Sundoga ang Dakong Magtutudlo

“Busa panglakaw kamo ug paghimog mga tinun-an sa katawhan . . . , nga magatudlo kanila sa pagtuman sa tanang butang nga akong gisugo kaninyo.”—MATEO 28:19, 20.

1, 2. (a) Sa unsang paagi kitang tanan, sa usa ka paagi, maoy mga magtutudlo? (b) Maylabot sa pagpanudlo, unsang talagsaong responsibilidad ang nabatonan sa matuod nga mga Kristohanon?

 USA ka ba ka magtutudlo? Sa usa ka paagi, kitang tanan maoy mga magtutudlo. Matag higayon nga imong tultolan ang usa ka nawala nga biyahedor, ipakita sa usa ka kauban sa trabaho kon unsaon paghimo ang usa ka buluhaton, o isaysay sa usa ka bata kon unsaon paghigot sa liston sa iyang sapatos, ikaw nagatudlo. Ang pagtabang sa uban nianang paagiha makahatag ug usa ka sukod sa katagbawan, dili ba?

² Maylabot sa pagpanudlo, ang matuod nga mga Kristohanon adunay talagsaong responsibilidad. Gisugo kita sa “paghimog mga tinun-an sa katawhan . . . , nga magatudlo kanila.” (Mateo 28:19, 20) Sa sulod usab sa kongregasyon, adunay panahon nga kita manudlo. Ang kuwalipikadong mga lalaki gitudlo aron sa pag-alagad ingong “mga magbalantay ug mga magtutudlo,” sa tuyo nga palig-onon ang kongregasyon. (Efeso 4:11-13) Sa ilang adlaw-adlaw nga Kristohanong mga kalihokan, ang hamtong nga mga babaye kinahanglang mahimong “mga magtutudlo sa maayo” ngadto sa batan-ong mga babaye. (Tito 2:3-5) Kitang tanan giawhag sa pagdasig sa mga isigkamagtutuo, ug kita makatuman nianang tambaga pinaagi sa paggamit sa Bibliya sa pagpalig-on sa uban. (1 Tesalonica 5:11) Pagkadakong pribilehiyo nga mahimong magtutudlo sa Pulong sa Diyos ug magpaambit sa espirituwal nga mga prinsipyo nga makahatag ug dumalayong mga kaayohan!

3. Sa unsang paagi mapauswag nato ang atong pagkaepektibo ingong mga magtutudlo?

³ Apan, sa unsang paagi mapauswag nato ang atong pagkaepektibo ingong mga magtutudlo? Sa panguna, kini maoy pinaagi sa pagsundog sa Dakong Magtutudlo, si Jesus. ‘Apan unsaon nato pagsundog si Jesus?’ maghunahuna tingali ang uban. ‘Siya hingpit.’ Tinuod, dili kita mahimong hingpit nga mga magtutudlo. Bisan pa niana, bisan unsa pay atong mga katakos, mahimo nato ang atong kinamaayohan sa pagsundog sa paagi nga nagtudlo si Jesus. Hisgotan nato kon sa unsang paagi magamit nato ang upat sa iyang mga paagi—kayano, epektibong mga pangutana, lohikal nga pangatarongan, ug haom nga mga ilustrasyon.

Paghimo Nianang Yano

4, 5. (a) Nganong ang kayano usa ka hinungdanong kinaiya sa kamatuoran sa Bibliya? (b) Aron makatudlo uban ang kayano, nganong hinungdanon ang pagtagad sa atong bokabularyo?

⁴ Ang paninugdang mga kamatuoran sa Pulong sa Diyos dili komplikado. Diha sa pag-ampo, si Jesus miingon: “Ako sa dayag nagadayeg kanimo, Amahan, . . . tungod kay gitago mo kining mga butanga gikan sa mga maalamon ug sa mga makinaadmanon ug gipadayag kini ngadto sa mga bata.” (Mateo 11:25) Gipadayag ni Jehova ang iyang mga katuyoan ngadto niadtong dunay sinsero ug mapaubsanon nga kasingkasing. (1 Corinto 1:26-28) Busa, ang kayano maoy pangunang kinaiya sa kamatuoran sa Bibliya.

