Kahupayan Diha sa Tukmang Kahibalo Bahin sa Diyos

ALANG sa ubang mga tawo, ang giingon sa Bibliya bahin sa gugma ug kaluoy sa Diyos makapatugbaw ug makatugawng mga pangutana. Sila mangutana: Kon nagtinguha ang Diyos sa pagwagtang sa pagkadaotan, nahibalo kon unsaon kini paghimo, ug may gahom sa paghimo niini, nganong ang pagkadaotan nagpadayon sa pagdaghan? Alang kanila ang problema mao ang pagsulbad sa daw tulo ka nagkasumpaking mga isyu: (1) Ang Diyos gamhanan sa ngatanan; (2) ang Diyos mahigugmaon ug maayo; ug (3) ang daotang mga hitabo padayong nagakahitabo. Sila mangatarongan nga kay ang ikatulong isyu tinuod man gayod, nan labing menos usa sa duha dili mahimong tinuod. Alang kanila, mahimong ang Diyos dili makapahunong sa pagkadaotan o kaha siya wala magtagad.

Sa milabay ang daghang adlaw human nga gibombahan ang World Trade Center sa New York, usa ka prominenteng lider sa relihiyon sa Tinipong Bansa miingon: “Gipangutana ako . . . sa daghang higayon sa akong kinabuhi kon nganong gitugotan sa Diyos nga mahitabo ang kalamidad ug pag-antos. Dawaton ko nga ako wala gayod mahibalo sa tubag, bisan sa makapatagbaw nga tubag.”

Agig reaksiyon niini nga komento, usa ka propesor sa teolohiya nagsulat nga siya natandog sa “makataronganong teolohiya” nga gisangyaw niining maong relihiyosong lider. Iyang giduso usab ang hunahuna sa usa ka eskolar kinsa nagsulat: “Ang pagkadili-masabtan sa pag-antos maoy bahin sa pagkadili-masabtan sa Diyos.” Apan dili ba gayod masabtan kon nganong gitugotan sa Diyos ang pagkadaotan?

Ang Gigikanan sa Pagkadaotan

Sukwahi sa gipanulti sa relihiyosong mga lider, ang Bibliya wala maglarawan sa pagtugot sa Diyos sa pagkadaotan ingong dili-masabtan. Ang hinungdanong punto aron masabtan ang isyu bahin sa pagkadaotan mao ang pag-ila nga si Jehova wala maglalang ug usa ka daotan nga kalibotan. Iyang gilalang ang unang tawhanong paris nga hingpit, walay sala. Si Jehova naglantaw sa iyang buhat sa paglalang ug nakita nga kini “maayo kaayo.” (Genesis 1:26, 31) Ang katuyoan niya alang kang Adan ug Eva mao ang pagpasangkad sa Paraiso sa Eden sa tibuok kalibotan ug ang pagpuno niini sa malipayong mga tawo ilalom sa pagpanalipod sa iyang mahigugmaong pagkasoberano.—Isaias 45:18.

Ang pagkadaotan nagsugod diha sa usa ka espiritu nga linalang kinsa, bisan tuod sa sinugdan matinumanon sa Diyos, natugkan ug tinguha nga pagasimbahon. (Santiago 1:14, 15) Ang iyang pag-alsa nadayag diha sa yuta sa dihang iyang gidaldal ang unang tawhanong paris sa pagduyog kaniya sa iyang pagsukol sa Diyos. Imbes magpasakop sa tin-awng instruksiyon sa Diyos sa dili pagkaon o paghikap sa bunga sa kahoy sa kahibalo sa maayo ug daotan, si Adan ug Eva mikuha ug mikaon niana. (Genesis 3:1-6) Sa paghimo niini, dili lamang gisupak nila ang Diyos kondili ilang gipakita usab nga buot nila ug kagawasan gikan kaniya.

Usa ka Moral nga Isyu ang Gipatugbaw

Kining nahitabong pag-alsa diha sa Eden nakapatugbaw ug usa ka moral nga isyu, usa ka hagit  nga hinungdanon sa uniberso. Gikuwestiyon sa mga tawong rebelde kon maayo ba ang pagdumala ni Jehova sa iyang pagmando sa iyang mga linalang. Ang Maglalalang ba adunay katungod sa pagpangayo ug bug-os nga pagkamasinugtanon gikan sa katawhan? Mas maayo kaha ang kahimtang sa tawo kon walay magbuot kanila?

Giatubang ni Jehova kini nga hagit sa iyang pagmando sa usa ka paagi nga nagpasundayag sa iyang hingpit nga pagkatimbang sa gugma, hustisya, kaalam, ug gahom. Mahimo niyang gamiton ang iyang gahom sa pagpukan sa rebelyon dihadiha. Morag mas makataronganon pa kana, kay siya adunay katungod sa paghimo niana. Apan kon gihimo pa kana, dili unta matubag ang moral nga mga isyu nga gipatugbaw. Sa laing bahin, mahimong ipalabay lang unta sa Diyos ang sala. Alang sa uban karon, ang maong pagpalabay sa sala morag mao ang mahigugmaong solusyon. Apan, dili gihapon matubag niini ang pangangkon ni Satanas nga ang mga tawo mas maayog kahimtang kon magmando sila sa ilang kaugalingon. Dugang pa, dili ba ang maong buhat magdasig sa uban sa pagtipas gikan sa dalan ni Jehova? Ang resulta mahimong walay kataposang pag-antos.

