Padayon sa Pagbuhat sa mga Butang nga Inyong Nakat-onan

“Ang mga butang nga inyong nakat-onan ingon man nadawat ug nadungog ug nakita maylabot kanako, buhata kini; ug ang Diyos sa kalinaw magauban kaninyo.”—FILIPOS 4:9.

1, 2. Sa katibuk-an, nag-impluwensiya ba ang Bibliya sa kinabuhi sa mga tawo nga nag-isip sa ilang kaugalingon nga relihiyoso? Ipatin-aw.

 “NAGKADAKO ang Impluwensiya sa Relihiyon, Apan Nagkamenos ang Impluwensiya sa Maayong Moral nga mga Sukdanan.” Kining maong ulohang balita sa Emerging Trends nagsumaryo sa mga resulta sa usa ka tibuok-nasod nga surbi nga gihimo didto sa Tinipong Bansa. Dayag nga sa maong nasod midaghan ang mga tawo nga tigsimba ug nag-ingon nga ang relihiyon dunay hinungdanong luna sa ilang kinabuhi. Apan, ang taho nag-ingon: “Bisan pa niining makapahinganghang ihap, daghang Amerikano ang klarong nagkuwestiyon sa epekto sa relihiyosong pagtuo diha sa tagsatagsa ka kinabuhi ug sa katilingban sa katibuk-an.”

² Kining situwasyona dili lamang makaplagan sa usa ra ka nasod. Sa tibuok kalibotan, daghang tawo nga nag-ingong sila modawat sa Bibliya ug maoy relihiyoso wala magtugot sa Kasulatan nga tinuod nga mag-impluwensiya sa ilang kinabuhi. (2 Timoteo 3:5) “Gitamod gihapon namo ang Bibliya,”  nag-ingon ang pangulo sa usa ka grupo sa tigpanukiduki, “apan kon bahin sa aktuwal nga paggugol ug panahon sa pagbasa, pagtuon ug pagpadapat niana—kana milabay na.”

3. (a) Sa unsang paagi naimpluwensiyahan sa Bibliya kadtong nahimong tinuod nga mga Kristohanon? (b) Sa unsang paagi ang mga sumusunod ni Jesus nagpadapat sa tambag ni Pablo nga gisulat diha sa Filipos 4:9?

³ Apan, sa tinuod nga mga Kristohanon lahi ang situwasyon. Ang pagpadapat sa tambag gikan sa Pulong sa Diyos nagpahinabo ug mga kausaban sa ilang panghunahuna ug panggawi. Ug ang bag-ong personalidad nga ilang gipakita daling mamatikdan sa uban. (Colosas 3:5-10) Alang sa mga sumusunod ni Jesus, ang Bibliya dili usa ka basahon nga wala gamita nga gipaabogan lang diha sa estante. Sa kasukwahi, giingnan ni apostol Pablo ang mga Kristohanon sa Filipos: “Ang mga butang nga inyong nakat-onan ingon man nadawat ug nadungog ug nakita maylabot kanako, buhata kini; ug ang Diyos sa kalinaw magauban kaninyo.” (Filipos 4:9) Ang mga Kristohanon dili kay igo rang modawat sa kamatuoran sa Pulong sa Diyos. Sila molihok sumala sa ilang nakat-onan, mopadayon sa pagpadapat sa tambag sa Bibliya—diha sa pamilya, sa trabaho, sa kongregasyon, ug sa tanang ubang bahin sa kinabuhi.

4. Nganong lisod ang pagtuman sa mga balaod sa Diyos?

⁴ Ang pagtuman sa mga balaod ug mga prinsipyo sa Diyos dili sayon. Kita nagkinabuhi sa kalibotan nga nailalom sa gahom ni Satanas nga Yawa, kinsa gitawag sa Bibliya nga “diyos niini nga sistema sa mga butang.” (2 Corinto 4:4; 1 Juan 5:19) Busa, hinungdanon nga magbantay batok sa bisan unsa nga makababag kanato sa paghupot ug integridad ngadto kang Jehova nga Diyos. Sa unsang paagi kita mahimong maghuhupot sa integridad?

