Nahinumdom Ka Ba?

Nalingaw ka ba sa pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Unsay empatiya, ug nganong kinahanglan kining ugmaron sa mga Kristohanon?

Kini mao ang katakos sa pagbutang sa kaugalingon diha sa kahimtang sa laing tawo, sama sa pagbati sa kasakit sa laing tawo diha sa atong kasingkasing. Gitambagan ang mga Kristohanon sa pagpakitag ‘pagbati alang sa isigkaingon, inigsoong pagbati, ug pagkamabination.’ (1 Pedro 3:8) Si Jehova naghatag kanato ug panig-ingnan nga angayng sundon maylabot sa pagpakitag empatiya. (Salmo 103:14; Zacarias 2:8) Atong mapauswag ang atong pagkasensitibo niining bahina pinaagi sa pagpamati, pagpaniid, ug paghanduraw.—4/15, mga panid 24-6.

• Aron mabatonan ang tinuod nga kalipay, nganong kinahanglang mahitabo una ang espirituwal nga pagpang-ayo sa dili pa ang bug-os nga solusyon sa mga depekto sa lawas?

Daghang tawo nga himsog sa pisikal ang dili malipayon, nabug-atan sa mga problema. Sa kasukwahi, daghang Kristohanon karon nga may mga depekto sa lawas ang malipayon kaayong nag-alagad kang Jehova. Kadtong nakabenepisyo sa espirituwal nga pagpang-ayo adunay kahigayonan nga makasinati sa pagkahanaw sa mga depekto sa lawas didto sa bag-ong kalibotan.—5/1, mga panid 6-7.

• Nganong ang Hebreohanon 12:16 nagpakasama kang Esau sa usa ka makihilawason?

Ang asoy sa Bibliya nagpakita nga si Esau nagpasundayag ug tinamdan nga nasentro sa dihadihang mga ganti ug kawalay-pagtagad sa sagradong mga butang. Kon may usa ka tawo karong adlawa nga magtugot nianang matanga sa tinamdan nga maugmad, mosangpot kini sa seryosong sala, sama sa pakighilawas.—5/1, mga panid 10-11.

• Kinsa si Tertullian, ug ilado siya sa unsa?

Siya maoy usa ka magsusulat ug teologo nga nabuhi sa ikaduha ug ikatulo nga mga siglo K.P. Nailado siya tungod sa paghimog daghang sinulat nga nagdepensa sa gitawag kono nga Kristiyanidad. Bisan tuod mihimo siyag pagdepensa, iyang gipasiugda ang mga ideya ug pilosopikanhong mga panghunahuna nga maoy pasikaranan sa sayop nga mga doktrina, sama sa Trinidad.—5/15, mga panid 29-31.

• Nganong ang henetika dili maoy bug-os nga responsable sa mga balatian, batasan, ug kamatayon sa tawo?

Ang mga siyentipiko nakahinapos nga may dayag nga henetikanhong hinungdan ang nagkalainlaing mga balatian sa tawo, ug ang uban nagtuo nga ang batasan gipiho sa atong mga gene. Bisan pa niana, ang Bibliya nagpatin-aw sa sinugdanan sa tawo, nga naglakip kon sa unsang paagi ang sala ug pagkadi-hingpit nagsakit sa mga tawo. Bisan tuod may papel nga gidula ang mga gene sa paghulma sa mga personalidad, ang atong pagkadi-hingpit ug ang atong palibot maoy pangunang mga impluwensiya usab.—6/1, mga panid 9-11.

• Sa unsang paagi ang tipik sa papiro nga nakaplagan sa Oxyrhynchus, Ehipto, naghatag ug katin-awan sa paggamit sa ngalan sa Diyos?

Kining maong tipik sa Job 42:11, 12 nga gikan sa Gregong Septuagint naundan sa Tetragrammaton (ang upat ka Hebreohanong mga letra sa ngalan sa Diyos). Kini maoy dugang pamatuod nga ang ngalan sa Diyos sa Hebreohanon makita diha sa Septuagint, nga kasagarang gikutlo sa mga magsusulat sa Kristohanon Gregong Kasulatan.—6/1, panid 30.

• Ang mapintas ug makamatay nga mga dula sa gladyador sa Romanhong Imperyo gipakasama sa unsang modernong ginatan-aw nga mga esport?

Ang usa ka bag-ong eksibit sa Colosseum sa Roma, Italya, nagpakita ug modernong mga kasamahan pinaagi sa paglakip sa mga pelikula sa video bahin sa pagpakigbugno sa toro, propesyonal nga boksing, mga lumba sa awto ug motorsiklo, ug ginatan-aw nga mga bugno diha sa ubang modernong mga bangga sa esport. Seryosong gihunahuna sa unang mga Kristohanon nga si Jehova wala mahigugma sa kapintasan o sa pintas nga mga tawo, ug dili usab kana angayng higugmaon sa mga Kristohanon karon. (Salmo 11:5)—6/15, panid 29.

• Samtang maningkamot kita nga mahimong epektibong mga magtutudlo, unsay atong makat-onan sa panig-ingnan ni Esdras?

Ang Esdras 7:10 nagpasiugda sa upat ka butang nga gihimo ni Esdras, mga butang nga mapaningkamotan natong masundog. Kini nag-ingon: “Si Esdras [1] nakaandam sa iyang kasingkasing [2] sa pagkonsulta sa balaod ni Jehova ug [3] sa pagbuhat niini ug [4] sa pagtudlo sa Israel sa regulasyon ug sa hustisya.”—7/1, panid 20.

• Sa unsang duha ka natad sa kalihokan nga haom alang sa Kristohanong babaye nga magpandong?

Ang una maoy sa mga kahimtang nga motungha diha sa panimalay. Ang iyang pagpandong nagbanaag sa iyang pag-ila nga ang iyang bana maoy dunay responsibilidad sa pagpanguna sa pag-ampo ug pagtudlo sa Bibliya. Ang ikaduha maoy diha sa mga kalihokan sa kongregasyon, diin iyang ipakita ang pag-ila nga ang bawtismadong mga lalaki adunay Kasulatanhong awtoridad sa pagtudlo ug pagpanguna. (1 Corinto 11:3-10)—7/15, mga panid 26-7.

• Nganong giila sa mga Kristohanon nga ang yoga dili kay ehersisyo lamang ug maoy peligroso?

Ang katuyoan sa yoga ingong disiplina mao ang pagtultol sa usa ka tawo nga mahiusa sa labaw-tawhanon nga espiritu. Sukwahi sa pagtultol sa Diyos, ang yoga nalangkit sa paghunong sa kinaugalingong paghunahuna. (Roma 12:1, 2) Ang yoga mahimong magladlad sa usa sa mga kapeligrohan sa espiritismo ug okultismo. (Deuteronomio 18:10, 11)—8/1, mga panid 20-2.