“Hupti Ninyo ang Maayong Panggawi Taliwala sa Kanasoran”
“Hupti Ninyo ang Maayong Panggawi Taliwala sa Kanasoran”
“Pasidunggi ang tanang matang sa mga tawo, pagbaton ug gugma alang sa tibuok kapunongan sa mga igsoon.”—1 Pedro 2:17.
1, 2. (a) Unsay gikomento sa usa ka koresponsal sa mantalaan bahin sa mga Saksi ni Jehova? (b) Nganong ang mga Saksi ni Jehova nanglimbasog sa paghupot ug taas nga mga sukdanan sa panggawi?
UBAY-UBAYNG katuigan kanhi, usa ka koresponsal sa mantalaan sa Amarillo, Texas, T.B.A., miduaw sa lainlaing mga relihiyon sa maong dapit ug nagtaho sa resulta sa iyang pagsusi. Usa ka grupo ang namatikdan niyang lahi. Siya miingon: “Sulod sa tulo ka tuig, ako mitambong sa tinuig nga mga kombensiyon sa mga Saksi ni Jehova sa Amarillo Civic Center. Samtang nakig-uban ako kanila, ni kas-a wala gayod akoy nakita nga nagdagkot ug sigarilyo, nag-ablig lata sa serbesa, o namalikas. Sila mao ang kinahinloan, kinabuotanan, makasaranganon ug pamesti, malipayon nga panon sa mga tawo nga akong nahimamat sukad.” Ang susamang mga komento bahin sa mga Saksi ni Jehova kasagarang gipatik. Nganong ang mga Saksi kanunayng gidayeg sa mga tawo nga dili nila samag pagtuo?
2 Kasagaran, ang katawhan sa Diyos ginadayeg tungod sa ilang maayong panggawi. Bisan tuod ang mga sukdanan sa katibuk-an nagakadaot, ang mga Saksi ni Jehova naglantaw sa taas nga mga sukdanan sa panggawi ingong obligasyon, usa ka bahin sa ilang pagsimba. Sila nahibalo nga ang ilang mga lihok mosumbalik-silaw kang Jehova ug sa ilang Kristohanong mga igsoon ug ang ilang maayong panggawi magrekomendar sa kamatuoran nga ilang gisangyaw. (Juan 15:8; Tito 2:7, 8) Nan, susihon nato kon sa unsang paagi mahuptan nato ang maayong panggawi ug sa ingon makapadayon sa pagbayaw sa maayong reputasyon ni Jehova ug sa iyang mga Saksi ug kon sa unsang paagi kita makabenepisyo sa pagbuhat niana.
Ang Kristohanong Pamilya
3. Batok sa unsa nga ang Kristohanong mga pamilya kinahanglang panalipdan?
3 Tagda ang atong panggawi sulod sa pamilya. Ang librong Die Neuen Inquisitoren: Religionsfreiheit und Glaubensneid (Ang Bag-ong mga Inkwisitor: Kagawasan sa Relihiyon ug Relihiyosong Kasina), ni Gerhard Besier ug Erwin K. Scheuch, nag-ingon: “Alang [sa mga Saksi ni Jehova] ang pamilya maoy usa ka institusyon nga ilabinang panalipdan.” Tinuod kana, ug karon daghan kaayong kapeligrohan nga niana ang pamilya nagkinahanglag panalipod. Adunay mga anak nga “dili-masinugtanon sa mga ginikanan” ug mga hamtong nga “walay kinaiyanhong pagbati” o “walay pagpugong-sa-kaugalingon.” (2 Timoteo 3:2, 3) Ang mga pamilya maoy mga dapit sa kapintasan batok sa kapikas, ang mga ginikanan nag-abuso o nagpasagad sa ilang mga anak, ug ang mga anak nahimong rebelyoso, nag-abuso sa droga ug nalangkit sa imoralidad, o milayas. Kining tanan maoy resulta sa makadaot nga impluwensiya sa ‘espiritu sa kalibotan.’ (Efeso 2:1, 2) Kinahanglang panalipdan nato ang atong mga pamilya batok nianang espirituha. Sa unsang paagi? Pinaagi sa pagpatalinghog sa tambag ug pagtultol ni Jehova alang sa mga membro sa pamilya.