Hupti ang “Sumbanan sa Makapahimsog nga mga Pulong”

5. Unsay gipasabot sa giingon ni Jesus: “Magpadayon sa pagsunod kanako”?

⁵ Ang usa ka bahin sa pagbuhat kon unsay atong nakat-onan nagkinahanglan ug maunongong pagpaluyo sa matuod nga pagsimba, bisan pa sa pagsupak gikan sa mga dili-magtutuo. Ang paglahutay nagkinahanglag paningkamot. “Kon adunay buot mosunod kanako,” miingon si Jesus, “padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako.” (Mateo 16:24) Wala moingon si Jesus nga kita angayng mosunod kaniya sulod lamang sa usa ka semana, usa ka bulan, o usa ka tuig. Hinunoa, siya miingon: “Magpadayon sa pagsunod kanako.” Ang iyang mga pulong nagpakita nga ang atong pagkatinun-an dili usa lamang ka yugto sa atong kinabuhi o usa ka lumalabay nga pagkamahinalaron nga temporaryo lamang. Ang maunongong pagpaluyo sa matuod nga pagsimba nagpasabot nga kita matinumanong molahutay sa dalan nga atong gipili, bisag unsa pay mahitabo. Sa unsang paagi mahimo nato kana?

6. Unsa ang sumbanan sa makapahimsog nga mga pulong nga nakat-onan sa unang-siglong mga Kristohanon gikan kang Pablo?

⁶ Giawhag ni Pablo ang iyang isigkamagbubuhat nga si Timoteo: “Magpadayon ka sa paghupot sa sumbanan sa makapahimsog nga mga pulong nga imong nadungog gikan kanako uban sa pagtuo ug gugma maylabot kang Kristo Jesus.” (2 Timoteo 1:13) Unsay gipasabot ni Pablo? Ang Gregong pulong dinhi nga gihubad ug “sumbanan” sa literal nagtumong sa pagkuriskuris sa usa ka dibuhista. Bisan tuod dili kaayo detalyado, tin-aw ang pagkakuriskuris mao nga ang tumatan-aw nga dunay katakos sa pag-ila makasabot sa katibuk-ang hulagway. Sa susama, ang sumbanan sa kamatuoran nga gitudlo ni Pablo kang Timoteo ug sa uban wala disenyoha aron sa paghatag ug espesipikong tubag sa tanang posibleng pangutana. Bisan pa niana, kining maong hugpong sa pagtulon-an naghatag ug igong giya—usa ka laraw, ingnon ta—aron ang matinud-anog-kasingkasing nga mga tawo makasabot kon unsay gikinahanglan ni Jehova kanila. Siyempre, aron makapahimuot sa Diyos, sila kinahanglang magpadayon sa paghupot sa maong sumbanan sa kamatuoran pinaagi sa pagbuhat kon unsay ilang nakat-onan.

7. Sa unsang paagi ang mga Kristohanon makapabilin diha sa sumbanan sa makapahimsog nga mga pulong?

⁷ Sa unang siglo, ang mga tawo sama kang Himeneo, Alejandro, ug Fileto nagpasiugda ug mga ideya nga wala mohaom sa “sumbanan sa makapahimsog nga mga pulong.” (1 Timoteo 1:18-20; 2 Timoteo 2:16, 17) Sa unsang paagi ang unang mga Kristohanon makalikay nga mapahisalaag sa mga apostata? Pinaagi sa makugihong pagtuon sa inspiradong mga sinulat ug pagpadapat niana sa ilang kinabuhi. Kadtong nagalakaw sumala sa panig-ingnan ni Pablo ug sa ubang mga matinumanon nakaila ug nagsalikway sa bisan unsa nga wala mahiuyon sa sumbanan sa kamatuoran nga gitudlo kanila. (Filipos 3:17; Hebreohanon 5:14) Imbes maoy “gikabuangan ang mga pagpangutana  ug ang mga pagpakiglalis bahin sa mga pulong,” sila nagpadayon sa pag-abante diha sa ilang hustong dalan sa diyosnong pagkamahinalaron. (1 Timoteo 6:3-6) Mabuhat nato ang ingon niana kon padayon natong buhaton ang mga kamatuoran nga atong nakat-onan. Pagkamakapalig-on sa pagtuo ang pagkakita nga milyonmilyong nag-alagad kang Jehova sa tibuok yuta ang nagpadayon sa paghupot sa sumbanan sa kamatuoran sa Bibliya nga gitudlo kanila.—1 Tesalonica 1:2-5.