Pinaagi sa iyang kaalam, gitugotan ni Jehova ang mga tawo sa paglakaw sa ilang kaugalingong dalan sulod sa usa ka yugto sa panahon. Bisan tuod nagkahulogan kini sa pagtugot sa pagkadaotan nga magpadayon sa temporaryong paagi, ang mga tawo sa ingon dunay kahigayonan sa pagpakita kon sila molampos ba sa pagmando sa ilang kaugalingon nga walay pagtultol sa Diyos, nga magkinabuhi sa ilang kaugalingong mga sukdanan sa kon unsa ang matarong ug daotan. Unsay miresulta? Naandan na gayod sa kasaysayan sa tawo ang gubat, inhustisya, paglupig, ug pag-antos. Ang dakong kapakyasan sa pag-alsa batok kang Jehova mohusay sa dumalayon sa mga isyu nga gipatugbaw diha sa Eden.

Kasamtangan, gipasundayag sa Diyos ang iyang gugma pinaagi sa pagtagana sa iyang Anak, si Jesu-Kristo, kinsa mitugyan sa iyang tawhanong kinabuhi ingong halad lukat. Kini nagpaarang sa mga tawong masinugtanon sa pagkabaton ug kagawasan gikan sa pagkatinunglo sa sala ug kamatayon nga maoy resulta sa pagkadili-masinugtanon ni Adan. Ang lukat maoy nagbukas sa dalan ngadto sa kinabuhing dayon alang sa tanang  magpasundayag ug pagtuo kang Jesus.—Juan 3:16.

Kita gipasaligan ni Jehova nga temporaryo lang ang pag-antos sa tawo. “Sa dili madugay, ug ang daotan mawala na,” nagsulat ang salmista. “Pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:10, 11.

Usa ka Umaabot nga May Kasegurohan ug Kalipay

Ang katumanan sa mga tagna sa Bibliya nagpakita nga duol na ang panahon nga taposon sa Diyos ang sakit, kaguol, ug kamatayon. Matikdi ang maanindot kaayong pasiunang pagtan-aw sa mga butang nga moabot nga gihatag ngadto kang apostol Juan diha sa usa ka panan-awon. Siya nagsulat: “Nakita ko ang usa ka bag-ong langit ug usa ka bag-ong yuta; kay ang unang langit ug ang unang yuta nangahanaw na man, ug ang dagat wala na. . . . Ug ang Diyos makig-uban [sa katawhan]. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Pinaagig mga pulong nga nagpasiugda sa pagkakasaligan niining mga saara, si Juan giingnan: “Isulat kini, tungod kay kining mga pulonga kasaligan ug matuod.”—Pinadayag 21:1-5.

Komosta ang binilyong inosenteng mga tawong nangamatay na sukad sa pag-alsa diha sa Eden? Si Jehova nagsaad nga iyang buhion ug balik ang mga tawo nga nangatulog sa kamatayon. Si apostol Pablo miingon: “Ako adunay paglaom diha sa Diyos . . . nga aduna unyay pagkabanhaw sa mga matarong ug sa mga dili-matarong.” (Buhat 24:15) Kini sila adunay palaaboton nga mabuhi diha sa usa ka kalibotan diin “magpuyo ang pagkamatarong.”—2 Pedro 3:13.

Sama sa usa ka mahigugmaong amahan nga motugot sa iyang anak nga moagi ug masakit nga operasyon kon siya nahibalo nga kini mohatag ug walay kataposang mga kaayohan, sa samang paagi gitugotan ni Jehova ang katawhan sa pagsinati sa temporaryong paglungtad sa pagkadaotan dinhi sa yuta. Apan, usa ka walay kataposang panalangin ang naghulat sa tanan nga naningkamot sa pagtuman sa kabubut-on sa Diyos. Si Pablo miingon: “Ang kalalangan gipailalom sa pagkawalay-pulos, dili pinaagi sa kaugalingong kabubut-on niini kondili pinaagi kaniya nga nagsakop niini, pinasukad sa paglaom aron nga ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”—Roma 8:20, 21.

Kini maoy tinuod gayod nga balita—dili ang matang sa balita nga atong makita sa telebisyon o mabasa sa mantalaan kondili maayong balita. Kini mao ang labing maayong balita gikan sa “Diyos sa tanang paghupay,” kinsa tinuod gayod nga mahingawaon kanato.—2 Corinto 1:3.

[Mga hulagway sa panid 6]

Napamatud-an sa panahon nga ang katawhan dili malamposong makamando sa ilang kaugalingon nga walay pagtultol sa Diyos

[Credit Lines]

Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo