‘Kon Walay Ilustrasyon Siya Dili Mosulti Kanila’

‘Misulti si Jesus ngadto sa mga panon sa katawhan pinaagi sa mga ilustrasyon. Sa pagkatinuod, kon walay ilustrasyon siya dili mosulti kanila.’—MATEO 13:34.

1, 2. (a) Nganong ang epektibong mga ilustrasyon dili daling malimtan? (b) Unsang matanga sa mga ilustrasyon ang gigamit ni Jesus, ug unsang mga pangutana ang motungha bahin sa iyang paggamit ug mga ilustrasyon? (Tan-awa usab ang potnot.)

 MAKAHINUMDOM ka ba ug usa ka ilustrasyon nga imong nadungog, tingali panahon sa usa ka pakigpulong publiko, daghang tuig kanhi? Ang epektibong mga ilustrasyon dili daling malimtan. Usa ka awtor nag-ingon nga tungod sa mga ilustrasyon “ang nadunggan mahimong makita ug ang mga mamiminaw makahunahuna ug mga hulagway.” Tungod kay ang mga hulagway kasagaran maoy kinamaayohang tabang sa atong pagsabot, ang mga ilustrasyon makapasayon sa pagsabot sa mga ideya. Ang mga ilustrasyon makahatag ug tataw nga kahulogan sa mga pulong, nga magtudlog mga pagtulon-an nga matisok pag-ayo sa atong panumdoman.

² Walay laing magtutudlo dinhi sa yuta nga nahimong mas batid sa paggamit ug mga ilustrasyon gawas kang Jesu-Kristo. Ang daghang sambingay ni Jesus dali rang mahinumdoman duolan sa duha ka libo ka tuig human kini gilitok. a Nganong nagsalig pag-ayo si Jesus niining linaing paagi sa pagpanudlo? Ug unsay nakapaepektibo pag-ayo sa iyang mga ilustrasyon?

Kon Nganong si Jesus Nagtudlo Pinaagig mga Ilustrasyon

3. (a) Sumala sa Mateo 13:34, 35, unsa ang usa ka hinungdan kon nganong si Jesus migamit ug mga ilustrasyon? (b) Unsay nagpakita nga gipabilhan gayod ni Jehova kining matanga sa pagpanudlo?

³ Ang Bibliya naghatag ug duha ka takos tagdon  nga mga hinungdan kon nganong si Jesus migamit ug mga ilustrasyon. Una, ang iyang pagbuhat niana nagtuman sa tagna. Si apostol Mateo misulat: ‘Si Jesus misulti sa mga panon sa katawhan pinaagi sa mga ilustrasyon. Sa pagkatinuod, kon walay ilustrasyon siya dili mosulti kanila; aron matuman ang gisulti pinaagi sa manalagna nga miingon: “Pagabukhon ko ang akong baba uban ang mga ilustrasyon.”’ (Mateo 13:34, 35) Ang “manalagna” nga gikutlo ni Mateo mao ang nagkomposo sa Salmo 78:2. Ang maong salmista misulat ilalom sa pag-inspirar sa espiritu sa Diyos kasiglohan una pa matawo si Jesus. Dili ba katingalahan nga gatosan ka tuig nga abante pa, gitino na ni Jehova nga ang iyang Anak manudlo pinaagig mga ilustrasyon? Seguradong gipabilhan ni Jehova kining matanga sa pagpanudlo!

4. Sa unsang paagi gisaysay ni Jesus kon nganong migamit siya ug mga ilustrasyon?

⁴ Ikaduha, si Jesus mismo misaysay nga siya migamit ug mga ilustrasyon aron ibulag kadtong kansang kasingkasing dili masanongon. Human niya giasoy sa “mga panon sa katawhan” ang sambingay sa magpupugas, ang iyang mga tinun-an nangutana: ‘Nganong mosulti ka kanila pinaagi sa paggamit ug mga ilustrasyon?’ Si Jesus mitubag: ‘Kaninyo gitugot ang pagsabot sa sagradong mga tinago sa gingharian sa mga langit, apan kanila wala kini itugot. Mao nga ako magasulti kanila pinaagi sa paggamit ug mga ilustrasyon, tungod kay, sa pagtan-aw, sila magatan-aw nga kawang, ug sa pagpamati, sila magapamati nga kawang, ni makasabot sila sa diwa niini; ug kanila natuman ang tagna ni Isaias, nga nag-ingon, “Pinaagi sa pagpamati, makabati kamo apan dili gayod makasabot sa diwa niini; ug, sa pagtan-aw, motan-aw kamo apan dili gayod makakita. Kay ang kasingkasing niini nga katawhan nahimong dili-madinawaton.”’—Mateo 13:2, 10, 11, 13-15; Isaias 6:9, 10.