⁵ Sa dihang nagadumala ka ug panagtuon sa Bibliya sa balay o moduaw pag-usab sa mga interesado, sa unsang paagi makatudlo ka uban ang kayano? Aw, unsay atong nakat-onan gikan sa Dakong Magtutudlo? Aron masabtan sa iyang mga mamiminaw, nga daghan kanila maoy mga tawong “dili edukado ug ordinaryo,” si Jesus migamit ug yanong pinulongan. (Buhat 4:13) Nan, aron makatudlo uban ang kayano, ang unang kinahanglanon mao ang pagtagad sa atong bokabularyo.  Dili kinahanglang mogamit kita ug mapagawalong mga pulong aron himoon ang kamatuoran sa Pulong sa Diyos nga mas makapadani sa uban. Ang maong “paghinobra sa sinultihan” makapahadlok, ilabina niadtong kulang sa edukasyon o katakos. (1 Corinto 2:1, 2) Ang panig-ingnan ni Jesus nagpakita nga tungod sa yanong mga pulong nga mainampingong gipili, nasabtan gayod ang kamatuoran.

6. Sa unsang paagi malikayan nato nga hatagan ang estudyante sa Bibliya ug hilabihan ka daghang impormasyon?

⁶ Aron makatudlo uban ang kayano, kinahanglang likayan usab nato nga hatagan ang estudyante sa Bibliya ug hilabihan ka daghang impormasyon. Si Jesus mahunahunaon sa mga limitasyon sa iyang mga tinun-an. (Juan 16:12) Kita usab kinahanglang magmahunahunaon sa mga limitasyon sa estudyante. Pananglitan, sa dihang nagdumala ug pagtuon sa librong Kahibalo nga Motultol sa Kinabuhing Walay Kataposan, dili kinahanglang isaysay nato ang tanang detalye. a Ni kinahanglang magdalidali paghisgot sa impormasyon, nga morag ang pagkobre sa usa ka tinong gidaghanon sa materyal mao ang labing hinungdanong butang. Hinunoa, maalamon nga ang mga panginahanglan ug mga katakos sa estudyante mao ang magtino sa gikusgon sa pagtuon. Ang atong tumong mao ang pagtabang sa estudyante nga mahimong tinun-an ni Kristo ug usa ka magsisimba ni Jehova. Kinahanglang gamiton nato ang bisan unsang panahon nga gikinahanglan sa pagtabang sa interesadong estudyante sa pagsabot pag-ayo sa iyang ginatun-an. Busa, ang kamatuoran makatandog sa iyang kasingkasing ug makapalihok kaniya.—Roma 12:2.

7. Unsang mga sugyot ang makatabang kanato sa pagtudlo uban ang kayano sa dihang mopakigpulong sa kongregasyon?

⁷ Sa dihang mopakigpulong kita sa kongregasyon, ilabina kon dunay mga bag-ohan diha sa mamiminaw, sa unsang paagi makabungat kita ug mga pulong nga “daling masabtan”? (1 Corinto 14:9) Tagda ang tulo ka sugyot nga makatabang. Una, ipatin-aw ang bisan unsang dili-sinati nga mga pulong nga kinahanglan nimong gamiton. Ang atong pagsabot sa Pulong sa Diyos naghatag kanato ug lahi nga bokabularyo. Kon gamiton nato ang mga ekspresyon sama sa “matinumanon ug maalamong ulipon,” “ubang mga karnero,” ug “Dakong Babilonya,” kinahanglan tingali natong isaysay kanila pinaagig yanong mga pulong nga makapatin-aw sa kahulogan. Ikaduha, likayi ang paggamit ug daghan kaayong pulong. Ang daghan ra kaayong pulong, hilabihan ka detalyadong pagsaysay, makapawala sa interes sa mamiminaw. Ang pagkatin-aw moresulta gikan sa pagkuha sa wala-kinahanglanang mga pulong. Ikatulo, ayaw sulayi pagkobre ang hilabihan ka daghang materyal. Tungod sa atong panukiduki makakuha kita ug daghang makaiikag nga mga detalye. Apan maayong organisahon ang materyal ngadto sa pipila ka pangunang mga punto, nga gamiton lamang ang impormasyon nga nagsuportar nianang mga puntoha ug klarong mahan-ay sulod sa gitugot nga panahon.

