Unsaon Nato Paglantaw ang mga Pagsulay?

MGA pagsulay! Ang tanan kinahanglang moatubang ug mga pagsulay. Lagmit gipahinabo kini sa kalainan sa personalidad, kalisod sa ekonomiya, dili maayong panglawas, mga tentasyon, pagpit-os sa isigkaingon sa pagbuhat ug sayop, paglutos, mga suliran sa atong baroganan maylabot sa neyutralidad o batok sa idolatriya, ug daghang uban pang mga butang. Bisan unsang matanga sa pagsulay ang atong atubangon, kasagaran kini makapahinabo ug dakong kabalaka. Sa unsang paagi masagubang nato kini sa malamposong paagi? May bisan unsang kaayohan ba nga ikahatag niini kanato?

Ang Labing Maayong Pagpaluyo

Si Haring David sa kakaraanan nakasinati ug mga pagsulay sa tibuok niyang kinabuhi, apan namatay siya nga matinumanon. Sa unsang paagi siya nakalahutay? Iyang gipunting ang tinubdan sa iyang kusog sa dihang siya miingon: “Si Jehova mao ang akong Magbalantay. Walay makulang kanako.” Unya siya mipadayon sa pag-ingon: “Bisan kon magalakaw ako sa walog sa mabagang kangiob, ako walay kahadlokan nga daotan, kay ikaw magauban kanako; ang imong olisi ug ang imong sungkod maoy magapahupay kanako.” (Salmo 23:1, 4) Oo, si Jehova mao ang tinubdan sa way-kinutobang pagpaluyo. Iyang gibantayan si David latas sa daghang malisod kaayong mga panahon, ug siya andam sa pagbantay usab kanato kon gikinahanglan.

Sa unsang paagi atong maangkon ang pagpaluyo ni Jehova? Ang Bibliya nagpunting sa paagi sa dihang kini nag-ingon: “Tilawi ug tan-awa ninyo nga si Jehova maayo.” (Salmo 34:8) Kana maoy usa ka malulotong imbitasyon, apan unsay kahulogan niana? Kana maoy usa ka pagdasig sa pag-alagad kang Jehova ug sa bug-os nga pagpahiuyon sa atong kinabuhi sa iyang kabubut-on. Ang maong kurso nagkahulogan ug pagbiya sa pipila nato ka kagawasan, nga maghimog mga sakripisyo. Sa pipila ka kaso, motultol pa gani kini ngadto sa mga pagsulay—paglutos ug pag-antos. Bisan pa niana, dili angayng magbasol kadtong kinasingkasing nga midawat sa imbitasyon ni Jehova. Si Jehova magmaluloton gayod ngadto kanila. Siya mogiya kanila ug moatiman kanila sa espirituwal nga paagi. Siya mopalig-on kanila latas sa mga pagsulay pinaagi sa iyang Pulong, iyang balaang espiritu, ug sa Kristohanong kongregasyon. Ug sa kataposan iya silang gantihan ug kinabuhing walay kataposan.—Salmo 23:6; 25:9; Isaias 30:21; Roma 15:5.

Kadtong mohimog makapausab-sa-kinabuhing desisyon sa pag-alagad kang Jehova ug magpabilin sa maong desisyon makakaplag nga si Jehova magtuman sa tanan niyang mga saad. Ingon niana ang naeksperyensiyahan sa mga Israelinhon  nga misunod kang Josue paingon sa Yutang Saad. Sa dihang nakatabok na sila sa Jordan, dihay mga pagsulay nga kinahanglang sagubangon, mga gubat nga kinahanglang awayon, ug makapaguol nga mga leksiyon nga kinahanglang makat-onan. Apan, ang maong kaliwatan nahimong mas matinumanon kay sa ilang mga amahan nga migawas sa Ehipto ug nangamatay sa kamingawan. Busa, si Jehova nagpaluyo sa iyang mga matinumanon, ug maylabot sa ilang kahimtang human mamatay si Josue, ang rekord sa Bibliya nag-ingon: “Si Jehova mihatag kanilag pahulay sa tibuok palibot, sumala sa tanan nga iyang gipanumpa sa ilang mga katigulangan . . . Walay saad nga napakyas sa tanang maayong saad nga gisaad ni Jehova ngadto sa balay sa Israel; kining tanan natuman.” (Josue 21:44, 45) Maeksperyensiyahan usab nato kana kon bug-os kitang mosalig kang Jehova sa dihang mailalom sa pagsulay ug sa tanang ubang mga panahon.

