Usa ka Kingdom Hall Gihatagan ug Medalya
Mga Magmamantala sa Gingharian Nagtaho
Usa ka Kingdom Hall Gihatagan ug Medalya
GIPILI sa Ministry of Environment sa Pinlandia ang tuig 2000 ingong “Tuig sa Pagpatahom sa Nataran.” Usa sa mga organisador miingon nga ang “katuyoan nga ang pagpatahom sa nataran maoy gipiling tema sa tuig mao ang pagpahinumdom kanatong tanan sa epekto sa lunhawng palibot diha sa atong adlaw-adlaw nga pagkinabuhi ug sa atong panglawas.”
Sa Enero 12, 2001, usa ka sulat gikan sa Finnish Association of Landscape Industries ang nadawat sa sangang buhatan sa mga Saksi ni Jehova sa Pinlandia. Gipatin-aw sa maong sulat nga ang Kingdom Hall sa mga Saksi ni Jehova sa Tikkurila gihatagan ug usa sa mga medalya sa pagpatahom sa nataran nga tema sa tuig tungod sa talagsaong disenyo sa palibot niini ug sa maayong pagkaareglar nga tanaman niini. Midugang ang maong sulat nga “ang katibuk-ang dagway sa tugkaran, sa ting-init man o sa tingtugnaw, matahom kaayo ug dekalidad.”
Ang medalya gihatag ngadto sa mga Saksi ni Jehova didto sa Rosendahl Hotel sa Tampere, Pinlandia, sa usa ka okasyon nga gitambongan sa 400 ka propesyonal ug mga negosyante. Ang Finnish Association of Landscape Industries nagpagula usab ug artikulo sa mantalaan, nga nag-ingon: “Sa nagkalainlaing bahin sa nasod, halos tanang Kingdom Hall sa mga Saksi ni Jehova maoy maayo kaayong pagkaplano. Ang maayong pagkaareglar nga palibot makapadani gayod sa halos tanang lumalabay. Ang Kingdom Hall sa Tikkurila maoy usa ka pananglitan sa maanindot nga tanaman sa katibuk-an. Ang bilding ug ang dakong nataran nagpasundayag ug kalinaw ug pagkabalanse.”
Sa Pinlandia adunay 233 ka Kingdom Hall, nga daghan niini gilibotan ug maanindot nga mga tanaman. Apan, ang nakapanindot gayod niining mga dapita mao nga kini maoy mga sentro sa matuod nga pagsimba ug sa edukasyon sa Bibliya. Alang sa kapin sa unom ka milyong Saksi ni Jehova sa tibuok kalibotan, ang usa ka Kingdom Hall—maayong pagkasangkap o kasarangan—maoy paborito kaayong dapit. Mao nga sila makugihon ug mahigugmaon nga nag-atiman niini. Ang mga Kingdom Hall maoy bukas alang sa tanan diha sa inyong komunidad!