Mga Batan-on nga Nahigugma sa Kamatuoran

“UNSAON paghinlo sa usa ka batan-ong lalaki sa iyang alagianan?” nangutana ang usa ka Hebreohanong salmista kapin sa 2,400 ka tuig kanhi. (Salmo 119:9) Haom gihapon kining pangutanaha karong adlawa tungod kay ang mga batan-on nag-atubang ug daghang problema dinhi sa kalibotan. Ang mahilayong seksuwal nga kalihokan nagladlad sa daghang batan-on sa AIDS, mga katunga niadtong nataptan niining makalilisang nga sakit nag-edad ug tali sa 15 ug 24 anyos. Ang pag-abuso sa droga makapahinabo usab ug daghang problema, nga maoy nakaingon sa ahat nga kamatayon sa pipila ka batan-on. Ang makadaot-sa-moral nga musika; mapintas ug imoral nga mga pelikula, mga salida sa TV, ug mga video; ug ang pornograpiya diha sa Internet adunay malaglagong impluwensiya diha sa mga batan-on. Busa, ang pangutana nga gisukna sa salmista anaa gayod sa hunahuna sa daghang ginikanan ug mga batan-on karon.

Alang sa iyang pangutana, ang mao ra gihapong salmista nagtubag: “Pinaagi sa pagpadayon sa pagbantay subay sa imong pulong.” Tino nga ang Pulong sa Diyos, ang Bibliya, naundan ug maayong pagtultol alang sa mga batan-on, ug pinaagi sa pagsunod niana, daghang batan-on ang nagmalamposon sa ilang kinabuhi. (Salmo 119:105) Atong susihon ang pipila ka panig-ingnan sa mga batan-on nga nahigugma sa Diyos ug naningkamot sa pagpabiling lig-on sa espirituwal diha sa nangitag-kalipayan ug materyalistiko nga kalibotan.

Sila Mapasalamaton sa Ginikananong Giya

Si Jacob Emmanuel maoy usa ka bug-os-panahong payunir nga ministro sulod na sa pipila ka tuig sa wala pa mag-alagad didto sa sangang buhatan sa mga Saksi ni Jehova sa Mexico. Mapasalamaton niyang nahinumdoman kon sa unsang paagi naugmad ang iyang gugma alang sa pag-alagad sa Diyos: “Ang panguna kong impluwensiya mao ang akong mga ginikanan, bisan tuod ug ang ubang espirituwal nga mga igsoon nga akong nahigala dako usab ug gikatabang. Sila nagpalihok kanako sa paghigugma sa buluhatong pagsangyaw. Sa malulotong paagi gitultolan nila ako sa hustong agianan; wala ko gayod batia nga gipit-os ko nila.”

Si David, kinsa nakagugol na ug ubay-ubayng katuigan diha bug-os-panahong ministeryo, nahinumdom kon sa unsang paagi nakaapekto kaniya nga ang iyang mga ginikanan misugod sa pag-alagad ingong mga espesyal payunir samtang siya ug ang iyang igsoong lalaki gagmay pa. Sa dihang namatay ang iyang amahan, nagpadayon ang iyang inahan sa pag-alagad ingong espesyal payunir. Siya nag-atiman kanila gawas pa sa pagsangyaw sa maayong balita. “Wala gayod nila ako pugsa sa pagpayunir,” matod ni David, “apan nalingaw kami pag-ayo sa pagpayunir ingong pamilya nga ang panag-ubanay ug ang mga kahimtang nagtukmod kanako sa pagpayunir.” Maylabot sa kahinungdanon sa maayong pagtultol ug pagtagad gikan sa mga ginikanan, si David nag-ingon: “Kada gabii, basahan mi ni Mama ug mga estorya gikan sa librong Gikan sa Paraisong Nawala Ngadto sa Paraisong Nabatonan Pag-usab. a Ang iyang paagi sa pag-asoy niana kanamo nakatabang kanamo nga ganahang mokaon sa espirituwal nga pagkaon.”

Pagpabili sa mga Tigom

Ang pipila ka batan-on nalisdan sa pagpabili sa Kristohanong mga tigom. Motambong lang sila tungod kay iuban man sila sa ilang mga ginikanan. Apan, kon ilang ipadayon ang pagtambong sa mga tigom, sa kadugayan makakat-on ra sila sa pagpabili sa mga panagkatigom. Tagda si Alfredo, kinsa misugod sa bug-os-panahong pag-alagad sa dihang 11 anyos  pa siya. Giangkon niya nga sa nag-edad siyag mga lima ka tuig, gisulayan niya ang paglikay sa pagtambong sa mga tigom tungod kay katulgon lang siya niini apan dili siya tugtan sa iyang mga ginikanan nga matulog panahon sa mga tigom. Siya nahinumdom: “Samtang ako nagkahamtong, anam-anam akong nainteres sa mga tigom, ilabina sa dihang nakakat-on na ako sa pagbasa ug pagsulat tungod kay nagsugod na ako sa pagkomento sa kaugalingon kong mga pulong.”

