Si Jehova May Kahingawa Kaninyo
Si Jehova May Kahingawa Kaninyo
“Itugyan [sa Diyos] ang tanan ninyong mga kabalaka, kay siya may kahingawa kaninyo.”—1 PEDRO 5:7.
1. Sa unsang hinungdanong bahin nga si Jehova ug si Satanas magkalahi gayod?
SI Jehova ug si Satanas magkalahi gayod. Si bisan kinsa nga madani kang Jehova mag-ayad gayod sa Yawa. Kining maong kalainan gihisgotan diha sa usa ka iladong reperensiya. Maylabot sa mga kalihokan ni Satanas sumala sa gilaraw diha sa basahon sa Bibliya sa Job, ang Encyclopædia Britannica (1970) nag-ingon: ‘Ang tahas ni Satanas mao ang pagsuroysuroy sa yuta sa pagpangitag mga buhat o mga tawo nga akusahan ug pagkadaotan; ang iyang obra sa ingon mao ang kaatbang nianang sa “mga mata sa Ginoo,” nga nagalibotlibot sa tibuok yuta nga nagpalig-on sa tanan nga maayo (II Cron. xvi, 9). Si Satanas mayubitong nagduhaduha sa dili-hinakog nga tawhanong pagkamaayo ug gitugotan sa pagsulay niana ilalom sa pagbulot-an ug pagkontrolar sa Diyos ug sulod sa mga limitasyon nga gipahimutang sa Diyos.’ Oo, pagkadakong kalainan!—Job 1:6-12; 2:1-7.
2, 3. (a) Sa unsang paagi ang kahulogan sa pulong “Yawa” haom nga giilustrar sa nahitabo kang Job? (b) Sa unsang paagi gipakita sa Bibliya nga si Satanas nagpadayon sa pag-akusar sa mga alagad ni Jehova dinhi sa yuta?
2 Ang pulong “Yawa” naggikan sa Gregong pulong nga nagkahulogang “bakak nga tig-akusar,” “tigpasipala.” Ang basahon sa Job nagpadayag nga giakusar ni Satanas ang matinumanong alagad ni Jehova nga si Job nga nag-alagad Kaniya tungod sa kaugalingong kaayohan, nga nag-ingon: “Mahadlok ba sa Diyos si Job sa wala lamay kapuslanan?” (Job 1:9) Ang asoy sa basahon sa Job nagpakita nga bisan pa sa iyang mga pagsulay, si Job labi pang nasuod kang Jehova. (Job 10:9, 12; 12:9, 10; 19:25; 27:5; 28:28) Human sa iyang pagsulay, siya miingon sa Diyos: “Sa hulungihong nakadungog ako bahin kanimo, apan karon ang akong mata nakakita kanimo.”—Job 42:5.
3 Mihunong ba si Satanas sa pag-akusar sa matinumanong mga alagad sa Diyos sukad sa panahon ni Job? Wala. Ang basahon sa Pinadayag nagpakita nga niining panahon sa kataposan, si Satanas nagpadayon sa pag-akusar sa dinihogang mga igsoon ni Kristo ug seguradong nag-akusar usab sa ilang matinumanong mga kauban. (2 Timoteo 3:12; Pinadayag 12:10, 17) Busa, ingong matuod nga mga Kristohanon, kitang tanan kinahanglang magpasakop sa atong mahingawaong Diyos, si Jehova, nga mag-alagad kaniya tungod sa halalom nga gugma ug sa ingon mapamatud-ang bakak ang akusasyon ni Satanas. Kon buhaton nato kana, kita makalipay sa kasingkasing ni Jehova.—Proverbio 27:11.
Si Jehova Nangitag mga Paagi sa Pagtabang Kanato
4, 5. (a) Kasukwahi kang Satanas, unsay ginapangita ni Jehova dinhi sa yuta? (b) Aron maangkon nato ang pag-uyon ni Jehova, unsay kinahanglan natong buhaton?