5. Sa unsang paagi ang mga ilustrasyon ni Jesus nagbulag sa mapaubsanong mga mamiminaw gikan sa mga mapahitas-on?

⁵ Unsay anaa sa mga ilustrasyon ni Jesus nga nagbulag sa mga tawo? Sa pipila ka kaso, ang iyang mga mamiminaw kinahanglang manukiduki aron bug-os nga makasabot sa iyang gisulti. Ang mapaubsanong mga tawo natukmod sa pagpangayo ug dugang impormasyon. (Mateo 13:36; Marcos 4:34) Nan, ang mga ilustrasyon ni Jesus nagpadayag sa kamatuoran ngadto niadtong kansang kasingkasing nagtinguha niana; sa samang higayon, ang iyang mga ilustrasyon nagtago sa kamatuoran gikan niadtong mapahitas-on ug kasingkasing. Pagkatalagsaong magtutudlo si Jesus! Susihon nato karon ang pipila ka butang nga naghimo sa iyang mga ilustrasyon nga epektibo kaayo.

Mapilion nga Paggamit sa mga Detalye

6-8. (a) Unsang bentaha ang wala pa mabatoni sa unang-siglong mga mamiminaw ni Jesus? (b) Unsang mga pananglitan ang nagpakita nga si Jesus mapilion sa iyang paggamit ug mga detalye?

⁶ Nahibulong ka ba sukad kon sama sa unsa ang kahimtang niadtong unang-siglong mga tinun-an nga direktang nakadungog sa pagpanudlo ni Jesus? Bisan tuod nabatonan nila ang talagsaong kahigayonan nga makadungog sa tingog ni Jesus, wala pa nila mabatoni ang bentaha sa pagpanukiduki sa sinulat nga pulong aron sa pagpahinumdom kanila sa mga butang nga iyang gisulti. Hinunoa, kinahanglang huptan nila ang mga pulong ni Jesus diha sa ilang hunahuna ug kasingkasing. Pinaagi sa iyang batid nga paggamit ug mga ilustrasyon, gipasayon ni Jesus ang paghinumdom nila sa iyang gitudlo. Sa unsang paagi?

⁷ Si Jesus mapilion sa iyang paggamit ug mga detalye. Sa dihang ang mga detalye adunay kalabotan sa usa ka sugilanon o kinahanglanon aron sa pagpasiugda, gitino niya nga ilakip kini. Busa gisulti niya kon pila ang eksaktong gidaghanon sa mga karnero nga gibiyaan samtang ang tag-iya nangita sa nawala nga karnero, kon pila ka oras nga ang mga trabahador naghago diha sa parasan, ug kon pila ka buok talanton ang gipiyal sa mga sulugoon.—Mateo 18:12-14; 20:1-16; 25:14-30.

⁸ Sa samang higayon, wala ilakip ni Jesus ang wala-kinahanglanang mga detalye nga makabalda sa atong pagsabot sa kahulogan sa mga ilustrasyon. Pananglitan, sa sambingay bahin sa dili-maluluy-ong ulipon, wala ipatin-aw kon sa unsang paagi ang maong ulipon nakautang ug 60,000,000 ka denario. Ang gipasiugda ni Jesus mao ang pagkakinahanglanon sa pagkamapinasayloon. Ang hinungdanon mao, dili kon sa unsang paagi nakautang ang ulipon, kondili kon sa unsang paagi napasaylo ang iyang utang ug kon sa unsang paagi siya, sa baylo, nagtratar sa isigkaulipon nga nakautang niya ug medyo gamay nga kantidad sa salapi. (Mateo 18:23-35) Sa susama, sa ilustrasyon bahin sa anak nga mausikon, wala ipatin-aw ni Jesus kon nganong ang manghod nga lalaki kalit lang nangayo sa iyang panulondon ug nganong  giusik-usikan niya kini. Apan gidetalye ni Jesus kon unsay gibati ug reaksiyon sa amahan sa dihang ang iyang anak nagbag-o ug mipauli. Ang maong mga detalye mahitungod sa reaksiyon sa amahan kinahanglanon sa punto nga gipasiugda ni Jesus, nga si Jehova nagapasaylo “sa madagayaon gayod.”—Isaias 55:7; Lucas 15:11-32.