Epektibong Paggamit sa mga Pangutana

8, 9. Sa unsang paagi makapili kita ug pangutana nga haom sa gikaikagan sa tagbalay? Paghatag ug mga panig-ingnan.

⁸ Hinumdomi nga si Jesus batid kaayo sa paggamit ug mga pangutana aron ipahayag sa iyang mga tinun-an kon unsay anaa sa ilang hunahuna ug aron mapalihok ug mabansay ang ilang panghunahuna. Pinaagi sa iyang mga pangutana, malumong natugkad ug napalihok ni Jesus ang ilang kasingkasing. (Mateo 16:13, 15; Juan 11:26) Sa unsang paagi kita, sama kang Jesus, epektibong makagamit ug mga pangutana?

⁹ Sa dihang mamalaybalay, makagamit kita ug mga pangutana aron sa pagpukaw sa interes, nga mag-andam sa dalan aron kita makasulti bahin sa Gingharian sa Diyos. Sa unsang paagi makapili kita ug pangutana nga haom sa gikaikagan sa tagbalay? Magmapaniiron. Sa dihang moduol sa usa ka balay, lantawa ang palibot. Duna bay mga dulaan  diha sa nataran, nga nagpaila nga dunay mga bata diha sa balay? Kon mao, makapangutana tingali kita, ‘Naghunahuna ka ba sukad kon sama sa unsa ang kalibotan sa dihang managko na ang imong mga anak?’ (Salmo 37:10, 11) Duna bay daghang trangka diha sa atubangan nga pultahan, o dunay elektronik nga sistema sa seguridad? Makapangutana kita: ‘Sa imong hunahuna moabot ba gayod ang panahon sa dihang ang mga tawo nga sama kanimo ug kanako mobating luwas diha sa atong balay ug sa karsada?’ (Miqueas 4:3, 4) Duna bay agianan sa wheelchair? Makapangutana tingali kita: ‘Moabot ba gayod ang panahon sa dihang ang tanang buhi makatagamtam ug maayong panglawas?’ (Isaias 33:24) Daghang sugyot ang makita diha sa librong Nangatarongan Pinasukad sa Kasulatan. b

10. Sa unsang paagi magamit nato ang mga pangutana sa ‘pagtimba’ sa hunahuna ug pagbati sa kasingkasing sa estudyante sa Bibliya, apan unsay angay natong hinumdoman?

¹⁰ Sa unsang paagi epektibo natong magamit ang mga pangutana sa dihang nagdumala ug mga panagtuon sa Bibliya? Dili sama kang Jesus, dili kita makabasa sa mga kasingkasing. Hinunoa, ang mataktikanhon apan maalamon nga mga pangutana makatabang kanato sa ‘pagtimba’ sa hunahuna ug pagbati sa kasingkasing sa estudyante. (Proverbio 20:5) Pananglitan, ibutang ta nga atong gitun-an ang kapitulong “Kon Nganong ang Diyosnong Pagkinabuhi Magdalag Kalipay,” sa librong Kahibalo. Naghisgot kini bahin sa panglantaw sa Diyos sa pagkadili-matinud-anon, pakighilawas, ug ubang mga butang. Tingali husto ang tubag sa estudyante sa pinatik nga mga pangutana, apan miuyon ba siya sa iyang nakat-onan? Makapangutana tingali kita: ‘Ang panglantaw ba ni Jehova sa maong mga butang daw makataronganon kanimo?’ ‘Sa unsang paagi mapadapat nimo kining maong mga prinsipyo sa Bibliya sa imong kinabuhi?’ Apan, hinumdomi ang panginahanglan nga magmatinahoron, nga maghatag sa estudyante ug dignidad. Dili nato gustong mosukna ug mga pangutana nga makapakaulaw sa estudyante sa Bibliya.—Proverbio 12:18.