4. Unsang mga responsibilidad ang nabatonan sa mga membro sa Kristohanong pamilya ngadto sa usag usa?
4 Ang Kristohanong mga magtiayon moila nga sila dunay emosyonal, espirituwal, ug pisikal nga mga obligasyon sa usag usa. (1 Corinto 7:3-5; Efeso 5:21-23; 1 Pedro 3:7) Ang Kristohanong mga ginikanan dunay bug-at nga mga responsibilidad ngadto sa ilang mga anak. (Proverbio 22:6; 2 Corinto 12:14; Efeso 6:4) Ug samtang ang mga anak diha sa Kristohanong mga panimalay magkahamtong, ilang mahibaloan nga sila usab dunay mga obligasyon. (Proverbio 1:8, 9; 23:22; Efeso 6:1; 1 Timoteo 5:3, 4, 8) Ang pagtuman sa mga obligasyon sa pamilya nagkinahanglag paningkamot, determinasyon, ug espiritu sa gugma ug pagsakripisyo-sa-kaugalingon. Apan, sa gilapdon nga ang tanang membro sa pamilya nakakab-ot sa ilang hinatag-sa-Diyos nga mga obligasyon, sa maong gilapdon nga sila maoy panalangin sa usag usa ug sa kongregasyon. Labi pang hinungdanon, ilang gipasidunggan ang Tigmugna sa pamilya, si Jehova nga Diyos.—Genesis 1:27, 28; Efeso 3:15.
Ang Kristohanong Panag-igsoonay
5. Unsang mga panalangin ang atong maani gumikan sa pagpakig-uban sa mga isigka-Kristohanon?
5 Ingong mga Kristohanon, kita usab dunay mga responsibilidad ngadto sa mga isigkamagtutuo sa kongregasyon ug, sa kataposan, ngadto niadtong naglangkob “sa tibuok kapunongan sa . . . mga igsoon dinhi sa kalibotan.” (1 Pedro 5:9) Ang atong relasyon uban sa kongregasyon hinungdanon sa atong espirituwal nga kahimsog. Sa dihang makig-uban kita sa mga isigka-Kristohanon, atong matagamtam ang ilang makapadasig nga pakig-uban maingon man ang makapahimsog nga espirituwal nga pagkaon gikan sa “matinumanon ug maalamong ulipon.” (Mateo 24:45-47) Kon duna kitay mga problema, makaduol kita sa atong mga igsoon alang sa maayong tambag nga gipasukad sa Kasulatanhong mga prinsipyo. (Proverbio 17:17; Ecclesiastes 4:9; Santiago 5:13-18) Sa dihang kita anaa sa kalisod, ang atong mga igsoon dili motalikod kanato. Pagkadakong panalangin nga mahimong bahin sa organisasyon sa Diyos!
6. Sa unsang paagi gipakita ni Pablo nga kita dunay mga responsibilidad ngadto sa ubang mga Kristohanon?
6 Apan, wala kita diha sa kongregasyon aron lamang sa pagdawat; atua usab kita didto aron sa paghatag. Gani, si Jesus miingon: “Adunay labaw nga kalipay sa paghatag kay sa pagdawat.” (Buhat 20:35) Gipasiugda ni apostol Pablo ang pagkaandam nga mohatag sa dihang siya misulat: “Atong panguptan pag-ayo ang pagpahayag sa dayag bahin sa atong paglaom nga walay pagkatarog, kay kasaligan siya nga misaad. Ug magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.”—Hebreohanon 10:23-25.
7, 8. Sa unsang paagi ipakita nato ang mahinatagong tinamdan sulod sa atong kongregasyon ug ngadto sa mga Kristohanon sa ubang kayutaan?
