Sa Unsang Paagi Makatabang Kanimo ang Tinuod nga mga Santos?

SA KASULATAN, ang Gregong pulong nga gihubad “santos” diha sa ubang mga bersiyon mahimong hubaron nga “balaang usa.” Kang kinsa mapadapat ang maong termino? “Kon ipadapat sa mga magtutuo sa dinaghang paagi,” matod sa An Expository Dictionary of New Testament Words, “kini magtumong kanilang tanan ug dili kay ikapadapat lamang sa mga tawong talagsaon ang pagkabalaan, o sa mga nangamatay nga giila tungod sa ilang talagsaong mga buhat sa pagkabalaan.”

Busa si apostol Pablo nagtawag sa tanang unang mga Kristohanon ingong tinuod nga mga santos, o mga balaan. Pananglitan, sa unang siglo K.P., siya nagsulat ngadto “sa kongregasyon sa Diyos nga anaa sa Corinto, uban sa tanang balaan nga anaa sa tibuok [Romanhong probinsiya sa] Acaya.” (2 Corinto 1:1) Sa ulahi, si Pablo nagsulat “ngadto sa tanan nga anaa sa Roma ingong mga hinigugma sa Diyos, nga gitawag aron mahimong mga balaan.” (Roma 1:7) Dayag nga wala pa mangamatay niadto ang maong mga balaan, ni sila giila nga labaw kay sa ubang mga magtutuo tungod sa ilang talagsaong hiyas. Unsay pasikaranan nga sila giila ingong mga santos?

Gibalaan sa Diyos

Gipakita sa Pulong sa Diyos nga ang usa ka tawo dili ikapahayag nga usa ka santos pinaagig mga tawo o pinaagig usa ka organisasyon. Ang Kasulatan nag-ingon: “[Ang Diyos] nagluwas kanato ug nagtawag kanato sa usa ka balaan nga pagtawag, dili tungod sa atong mga buhat, kondili tungod sa iyang kaugalingong katuyoan ug dili-takos nga kalulot.” (2 Timoteo 1:9) Ang usa nga balaan pagabalaanon tungod sa pagtawag ni Jehova, sumala sa dili-takos nga kalulot sa Diyos ug uyon sa Iyang katuyoan.

Ang mga balaan diha sa Kristohanong kongregasyon maoy mga sumasalmot sa “usa ka bag-ong pakigsaad.” Ang giulang dugo ni Jesu-Kristo maoy nagpalig-on sa maong pakigsaad ug nagbalaan sa mga sumasalmot niini. (Hebreohanon 9:15; 10:29; 13:20, 24) Kay nahinlo na sa panan-aw sa Diyos, sila maoy ‘usa ka balaang pagkasaserdote nga magtanyag ug espirituwal nga mga halad nga dalawaton sa Diyos pinaagi kang Jesu-Kristo.’—1 Pedro 2:5, 9.

Pagsangpit ug Pagpataliwala sa mga Santos

Sa pagtuo nga ang “mga santos” makahatag ug espesyal nga gahom sa mga deboto, minilyon ang nagsimba kanila pinaagi sa paggamit ug mga relikyas o sa pagsangpit kanila ingong mga tigpataliwala. Kini ba maoy pagtulon-an sa Bibliya? Sa iyang Wali sa Bukid, si Jesus nagtudlo sa iyang mga sumusunod kon unsaon pagduol sa Diyos, nga nag-ingon: “Busa, mag-ampo kamo sa  ingon niini nga paagi: ‘Amahan namo nga anaa sa mga langit, pagabalaanon unta ang imong ngalan.’” (Mateo 6:9) Ang mga pag-ampo angay nga itumong lamang kang Jehova nga Diyos.

Sa paningkamot nga pamatud-an ang pagpataliwala sa “mga santos,” ang ubang mga teologo mokutlo sa Roma 15:30, nga atong mabasa: “Ako magaawhag kaninyo, mga igsoon, pinaagi sa atong Ginoong Jesu-Kristo ug pinaagi sa gugma sa espiritu, nga manlimbasog kamo uban kanako sa mga pag-ampo ngadto sa Diyos alang kanako.” Gidasig ba ni Pablo ang maong mga magtutuo sa pag-ampo kaniya o sa pagsangpit sa iyang ngalan sa dihang moduol sa Diyos? Wala. Bisan tuod gidasig sa Bibliya nga ang mga pag-ampo itanyag alang sa tinuod nga mga santos, o mga balaan, ang Diyos wala gayod magsugo kanato sa pag-ampo ngadto o pinaagi sa maong mga balaan.—Filipos 1:1, 3, 4.