11. Sa unsang mga paagi nga ang mga mamumulong sa publiko epektibong makagamit ug mga pangutana?

¹¹ Ang mga mamumulong sa publiko epektibo usab nga makagamit sa mga pangutana. Ang retorikal nga mga pangutana—mga pangutana diin dili nato dahomon ang atong mga mamiminaw nga motubag ug kusog—makatabang sa mamiminaw sa paghunahuna ug pagpangatarongan. Sa popanahon si Jesus migamit sa maong mga pangutana. (Mateo 11:7-9) Dugang pa, human sa mga pasiuna, ang usa ka mamumulong makagamit ug mga pangutana aron sa paglatid sa pangunang mga punto nga pagahisgotan. Siya makaingon: “Sa atong panaghisgot karon, atong konsiderahon ang mga tubag sa mosunod nga mga pangutana . . .” Dayon, sa konklusyon, mahimo niyang hisgotan ang maong mga pangutana aron sa pagsubli sa pangunang mga punto.

12. Paghatag ug panig-ingnan sa pagpakita kon sa unsang paagi ang Kristohanong mga ansiyano makagamit ug mga pangutana sa pagtabang sa isigkamagtutuo sa pagbaton ug kahupayan gikan sa Pulong sa Diyos.

¹² Sa ilang buluhatong pagduaw isip magbalantay, ang Kristohanong mga ansiyano makagamit ug mga pangutana sa pagtabang sa ‘magul-anong kalag’ nga makadawat ug paghupay gikan sa Pulong ni Jehova. (1 Tesalonica 5:14) Pananglitan, aron matabangan ang usa nga nagmasulub-on, mahimong tagdon sa usa ka ansiyano ang Salmo 34:18. Kini nag-ingon: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.” Aron maseguro nga ang usa nga naluya ang buot nakasabot kon sa unsang paagi kini mapadapat kaniya sa personal, ang ansiyano mangutana tingali: ‘Kang kinsa duol si Jehova? Mobati ka ba usahay nga ‘nadugmok ang imong kasingkasing’ ug ‘nahugno ang imong espiritu’? Kon, sumala sa giingon sa Bibliya, si Jehova duol nianang mga tawhana, wala ba  kana magpasabot nga siya duol kanimo?’ Ang maong malumong pasalig makapadasig sa usa nga nagmagul-anon.—Isaias 57:15.

Lohikal nga Pangatarongan

13, 14. (a) Sa unsang paagi tingali kita makapangatarongan uban sa usa ka tawo nga nag-ingon nga dili siya motuo sa Diyos nga dili niya makita? (b) Nganong dili nato dahomon nga ang tanan makombinsir?

¹³ Sa atong ministeryo, buot natong matugkad ang mga kasingkasing pinaagi sa maayo, makapadani nga pangatarongan. (Buhat 19:8; 28:23, 24) Nagpasabot ba kana nga kinahanglang makat-onan nato ang paggamit sa komplikadong lohika aron madani ang uban sa kamatuoran sa Pulong sa Diyos? Wala gayod. Ang maayong pangatarongan dili kinahanglang komplikado. Ang lohikal nga mga argumento nga gipresentar sa yanong paagi kasagarang maoy labing epektibo. Tagda ang usa ka pananglitan.

¹⁴ Sa unsang paagi kita motubag sa dihang dunay moingon nga dili siya motuo sa usa ka Diyos nga dili niya makita? Makapangatarongan kita pinasukad sa kinaiyanhong balaod sa hinungdan ug epekto. Sa dihang makita nato ang usa ka epekto, kita mouyon nga duna gayoy usa ka hinungdan. Moingon tingali kita: ‘Kon anaa ka sa usa ka hilit nga dapit ug nakakita ka ug maayong-pagkatukod nga balay nga puno sa pagkaon (epekto), mouyon ka dayon nga dunay usa (hinungdan) nga nagtukod nianang balaya ug nagpuno sa mga aparador niini. Mao man usab, sa dihang makita nato ang disenyo nga dayag diha sa kinaiyahan ug ang kadagaya sa pagkaon diha sa “aparador” sa yuta (epekto), dili ba makataronganon ang pag-uyon nga dunay Usa ( hinungdan) nga responsable niana?’ Ang yanong argumento sa Bibliya klarong nagpahayag niining kamatuorana: “Dayag, ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Apan, bisan unsa ka maayo ang atong pangatarongan, dili tanan ang makombinsir. Ang Bibliya nagpahinumdom kanato nga kadto lamang “hustong nakiling” ang mahimong mga magtutuo.—Buhat 13:48; 2 Tesalonica 3:2.