4 Ang Yawa nagsuroysuroy sa yuta, nga nangitag maakusar ug matukob. (Job 1:7, 9; 1 Pedro 5:8) Sa kaatbang, si Jehova nangitag mga paagi sa pagtabang niadtong nanginahanglan sa iyang kusog. Si manalagnang Hanani miingon kang Haring Asa: “Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cronicas 16:9) Pagkadako sa kalainan tali sa madumtanong pag-aninaw ni Satanas ug sa mahigugmaong kahingawa ni Jehova!
5 Si Jehova wala mangespiya kanato aron mahibaloan ang tanan natong kasaypanan. Ang salmista misulat: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Salmo 130:3) Ang gipakitang tubag mao: walay makabarog. (Ecclesiastes 7:20) Kon moduol kita kang Jehova uban ang bug-os nga kasingkasing, ang iyang mga mata magatan-aw kanato, dili aron sa paghukom kanato, kondili aron panid-an ang atong mga paningkamot ug tubagon ang atong mga pag-ampo alang sa tabang ug kapasayloan. Si apostol Pedro misulat: “Ang mga mata ni Jehova anaa sa mga matarong, ug ang iyang mga igdulungog gikiling sa ilang pangamuyo; apan ang nawong ni Jehova maoy batok sa nagabuhat ug daotang mga butang.”—1 Pedro 3:12.
6. Sa unsang paagi ang kaso ni David maoy paghupay ug pasidaan alang kanato?
6 Si David dili-hingpit ug nakahimog grabeng sala. (2 Samuel 12:7-9) Apan iyang gibubo ang iyang kasingkasing ngadto kang Jehova ug miduol kaniya diha sa kinasingkasing nga pag-ampo. (Salmo 51:1-12, superskripsiyon) Si Jehova nagpatalinghog sa iyang pag-ampo ug nagpasaylo kaniya, bisan tuod naagoman ni David ang dili-maayong mga sangpotanan sa iyang sala. (2 Samuel 12:10-14) Kini angayng maghupay ug magsilbing pasidaan alang kanato. Makapahupay ang pagkahibalo nga si Jehova andam nga mopasaylo sa atong mga sala kon kita tinuod nga mahinulsolon, apan makapahinuklog ang pagkaamgo nga ang mga sala kasagarang magpatunghag grabeng mga sangpotanan. (Galacia 6:7-9) Kon buot natong moduol kang Jehova, kita angayng magpalayo kutob sa mahimo gikan sa bisan unsa nga dili makapahimuot kaniya.—Salmo 97:10.
Si Jehova Nagdani sa mga Tawo Ngadto Kaniya
7. Unsang matanga sa mga tawo ang ginabantayan ni Jehova, ug sa unsang paagi siya nagdani kanila ngadto kaniya?
7 Si David misulat diha sa usa sa iyang mga salmo: “Si Jehova hataas, apan siya makakita sa mapainubsanon; apan ang mapahitas-on iyang mailhan lamang sa halayo.” (Salmo 138:6) Sa susama, ang laing salmo nag-ingon: “Kinsa ang sama kang Jehova nga atong Diyos, siya nga nagapuyo sa kahitas-an? Siya nagapaubos aron sa pagtan-aw sa langit ug sa yuta, nga nagabangon sa timawa gikan sa abog.” (Salmo 113:5-7) Oo, ang labing gamhanang Maglalalang sa uniberso nagapaubos aron sa pagtan-aw sa yuta, ug ang iyang mga mata nakakita “sa mapaubsanon,” “sa timawa,” nga mga tawo nga “nagapanghupaw ug nagaagulo tungod sa tanang dulumtanang mga butang nga ginahimo.” (Ezequiel 9:4) Gidani niya ang maong mga tawo ngadto kaniya pinaagi sa iyang Anak. Samtang dinhi sa yuta, si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya . . . Walay usa nga makaari kanako gawas kon kini itugot kaniya sa akong Amahan.”—Juan 6:44, 65.
