“Kinabubut-on nga Magpasaylo sa Usag Usa”

IKAW ba nagtuo nga napasaylo na sa Diyos ang imong mga sala? Sa Tinipong Bansa, mopatim-aw nga mao kini ang gituohan sa kadaghanang hamtong nga mga tawo. Si Dr. Loren Toussaint, ang pangunang tigmugna sa usa ka pagtuon nga gihimo didto sa University of Michigan Institute for Social Research, nagtaho nga sa 1,423 ka Amerikanong gipangutana, mga 80 porsiyento sa mga hamtong nga kapin sa 45 ang edad miingon nga napasaylo na sa Diyos ang ilang mga sala.

Apan, makaiikag nga 57 porsiyento lamang niadtong gipangutana miingon nga gipasaylo nila ang uban. Kining maong estadistika nagpahinumdom kanato sa mga pulong ni Jesus diha sa Wali sa Bukid: “Kon kamo magapasaylo sa mga tawo sa ilang kalapasan, pasayloon usab kamo sa inyong langitnong Amahan; apan kon kamo dili magapasaylo sa mga tawo sa ilang kalapasan, dili usab pasayloon sa inyong Amahan ang inyong kalapasan.” (Mateo 6:14, 15) Oo, ang pagpasaylo sa Diyos sa atong mga sala nagdepende, sa usa ka bahin, sa atong pagkaandam sa pagpasaylo sa uban.

Gipahinumdoman ni apostol Pablo ang mga Kristohanon sa Colosas niining maong prinsipyo. Iyang giawhag sila: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.” (Colosas 3:13) Tinuod, dili gayod kini sayon nga buhaton. Pananglitan, kon ang usa ka tawo mosulti kanimo ug sakit o dili malulotong mga pulong, lisod palabyon ang iyang gihimo.

Bisan pa niana, daghang kaayohan ang mabatonan sa pagpasaylo sa uban. Mao kini ang giingon sa usa ka sosyologo nga si Dr. David R. Williams bahin sa iyang panukiduki: “Among nakita nga ang pagpasaylo sa uban dako kaayog kalambigitan sa kahimsog sa hunahuna taliwala sa hamtong ug edaran nga mga Amerikano.” Kana maoy uyon sa mga pulong sa maalamon nga Haring Solomon, kinsa mga 3,000 ka tuig kanhi misulat: “Ang kalmado nga kasingkasing mao ang kinabuhi sa unod.” (Proverbio 14:30) Sanglit ang mapinasayloong espiritu nagpalambo ug maayong relasyon sa Diyos ug sa atong isigkatawo, kita dunay maayong katarongan nga kinabubut-ong magpasaylo sa usag usa gikan sa kasingkasing.—Mateo 18:35.