Si Cintia, usa ka 17-anyos nga babaye nga nag-alagad ingong regular payunir, nagsugilon kon sa unsang paagi ang maayong panag-ubanay adunay dakong bahin sa iyang pag-ugmad sa gugma alang sa pag-alagad sa Diyos. Siya miingon: “Ang maayong relasyon uban sa mga igsoon ug ang regular nga pagtambong sa mga tigom nagpugong kanako nga mawili sa akong kalibotanong mga higala ug sa mga kalihokan nga popular sa mga kabataan, sama sa pag-adto sa mga diskohan. Ang pagpaminaw sa mga komento ug mga eksperyensiya diha sa mga tigom nagpatungha dinhi kanako ug tinguha sa paghatag kang Jehova sa tanan kong nabatonan, ug gibati ko nga ang labing maayong butang nga akong nabatonan mao ang akong pagkabatan-on. Busa nakahukom ako sa paggamit niini diha sa pag-alagad kaniya.”

Apan, siya miangkon: “Sa wa pa ko mabawtismohi, dihay panahon nga dali ra kong mopalta sa mga tigom, nga gamiton ang homwork o ubang mga kalihokan sa eskuylahan ingong pasangil. Nakapalta akog ubay-ubayng mga tigom, ug misugod kini sa pag-apektar kanako sa espirituwal nga paagi. Misugod ako sa pagpakig-uban sa usa ka lalaki nga wala magtuon sa Bibliya. Tungod sa tabang ni Jehova, sa ngadtongadto ako rang natul-id ang mga butang.”

Usa ka Personal nga Desisyon

Sa dihang gipangutana si Pablo, laing batan-on nga nag-alagad kang Jehova sa bug-os panahon, kon unsay gihunahuna niyang labing hinungdanong butang aron maugmad ang gugma alang sa kamatuoran sa Pulong sa Diyos, siya miingon: “Alang kanako adunay duha ka butang: regular nga personal nga pagtuon ug kasibot diha sa buluhatong pagsangyaw. Mapasalamaton ako sa akong mga ginikanan tungod sa pagtudlo kanako sa kamatuoran bahin kang Jehova, ug gibati ko nga mao kini ang kinamaayohang butang nga ilang gihatag kanako. Apan, kinahanglang kombinsido gayod ako kon nganong gihigugma ko si Jehova. Aron mahimo kana, kinahanglan kong mahibaloan ang ‘gilapdon ug giladmon’ sa kamatuoran sa Bibliya. Niining paagiha lamang nga kita mangandoy sa Pulong ni Jehova, nga magdasig kanato sa pagsulti niana ngadto sa uban. Ang maong kasibot alang sa buluhatong pagsangyaw magpalalom sa atong pagkamapasalamaton sa kamatuoran.”—Efeso 3:18; Jeremias 20:9.

Si Jacob Emmanuel, nga gihisgotan ganina, nahinumdom usab sa kahinungdanon sa paghimog personal nga pagpili sa pag-alagad kang Jehova. Siya miingon nga wala gayod siya pugsa sa iyang mga ginikanan sa pagpabawtismo. “Nagtuo ako nga mao kini ang kinamaayohang paagi tungod kay nakita ko ang maayong mga resulta. Pananglitan, ang ubang mga batan-on nga kanunay nakong gipakig-ubanan nakahukom nga dungang magpabawtismo. Bisan pag maayo kana, namatikdan ko nga ang uban mihimo niana tungod lang sa emosyon, ug sa wala madugay, nagkahanaw ang ilang kasibot alang sa mga kalihokan sa Gingharian. Sa akong kahimtang, wala ko pit-osa sa akong mga ginikanan sa paghimog desisyon sa pagpahinungod sa akong kaugalingon kang Jehova. Kadto maoy personal nga desisyon.”

 Ang Papel sa Kongregasyon

Ang ubang mga batan-on nakakat-on sa kamatuoran sa Pulong sa Diyos sa ilang kaugalingon, nga wala tabangi sa ilang mga ginikanan. Dili gayod sayon nga mailalom sa maong mga kahimtang sa pagkat-on sa pagbuhat kon unsay maayo ug sa pagpadayon diha niana.