8, 9. (a) Nganong kitang tanan angayng moduol kang Jesus? (b) Unsay nakapatalagsaon pag-ayo sa kahikayan sa lukat?
8 Ang tanang tawo angayng moduol kang Jesus ug motuo sa halad lukat tungod kay sila natawo nga mga makasasala, nahimulag sa Diyos. (Juan 3:36) Sila kinahanglang ipasig-uli ngadto sa Diyos. (2 Corinto 5:20) Wala hulata sa Diyos ang mga makasasala nga mohangyo kaniya sa paghimo ug usa ka kahikayan diin sila mahimong makakaplag ug pakigdait uban kaniya. Si apostol Pablo misulat: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato. Kay kon, sa dihang kita mga kaaway pa, kita gipasig-uli ngadto sa Diyos pinaagi sa kamatayon sa iyang Anak, karon nga kita napasig-uli na, labi pa nga kita pagaluwason pinaagi sa iyang kinabuhi.”—Roma 5:8, 10.
9 Gipamatud-an ni apostol Juan ang labing bililhong kamatuoran nga ang Diyos nagpasig-uli sa mga tawo ngadto kaniya, nga nagsulat: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.” (1 Juan 4:9, 10) Ang Diyos maoy mihimo sa unang lakang, dili ang tawo. Wala ka ba madani sa usa ka Diyos nga nagpakitag dako kaayong gugma dili lamang sa “mga makasasala,” kondili sa “mga kaaway” pa?—Juan 3:16.
Panginahanglan nga Mangita Kang Jehova
10, 11. (a) Unsay angay natong buhaton sa pagpangita kang Jehova? (b) Sa unsang paagi lantawon nato ang sistema sa mga butang ni Satanas?
10 Siyempre, si Jehova dili mamugos kanato sa pagduol kaniya. Kita kinahanglang mangita kaniya, ‘mangapkap kaniya ug makakaplag gayod kaniya, bisan ug, sa pagkatinuod, siya dili halayo gikan sa matag usa kanato.’ (Buhat 17:27) Kita kinahanglang moila sa katungod ni Jehova sa pagpangayo sa atong pagpasakop. Ang disipulong si Santiago misulat: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo. Duol sa Diyos, ug siya moduol kaninyo. Hinloi ang inyong mga kamot, kamong mga makasasala, ug lunsaya ang inyong mga kasingkasing, kamong mga maduhaduhaon.” (Santiago 4:7, 8) Dili kita angayng magpanuko sa pagbarog nga malig-on batok sa Yawa ug dapig kang Jehova.
11 Kini nagkahulogan nga magpalayo kita gikan sa daotang sistema sa mga butang ni Satanas. Si Santiago misulat usab: “Wala ba kamo mahibalo nga ang pagpakighigala sa kalibotan maoy pagpakig-away sa Diyos? Busa, bisan kinsa nga buot makighigala sa kalibotan maghimo sa iyang kaugalingon nga kaaway sa Diyos.” (Santiago 4:4) Sa kaatbang, kon buot natong mahimong mga higala ni Jehova, kinahanglang dahomon nato nga dumtan kita sa kalibotan ni Satanas.—Juan 15:19; 1 Juan 3:13.
12. (a) Unsang makapahupayng mga pulong ang gisulat ni David? (b) Unsang pasidaan ang gihatag ni Jehova pinaagi kang manalagnang Azarias?