Isalikway ang “Bakak nga mga Sugilanon”

8. (a) Sa unsang paagi si Satanas naningkamot sa pagbungkag sa atong pagtuo karon? (b) Unsang pasidaan ni Pablo ang makita diha sa 2 Timoteo 4:3, 4?

⁸ Si Satanas maningkamot sa pagbungkag sa atong integridad pinaagi sa pagpugas ug mga pagduhaduha bahin sa gitudlo kanato. Karon, sama sa unang siglo, ang mga apostata ug ang uban pa naningkamot sa pagbungkag sa pagtuo sa mga inosente. (Galacia 2:4; 5:7, 8) Usahay gamiton nila ang palaumagian sa balita aron sa pagsabwag ug tinuis nga impormasyon o bisan tumang kabakakan bahin sa mga paagi ug motibo sa katawhan ni Jehova. Si Pablo nagpasidaan nga ang uban motalikod sa kamatuoran. “Aduna unyay yugto sa panahon,” siya misulat, “nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan; ug ilang ilingiw ang ilang mga dalunggan gikan sa kamatuoran, samtang sila moliso ngadto sa bakak nga mga sugilanon.”—2 Timoteo 4:3, 4.

9. Unsa tingaliy anaa sa hunahuna ni Pablo sa dihang naghisgot siya sa “bakak nga mga sugilanon”?

⁹ Imbes magpadayon sa paghupot sa sumbanan sa makapahimsog nga mga pulong, ang uban naikag sa “bakak nga mga sugilanon.” Unsa kining bakak nga mga sugilanon? Tingali anaa sa hunahuna ni Pablo ang tinumotumo nga mga sugilambong, sama nianang makita diha sa apokripal nga basahong Tobit. a Ang bakak nga mga sugilanon mahimong naglakip usab sa hinobra ug gibanabana nga mga hulungihong. Dayon, ang uban usab—“sumala sa ilang kaugalingong mga tinguha”—mahimong nalimbongan niadtong nagduso ug matugotong panglantaw sa mga sukdanan sa Diyos o kinsa hinawayon niadtong nanguna sa kongregasyon. (3 Juan 9, 10; Judas 4) Bisan unsang mga kapandolan ang nalangkit, ang uban dayag nga mipili sa kabakakan imbes sa mga kamatuoran sa Pulong sa Diyos. Wala magdugay sila mihunong sa pagbuhat sa mga butang nga ilang nakat-onan, ug mitultol kini sa ilang espirituwal nga kadaot.—2 Pedro 3:15, 16.

10. Unsa ang pipila ka presenteng-adlaw nga bakak nga mga sugilanon, ug sa unsang paagi gipasiugda ni Juan ang panginahanglan nga magbantay?

¹⁰ Malikayan nato nga madani sa bakak nga mga sugilanon karon kon atong susihon ug pilion kon unsay atong gipaminawan ug ginabasa. Pananglitan, ang palaumagian sa balita kasagarang nagpasiugda sa imoralidad. Daghang tawo ang nagdasig sa agnostisismo o direktang ateyismo. Ang matukiong  mga tigpanaway nagbiaybiay sa pangangkon sa Bibliya nga kini inspirado sa Diyos. Ang modernong-adlaw nga mga apostata nagpadayon sa pagpugas ug binhi sa pagduhaduha aron mapukan ang pagtuo sa mga Kristohanon. Bahin sa susamang kapeligrohan nga gipahamtang sa bakak nga mga manalagna sa unang siglo, si apostol Juan nagpasidaan: “Mga hinigugma, ayaw ninyo tuohi ang matag inspiradong pahayag, hinunoa sulayi ang inspiradong mga pahayag aron masuta kon kini nagagikan ba gayod sa Diyos, tungod kay daghang mini nga mga manalagna ang nanungha sa kalibotan.” (1 Juan 4:1) Busa angay kitang magbantay.