Unsay makapahuyang sa atong pagsalig kang Jehova? Gipunting ni Jesus ang usa ka butang sa dihang siya miingon: “Walay usa nga mahimong ulipon sa duha ka agalon . . . Dili kamo mahimong ulipon sa Diyos ug sa Bahandi.” (Mateo 6:24) Kon mosalig kita kang Jehova, dili kita mangitag kasegurohan sa mga butang diin ang kadaghanan sa kalibotan nangita niana, sa materyal nga mga butang. Gitambagan ni Jesus ang iyang mga sumusunod: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang [gikinahanglang materyal nga] mga butang igadugang ra kaninyo.” (Mateo 6:33) Ang usa ka Kristohanon nga maghupot ug timbang nga panglantaw sa materyal nga mga butang ug mag-una sa Gingharian sa Diyos diha sa iyang kinabuhi nagahimo sa hustong pagpili. (Ecclesiastes 7:12) Siyempre, lagmit may ibugti siya niini. Siya tingali maghimog mga sakripisyo sa materyal nga paagi. Apan iyang maani ang daghang ganti. Ug paluyohan siya ni Jehova.—Isaias 48:17, 18.

Kon Unsay Atong Makat-onan Gikan sa mga Pagsulay

Siyempre, ang pagpili sa ‘pagtilaw ug pagtan-aw nga si Jehova maayo’ wala magpasabot nga panalipdan kita batok sa wala damhang mga panghitabo sa kinabuhi; ni manalipod kini kanato sa bug-os batok sa mga pag-atake ni Satanas ug sa iyang tawhanong mga ahente. (Ecclesiastes 9:11) Tungod niana, ang kamatinud-anon ug determinasyon sa usa ka Kristohanon mahimong masulayan. Nganong tugotan man ni Jehova nga masulayan ang iyang mga magsisimba? Si apostol Pedro naghatag ug usa ka rason sa dihang siya misulat: “Bisan tuod nga karon sa makadiyot, kon kinahanglanon man, kamo naguol sa nagkadaiyang mga pagsulay, aron nga ang sinulayang kalidad sa inyong pagtuo, nga labi pang bililhon kay sa bulawan nga madugta ra bisan tuod nga nasulayan na kini pinaagig kalayo, makaplagan nga usa ka hinungdan sa pagdayeg ug himaya ug dungog sa pagpadayag ni Jesu-Kristo.” (1 Pedro 1:6, 7) Oo, ang mga pagsulay magtugot kanato sa pagpasundayag sa kalidad sa atong pagtuo ug sa atong gugma kang Jehova. Ug motabang kini kanato sa paghatag ug tubag sa mga pagtamay ug mga akusasyon ni Satanas nga Yawa.—Proverbio 27:11; Pinadayag 12:10.

Ang mga pagsulay motabang usab kanato sa pag-ugmad sa ubang Kristohanong mga hiyas. Ingong pananglitan, tagda ang giingon sa salmista: “[Si Jehova] makakita sa mapainubsanon; apan ang mapahitas-on iyang mailhan lamang sa halayo.” (Salmo 138:6) Daghan kanato dili kinaiyanhon nga mapainubsanon, apan ang mga pagsulay makatabang kanato sa pag-ugmad sa maong kinahanglanong hiyas. Hinumdomi ang okasyon balik sa adlaw ni Moises sa dihang ang pipila ka Israelinhon gipul-an na sa pagsigeg kaon ug mana matag semana, matag bulan. Dayag nga kadto maoy usa ka pagsulay alang kanila, bisan tuod ang mana maoy usa ka milagrosong tagana. Unsa may katuyoan sa pagsulay? Giingnan sila ni Moises: ‘Si Jehova nagpakaon kaninyo ug mana sa kamingawan . . . aron sa pagpaubos kaninyo ug sa pagbutang kaninyo sa pagsulay.’—Deuteronomio 8:16.