12 Sa dihang ang kalibotan ni Satanas mosupak kanato sa usa ka paagi, kita ilabinang nagkinahanglan nga moduol kang Jehova diha sa pag-ampo, nga mangayo sa iyang tabang. Si David, kinsa giluwas ni Jehova sa makadaghan, misulat aron sa paghupay kanato: “Si Jehova haduol kanilang tanan nga nagatawag kaniya, kanilang tanan nga nagatawag kaniya sa kamatinud-anon. Pagatumanon niya ang tinguha niadtong nahadlok kaniya, ug ang ilang pagtuaw alang sa tabang iyang pagadunggon, ug siya magaluwas kanila. Si Jehova nagabantay sa tanang nahigugma kaniya, apan iyang pagalaglagon ang tanang daotan.” (Salmo 145:18-20) Kining maong salmo nagpakita nga si Jehova makaluwas kanato sa dihang ang matag usa kanato sulayan ug nga iyang luwason ang iyang katawhan ingong pundok sa panahon sa “dakong kasakitan.” (Pinadayag 7:14) Si Jehova magpabiling suod kanato kon kita magpabiling suod kaniya. Gigiyahan sa “espiritu sa Diyos,” gisulti ni manalagnang Azarias kon unsay mahimo natong isipon ingong kamatuoran nga daghag kapadapatan: “Si Jehova magauban kaninyo basta kamo magauban kaniya; ug kon kamo mangita kaniya, itugot niya nga siya hikaplagan ninyo, apan kon inyo siyang biyaan siya mobiya kaninyo.”—2 Cronicas 15:1, 2.
Si Jehova Kinahanglang Tinuod Alang Kanato
13. Sa unsang paagi ikapakita nato nga si Jehova tinuod alang kanato?
13 Si apostol Pablo misulat bahin kang Moises nga “siya nagpabiling lig-on nga daw nakakita sa Usa nga dili-makita.” (Hebreohanon 11:27) Siyempre, si Moises dili gayod aktuwal nga nakakita kang Jehova. (Exodo 33:20) Apan si Jehova tinuod kaayo alang kaniya nga morag iyang nakita Siya. Sa susama, human sa iyang mga pagsulay, ang mga mata sa pagtuo ni Job mas klarong nakakita kang Jehova, ingong usa ka Diyos nga nagtugot sa iyang matinumanong mga alagad sa pag-antos sa mga pagsulay apan kinsa dili gayod mobiya kanila. (Job 42:5) Giingon bahin kang Enoc ug Noe nga sila ‘nagalakaw uban sa Diyos.’ Gibuhat nila kini pinaagi sa pagpaningkamot sa pagpahimuot sa Diyos ug pagsugot kaniya. (Genesis 5:22-24; 6:9, 22; Hebreohanon 11:5, 7) Kon si Jehova sama ka tinuod kanato maingon nga siya tinuod kang Enoc, Noe, Job, ug Moises, ‘tagdon nato siya’ sa tanan natong mga dalan, ug siya “magatul-id sa [atong] mga alagianan.”—Proverbio 3:5, 6.
14. Unsay kahulogan sa ‘pag-unong’ kang Jehova?
14 Sa wala pa mosulod ang mga Israelinhon sa Yutang Saad, gitambagan sila ni Moises: “Magalakaw kamo sunod kang Jehova nga inyong Diyos, ug kaniya mangahadlok kamo, ug tumana ninyo ang iyang kasugoan, ug pamati kamo sa iyang tingog, ug kaniya magaalagad kamo, ug kaniya mounong kamo.” (Deuteronomio 13:4) Sila kinahanglang mosunod kang Jehova, mahadlok kaniya, mosugot kaniya, ug mounong kaniya. Maylabot sa pulong nga gihubad dinhi ingong “mounong,” usa ka eskolar sa Bibliya nag-ingon nga “ang maong pulong nagpakita ug suod kaayo nga relasyon.” Ang salmista miingon: “Ang pagkasuod kang Jehova ila sa mga nahadlok kaniya.” (Salmo 25:14) Kining bililhon, suod nga relasyon uban kang Jehova matagamtam nato kon siya tinuod alang kanato ug kon kita nahigugma pag-ayo kaniya nga mahadlok kitang pasuk-on siya sa bisan unsang paagi.—Salmo 19:9-14.
