Sugilanon sa Kinabuhi

“Wala Akoy Usbon sa Akong Kinabuhi!”

SUMALA SA GIASOY NI GLADYS ALLEN

Usahay pangutan-on ako, “Kon hatagan ka ug higayon sa pagkinabuhi pag-usab, unsay imong usbon?” Ako makaingon gayod, “Wala akoy usbon sa akong kinabuhi!” Pasaysaya ako kon nganong ingon niini ang akong pagbati.

SA TING-INIT sa 1929, sa duha ka tuig pa ang akong edad, dihay nindot nga kasinatian ang akong amahan nga si Matthew Allen. Mikuha siya sa pulyetong Millions Now Living Will Never Die!, nga gipatik sa Internasyonal nga mga Estudyante sa Bibliya, nga maoy pagtawag sa mga Saksi ni Jehova kaniadto. Human sa maikagong pagbasa sa pipila lang ka panid, si Papa mipatugbaw, “Mao kini ang kinamaayohang impormasyon nga akong nabasa sukad!”

Wala madugay human niana, si Papa mikuha sa uban pang mga publikasyon sa mga Estudyante sa Bibliya. Wala siya mag-usik ug panahon sa pagpaambit sa iyang nakat-onan ngadto sa tanang silingan. Ugaling lang, walay kongregasyon sa mga Saksi ni Jehova diha sa among baryo sa banika. Kay giila ni Papa nga gikinahanglan ang regular nga Kristohanong pagpakig-uban, iyang gibalhin ang pamilya ngadto sa Orangeville, Ontario, Canada, sa 1935 tungod kay may kongregasyon didto.

Niadtong mga panahona, ang mga bata wala kaayo dasiga sa pagtambong sa mga tigom sa kongregasyon; sila kasagaran magpabilin ra sa gawas sa tigomanan ug magdula hangtod mahuman pagtambong sa tigom ang mga hamtong. Si Papa wala malipay niini. Sa iyang hunahuna, “Kon ang mga tigom makaayo kanako, makaayo usab kini sa akong mga anak.” Busa, bisan tuod bag-ohan pa lang, gisultihan ni Papa ang akong mga igsoong si Bob, Ella, Ruby, ug ako sa pagtambong sa mga tigom uban sa mga hamtong, ug mituman kami. Wala madugay, ang mga anak sa ubang mga Saksi nanambong na usab. Ang  pagtambong sa tigom ug pagkomento nahimong hinungdanon kaayong bahin sa among kinabuhi.

Gimahal ni Papa ang Bibliya, ug may makalingaw siya nga paagi sa pagbuhi sa mga sugilanon sa Bibliya. Pinaagi niini, iyang gisilsil diha sa among linghod nga mga kasingkasing ang hinungdanong mga pagtulon-an nga mahinumdoman gihapon nako nga may dakong paghandom. Ang usa nga akong mahinumdoman mao nga panalanginan ni Jehova kadtong matinumanon kaniya.

Gitudloan usab kami ni Papa sa paggamit sa Bibliya sa pagdepensa sa among pagtuo. Kini among gihimo nga usa ka dula. Pananglitan, moingon si Papa, “Ako nagtuo nga kon mamatay ko, moadto ko sa langit. Karon pamatud-i kanako nga dili ko moadtog langit.” Among tukion ni Ruby ang concordance sa pagpangitag mga teksto nga among magamit sa pagpanghimakak sa maong pagtulon-an. Human sa pagbasa namo ngadto kang Papa sa teksto nga among nakita, siya moingon, “Nindot nga punto, apan wala gihapon ako makombinsir.” Busa mangita na sab kamig mga teksto diha sa concordance. Kini kasagarang magpadayon sa daghang oras hangtod matagbaw si Papa sa mga tubag nga among ihatag kaniya. Tungod niini, kami ni Ruby nasangkapan pag-ayo sa pagpatin-aw sa among tinuohan ug sa pagdepensa sa among pagtuo.

Pagbuntog sa Kahadlok sa Tawo

Bisan pa sa maayong pagbansay nga akong nadawat sa balay ug sa mga tigom sa kongregasyon, angkonon ko nga dihay mga bahin sa pagkahimong Kristohanon nga naglisod ako. Sama sa daghang batan-on, dili ko gustong malahi sa uban, ilabina sa akong mga klasmet. Ang unang pagsulay sa akong pagtuo naglangkit sa among gitawag ug mga martsa sa impormasyon.