Ang atong pagkamapainubsanon mahimong masulayan usab. Sa unsang paagi? Pananglitan, unsay atong reaksiyon maylabot sa organisasyonal  nga mga kausaban? (Isaias 60:17) Kinasingkasing ba natong gipaluyohan ang buluhatong pagsangyaw ug pagpanudlo? (Mateo 24:14; 28:19, 20) Maikagon ba natong gidawat ang mga katin-awan sa kamatuoran sa Bibliya nga gihatag sa “matinumanon ug maalamong ulipon”? (Mateo 24:45-47; Proverbio 4:18) Ato bang gisuklan ang pagpit-os nga makabaton sa kinabag-ohang kasangkapan, kinabag-ohang uso sa sinina, o kinabag-ohang modelo sa awto? Ang mapainubsanong tawo makatubag nga positibo sa maong mga pangutana.—1 Pedro 1:14-16; 2 Pedro 3:11.

Ang mga pagsulay motabang kanato sa pag-ugmad sa usa pa ka hinungdanong hiyas—pagkamainantoson. Ang tinun-ang si Santiago nag-ingon: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay, kay nahibalo kamo nga kining sinulayang kalidad sa inyong pagtuo mosangpot ug pagkamainantoson.” (Santiago 1:2, 3) Pinaagi sa paglahutay sa daghang pagsulay uban ang bug-os nga pagsalig kang Jehova, maugmad nato ang kalig-on, kamakanunayon, ug integridad. Magpalig-on kini kanato sa pagsukol sa umaabot nga mga pag-atake ni Satanas, ang masuk-anong diyos niining kalibotana.—1 Pedro 5:8-10; 1 Juan 5:19; Pinadayag 12:12.

Hupti ang Hustong Panglantaw sa mga Pagsulay

Ang hingpit nga Anak sa Diyos, si Jesu-Kristo, nakaatubang ug daghang pagsulay samtang dinhi sa yuta ug nakaani ug daghang kaayohan sa paglahutay niana. Si Pablo misulat nga si Jesus ‘nakakat-on sa pagkamasinugtanon gikan sa mga butang nga iyang giantos.’ (Hebreohanon 5:8) Ang iyang pagkamaunongon hangtod sa kamatayon naghatag ug kadayeganan sa ngalan ni Jehova ug nakapaarang kang Jesus sa pagtanyag sa bili sa iyang hingpit tawhanong kinabuhi ingong lukat alang sa katawhan. Gibuksan niana ang dalan alang niadtong magpasundayag ug pagtuo kang Jesus nga makabaton sa paglaom nga mabuhing walay kataposan. (Juan 3:16) Tungod sa pagpabiling matinumanon ni Jesus ilalom sa pagsulay, siya karon mao ang atong Hataas nga Saserdote ug naentronong Hari.—Hebreohanon 7:26-28; 12:2.

Makabaton ba usab kita ug mga kaayohan? Ang atong pagkamaunongon atubangan sa mga pagsulay magdala usab ug dagkong mga panalangin. Bahin niadtong may langitnong paglaom, ang Bibliya nag-ingon: “Malipayon ang tawo nga nagpadayon sa pag-antos sa pagsulay, tungod kay sa pagkahimong inuyonan iyang madawat ang purongpurong sa kinabuhi, nga gisaad ni Jehova niadtong nagpadayon sa paghigugma kaniya.” (Santiago 1:12) Kadtong adunay yutan-ong paglaom gipasaligan nga kon molahutay sila nga matinumanon, ilang mapanunod ang kinabuhing walay kataposan sa usa ka yutan-ong paraiso. (Pinadayag 21:3-6) Ug mas hinungdanon pa, ang ilang matinumanong paglahutay magdalag kadayeganan sa ngalan ni Jehova.

Samtang atong sundon ang mga tunob ni Jesus, makasalig kita nga malamposon natong masagubang ang tanang pagsulay nga atong maagoman niining sistemaha sa mga butang. (1 Corinto 10:13; 1 Pedro 2:21) Sa unsang paagi? Pinaagi sa atong pagsalig kang Jehova, kinsa naghatag ug “gahom nga labaw sa kasarangan” niadtong mosalig kaniya. (2 Corinto 4:7) Hinaot ang atong pagtuo mahisama nianang kang Job, kinsa samtang nag-antos sa grabeng mga pagsulay masaligong nakaingon: “Human niya ako masulayan, mogula ako ingon sa bulawan.”—Job 23:10.

[Hulagway sa panid 31]

Ang pagkamaunongon ni Jesus ilalom sa pagsulay naghatag ug kadayeganan sa ngalan ni Jehova. Mao man usab ang atong pagkamaunongon