9, 10. (a) Sa dihang naghulagway sa mga karakter diha sa iyang mga ilustrasyon, sa unsa gisentro ni Jesus ang iyang pagtagad? (b) Sa unsang paagi gipasayon ni Jesus alang sa iyang mga mamiminaw ug sa uban pa sa paghinumdom sa iyang mga ilustrasyon?

⁹ Si Jesus maalamon usab sa paagi sa paghulagway niya sa mga karakter diha sa iyang mga sambingay. Inay kay idetalye pag-ayo ang mga kahubitan sa panagway sa mga karakter, si Jesus kasagarang nagsentro sa pagtagad diha sa ilang gibuhat o kon unsay ilang reaksiyon sa mga hitabo nga iyang giasoy. Busa, imbes hubiton ang panagway sa maayong silingan nga Samarianhon, si Jesus nag-asoy ug mas hinungdanong butang—kon sa unsang paagi maluluy-ong mitabang ang Samarianhon sa samdan nga Hudiyo nga nagbuy-od sa dalan. Gihatag ni Jesus ang mga detalye nga gikinahanglan aron sa pagtudlo nga ang gugma sa silingan angayng ipakita ngadto sa mga tawo gawas niadtong pareho nato ug rasa o nasyonalidad.—Lucas 10:29, 33-37.

¹⁰ Ang mainampingong paggamit ni Jesus sa mga detalye naghimo sa iyang mga ilustrasyon nga mubo ug dili kaayo daghag detalye. Busa gipasayon niya alang sa iyang unang-siglong mga mamiminaw—ug sa daghan pang uban nga sa ulahi makabasa sa inspiradong mga Ebanghelyo—sa paghinumdom niana ug sa bililhong mga leksiyon nga gitudlo niana.

Gikuha Gikan sa Adlaw-Adlaw nga Kinabuhi

11. Paghatag ug mga pananglitan kon sa unsang paagi ang mga sambingay ni Jesus nagbanaag sa mga butang nga sa walay duhaduha iyang nakita samtang nagdako sa Galilea.

¹¹ Si Jeus batid kaayo sa paggamit ug mga ilustrasyon nga adunay kalabotan sa kinabuhi sa mga tawo. Daghan sa iyang mga sambingay nagbanaag sa mga butang nga sa walay duhaduha iyang nakita samtang nagdako sa Galilea. Hunahunaa sa makadiyot ang panahon sa bata pa siya. Unsa ka subsob nga nakita niya ang iyang inahan nga nagluto ug tinapay nga dunay lebadura pinaagi sa pagkuha ug usa ka tipik sa gipaaslom nga minasa nga gitipigan gikan sa miaging pagluto niya ug tinapay ug gigamit kini ingong igpapatubo? (Mateo 13:33) Pila ka higayon nga nagtan-aw siya sa mga mangingisda samtang gitaktak nila ang ilang mga baling ngadto sa tin-awng asul nga katubigan sa Dagat sa Galilea? (Mateo 13:47) Unsa ka subsob nga iyang nakita ang mga bata nga nagdula sa tiyanggihan? (Mateo 11:16) Lagmit namatikdan ni Jesus ang ubang ordinaryong mga butang nga nahimong bahin sa iyang mga ilustrasyon—mga binhi nga gipugas, malipayong mga kombira sa kasal, ug mga uma sa trigo nga nahinog ilalom sa adlaw.—Mateo 13:3-8; 25:1-12; Marcos 4:26-29.

12, 13. Sa unsang paagi ang sambingay ni Jesus bahin sa trigo ug mga bunglayon nagbanaag sa iyang pagkasinati sa lokal nga mga kahimtang?

 ¹² Nan, dili ikatingala nga ang mga sirkumstansiya ug mga situwasyon sa adlaw-adlaw nga kinabuhi gisal-ot diha sa daghang ilustrasyon ni Jesus. Busa, aron mas bug-os nga masabtan ang iyang kabatid sa paggamit niining maong pamaagi sa pagtudlo, makatabang ang pagkonsiderar kon unsay kahulogan sa iyang gisulti ngadto sa iyang Hudiyong mga mamiminaw. Susihon nato ang duha ka pananglitan.