15. Unsang matang sa pangatarongan ang atong magamit sa pagpasiugda sa mga hiyas ug paagi ni Jehova, ug unsang duha ka pananglitan ang nagpasundayag kon unsaon tingali nato paggamit ang maong pangatarongan?

¹⁵ Sa atong pagpanudlo, sa ministeryo sa kanataran o sa kongregasyon, makagamit kita ug lohikal nga pangatarongan aron sa pagpasiugda sa mga hiyas ug paagi ni Jehova. Ilabinang epektibo ang ‘unsa ka labaw pa gayod’ nga matang sa pangatarongan nga popanahong gigamit ni Jesus. (Lucas 11:13; 12:24) Pinasukad sa kalainan, kining matanga sa pangatarongan makapatisok pag-ayo sa impormasyon. Aron iyagyag ang pagkadili-makataronganon sa doktrina sa impiyerno nga kalayo, makaingon kita: ‘Walay mahigugmaong amahan nga mosilot sa iyang anak pinaagi sa pagdangka sa kamot sa iyang anak sa kalayo. Unsa ka labaw pa gayod ang pagdumot nga gibati sa atong mahigugmaong langitnong Amahan sa ideya bahin sa impiyernong kalayo!’ (Jeremias 7:31) Aron sa pagtudlo nga si Jehova may pagtagad sa iyang mga alagad sa tinagsatagsa, kita makaingon: ‘Kon nahibalo si Jehova sa ngalan sa matag usa sa bilyonbilyong bituon, unsa ka labaw pa gayod nga siya mag-atiman sa mga tawo nga nahigugma kaniya ug gipalit sa bililhong dugo sa iyang Anak!’ (Isaias 40:26; Buhat 20:28) Ang maong makapakombinsir nga pangatarongan makatabang kanato sa pagtugkad sa kasingkasing sa uban.

Haom nga mga Ilustrasyon

16. Nganong bililhon sa pagpanudlo ang mga ilustrasyon?

¹⁶ Ang epektibong mga ilustrasyon maoy usa ka lamas nga makapahimo sa atong pagpanudlo nga mas makapadani sa uban. Nganong bililhon ang mga ilustrasyon diha sa pagpanudlo? Ang usa ka edukador nag-ingon: “Ang katakos sa paghunahuna diin diyutay ra o walay paghulagway maoy usa sa kinalisdang mga kahimoan sa tawo.” Ang mga ilustrasyon magpatisok sa makahuloganong mga hulagway diha sa atong hunahuna, nga motabang kanato nga mas bug-os nga makasabot sa bag-ong mga ideya. Si Jesus maoy talagsaon sa iyang paggamit ug mga ilustrasyon. (Marcos 4:33, 34) Tagdon nato kon sa unsang paagi magamit nato kining maong paagi sa pagpanudlo.

17. Unsang upat ka butang ang makapaepektibo sa usa ka ilustrasyon?

¹⁷ Unsay makapaepektibo sa usa ka ilustrasyon? Una, kinahanglang mohaom kini sa atong mamiminaw, nga gamiton ang mga sirkumstansiya nga dali rang masabtan sa atong mga mamiminaw. Atong hinumdoman nga daghan sa mga ilustrasyon ni Jesus gikuha gikan sa adlaw-adlaw nga kinabuhi sa iyang mga mamiminaw. Ikaduha, ang usa ka ilustrasyon kinahanglang maoy katumbas sa makataronganong paagi sa punto nga gipalutaw. Kon dili haom ang pagtandi, ang ilustrasyon makapalinga lamang sa atong mga mamiminaw. Ikatulo, ang usa ka ilustrasyon dili angayng daghan kaayog wala-kinahanglanang mga detalye. Hinumdomi nga si Jesus naghatag ug kinahanglanong mga detalye apan wala maglakip sa wala kinahanglana. Ikaupat, sa dihang  gamiton nato ang usa ka ilustrasyon, kinahanglang seguroon nato nga klaro ang kapadapatan. Kay kon dili, basin dili masabtan sa uban ang punto.