Naamgohan ba Nimo ang Kahingawa ni Jehova?
15, 16. (a) Sa unsang paagi ang Salmo 34 nagpakita nga si Jehova may kahingawa kanato? (b) Unsay angay natong buhaton kon naglisod kita sa paghinumdom sa maayong mga buhat ni Jehova alang kanato?
15 Usa sa malipatlipatong mga buhat ni Satanas mao ang pagpahinabo kanato nga malimot sa kamatuoran nga ang atong Diyos, si Jehova, kanunayng nag-atiman sa iyang matinumanong mga alagad. Si Haring David sa Israel nahibalo gayod sa mapanalipdanong kamot ni Jehova bisan sa dihang nag-atubang siya sa labing peligrosong yugto. Sa dihang napugos siya sa pagpabuangbuang atubangan kang Haring Akis sa Gat, siya nagkomposo ug usa ka awit, usa ka matahom kaayo nga salmo, nga naglakip niining maong mga pahayag sa pagtuo: “Oh padakoa ninyo si Jehova uban kanako, ug usahan ta ang pagbayaw sa iyang ngalan. Nagpakisayod ako kang Jehova, ug gitubag niya ako, ug giluwas niya ako gikan sa tanan kong gikalisangan. Ang manulonda ni Jehova nagkampo libot niadtong nangahadlok kaniya, ug siya nagluwas kanila. Oh tilawi ug tan-awa ninyo nga si Jehova maayo; malipayon ang tawo nga lig-on ug lawas nga modangop kaniya. Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu. Daghan ang mga katalagman sa matarong, apan si Jehova magaluwas kaniya gikan niining tanan.”—Salmo 34:3, 4, 7, 8, 18, 19; 1 Samuel 21:10-15.
16 Kombinsido ka ba sa gahom sa pagluwas ni Jehova? Nakaamgo ka ba sa iyang panalipod pinaagi sa iyang manulonda? Natilawan ug nakita mo ba mismo nga si Jehova maayo? Kanus-a ang kataposang higayon nga ikaw ilabinang nakaamgo nga si Jehova maayo kanimo? Sulayi sa paghinumdom. Didto ba sa kataposang balay nga imong giduaw diha sa imong pagministeryo, sa dihang gibati nimo nga wala ka nay mahimo? Tingali makapadasig ang imong kabildohay niadto uban sa tagbalay. Nahinumdom ka ba sa pagpasalamat kang Jehova tungod sa paghatag kanimo sa dugang kusog nga imong gikinahanglan ug sa pagpanalangin kanimo? (2 Corinto 4:7) Sa laing bahin, basin nalisdan ka sa paghinumdom sa usa ka espesipikong maayong buhat nga gihimo ni Jehova alang kanimo. Tingali kinahanglan nimong mohunahunag balik usa ka semana, usa ka bulan, usa ka tuig, o kapin pa. Kon mao kini ang kahimtang, nganong dili maningkamot pag-ayo nga makigsuod pa kang Jehova ug sulayan sa pagsusi kon sa unsang paagi siya nagagiya ug nagatultol kanimo? Si apostol Pedro mitambag sa mga Kristohanon: “Ipaubos ang inyong kaugalingon ilalom sa gamhanang kamot sa Diyos . . . samtang inyong itugyan kaniya ang tanan ninyong mga kabalaka, kay siya may kahingawa kaninyo.” (1 Pedro 5:6, 7) Sa pagkatinuod, matingala ka kon unsa ka dako ang iyang kahingawa kanimo!—Salmo 73:28.