¹³ Una, sa sambingay sa trigo ug mga bunglayon, si Jesus nagsugilon bahin sa usa ka tawo nga nagpugas ug maayong trigo diha sa iyang uma apan ang “kaaway” misulod sa umahan ug gisapawan pagpugas ug mga bunglayon ang trigo. Nganong gipili ni Jesus kanang mabatokong buhat? Buweno, hinumdomi nga iyang giasoy ang ilustrasyon duol sa Dagat sa Galilea, ug ang pangunang trabaho sa mga Galileanhon dayag nga mao ang pagpanguma. Unsa pa bay mas makadaot ngadto sa mag-uuma kay sa paghinok ug sulod sa usa ka kaaway ngadto sa iyang uma ug sapawan kana pagpugas ug makadaot nga mga bunglayon? Ang sekular nga mga balaod niadtong panahona nagpakita nga ang maong mga pag-atake nahitabo gayod. Dili ba dayag nga gigamit ni Jesus ang usa ka situwasyon nga masabtan sa iyang mga mamiminaw?—Mateo 13:1, 2, 24-30.

14. Sa sambingay bahin sa maayong silingan nga Samarianhon, nganong makahuloganon nga gigamit ni Jesus ang dalan nga “gikan sa Jerusalem paingon sa Jerico” aron ipasiugda ang iyang punto?

¹⁴ Ikaduha, hinumdomi ang sambingay bahin sa maayong silingan nga Samarianhon. Si Jesus misugod sa pag-ingon: “Dihay usa ka tawo nga naglugsong gikan sa Jerusalem paingon sa Jerico ug nahulog sa kamot sa mga tulisan, kinsa naghukas kaniya ug nagbun-og kaniya, ug namahawa, nga nagbiya kaniya nga himalatyon.” (Lucas 10:30) Makahuloganon nga gigamit ni Jesus ang dalan nga “gikan sa Jerusalem paingon sa Jerico” aron ipasiugda ang iyang punto. Sa dihang nag-asoy niining sambingaya, didto siya sa Judea, dili layo sa Jerusalem; busa ang iyang mga mamiminaw lagmit nasinati sa dalan nga gihisgotan. Kanang maong dalan nabaniog nga peligroso, ilabina alang sa usa ka tawo nga nag-inusara pagbiyahe. Kini naglikoliko agi sa mingaw nga yuta, nga tungod niana daghan ang katagoan sa mga tulisan.

15. Nganong wala may makapakamatarong sa pagkawalay-pagtagad sa saserdote ug sa Levihanon diha sa ilustrasyon nga naglangkit sa maayong silingan nga Samarianhon?

¹⁵ Aduna pay laing takos tagdon sa paghisgot ni Jesus sa dalan nga “gikan sa Jerusalem paingon sa Jerico.” Sumala sa sambingay, una usa ka saserdote ug dayon usa ka Levihanon ang miagi usab nianang dalana—apan walay mihunong aron sa pagtabang sa biktima. (Lucas 10:31, 32) Ang mga saserdote nag-alagad didto sa templo sa Jerusalem, ug ang mga Levihanon nagtabang kanila. Daghang saserdote ug mga Levihanon ang nagpuyo sa Jerico kon wala silay trabaho sa templo, kay ang Jerico maoy 23 kilometros lamang gikan sa Jerusalem. Busa, sa walay duhaduha may higayon nga moagi sila nianang dalana. Matikdi usab nga ang  saserdote ug ang Levihanon miagi nianang dalana “gikan sa Jerusalem,” busa gikan na sila sa templo. b Mao nga walay usa nga makapakamatarong sa pagkawalay-pagtagad niining mga tawhana pinaagi sa pag-ingong, ‘Ilang gilikayan ang tawong samdan tungod kay morag patay na siya, ug ang paghikap ug patay makapahimo kanilang dili-takos nga moalagad sa templo nianang panahona.’ (Levitico 21:1; Numeros 19:11, 16) Dili ba klaro nga ang ilustrasyon ni Jesus nagbanaag sa mga butang nga sinati sa iyang mga mamiminaw?