Apan ang Diyos nagtudlo ug usa ka Tigpataliwala alang sa atong mga pag-ampo. “Ako ang dalan ug ang kamatuoran ug ang kinabuhi,” matod ni Jesu-Kristo. “Walay makaadto sa Amahan kon dili pinaagi kanako.” Si Jesus miingon usab: “Bisan unsa nga inyong pangayoon sa akong ngalan, kini akong pagabuhaton, aron nga ang Amahan mahimaya maylabot sa Anak. Kon kamo mangayo ug bisan unsa sa akong ngalan, kini akong pagabuhaton.” (Juan 14:6, 13, 14) Makasalig kita nga si Jehova andam sa pagdungog sa mga pag-ampo nga itanyag pinaagi sa ngalan ni Jesus. Bahin kang Jesus, ang Bibliya nag-ingon: “Siya makahimo usab sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.”—Hebreohanon 7:25.

Kon si Jesus andam sa pagpataliwala alang kanato, nganong ang “mga santos” maoy kasagarang ampoan sa mga magsisimba sa Kakristiyanohan? Sa iyang librong The Age of Faith, ang historyanong si Will Durant nagsusi sa sinugdanan niining buhata. Bisan tuod iyang gihisgotan nga ang Labing Gamhanan nga Diyos maoy angay kahadlokan ug si Jesus mas daling maduol, si Durant miingon: “Ang usa magpanuko sa pagpakigsulti nga direkta [kang Jesus] human nga iyang malapas sa bug-os ang Wali sa Bukid ni Jesus. Morag mas maalamon ang pag-ampo ngadto sa usa ka santos nga gideklarar pinaagig kanonisasyon nga seguradong tua na sa langit, ug mangaliyupo nga ang maong santos magpataliwala kaniya ug kang Kristo.” Makataronganon ba ang maong mga kabalaka?

Ang Bibliya nagtudlo kanato nga pinaagi kang Jesus kita makabaton ug “kagawasan sa pagsulti  ug pagduol uban ang pagsalig” sa pag-ampo ngadto sa Diyos. (Efeso 3:11, 12) Ang Labing Gamhanang Diyos dili kaayo layo sa mga tawo nga dili siya makapatalinghog sa atong mga pag-ampo. Ang salmistang si David masaligong miampo: “Oh Tigpatalinghog sa pag-ampo, nganha kanimo moduol ang tanang matang sa katawhan.” (Salmo 65:2) Inay mohatag ug gahom pinaagi sa mga relikyas sa nangamatay nga “mga santos,” si Jehova mobubo sa iyang balaang espiritu niadtong mangayo niana nga may pagtuo. Si Jesus nangatarongan: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—Lucas 11:13.

Ang Papel sa mga Balaan

Ang mga balaan nga gisulatan ni Pablo nangamatay kasiglohan na kanhi ug sa pag-abot sa panahon ilang nadawat “ang purongpurong sa kinabuhi,” usa ka pagkabanhaw ngadto sa langit. (Pinadayag 2:10) Ang mga magsisimba ni Jehova nga Diyos nahibalo nga ang pagsimba niining tinuod nga mga santos dili kasulatanhon ug dili makapanalipod batok sa sakit, natural nga mga katalagman, kalisod sa ekonomiya, pagkatigulang, o kamatayon. Busa, ikaw tingali makasukna, ‘Tinuod bang may pagtagad kanato ang mga balaan sa Diyos? Makadahom ba kita nga sila molihok alang kanato?

Ang mga balaan gihulagway pag-ayo diha sa tagna nga gitala ni Daniel. Sa ikaunom nga siglo W.K.P., nakita niya ang makapadasig nga panan-awon, ang katumanan niini molugway hangtod sa atong panahon. Gikan sa dagat migula ang upat ka makahahadlok nga mga mananap nga naghawas sa tawhanong mga kagamhanan, nga dili makatagbaw sa tinuod nga mga panginahanglan sa tawo. Dayon si Daniel nagtagna: “Apan ang mga balaan sa Supremong Usa magadawat sa gingharian, ug panag-iyahon nila ang gingharian sa panahong walay tino, bisan sa panahong walay tino hangtod sa mga panahong walay tino.”—Daniel 7:17, 18.

