Usa ka Panahon sa Pagmaya Diha sa mga Nasod sa Balkan

Kadto maoy tuig 1922. Usa ka tigom sa Sinserong mga Estudyante sa Bibliya, ingon sa pagtawag kaniadto sa mga Saksi ni Jehova, ang gihimo sa Innsbruck, Austria. Usa sa mitambong mao si Franz Brand, usa ka batan-on nga taga-Apatin sa Vojvodina, Serbia. Sa dihang gilitok sa mamumulong ang ngalan sa Diyos, nga Jehova, usa ka magubtanong panon ang misugod sa pagyagayaga, busa wala na siya makapadayon sa pagsulti, ug naundang ang tigom. Bisan pa niana, ang nadunggan ni Franz nakapatandog pag-ayo kaniya, ug misugod siya sa pagsangyaw sa maayong balita sa Gingharian. Kini mao ang gamayng sinugdanan sa makapahinam nga espirituwal nga pag-uswag diha sa usa sa mga nasod sa Balkan.

ALANG sa kadaghanang tawo karong adlawa, ang ngalang Yugoslavia makapahunahuna kanila sa gubat ug pagpatay. Makapaguol nga mga hulagway sa grabeng pagpamatay, sa nawad-ag paglaom nga mga kagiw, sa nangaguba nga mga balay, ug sa magul-anong mga ilo. Dili ikahubit sa mga pulong ang hilabihang kasakit ug kagul-anan nga gipahinabo sa gubat nga nakapaut-ot sa Balkan Peninsula gikan sa 1991 hangtod sa 1995, nga nakapahugno sa tanang paglaom alang sa mauswagon ug haruhay nga kaugmaon pinaagi sa tawhanong mga paningkamot. Tungod sa maong gubat, ang mga tawo sa kanhing Yugoslavia nag-antos sa kalisod sa ekonomiya ug sa tumang kakabos. a

Tungod nianang maong pag-antos, wala gayoy magdahom nga may makaplagang malipayong mga tawo nga nagpuyo niining dapita sa kalibotan. Apan, bisag katingad-an tuod kana, naglungtad gayod ang maong mga tawo. Gani, ilang naeksperyensiyahan ang usa ka linaing malipayong adlaw sa naghinapos ang ika-20ng siglo. Sa unsang paagi nalangkit niining tanan si Franz Brand, ang batan-ong lalaki nga gihisgotan sa sinugdanan?

Espirituwal nga Pag-uswag Diha sa mga Nasod sa Balkan

Si Franz Brand naikag sa bag-ong mga kamatuoran nga iyang nadunggan ug nakahukom nga kinahanglan niyang ipakaylap ang maayong balita. Nakakita siyag trabaho ingong barbero didto sa Maribor, usa ka siyudad sa Slovenia duol sa utlanan sa Austria, ug misugod siya sa pagsangyaw ngadto sa iyang mga suki, nga kasagarang molingkod ug maminaw pag-ayo samtang sila gibalbasan. Tungod sa iyang mga paningkamot, natukod ang usa ka gamayng grupo sa mga magmamantala sa  Gingharian sa Maribor sa ulahing bahin sa katuigan sa 1920. Ang mga pakigpulong sa Bibliya gipahigayon diha sa usa ka restawran, nga sa ulahi haom nga ginganlang Novi svet (New World) Seafood Restaurant.

Sa ngadtongadto, ang maayong balita mikaylap na sa tibuok nasod. Ang paggamit sa “Photo-Drama of Creation” (usa ka walo-ka-oras nga pasundayag nga adunay mga pelikula, mga eslayd, ug mga rekording) dakog natabang niini nga pag-uswag. Dayon sa katuigan sa 1930 sa dihang ang mga Saksi ni Jehova nailalom sa grabeng paglutos sa Alemanya, ang mga Saksi sa Kingdom of Yugoslavia napalig-on uban sa mga payunir nga Aleman kinsa mikalagiw gikan sa ilang yutang natawhan. Nga nagsakripisyo sa personal nga kaharuhay o kasayon, naningkamot sila sa pag-adto sa kinahilitang mga dapit niining bukiron nga nasod aron sa pagwali. Sa sinugdan, morag diyutay lang ang misanong sa ilang mensahe. Sa unang bahin sa katuigan sa 1940, 150 lang ka magmamantala ang nagtaho ug pag-alagad sa kanataran.