Gikuha Gikan sa Kalalangan

16. Nganong dili ikahibulong nga si Jesus nasinati pag-ayo sa kalalangan?

¹⁶ Daghang ilustrasyon ug mga sambingay ni Jesus ang nagpadayag sa iyang pagkasinati sa mga tanom, hayop, ug kahimtang sa panahon. (Mateo 6:26, 28-30; 16:2, 3) Diin niya nakuha ang maong kahibalo? Samtang nagdako sa Galilea, siya sa walay duhaduha dunay daghang kahigayonan sa pagpaniid sa mga linalang ni Jehova. Dugang pa, si Jesus mao “ang panganay sa tanang kalalangan,” ug gigamit siya ni Jehova ingong “batid nga magbubuhat” sa paglalang sa tanang butang. (Colosas 1:15, 16; Proverbio 8:30, 31) Ikahibulong ba nga si Jesus nasinati pag-ayo sa kalalangan? Susihon nato kon sa unsang paagi batid niyang gigamit kining maong kahibalo diha sa iyang pagpanudlo.

17, 18. (a) Sa unsang paagi ang mga pulong ni Jesus nga nasulat diha sa Juan kapitulo 10 nagbutyag nga sinati siya sa mga taras sa mga karnero? (b) Unsay napanid-an sa mga bisita sa kayutaan sa Bibliya bahin sa bugkos tali sa mga magbalantay ug sa ilang mga karnero?

¹⁷ Lakip sa labing mabination sa mga ilustrasyon ni Jesus mao kanang nasulat sa Juan kapitulo 10, diin iyang gipakasama ang iyang suod nga relasyon uban sa iyang mga sumusunod nianang sa usa ka magbalantay uban sa iyang mga karnero. Ang giingon ni Jesus nagpadayag nga sinati kaayo siya sa mga taras sa binuhi nga mga karnero. Iyang gipaila nga ang mga karnero andam nga giyahan ug nga sila matinumanong mosunod sa ilang magbalantay. (Juan 10:2-4) Ang talagsaong bugkos tali sa mga magbalantay ug sa mga karnero napanid-an sa mga bisita sa kayutaan sa Bibliya. Sa ika-19ng siglo, ang usa ka biologo nga si H. B. Tristram nag-ingon: “Kas-a gipanid-an nako ang usa ka magbalantay nga nakigdula sa iyang panon sa mga karnero. Nagpakaaron-ingnon siyang midagan; ang mga karnero migukod ug milikos kaniya. . . . Sa kataposan ang tibuok panon nagpormag sirkulo, nga nagluksolukso palibot niya.”

¹⁸ Nganong ang mga karnero mosunod sa ilang magbalantay? “Tungod kay nakaila man sila sa iyang tingog,” miingon si Jesus. (Juan 10:4) Nakaila ba gayod ang mga karnero sa tingog sa ilang magbalantay? Gikan sa personal nga obserbasyon, si George A. Smith misulat diha sa iyang librong The Historical Geography of the Holy Land: “Usahay malingaw kami sa among pagpahulay sa udto tupad sa usa sa mga atabay sa  Judea, diin tulo o upat ka magbalantay ang magdala sa ilang mga panon sa mga karnero. Ang mga panon nagkasagolsagol, ug naghunahuna mi kon unsaon pagkuha ug balik sa matag magbalantay ang iyang kaugalingong panon sa mga karnero. Apan human manginom ug magduladula ang panon sa mga karnero, ang mga magbalantay tinagsatagsa nga mosaka sa lainlaing mga kiliran sa walog, ug ang matag usa mogamit sa iyang linain nga paagi sa pagtawag; ug ang mga karnero sa matag magbalantay mobulag sa panon ug moadto sa kaugalingon nilang magbalantay, ug ang mga panon hapsay nga mamiya sama sa ilang pag-abot.” Nakaplagan ni Jesus ang kinamaayohang paagi sa pag-ilustrar sa iyang punto. Kon kita moila ug motuman sa iyang mga pagtulon-an ug kon kita mosunod sa iyang pagtultol, nan kita makapailalom sa malumo ug mahigugmaon nga pag-atiman sa “maayong magbalantay.”—Juan 10:11.