Nahinumdom si Noé kon unsa ka dako ang kaayohan nga nahatag sa kamatuoran kaniya. Dali ra siyang mosinta sa kasuko ug kapintasan sukad sa bata pa siya. Sa dihang misugod siya sa pagtuon sa Bibliya sa edad nga 14, dili na siya daling masuko, nga gikahimuot pag-ayo sa iyang mga ginikanan nga dili interesado sa Bibliya niadtong tungora. Samtang miuswag si Noé sa espirituwal, buot niyang gamiton ang iyang kinabuhi nga mas bug-os pa diha sa pag-alagad sa Diyos. Nag-alagad na siya karon diha sa bug-os-panahong ministeryo.

Sa susama, si Alejandro nagsugod sa pagkainteres sa Kristohanong kamatuoran sa bata pa siya, bisan tuod ug dili interesado niini ang iyang mga ginikanan. Nagpahayag sa iyang pagkamapasalamaton sa kamatuoran, siya miingon: “Gipadako ako diha sa usa ka tradisyonal nga Katolikong panimalay. Apan nagkadako ang akong pagkiling ngadto sa Komunistang ateyismo, tungod kay ang simbahan wala makatubag sa mga pangutana nga nakahasol kanako sukad pa sa pagkabata. Gitabangan ako sa organisasyon ni Jehova nga mabatonan ang kahibalo bahin sa Diyos. Nakaluwas gayod kini sa akong kinabuhi tungod kay kon wala pa ako magtuon sa Bibliya, lagmit nalangkit na ako sa imoralidad, alkoholismo, o droga. Basin nahiapil pa gani ako sa usa ka rebolusyonaryong pundok, uban ang makapaguol nga mga sangpotanan.”

Sa unsang paagi makapadayon ang usa ka batan-on sa iyang pagpangita sa kamatuoran ug paghawid niana bisag wala paluyohi sa iyang mga ginikanan? Dayag nga ang mga ansiyano ug ang uban pa diha sa kongregasyon adunay hinungdanon kaayong bahin. Nahinumdom si Noé: “Wala ko gayod batia nga nag-inusara, tungod kay si Jehova kanunayng duol kanako. Dugang pa, gipaluyohan ako sa daghang mahigugmaong mga igsoong lalaki ug babaye nga nahimong akong espirituwal nga mga amahan, inahan, ug mga igsoon.” Siya nag-alagad na karon sa Bethel ug naggamit sa iyang panahon diha sa pag-alagad sa Diyos. Sa susama, si Alejandro miingon: “Ang usa ka butang nga ako kanunayng magmapasalamaton mao nga ako gipanalanginan nga maanaa sa usa ka kongregasyon diin ang lawas sa mga ansiyano nagpakitag mahigugmaong interes kanako. Mapasalamaton gayod ako niini tungod kay sa dihang misugod ako sa pagtuon sa Bibliya, sa edad nga 16, ang kahigwaos nga maoy kasagaran sa mga batan-on nakaapektar usab kanako. Wala gayod ako pasagdi sa mga pamilya diha sa kongregasyon. Aduna gayoy nag-abiabi kanako ug nagpaambit dili lang sa iyang puloy-anan ug pagkaon kondili sa iyang kasingkasing usab.” Si Alejandro nag-alagad nga bug-os panahon sulod na sa kapin sa 13 ka tuig.

Nagtuo ang ubang mga tawo nga ang relihiyon alang lamang sa mga tigulang. Apan, daghang batan-on ang nakakat-on sa kamatuoran sa Bibliya sa linghod pa nga panuigon ug nakakat-on sa paghigugma kang Jehova ug nagpabiling maunongon kaniya. Niining mga batan-ona, mapadapat ang giingon ni David nga narekord diha sa Salmo 110:3: “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar. Sa kahalangdon sa pagkabalaan, gikan sa tagoangkan sa kaadlawon, ikaw adunay pundok sa mga batan-on nga sama gayod sa mga yamog.”

Usa gayod ka hagit alang sa mga batan-on ang pagkat-on sa kamatuoran ug pagpabilin diha niana. Pagkadakong kalipay ang pagkakita nga daghan ang nagpabiling suod sa organisasyon ni Jehova, regular nga nagatambong sa mga tigom, ug makugihon nga nagatuon sa Bibliya. Sa pagbuhat niana, sila nakahimo sa pag-ugmad ug tiunay nga gugma alang sa Pulong sa Diyos ug sa pag-alagad kaniya!—Salmo 119:15, 16.

[Footnote]