Ang tuyo mao nga ang usa ka grupo sa mga igsoon hinayng maglakaw diha sa dagkong kadalanan sa lungsod nga nagdalag mga plakard nga gisulatan ug mga eslogan. Ang tanan nakaila sa tanan diha sa among lungsod nga may halos 3,000 ka tawo. Sa usa ka martsa sa impormasyon, ako naglakaw sa kataposan sa linya nga nagdalag plakard nga gisulatan ug “Ang Relihiyon Usa ka Lit-ag ug Panglimbong.” Ang pipila sa akong mga eskolmet nakakita nako, ug sila dihadihang milinya sa akong luyo, nga nag-awit sa nasodnong awit sa Canada. Sa unsang paagi ako nakasagubang? Hugot akong miampo alang sa kusog nga makapadayon. Sa dihang sa kataposan nahuman ang maong martsa, midalidali ako sa pag-adto sa Kingdom Hall aron iuli ang akong plakard ug mopauli. Ugaling lang, ang tigdumala misulti kanako nga talisugod na sab ang laing martsa ug kulang sila ug usa pa ka tawo sa pagdalag plakard. Busa nagmartsa na usab ako, nga mas hugot pa gayod nga nag-ampo. Apan, nianang higayona ang akong mga klasmet gipangkapoy ug namauli na. Ang akong mga pag-ampo alang sa kusog nahimong mga pag-ampo sa pasalamat!—Proverbio 3:5.

Ang bug-os-panahong mga alagad giabiabi kanunay diha sa among balay. Sila maoy usa ka mangayaong grupo ug makalilipayng abiabihon. Sumala sa akong mahinumdoman, kaming mga anak kanunayng sultihan sa among mga ginikanan nga ang bug-os-panahong ministeryo mao ang labing maayong karera nga mabatonan.

Agig sanong sa ilang pagdasig, ako nagsugod sa akong karera sa bug-os-panahong ministeryo niadtong 1945. Sa ulahi miapas ako sa akong igsoong si Ella, kinsa nagpayunir sa London, Ontario. Didto, nasulayan nako sa unang higayon ang usa ka bahin sa pag-alagad nga abi nakog dili gayod nako mahimo. Ang mga igsoon kaniadto moduol sa lainlaing mga lamesa diha sa lokal nga mga imnanan nga nagtanyag sa mga kustomer ug mga kopya sa Ang Bantayanang Torre ug Consolation (karon Pagmata!). Maayo na lang, ang pagtanyag  himoon matag Sabado sa hapon, busa may tibuok semana ako sa pag-ampo alang sa kaisog sa paghimo niana! Ang buluhaton dili gayod sayon alang kanako, apan magantihon kini.

Sa laing bahin, nakakat-on usab ako sa paghatod ug linaing mga gula sa Consolation nga naghisgot bahin sa paglutos sa among mga igsoon sa mga kampong konsentrasyon sa Nazi, ilabina sa pagpakigkontak sa impluwensiyadong mga negosyante sa Canada, lakip na sa mga presidente sa dagkong mga korporasyon. Latas sa katuigan, akong naeksperyensiyahan nga si Jehova kanunayng mopaluyo kanamo basta kami mosalig kaniya alang sa kusog. Sama sa isulti kanunay ni Papa kaniadto, panalanginan ni Jehova kadtong matinumanon Kaniya.

Pagtubag sa Panapit nga Mag-alagad sa Quebec

Sa Hulyo 4, 1940, gidili ang buluhaton sa mga Saksi ni Jehova sa Canada. Sa ulahi, ang pagdili giwagtang, apan gilutos gihapon kami diha sa Romano Katolikong probinsiya sa Quebec. Usa ka linaing kampanya nga naggamit sa masakit-ug-pinulongan nga tract nga Quebec’s Burning Hate for God and Christ and Freedom Is the Shame of All Canada ang gihimo aron matagad ang pagmaltratar nga gihimo batok sa among mga igsoon didto. Si Nathan H. Knorr, nga membro sa Nagamandong Lawas sa mga Saksi ni Jehova, nakigkita sa gatosan ka payunir sa siyudad sa Montreal aron ipatin-aw ang malagmit nga resulta sa among pagabuhaton. Giingnan kami ni Brader Knorr nga kon mosugot kami sa pagpakigbahin sa kampanya, kami makadahom nga dakpon ug bilanggoon. Mao gayod kana ang nahitabo! Sulod sa usa ka yugto sa panahon, gidakop ako 15 ka beses. Kon mogawas kami sa kanataran, among paneguroon nga dala namo ang among sepilyo ug sudlay kay basin ug adto kami matulog pagkagabii sa bilanggoan.