Sa 1941, mitungha ang grabeng paglutos, nga nagpadayon hangtod sa 1952. Pagkadakong kalipay nga sa kataposan niadtong Septiyembre 9, 1953, ilalom sa Komunistang pagmando ni Heneral Tito, ang mga Saksi ni Jehova legal nga narehistro! Nianang tuiga, dihay 914 ka magmamantala sa maayong balita, ug padayong nagtubo ang maong gidaghanon. Pagka-1991, miuswag ang gidaghanon sa mga magmamantala ngadto sa 7,420, ug 16,072 ang mitambong sa Memoryal nianang tuiga.

Gikan sa Agosto 16 hangtod sa 18, 1991, ang unang internasyonal nga kombensiyon sa mga Saksi ni Jehova niining nasora gihimo sa Zagreb, Croatia. Dihay nanambong nga 14,684 gikan sa sulod ug sa gawas sa nasod. Kining maong di-malimtang kombensiyon nag-andam sa katawhan ni Jehova alang sa umaabot nga mga pagsulay. Lakip sa kataposang mga sakyanan nga miagi sa checkpoint tali sa Croatia ug Serbia mao ang mga bus nga gisakyan sa namauli nga mga delegadong taga-Serbia. Human makaagi ang kataposang bus, gisirhan ang utlanan ug nagsugod ang gubat.

Ang Katawhan ni Jehova Adunay mga Katarongan sa Pagmaya

Ang katuigan sa gubat nahimong usa ka panahon sa grabeng pagsulay alang sa mga Saksi ni Jehova diha sa mga nasod sa Balkan. Bisan pa niana, sila adunay katarongan sa pagmaya tungod kay gipanalanginan ni Jehova ang iyang katawhan didto uban sa talagsaong pag-uswag. Sukad sa 1991, ang gidaghanon sa mga magmamantala sa Gingharian sa dapit sa kanhing Yugoslavia miuswag ug kapin sa 80 porsiyento. Sa 2001 nga tuig sa pag-alagad nakab-ot ang kinatas-ang gidaghanon nga 13,472.

Ang mga buhatan sa Zagreb ug Belgrade (Serbia) maoy miatiman kaniadto sa buluhaton sa mga Saksi ni Jehova diha sa tanang dapit sa kanhing Yugoslavia. Tungod sa pag-uswag ug sa kausaban sa politika, gikinahanglan ang pagtukod ug bag-ong mga buhatan diha sa Ljubljana (Slovenia), ug Skopje (Macedonia), dugang pa sa pagpalit ug bag-ong mga buhatan didto sa Belgrade ug Zagreb. Duolan sa 140 ka membro ang nag-alagad dinhi niining mga buhatan. Kadaghanan kanila maoy mga batan-on ug puno sa kasibot ug gugma alang kang Jehova. Ubay-ubay kanila ang nalangkit sa paghubad sa mga tabang sa pagtuon sa Bibliya ngadto sa pinulongang Kroasiano, Macedonian, Serbiano, ug Eslobenyano. Pagkadakong kalipay nga kadaghanan sa mga magasin ug literatura sa mga Saksi ni Jehova niining mga pinulongana dungang gipatik uban sa orihinal nga edisyon sa Iningles! Kining mga basahona nagtabang sa daghang tawo nga makakaplag ug kahupayan ug paglaom.

 Ang lain pang katarongan sa pagmaya mao ang di-mahakogong tabang nga gihatag sa daghang bug-os-panahong mga alagad gikan sa ubang mga nasod. Ubay-ubayng maanindot nga mga Kingdom Hall ang gitukod sa di pa dugayng katuigan, nga nakadugang sa kalipay sa mga kongregasyon. Bisan pa niana, aduna pay dugang kalipay nga nagpaabot sa unahan. Sa unsang paagi nahitabo kana?