Gikuha Gikan sa mga Hitabo nga Nahibaloan sa Iyang mga Mamiminaw

19. Aron sa pagsalikway sa usa ka bakak nga ideya, sa unsang paagi epektibong gigamit ni Jesus ang lokal nga trahedya?

¹⁹ Ang epektibong mga ilustrasyon mahimong maglakip sa matulon-anon nga mga eksperyensiya o mga pananglitan. Sa usa ka okasyon, gigamit ni Jesus ang di pa dugayng hitabo sa pagsalikway sa bakak nga ideya nga ang trahedya modangat niadtong angayan niana. Siya miingon: “Kadtong napulog-walo nga natumpagan sa torre sa Siloam, nga sa ingon nagpatay kanila, naghunahuna ba kamo nga sila napamatud-ang labaw nga utangan [mga makasasala] kay sa tanang uban pang mga tawo nga nagapuyo sa Jerusalem?” (Lucas 13:4) Si Jesus larinong nangatarongan batok sa pangatarongan nga langkit sa kapalaran. Kadtong 18 ka kalag wala mamatay tungod sa usa ka sala nga nakapasuko sa Diyos. Sa pagkatinuod, ang ilang makapasubong kamatayon maoy resulta sa panahon ug wala damhang panghitabo. (Ecclesiastes 9:11) Sa ingon iyang gitumba ang usa ka bakak nga pagtulon-an pinaagi sa paghisgot sa usa ka hitabo nga ilado sa iyang mga mamiminaw.

20, 21. (a) Sa unsang paagi gisaway sa mga Pariseo ang mga tinun-an ni Jesus? (b) Unsang Kasulatanhong asoy ang gigamit ni Jesus aron sa pag-ilustrar nga dili katuyoan ni Jehova nga estriktong ipatuman ang iyang balaod sa Igpapahulay? (c) Unsay hisgotan sa sunod nga artikulo?

²⁰ Sa iyang pagtulon-an, gigamit usab ni Jesus ang Kasulatanhong mga pananglitan. Hinumdomi ang panahon sa dihang gisaway sa mga Pariseo ang iyang mga tinun-an tungod sa pagpangutlog uhay ug pagkaon niana sa Igpapahulay. Sa pagkatinuod, ang mga tinun-an nagsupak, dili sa Balaod sa Diyos, kondili sa estriktong interpretasyon sa mga Pariseo sa kon unsay trabaho nga supak sa balaod panahon sa Igpapahulay. Aron sa pag-ilustrar nga dili gayod katuyoan sa Diyos ang maong dili-angay nga estriktong pagpatuman sa iyang balaod sa Igpapahulay, gihisgotan ni Jesus ang usa ka hitabo nga nasulat sa 1 Samuel 21:3-6. Sa dihang gigutom, si David ug ang iyang mga tawo mihunong sa tabernakulo ug mikaon sa pasundayag nga mga tinapay, nga giilisan ug bag-o. Kasagaran ang daan nga mga tinapay gigahin aron kaonon sa mga saserdote. Bisan pa niana, ilalom sa mga sirkumstansiya, si David ug ang iyang mga tawo wala sawaya tungod sa pagkaon niana. Takos tagdon nga ang maong asoy mao ang bugtong nasulat nga hitabo diha sa Bibliya mahitungod sa pagkaon sa mga dili-saserdote sa daang mga tinapay. Si Jesus nahibalo gayod sa eksaktong asoy nga gamiton, ug ang iyang Hudiyong mga mamiminaw sa walay duhaduha sinati niana.—Mateo 12:1-8.

²¹ Sa pagkatinuod, si Jesus maoy Dakong Magtutudlo! Matingala gayod kita sa iyang dili-hitupngang katakos sa pagpahayag ug hinungdanong mga kamatuoran sa paagi nga nasabtan sa iyang mga mamiminaw. Apan, sa unsang paagi masundog nato siya diha sa atong pagpanudlo? Hisgotan kini sa sunod nga artikulo.

[Mga footnote]

Nahinumdom Ka Ba?

• Nganong si Jesus nagtudlo pinaagig mga ilustrasyon?

• Unsang pananglitan ang nagpakita nga gigamit ni Jesus ang mga ilustrasyon nga nasabtan sa iyang unang-siglong mga mamiminaw?

• Sa unsang paagi batid nga gigamit ni Jesus ang iyang kahibalo sa kalalangan diha sa iyang mga ilustrasyon?

• Sa unsang mga paagi gigamit ni Jesus ang mga hitabo nga nahibaloan sa iyang mga mamiminaw?

[Mga Pangutana sa Pagtuon]

[Mga hulagway sa panid 15]

Si Jesus nag-asoy bahin sa usa ka ulipon nga wala magpasaylo sa medyo gamay ra nga utang ug sa usa ka amahan nga nagpasaylo sa anak nga nag-usik-usik sa iyang tibuok panulondon

[Hulagway sa panid 16]

Unsay punto sa sambingay ni Jesus bahin sa maayong silingan nga Samarianhon?

[Hulagway sa panid 17]

Tinuod ba gayod nga ang mga karnero makaila sa tingog sa ilang magbalantay?