sa dumalayong kaayohan sa iyang mga anak. (1 Corinto 11:3) Sa daghang kahimtang, ang iyang dili-magtutuong bana dili man mosupak kon ang iyang asawa nga Saksi mag-edukar sa ilang mga anak maylabot sa moral ug sa espirituwal, ug ang tabang ngadto sa maong tumong mabatonan diha sa mga tigom sa katawhan ni Jehova. Ang inahan makatabang sa iyang bana nga masabtan ang mga kaayohan sa makapalig-ong edukasyon nga madawat sa ilang mga anak pinaagi sa organisasyon ni Jehova. Sa mataktikanhong paagi, ikapasiugda sa asawa ang kaayohan sa pagsilsil sa mga prinsipyo sa Bibliya bahin sa moral diha sa ilang mga anak, sanglit ang ilang mga anak nagkinabuhi sa kalibotan nga dunot ang moralidad.

Bisan pa niana, ang bana basin moinsistir nga ang iyang mga anak kinahanglang mosunod sa iyang relihiyon, nga magdala kanila ngadto sa simbahan ug mag-edukar kanila sumala sa iyang relihiyon. O kaha ang bana basin supak sa tanang relihiyon ug moinsistir nga ang iyang mga anak dili tudloan bahin sa relihiyon. Isip ulo sa pamilya, siya ang numero unong responsable sa maong desisyon. a

Bisan tuod nagtahod sa pagkaulo sa iyang bana, isip usa ka dedikadong Kristohanon, ang magtutuong asawa maghinumdom sa tinamdan sa mga apostoles nga si Pedro ug Juan, nga miingon: “Alang kanamo, dili kami makahunong sa pagsulti sa mga  butang nga among nakita ug nadungog.” (Buhat 4:19, 20) Kay mabalak-on sa espirituwal nga kaayohan sa mga anak, ang usa ka inahan nga Saksi mangita gayod ug mga kahigayonan sa pagtultol kanila bahin sa moral. May kaakohan siya atubangan kang Jehova sa pagtudlo sa uban bahin sa kon unsay iyang nahibaloan nga tinuod, ug apil niini ang iyang mga anak. (Proverbio 1:8; Mateo 28:19, 20) Sa unsang paagi masulbad sa inahan nga Saksi ang maong suliran?

Tagda pananglitan ang bahin sa pagtuo sa Diyos. Ang asawa nga Saksi tingali dili makadumalag pormal nga pagtuon sa Bibliya uban sa iyang mga anak tungod sa mga pagdili sa bana. Tungod niini, dili na lang ba siya mosulti sa iyang mga anak ug bisan unsa bahin kang Jehova? Dili. Ang iyang mga pulong ug buhat natural lang nga magbanaag sa iyang pagtuo sa Maglalalang. Sa walay duhaduha ang iyang mga anak mangutana bahin niana. Angay nga dili siya magpanuko sa paggamit sa iyang kagawasan sa pagtuman sa iyang relihiyon pinaagi sa pagpahayag sa iyang pagtuo sa Maglalalang, lakip na ngadto sa iyang mga anak. Bisan tuod siya dili makadumalag pagtuon sa Bibliya uban sa iyang mga anak o makadala kanila nga regular ngadto sa mga tigom, siya makapaambit kanila sa kahibalo bahin kang Jehova nga Diyos.—Deuteronomio 6:7.

Maylabot sa relasyon tali sa usa ka Saksi ug sa iyang kapikas nga dili-magtutuo, si apostol Pablo misulat: “Ang bana nga dili-magtutuo ginabalaan labot sa iyang asawa, ug ang asawa nga dili-magtutuo ginabalaan labot sa igsoon nga lalaki; kay kon wala pa, ang inyong mga anak sa pagkatinuod mahugaw, apan karon sila mga balaan.” (1 Corinto 7:14) Giisip ni Jehova ang relasyon sa kaminyoon nga balaan tungod sa kapikas nga magtutuo, ug ang mga anak giisip ni Jehova nga balaan. Ang asawa nga Saksi kinahanglang maghimo sa iyang maarangan sa pagtabang sa iyang mga anak sa pagsabot sa kamatuoran, nga magasalig kang Jehova kon unsay dangatan sa kataposan.

Samtang magtubo ang mga anak, sila nay magdesisyon kon unsay ilang baroganan sumala sa impormasyon nga ilang madawat gikan sa ilang ginikanan. Basin modesidir sila pinasukad sa mga pulong ni Jesus: “Siya nga adunay labawng pagmahal sa amahan o sa inahan kay kanako dili-takos kanako.” (Mateo 10:37) Sila usab gisugo: “Mga anak, magmasinugtanon sa inyong mga ginikanan nga nahiusa sa Ginoo.” (Efeso 6:1) Daghang batan-on mihukom sa ‘pagsugot sa Diyos ingong magmamando’ inay kay sa ilang ginikanan nga dili-Saksi, bisan pag gilisodlisod sila sa maong ginikanan. Pagkadakong ganti alang sa ginikanan nga Saksi nga makita ang iyang mga anak nga modesidir sa pag-alagad kang Jehova bisan pa sa pagsupak!

[Footnote]