Usa ka Talagsaong Proyekto

Daghang magmamantala ang kasagarang maghunahuna, ‘Makabaton ba gayod kitag Bag-ong Kalibotang Hubad sa atong pinulongan?’ Matag tuig, maikagon nilang gipaabot ang pagkadungog ug pahibalo bahin niana diha sa distritong kombensiyon. Bisan pa niana, sa unsang paagi himoon ang maong dako kaayong proyekto, sanglit ang mga tem sa mga maghuhubad niining mga pinulongana natukod pipila ka tuig ang miagi ug diyutay lang ang mga maghuhubad?

Human masusi ang mga butang, giuyonan sa Nagamandong Lawas ang dungang proyekto diin ang Croatian, Macedonian, ug ang Serbian nga mga tem sa maghuhubad suod nga magtambayayongay ug busa makabenepisyo gikan sa trabaho ug mga sugyot sa usag usa. Ang tem sa Croatia mao ang manguna.

Usa ka Adlaw sa Pagmaya

Ang mga Saksi ni Jehova diha sa mga nasod sa Balkan dili gayod malimot sa Hulyo 23, 1999. Ang serye sa “Matagnaong Pulong sa Diyos” Distritong mga Kombensiyon dungan nga pagahimoon sa Belgrade, Sarajevo (Bosnia-Herzegovina), Skopje, ug Zagreb. Sulod sa pipila ka panahon wala pa matino kon may kombensiyon ba nga mapahigayon sa Belgrade sanglit panahon sa pagpamomba sa NATO, walay publikong mga tigom ang gitugotang himoon. Pagkadako sa kalipay sa mga igsoon sa kalaoman nga makapakig-uban sila sa usag usa human sa mga bulan nga walay katinoan! Apan, ang tinuod nga nahitabo milabaw pa sa ilang mga gidahom.

Sa Biyernes sa hapon usa ka espesyal nga pahibalo ang gihimo diha sa upat ka siyudad sa kombensiyon. Ang 13,497 ka delegado naghinamhinam kon unsay ipahibalo. Sa dihang sa kataposan giluwatan sa mamumulong ang Bag-ong Kalibotang Hubad sa Kristohanon Gregong Kasulatan diha sa pinulongang Kroasiano ug Serbiano ug giingnan niya ang mga mamiminaw nga maayo ang pag-uswag sa paghubad diha sa Macedonian nga pinulongan, wala na makapugong ang mga delegado sa ilang gibati. Wala na mahuman sa mamumulong ang pahibalo tungod sa lanog nga pagpamakpak. Sa kombensiyon didto sa Sarajevo, ang mamiminaw kalit lang nahilom, nga bug-os nga nasorpresa. Gisundan kadto sa dugay nga pagpamakpak. Mga luha sa kalipay ang midagayday sa mga aping didto sa Belgrade, ug ang mamumulong nabalda tungod sa sublisubling pagpamakpak sa wala pa niya mahuman ug basa ang pahibalo. Pagkamalipayon gayod sa tanan!

Kini nga gasa mas pa gayong gipabilhan tungod sa kamatuoran nga nabatonan sa mga Saksi ni Jehova ang mga katungod sa pagpatik alang sa hubad sa Bibliya sa pinulongang Kroasiano maingon man sa Serbiano. Busa, ang Bag-ong Kalibotang Hubad sa Kristohanon Gregong Kasulatan niining duha ka pinulongan gitapo ingong usa ka tomo uban sa hubad sa Hebreohanong Kasulatan sa mao gihapong pinulongan. Dugang pa, ang Serbiano nga Bibliya gipatik diha sa Roman ug Cyrillic nga tipo sa mga letra.

Kay mapasalamaton sa mga panalangin ug giya nga nadawat, ang katawhan ni Jehova diha sa kanhing mga nasod sa Balkan mouyon gayod sa mga pulong ni David: “Bisan kon magalakaw ako sa walog sa mabagang kangiob, ako walay kahadlokan nga daotan, kay ikaw [Jehova] magauban kanako.” Bisan pa sa tanang kalisdanan nga padayon nilang ginaatubang, determinado sila sa paghimo sa ‘kalipay ni Jehova nga maoy ilang salipdanan.’—Salmo 23:4; Nehemias 8:10.

[Foootnote]

[Hulagway sa panid 20]

Ang unang grupo sa mga magmamantala nga gikan sa Maribor, Slovenia, nga nagsangyaw diha sa layong teritoryo