11. Unsa ang usa ka paagi sa pagsulay ug pagtino kon kita anaa sa pagtuo?

¹¹ Bahin niini, si Pablo misulat: “Padayong sulayi kon kamo anaa ba sa pagtuo.” (2 Corinto 13:5) Giawhag kita sa apostol sa pagpadayon sa pagsulay sa atong kaugalingon aron sa pagtino kon kita ba nagasunod sa tibuok Kristohanong mga tinuohan. Kon kita nakiling sa pagpamati sa mga bagulbolan, kinahanglang analisahon nato nga mainampoon ang atong kaugalingon. (Salmo 139:23, 24) Kita ba nakiling sa pagpangitag sayop sa katawhan ni Jehova? Kon mao, ngano? Duna bay nakapasilo kanato pinaagi sa mga pulong o mga lihok sa laing tawo? Kon mao, gilantaw ba nato ang situwasyon sa hustong kahimtang niini? Ang bisan unsang pagsulay nga atong atubangon niining sistemaha sa mga butang maoy temporaryo lamang. (2 Corinto 4:17) Bisan pag nakasinati kita ug pagsulay diha sa kongregasyon, nganong mohunong man kita sa pag-alagad sa Diyos? Kon dunay nakapapikal kanato, dili ba mas maayo nga himoon nato ang atong maarangan aron masulbad ang maong butang ug dayon itugyan kana kang Jehova?—Salmo 4:4; Proverbio 3:5, 6; Efeso 4:26.

12. Sa unsang paagi ang mga taga-Berea naghatag ug maayong panig-ingnan alang kanato?

¹² Imbes magsigeg panaway, huptan nato ang himsog-sa-espirituwal nga panglantaw sa impormasyon nga nadawat pinaagi sa personal nga pagtuon ug mga tigom sa kongregasyon. (1 Corinto 2:14, 15) Ug imbes magduhaduha sa Pulong sa Diyos, pagkalabi pang maalamon ang pagbaton sa tinamdan sa unang-siglong mga taga-Berea kinsa nagsusi pag-ayo sa Kasulatan! (Buhat 17:10, 11) Unya, molihok kita sumala sa atong nakat-onan, nga isalikway ang bakak nga mga sugilanon ug mangupot sa kamatuoran.

13. Sa unsang paagi kita dili tinuyong makapasa ug bakak nga mga sugilanon?

¹³ Adunay laing matang sa bakak nga sugilanon nga angay natong bantayan. Daghan kaayong naghinobrang mga estorya ang gipasa, kasagaran pinaagi sa E-mail. Maalamon nga magmabinantayon bahin sa maong mga estorya, ilabina kon wala kita mahibalo sa orihinal nga tinubdan sa maong impormasyon. Bisan pag ang usa ka eksperyensiya o sugilanon gipadala sa usa ka maayog-dungog nga Kristohanon, kanang tawhana basin dili mao ang nahibalo mismo sa mga kamatuoran. Mao nga hinungdanong magmabinantayon bahin sa pagsubli o pagpadala ug wala mapamatud-i nga mga asoy. Tinong dili nato gusto nga sublion ang “dili-diyosnong mga sugilambong,” o “bakak nga mga sugilanon nga nagpasipala kon unsay balaan.” (1 Timoteo 4:7; New International Version) Tungod kay kita usab dunay obligasyon sa pagsulti nga matinud-anon sa usag usa, kita nagalihok nga maalamon pinaagi sa paglikay sa bisan unsa nga magpahinabo  kanato sa pagpasa ug mga bakak bisag wala tuyoa.—Efeso 4:25.

Positibong mga Resulta sa Pagbuhat sa Kamatuoran

14. Unsang mga benepisyo ang moresulta gumikan sa pagbuhat sa mga butang nga atong nakat-onan gikan sa Pulong sa Diyos?

¹⁴ Ang pagbuhat sa atong nakat-onan pinaagi sa personal nga pagtuon sa Bibliya ug sa Kristohanong mga tigom makahatag ug daghang benepisyo. Pananglitan, makaplagan nato nga moarang-arang ang atong relasyon uban niadtong kabanay nato sa pagtuo. (Galacia 6:10) Ang atong kaugalingong tinamdan moarang-arang sa dihang atong ipadapat ang mga prinsipyo sa Bibliya. (Salmo 19:8) Dugang pa, pinaagi sa pagpadapat sa atong nakat-onan, atong ‘gidayandayanan ang pagtulon-an sa Diyos’ ug lagmit nga makadani sa uban ngadto sa matuod nga pagsimba.—Tito 2:6-10.