Padayon sa Pagpangita Kang Jehova
17. Unsay gikinahanglan aron padayon natong pangitaon si Jehova?
17 Ang paghupot sa atong relasyon uban kang Jehova kinahanglang magpadayon. Si Jesus miingon diha sa pag-ampo ngadto sa iyang Amahan: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ang pagkuha ug kahibalo bahin kang Jehova ug sa iyang Anak nagkinahanglag kanunayng paningkamot sa atong bahin. Kita nagkinahanglan sa tabang sa pag-ampo ug sa balaang espiritu aron sa pagsabot sa “lawom nga mga butang sa Diyos.” (1 Corinto 2:10; Lucas 11:13) Kita nagkinahanglan usab sa giya sa “matinumanon ug maalamong ulipon” aron pakan-on ang atong hunahuna ug espirituwal nga pagkaon nga gihatag “sa hustong panahon.” (Mateo 24:45) Pinaagi nianang maong galamiton, gitambagan kita ni Jehova sa pagbasa sa iyang Pulong sa adlaw-adlaw, pagtambong nga regular sa mga tigom, ug pagpakig-ambit nga kinasingkasing sa pagsangyaw sa “maayong balita sa gingharian.” (Mateo 24:14) Pinaagi sa pagbuhat niana, kita makapadayon sa pagpangita sa atong mahingawaong Diyos, si Jehova.
18, 19. (a) Unsay determinado natong buhaton? (b) Kon mobarog kitang malig-on batok sa Yawa ug magpadayon sa pagpangita kang Jehova, sa unsang paagi kita mapanalanginan?
18 Gihimo ni Satanas ang tanan niyang maarangan sa pagpahamtang ug paglutos, pagsupak, ug pagpit-os sa katawhan ni Jehova gikan sa tanang bahin. Naningkamot siya sa pagbungkag sa atong pakigdait ug pagdaot sa atong maayong baroganan uban sa atong Diyos. Dili niya buot nga kita magpadayon sa atong buluhaton sa pagpangitag mga tawong matinud-anog-kasingkasing ug tabangan sila sa pagdapig kang Jehova maylabot sa isyu sa unibersohanong pagkasoberano. Apan kinahanglang magmadeterminado kita sa pagpabiling maunongon kang Jehova, nga magasalig kaniya sa pagluwas kanato gikan sa usa nga daotan. Pinaagi sa pagtugot sa Pulong sa Diyos nga mogiya kanato ug pinaagi sa pagpabiling aktibo uban sa iyang makitang organisasyon, makaseguro kita nga siya anaa kanunay aron sa pagtabang kanato.—Isaias 41:8-13.
19 Busa, hinaot kitang tanan mobarog nga malig-on batok sa Yawa ug sa iyang malipatlipatong mga buhat, nga kanunayng mangita sa atong minahal nga Diyos, si Jehova, kinsa dili mapakyas sa ‘pagpalig-on kanato, paghimo kanatong kusgan.’ (1 Pedro 5:8-11) Sa ingon, kita ‘makapabilin diha sa gugma sa Diyos, samtang nagapaabot kita sa kaluoy sa atong Ginoong Jesu-Kristo nga nagapanglantaw sa kinabuhing walay kataposan.’—Judas 21.
Unsaon Nimo Pagtubag?
• Unsay kahulogan sa pulong “Yawa,” ug sa unsang paagi ang Yawa nagpahiuyon sa maong ngalan?
• Sa unsang paagi lahi si Jehova sa Yawa sa paagi nga Siya naniid sa mga molupyo sa yuta?
• Nganong ang usa ka tawo kinahanglang modawat sa lukat diha sa pagduol kang Jehova?
• Unsay kahulogan sa ‘pag-unong’ kang Jehova, ug sa unsang paagi kita makapadayon sa pagpangita kaniya?
[Mga Pangutana sa Pagtuon]
[Hulagway sa panid 15]
Bisan pa sa iyang mga pagsulay, nasabtan ni Job nga si Jehova may kahingawa kaniya
[Mga hulagway sa panid 16, 17]
Ang adlaw-adlaw nga pagbasa sa Bibliya, regular nga pagtambong sa Kristohanong mga tigom, ug masibotong pagpakigbahin sa buluhatong pagsangyaw magpahinumdom kanato nga si Jehova may kahingawa kanato