Gipamatud-an ni Pablo kining “panulondon alang sa mga balaan,” nga mao ang pagkahimong kaubang mga manununod ni Kristo sa mga langit. (Efeso 1:18-21) Ang dugo ni Jesus nag-abli sa dalan alang sa 144,000 nga mga balaan nga mabanhaw ngadto sa langitnong himaya. Si apostol Juan mipahayag: “Malipayon ug balaan si bisan kinsa nga adunay bahin sa unang pagkabanhaw; kanila ang ikaduhang kamatayon walay awtoridad, apan sila mahimong mga saserdote sa Diyos ug sa Kristo, ug magamando ingong mga hari uban kaniya sulod sa usa ka libo ka tuig.” (Pinadayag 20:4, 6; 14:1, 3) Diha sa panan-awon, nadungog ni Juan ang panon sa langitnong mga linalang nga nag-awit atubangan sa gihimayang si Jesus: “Sa imong dugo gipalit mo ang mga tawo alang sa Diyos gikan sa matag tribo ug pinulongan ug katawhan ug nasod, ug gihimo mo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.” (Pinadayag 5:9, 10) Makapadasig gayod nga pasalig! Si Jehova nga Diyos mismo maoy maampingong nagpili niining maong mga lalaki ug babaye. Dugang pa, sila matinumanong nag-alagad dinhi sa yuta, nga nakasagubang sa halos tanang suliran nga nasinati sa mga tawo. (1 Corinto 10:13) Busa, kita makasalig nga kining gibanhaw nga mga balaan, o mga santos, mahimong maluluy-on ug mabinationg mga magmamando, nga magkonsiderar sa atong mga kahuyangan ug mga limitasyon.

Mga Panalangin Ilalom sa Pagmando sa Gingharian

Ang Gingharian nga kagamhanan sa di-madugay molihok sa paghanaw sa tanang pagkadaotan ug pag-antos dinhi sa yuta. Nianang panahona, ang mga tawo masuod pa gayod sa Diyos kay sukad masukad. Si Juan misulat: “Niana nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila.’” Kini magdalag di-mahubit nga  mga panalangin sa katawhan, kay ang tagna nagpadayon: “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.

Pagkamalipayong panahon unya niana! Ang mga resulta sa hingpit nga pagmando ni Kristo Jesus ug sa 144,000 nga mga balaan gihubit ug dugang niining mga pulonga sa Miqueas 4:3, 4: “[Si Jehova] magahukom gayod taliwala sa daghang mga katawhan, ug magatul-id sa mga butang labot sa gamhanang mga nasod sa halayo. Ug ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Dili sila mobakyaw sa espada, nasod batok sa nasod, ni makakat-on pa sila sa gubat. Ug sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.”

Ang pagdapit aron makigbahin sa maong mga panalangin gitanyag pinaagi sa mga balaan. Gisimbolohan sa usa ka pangasaw-onon, ang tinuod nga mga santos padayong nag-ingon: “Umari ka!” Ang teksto nagpadayon: “Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” (Pinadayag 22:17) Unsay nalakip sa “tubig sa kinabuhi”? Usa niini mao ang tukmang kahibalo sa mga katuyoan sa Diyos. Sa pag-ampo sa Diyos, si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Kini nga kahibalo mabatonan pinaagi sa regular nga pagtuon sa Bibliya. Pagkamalipayon nato nga pinaagi sa Pulong sa Diyos atong mailhan ang tinuod nga mga balaan ug makakat-on kon sa unsang paagi iyang gamiton sila alang sa dumalayong kaayohan sa katawhan!

[Hulagway sa panid 4]

Si Pablo nagsulat ug inspiradong mga sulat ngadto sa tinuod nga mga santos

[Hulagway sa panid 5]

Ang matinumanong mga apostoles ni Jesus nahimong tinuod nga mga santos, o mga balaan

[Hulagway sa panid 6]

Kita masaligon nga makaampo sa Diyos pinaagi kang Jesu-Kristo

[Hulagway sa panid 7]

Ang gibanhaw nga mga santos, o mga balaan, mahimong mabinationg mga magmamando ibabaw sa yuta