Sa sinugdanan among himoon ang dakong bahin sa buluhaton magabii aron dili kaayo kami mamatikdan kutob sa mahimo. Kanunay kong magdaladala ug ekstrang suplay sa mga tract diha sa bag nga akong ibaliog ilalom sa akong kalupo. Medyo baga ang bag nga puno sa mga tract, mao nga morag mabdos akong tan-awon. Nakahatag kinig bentaha nako kon mosakay ako sa naghuot nga sakyanan sa pagbiyahe paingon sa teritoryo. Makadaghang higayon nga dihay matinagdanong lalaki nga mitindog nga nagtanyag ngadto sa “mabdos” nga babaye sa iyang lingkoranan.

Sa paglabay sa panahon, nagsugod kami sa pagpang-apod-apod maadlaw. Magbilin kami ug mga tract diha sa tulo o upat ka pultahan, ug dayon moadto kami sa laing teritoryo. Kasagaran, malamposon kana. Ugaling lang, kon mahibaloan sa kura paroko nga naa kami sa usa ka lugar, kami makadahom ug kasamok. Dihay higayon nga gisulsolan sa pari ang magubtanong panon sa 50 o 60 ka hamtong ug mga bata sa pagbato kanamo ug mga kamatis ug mga itlog. Midangop kami sa balay sa usa ka Kristohanong igsoong babaye, diin kami nagpalabay sa kagabhion nga natulog sa salog.

Daghang payunir ang gikinahanglan aron masangyawan ang nagsultig-Pranses nga mga tawo sa Quebec, busa niadtong Disyembre 1958, ang akong igsoong si Ruby ug ako nagsugod sa pagtuon sa pinulongang Pranses. Pagkahuman niana giasayn kami sa daghang dapit nga Pranses ang sinultian sa maong probinsiya. Ang matag asaynment maoy usa ka talagsaong kasinatian. Sa usa ka lugar, namalaybalay kami walo ka oras sa usa ka adlaw sulod sa duha ka tuig nga walay motubag sa pultahan! Ang mga tawo igo lang molili sa pultahan ug manira. Apan wala kami moangka. Karon, duna nay duha ka mauswagong kongregasyon nianang lungsora.

Gipalig-on ni Jehova sa Tanang Paagi

Kami nagsugod sa among buluhaton ingong mga espesyal payunir niadtong 1965. Diha sa usa ka teritoryo namo isip mga espesyal payunir, among nasabtan ang bug-os nga kahulogan sa mga pulong ni Pablo nga natala sa 1 Timoteo 6:8: “Kon kita adunay makaon ug ikabesti, kita magmakontento na niining mga butanga.” Giayo gayod namog badyet ang among kuwarta aron makasapal sa among mga galastohan. Busa maglain kami ug kuwarta para sa pangpainit sa balay, abang, elektrisidad, ug pagkaon. Kay nalain na ang kuwarta alang niana nga mga galastohan, may 25 sentabos kami nga nabiling panggasto sa tibuok bulan sa kon unsay among gusto.

Kay limitado ang kuwarta, among paandaron ang pangpainit sa among balay sulod sa pipila lamang ka oras magabii. Busa ang temperatura sa among lawak dili gayod moabot ug 15 grado Celsius ug kasagarang mas tugnaw pa. Unya, usa ka adlaw niana ang anak nga lalaki sa usa sa  mga estudyante sa Bibliya ni Ruby miduaw kanamo. Tingali sa pagpauli niya iyang giingnan ang iyang inahan nga gitugnaw mi pag-ayo, kay pagkahuman niana nagpadala siya ug napulo ka dolyar kada bulan para ipalit ug aseite aron mapaandar namo kanunay ang pangpainit sa balay. Wala namo batia nga nahikawan kami sa bisan unsang paagi. Dili kami adunahan, apan nabatonan gayod namo ang among mga kinahanglanon. Among gibati nga ang bisan unsang sobra maoy usa ka panalangin. Pagkatinuod sa mga pulong sa Salmo 37:25: “Wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay”!