15. (a) Sa unsang paagi ang usa ka batan-on nakabaton ug kaisog sa pagpamatuod diha sa eskuylahan? (b) Unsay imong nakat-onan gikan niining maong eksperyensiya?

¹⁵ Taliwala sa mga Saksi ni Jehova anaa ang daghang batan-on nga nagbuhat sa ilang nakat-onan pinaagi sa personal nga pagtuon sa Bibliya ug sa Kristohanong mga publikasyon maingon man sa regular nga pagtambong sa mga tigom sa kongregasyon. Ang ilang maayong panggawi maoy gamhanang pamatuod ngadto sa mga magtutudlo ug mga isigkaestudyante sa eskuylahan. (1 Pedro 2:12) Tagda si Leslie, usa ka 13-anyos nga dalagita sa Tinipong Bansa. Siya miangkon nga siya malisdan kaniadto sa pagpakigsulti sa mga eskolmet bahin sa iyang mga tinuohan, apan usa ka adlaw niana kana nausab. “Ang klase naghisgot kon sa unsang paagi ang mga tawo naningkamot sa pagbaligya kanimo ug mga butang. Usa ka dalagita ang miisa sa iyang kamot ug gihisgotan ang mga Saksi ni Jehova ingong pananglitan.” Ingong usa ka Saksi, unsay reaksiyon ni Leslie? “Akong gidepensahan ang akong pagtuo,” siya miingon, “nga seguro kong nakapatingala sa tanan, tungod kay kasagarang hilomon kaayo ko sa eskuylahan.” Unsay resulta sa pagkamaisogon ni Leslie? “Nakapahimutang ako ug brosyur ug tract uban sa maong estudyante, tungod kay duna pa siyay laing mga pangutana,” matod pa ni Leslie. Pagkadako gayod sa kalipay ni Jehova sa dihang ang mga batan-on nga nagbuhat sa ilang nakat-onan nakabaton ug kaisog sa pagpamatuod diha sa eskuylahan!—Proverbio 27:11; Hebreohanon 6:10.

16. Sa unsang paagi ang Teokratikanhong Tunghaan sa Ministeryo nakabenepisyo sa usa ka batan-ong Saksi?

¹⁶ Ang laing panig-ingnan mao kanang kang Elizabeth. Sukad sa pag-edad ug siyete ug sa tanang tuig niya sa tunghaang elementarya, kining batan-ong babaye nagdapit sa iyang mga magtutudlo sa pag-adto sa Kingdom Hall kon duna siyay asaynment sa Teokratikanhong Tunghaan sa Ministeryo. Kon dunay magtutudlo nga dili makatambong, si Elizabeth magpabilin sa eskuylahan human sa klase ug ipahayag ang iyang bahin ngadto sa magtutudlo. Sa iyang kataposang tuig sa hayskul, si Elizabeth misulat ug napulo-ka-panid nga report bahin sa mga benepisyo sa Teokratikanhong Tunghaan sa Ministeryo ug mihimog presentasyon atubangan sa upat ka magtutudlo. Giawhag usab siya sa paghatag ug modelong demonstrasyon sa Teokratikanhong Tunghaan sa Ministeryo, nga niana gipili niya ang ulohang “Nganong Gitugotan sa Diyos ang Pagkadaotan?” Si Elizabeth nakabenepisyo gikan sa edukasyonal nga programa nga gihimo sa mga Saksi ni Jehova diha sa Teokratikanhong Tunghaan sa Ministeryo. Usa lamang siya sa daghang batan-ong mga Kristohanon nga naghatag ug kadayeganan kang Jehova pinaagi sa pagbuhat sa mga butang nga ilang nakat-onan gikan sa iyang Pulong.

17, 18. (a) Ang Bibliya nagtanyag ug unsang tambag mahitungod sa pagkamatinud-anon? (b) Sa unsang paagi ang usa ka tawo naapektahan sa matinud-anong panggawi sa usa sa mga Saksi ni Jehova?