18. Sa unsang paagi makahunahuna kita ug haom nga mga ilustrasyon?

¹⁸ Sa unsang paagi makahunahuna kita ug haom nga mga ilustrasyon? Dili kinahanglang maghunahuna kita ug tag-as, detalyado kaayo nga mga sugilanon. Ang mugbong mga ilustrasyon mahimong epektibo kaayo. Paghunahuna lang ug mga pananglitan sa punto nga ginahisgotan. Pananglitan, ibutang ta nga atong gihisgotan ang ulohan bahin sa pagkamapinasayloon sa Diyos, ug buot natong iilustrar ang punto diha sa Buhat 3:19, diin nag-ingon kini nga ‘papason,’ o palaon, ni Jehova ang atong kasaypanan. Tataw nga kana maoy mahulagwayong pagkasulti, apan unsang aktuwal nga pananglitan ang atong magamit aron sa pag-ilustrar sa punto—usa kaha ka papas? usa ka espongha? Tingali moingon kita: ‘Sa dihang pasayloon ni Jehova ang atong mga sala, palaon niya kana nga daw naggamit siya ug espongha (o papas).’ Dali rang masabtan ang punto sa maong yanong ilustrasyon.

19, 20. (a) Asa nato makaplagan ang maayong mga ilustrasyon? (b) Unsa ang pipila ka pananglitan sa epektibong mga ilustrasyon nga gipatik diha sa atong literatura? (Tan-awa usab ang kahon.)

¹⁹ Asa ka man makakaplag ug haom nga mga ilustrasyon, lakip na sa tinuod-kinabuhi nga mga pananglitan? Pangita niana diha sa imong kaugalingong kinabuhi o sa nagkadaiyang mga kagikan ug mga eksperyensiya sa mga isigkamagtutuo. Ang mga ilustrasyon mahimong pilion gikan sa daghang ubang mga tuboran, lakip na sa dunay kinabuhi ug walay kinabuhi nga mga butang, mga galamiton sa balay, o sa usa ka bag-ong hitabo nga nabaniog pag-ayo sa komunidad. Ang usa ka epektibong paagi sa pagpangitag maayong mga ilustrasyon mao ang pagkaalisto, nga ‘maniid pag-ayo’ sa adlaw-adlaw nga mga sirkumstansiya sa atong palibot. (Buhat 17:22, 23) Ang usa ka basahon bahin sa pagpakigpulong sa publiko nag-ingon: “Ang mamumulong nga maniid sa tawhanong kinabuhi ug sa nagkadaiyang mga kalihokan niini, makigsulti sa tanang matang sa mga tawo, magsusi pag-ayo sa mga butang ug mangutana hangtod nga masabtan niya kini, magtigom ug daghan kaayong ilustrasyon nga makatabang kaniya kon gikinahanglan.”

²⁰ Duna pay laing dagayang tuboran sa epektibong mga ilustrasyon—Ang Bantayanang Torre, Pagmata!, ug ang ubang literatura nga gipatik sa mga Saksi ni Jehova. Daghan kag makat-onan pinaagi sa pagpaniid kon sa unsang paagi kining mga publikasyona naggamit ug mga ilustrasyon. c Tagda, pananglitan, ang ilustrasyon nga gigamit sa parapo 11 sa kapitulo 17 sa librong Kahibalo. Gitandi niini ang nagkalainlaing mga personalidad diha sa kongregasyon sa lainlaing matang sa mga sakyanan nga nagdagan diha sa karsada. Unsay nakapaepektibo niana? Matikdi nga gipasukad kini sa adlaw-adlawng mga sirkumstansiya, susama gayod kini sa punto nga gipalutaw, ug klaro ang kapadapatan niini. Mahimong gamiton nato ang pinatik nga mga ilustrasyon diha sa atong pagpanudlo, tingali ipasibo kini sa mga panginahanglan sa usa ka estudyante sa Bibliya o ipahaom kana aron magamit sa pakigpulong.