Bisan pa sa paglutos nga among giatubang, nalipay ako sa pagkakita sa ubay-ubayng mga tawo nga akong gidumalahan sa mga pagtuon sa Bibliya nga nakadangat sa kahibalo sa kamatuoran. Ang pipila naghimo sa bug-os-panahong ministeryo ingong karera, nga nakapalipay kaayo kanako.

Malamposon sa Pag-atubang ug Laing mga Pagsulay

Sa 1970 kami gihatagan ug bag-ong asaynment nga mao ang Cornwall, Ontario. Mga usa ka tuig human kami miabot sa Cornwall, si Mama nagsakit. Sa Papa namatay na niadtong 1957, ug ang akong duha ka igsoong babaye ug ako nagpulipuli sa pag-atiman kang Mama hangtod siya namatay sa 1972. Ang among mga kauban sa espesyal payunir nga buluhaton, si Ella Lisitza ug Ann Kowalenko nakahatag ug makapalig-on ug mahigugmaong pagpaluyo nianang panahona. Silay nag-atiman sa among mga ginatun-an sa Bibliya ug sa ubang mga responsabilidad nianang mga panahona nga wala kami. Tinuod gayod ang mga pulong sa Proverbio 18:24: “Adunay higala nga mounong labaw pa kay sa usa ka igsoon”!

Ang kinabuhi puno gayod sa malisod nga mga pagsulay. Pinaagi sa mahigugmaong pagpaluyo ni Jehova, ako nakaarang sa pag-atubang niini. Ako malipayon gihapon nga nagsubay sa kinabuhi sa bug-os-panahong pag-alagad. Si Bob, nga namatay sa 1993, migugol ug kapin sa 20 ka tuig sa payunir nga buluhaton, nga naglakip sa 10 ka bililhong mga tuig sa pagpayunir uban sa iyang asawa, si Doll. Ang akong magulang nga babaye nga si Ella, kinsa namatay sa Oktubre 1998, nagpayunir sa kapin sa 30 ka tuig ug diha kaniya kanunay ang espiritu sa pagpayunir. Sa 1991 ang akong laing igsoong babaye, si Ruby, nadayagnos nga may kanser. Bisan pa niana, iyang gigamit ang iyang limitadong kusog sa pagsangyaw sa maayong balita. Siaw gihapon siya hangtod nianang buntaga nga siya namatay, sa Septiyembre 26, 1999. Bisan tuod wala na ang akong mga igsoong babaye, ako dunay espirituwal nga pamilya sa mga igsoong lalaki ug babaye sa pagtabang kanako nga makapabiling siaw gihapon.

 Kon akong palandongon ang akong milabayng kinabuhi, unsay akong usbon? Wala ako magminyo, apan gipanalanginan ako ug mahigugmaong mga ginikanan, igsoong lalaki, ug mga igsoong babaye nga giuna ang kamatuoran diha sa ilang kinabuhi. Ako nagpaabot nga makita silang tanan sa dili madugay sa pagkabanhaw. Ang maong paglaom buhi kaayo kanako mao nga ako nang mabati ang akong papa nga naghalog kanako ug makita ang mga luha sa akong inahan samtang naggaksanay kami. Si Ella, Ruby, ug Bob magluksolukso unya sa kalipay.

Sa pagkakaron, ako determinado nga magpadayon sa paggamit sa akong nahibiling kahimsog ug kusog sa pagdayeg ug pagpasidungog kang Jehova. Ang pag-alagad ingong bug-os-panahong payunir maoy maanindot, magantihong kinabuhi. Sama gayod kini sa giingon sa salmista bahin niadtong nagalakaw diha sa mga dalan ni Jehova: “Ikaw magmalipayon ug maayo ang imong dangatan.”—Salmo 128:1, 2.

[Mga hulagway sa panid 26]

Gimahal ni Papa ang Bibliya. Gitudloan niya kami sa paggamit niini sa pagdepensa sa among pagtuo

[Hulagway sa panid 28]

Wala ngadto sa tuo: Si Ruby, ako, si Bob, si Ella, si Mama, ug si Papa sa 1947

[Hulagway sa panid 28]

Sa atubangan, wala ngadto sa tuo: Ako, si Ruby, ug si Ella sa Distritong Kombensiyon, 1998