Mga Pangutana Gikan sa mga Magbabasa

Usa ba ka matang sa panagtapo sa pagtuo kon mopalit ug usa ka bilding nga gipanag-iya sa laing relihiyosong grupo ug himoon kining Kingdom Hall?

Sa katibuk-an, likayan sa mga Saksi ni Jehova ang maong mga pakiglabot sa ubang mga relihiyon. Bisan pa niana, ang maong transaksiyon mahimong wala maglakip sa usa ka buhat sa panagtapo sa pagtuo. Mahimong isipon lamang kini ingong usa-ka-panahon nga transaksiyon sa negosyo. Ang lokal nga kongregasyon sa mga Saksi ni Jehova wala makigsabot sa laing relihiyosong grupo nga magtukod ug usa ka dapit sa pagsimba aron gamiton sa duha ka grupo.

Unsay matawag ug panagtapo sa pagtuo sa panglantaw ni Jehova? Tagda ang pagtultol nga gihatag ni apostol Pablo: “Ayaw pagpayugo nga dili timbang sa mga dili-magtutuo. Kay aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit? Dugang pa, aduna bay panag-uyon tali kang Kristo ug Belial? O aduna bay bahin ang tawong matinuohon uban sa usa ka dili-magtutuo? Ug aduna bay panag-uyon ang templo sa Diyos uban sa mga idolo? . . . ‘Busa gumula kamo gikan sa ilang taliwala, ug ilain ang inyong kaugalingon,’ nagaingon si Jehova, ‘ug hunong na sa paghikap sa mahugaw nga butang’; ‘ug pasudlon ko kamo.’” (2 Corinto 6:14-17) Unsay buot ipasabot ni Pablo sa mga pulong nga “panag-ubanay” ug “pakig-ambitay”?

Ang panag-ubanay nga gihisgotan ni Pablo dayag nga naglangkit sa pagsimba ug sa espirituwal nga mga kalihokan uban sa mga tigsimbag idolo ug mga dili-magtutuo. Iyang gipasidan-an ang mga taga-Corinto batok sa ‘pagpakig-ambit sa . . . lamesa sa mga demonyo.’ (1 Corinto 10:20, 21) Busa, ang panagtapo sa pagtuo mao ang pagpakigbahin diha sa pagsimba o ang pagkaadunay espirituwal nga panag-ubanay sa ubang relihiyosong mga organisasyon. (Exodo 20:5; 23:13; 34:12) Kon mapalit ang usa ka bilding nga gigamit sa usa ka relihiyosong organisasyon, kini gihimo aron lang mabatonan ang usa ka bilding nga gikinahanglan alang sa usa ka Kingdom Hall. Sa dili pa kini gamiton ingong Kingdom Hall, kini pagahinloan una sa bisan unsa nga nalangkit sa bakak nga pagsimba. Kay gibag-o na, ipahinungod kini kang Jehova aron gamiton lamang sa pagsimba kaniya. Walay panag-ambitay o panag-ubanay tali sa matuod ug bakak nga pagsimba.

Sa dihang hisgotan ang mga detalye bahin sa maong pagpalit, ang pagpakigkontak sa laing grupo kinahanglang limitehan ug kinahanglang hisgotan lamang gayod ang maylabot sa kasabotan sa pagpalit. Angayng hinumdoman sa mga membro sa Kristohanong kongregasyon ang pasidaan ni Pablo nga dili ‘magpayugo nga dili timbang sa mga dili-magtutuo.’ Bisan tuod ug wala nato batiang labaw kita niadtong laig tinuohan, maglikay kita sa pagpakig-uban kanila o mahimong maimpluwensiyahan sa pagduyog sa ilang pagsimba. a

Unsay Kasulatanhong panglantaw bahin sa usa ka kongregasyon nga nag-abang ug usa ka bilding nga gipanag-iya sa usa ka relihiyosong organisasyon? Ang pag-abang kasagarang mopahinabog regular nga pakigkontak uban sa maong relihiyosong grupo, nga maoy kinahanglang likayan. Bisag abangan ang maong bilding sa usa lang ka higayon, kinahanglang tagdon sa lawas sa mga ansiyano ang mosunod: Aduna bay mga imahen ug relihiyosong mga simbolo sa sulod o sa gawas sa bilding? Sa unsang paagi lantawon sa mga tawo diha sa komunidad ang atong paggamit sa maong pasilidad? Aduna ba kahay mapandol diha sa kongregasyon tungod sa atong paggamit sa maong bilding? (Mateo 18:6; 1 Corinto 8:7-13) Timbangtimbangon sa mga ansiyano kining mga butanga ug dayon mohukom pinasukad niana. Ang kaugalingon nilang tanlag ug nianang sa kongregasyon sa katibuk-an kinahanglang tagdon usab aron matino kon angay bang paliton ug himoong Kingdom Hall ang maong bilding.

[Footnote]

[Hulagway sa panid 27]

Kini nga bilding, nga usa ka sinagoga kaniadto, gipalit ug giusab aron mahimong Kingdom Hall