21. Unsang mga balos ang modangat tungod sa pagkahimong epektibong magtutudlo sa Pulong sa Diyos?

²¹ Daghan ang mga balos sa pagkahimong epektibong magtutudlo. Sa dihang kita manudlo, kita nagpaambit sa uban; atong gigamit ang pipila sa atong mga kahinguhaan aron sa pagtabang kanila. Ang maong paghatag magdalag kalipay, kay ang Bibliya nag-ingon: “Adunay labaw nga kalipay sa paghatag kay sa pagdawat.” (Buhat 20:35) Alang sa mga magtutudlo sa Pulong sa Diyos, kanang maong kalipay nagsumikad sa pagkahibalo nga nagpaambit kita ug usa ka butang nga tiunay ug may dumalayong bili—ang kamatuoran bahin kang Jehova. Bation usab nato ang katagbawan nga nagsumikad sa pagkahibalo nga atong ginasundog ang Dakong Magtutudlo, si Jesus Kristo.

[Mga footnote]

Nahinumdom Ka Ba?

• Sa unsang paagi kita makatudlo uban ang kayano sa dihang nagadumala ug panagtuon sa Bibliya sa balay? sa dihang nagpakigpulong sa kongregasyon?

• Sa unsang paagi epektibo natong magamit ang mga pangutana sa dihang mamalaybalay?

• Sa unsang paagi magamit nato ang lohikal nga pangatarongan sa pagpasiugda sa mga hiyas ug paagi ni Jehova?

• Asa nato makaplagan ang haom nga mga ilustrasyon?

[Mga Pangutana sa Pagtuon]

 [Kahon/Hulagway sa panid 23]

Nahinumdoman ba Nimo Kining mga Ilustrasyona?

Ang mosunod maoy pipila lamang ka epektibong mga ilustrasyon. Nganong dili tan-awon ang reperensiya ug matikdi kon sa unsang paagi ang ilustrasyon nakatabang sa pagpasiugda sa punto nga gihisgotan?

• Sama sa mga sirkador nga nagtabyogtabyog sa trapeze o sa parisan nga nag-eskeyt sa yelo, kadtong nagtinguha sa pagtukod ug malamposong kaminyoon nagdepende ug dako sa kabagay nga kapikas.—Ang Bantayanang Torre, Mayo 15, 2001, panid 16.

• Ang pagpahibalo sa imong gibati sama rag paglabay ug bola. Mahimo nimo kining ilabay ug hinay o ilabay ug kusog sa pagkaagi nga magpahinabo kinig kadaot.—Pagmata!, Enero 8, 2001, panid 10.

• Ang pagkat-on sa pagpakita ug gugma sama rag pagkat-on ug bag-ong pinulongan.—Ang Bantayanang Torre, Pebrero 15, 1999, mga panid 18, 22-3.

• Ang napanunod nga sala ikatandi nianang mahitabo sa dihang ang mga payl sa kompiyuter madaot tungod sa virus.—Is There a Creator Who Cares About You?, panid 156.

• Ang espiritismo nagasilbi sa katuyoan sa mga demonyo sa samang paagi nga ang paon nagasilbi sa katuyoan sa mga mangangayam. Kini nagadani sa tukbonon.—Kahibalo nga Motultol sa Kinabuhing Walay Kataposan, panid 111.

• Ang paagi sa pagluwas ni Jesus sa mga kaliwat ni Adan ikatandi nianang sa usa ka adunahan nga tigtabang nga nagbayad sa utang sa usa ka kompaniya (nga gipahinabo sa malimbongong manedyer) ug nagbukas pag-usab sa pabrika, sa ingon nakabenepisyo sa daghang empleyado niini.—Ang Bantayanang Torre, Pebrero 15, 1991, panid 13.

• Maingon nga ang mga tawong mapabilhon sa mga buhat sa arte maningkamot gayod sa pagpasig-uli sa nadaot pag-ayong obra maestra, si Jehova magpasaylo sa atong mga dili-kahingpitan, mangitag maayong hiyas diha kanato, ug ngadtongadto magpasig-uli kanato ngadto sa hingpit nga baroganan nga giwala ni Adan.—Ang Bantayanang Torre, Pebrero 15, 1990, panid 22.

[Mga hulagway sa panid 20]

Ang matuod nga mga Kristohanon maoy mga magtutudlo sa Pulong sa Diyos

[Hulagway sa panid 21]

Ang mga ansiyano makagamit ug mga pangutana sa pagtabang sa mga isigkamagtutuo sa pagbaton ug kahupayan gikan sa Pulong sa Diyos