¹⁷ Ang Bibliya nag-awhag sa mga Kristohanon  nga magmatinud-anon sa tanang butang. (Hebreohanon 13:18) Ang pagkadili-matinud-anon makadaot sa atong relasyon sa uban ug, labawng hinungdanon, kang Jehova mismo. (Proverbio 12:22) Ang atong kasaligang panggawi maghatag ug pamatuod nga kita nagabuhat sa mga butang nga atong nakat-onan, ug kini nagpahinabo sa daghan nga makabaton ug mas dakong pagtahod sa mga Saksi ni Jehova.

¹⁸ Tagda ang eksperyensiya sa usa ka sundalo nga ginganlag Phillip. Nawala niya ang usa ka blangko, napirmahan nga tseke ug wala makaamgo niini hangtod nga giuli kini kaniya pinaagi sa koreyo. Ang tseke nakit-an sa usa sa mga Saksi ni Jehova, ug usa ka mubong sulat ang gipataban niana nga ang relihiyosong mga tinuohan sa nakakita mao ang nagtukmod kaniya sa pag-uli niana. Nakurat si Phillip. “Makawatan na unta nila ako ug $9,000!” matod niya. Nahigawad siya sa laing higayon sa dihang ang iyang kalo gikawat didto sa simbahan. Dayag, nga usa ka kaila ang mikuha sa iyang kalo, samtang ang usa ka dili-kaila miuli sa tseke nga mobalor ug libolibong dolyar! Sa pagkatinuod, ang matinud-anong mga Kristohanon nagpasidungog kang Jehova nga Diyos!

Magpadayon sa Pagpadapat sa Imong Nakat-onan

19, 20. Sa unsang paagi kita makabenepisyo gikan sa paglihok nga kaharmonya sa Kasulatanhong mga butang nga atong nakat-onan?

¹⁹ Kadtong nagpadapat sa ilang nakat-onan gikan sa Pulong sa Diyos makaani ug daghang benepisyo. Ang tinun-an nga si Santiago misulat: “Apan siya nga magasud-ong pag-ayo sa hingpit nga balaod nga iya sa kagawasan ug magpadayon diha niana, kini nga tawo, tungod kay siya dili usa ka malimtanong tigpaminaw, kondili usa ka magtutuman sa buluhaton, malipayon siya sa iyang pagbuhat niini.” (Santiago 1:25) Oo, kon kita molihok nga kaharmonya sa Kasulatanhong mga butang nga atong nakat-onan, kita makabaton ug tinuod nga kalipay ug mas makasagubang sa mga pagpit-os sa kinabuhi. Labaw sa tanan, mabatonan nato ang panalangin ni Jehova ug ang paglaom nga mabuhi sa walay kataposan!—Proverbio 10:22; 1 Timoteo 6:6.

²⁰ Busa, magmakugihon gayod sa pagtuon sa Pulong sa Diyos. Pakigtigom nga regular uban sa mga magsisimba ni Jehova, ug hatagig pagtagad ang materyal nga gipresentar diha sa Kristohanong mga tigom. Ipadapat ang imong nakat-onan, padayon sa pagbuhat niana, ug ‘ang Diyos sa kalinaw magauban kanimo.’—Filipos 4:9.

[Footnote]

Nahinumdom Ka Ba?

• Unsa ang “sumbanan sa makapahimsog nga mga pulong,” ug sa unsang paagi padayon natong mahuptan kini?

• Unsang “bakak nga mga sugilanon” ang kinahanglan natong isalikway?

• Unsang mga benepisyo ang modangat niadtong nagbuhat sa mga butang nga ilang nakat-onan gikan sa Pulong sa Diyos?

[Mga Pangutana sa Pagtuon]

[Hulagway sa panid 17]

Sa unsang paagi ang unang mga Kristohanon makalikay nga mapahisalaag sa mga apostata?

[Mga hulagway sa panid 18]

Ang mga binhi sa pagduhaduha mahimong ipugas sa palaumagian sa balita, pinaagi sa Internet, ug sa modernong-adlaw nga mga apostata

[Hulagway sa panid 19]

Dili maalamon ang pagpasa ug wala-mapamatud-ing mga taho

[Mga hulagway sa panid 20]

Diha sa trabahoan, sa eskuylahan, ug bisan asa, ang mga Saksi ni Jehova nagpadapat sa ilang nabasahan diha sa Pulong sa Diyos