7 Sulod sa kongregasyon, kita ‘nagpahayag sa atong paglaom’ sa dihang kita naghatag ug mga komento panahon sa tigom o nakig-ambit sa ubang mga paagi diha sa programa. Ang maong mga paningkamot makapadasig gayod sa atong mga igsoon. Gidasig usab nato sila pinaagi sa atong kabildohay una pa ug human sa tigom. Kana maoy panahon nga atong mapalig-on ang maluya, mahupay ang nagmagul-anon, ug mapalig-on ang masakiton. (1 Tesalonica 5:14) Ang sinserong mga Kristohanon mahinatagon nianang paagiha, mao nga daghan kaayo nga mitambong sa atong mga tigom sa unang higayon ang nakadayeg sa gugma nga ilang namatikdan sa atong taliwala.—Salmo 37:21; Juan 15:12; 1 Corinto 14:25.
8 Bisan pa niana, ang atong gugma dili lamang alang sa atong kongregasyon. Naglakip kini sa tibuok kapunongan sa atong mga igsoon sa tibuok kalibotan. Mao nga, pananglitan, dunay kahon sa amot alang sa Kingdom Hall Fund diha sa matag Kingdom Hall. Ang atong kaugalingong Kingdom Hall maayo tingalig kahimtang, apan nahibalo kita nga libolibo sa mga isigka-Kristohanon sa ubang mga nasod ang nakulangan ug angayng dapit nga tigoman. Sa dihang moamot kita alang sa Kingdom Hall Fund, atong gipakita ang atong gugma alang sa maong mga tawo bisan pa tingalig dili nato sila kaila.
9. Sa unsang pasukaranang hinungdan nga ang mga Saksi ni Jehova nahigugma sa usag usa?
9 Nganong ang mga Saksi ni Jehova nahigugma sa usag usa? Aw, gisugo sila ni Jesus sa pagbuhat niana. (Juan 15:17) Ug ang gugma nga ilang nabatonan alang sa usag usa maoy pamatuod nga ang espiritu sa Diyos nagalihok nganha kanila ingong indibiduwal ug ingong pundok. Ang gugma maoy bahin sa “bunga sa espiritu.” (Galacia 5:22, 23) Samtang ang mga Saksi ni Jehova nagtuon sa Bibliya, nagtambong sa mga tigom, ug nag-ampo kanunay sa Diyos, ang gugma mahimong natural na lang kanila bisan pag nagpuyo sa kalibotan diin ‘ang gugma sa kadaghanan mibugnaw na.’—Mateo 24:12.
Pagpakiglabot Niining Kalibotana
10. Unsay atong responsibilidad niining kalibotana?
10 Ang paghisgot ni Pablo sa “pagpahayag sa dayag bahin sa atong paglaom” nagpahinumdom kanato sa laing responsibilidad. Kining pagpahayag sa dayag naglakip sa buluhaton nga pagsangyaw sa maayong balita ngadto niadtong wala pa mahimong atong Kristohanong mga igsoon. (Mateo 24:14; 28:19, 20; Roma 10:9, 10, 13-15) Ang maong pagsangyaw maoy laing buhat sa paghatag. Aron makapakig-ambit niana gikinahanglan ang panahon, kusog, pagpangandam, pagbansay, ug paggamit sa personal nga kahinguhaan. Bisan pa niana, si Pablo misulat usab: “Ngadto sa mga Grego ug sa mga Barbaro, sa mga maalamon ug sa mga walay salabotan ako utangan: busa ako may kaikag nga ipahayag usab ang maayong balita kaninyo diha sa Roma.” (Roma 1:14, 15) Sama kang Pablo, hinaot dili kita magtinihik samtang nagabayad kita niining maong “utang.”
11. Unsang duha ka Kasulatanhong mga prinsipyo ang nagmando sa atong relasyon uban sa kalibotan, apan bisan pa niana unsay atong giila?
11 Duna ba kitay ubang mga responsibilidad niadtong dili nato mga isigkamagtutuo? Aduna gayod. Siyempre, atong giila nga “ang tibuok kalibotan nailalom sa gahom sa usa nga daotan.” (1 Juan 5:19) Kita nahibalo nga si Jesus miingon bahin sa iyang mga tinun-an: “Sila dili bahin sa kalibotan, ingon nga ako dili bahin sa kalibotan.” Bisan pa niana, kita nagpuyo sa kalibotan, nanginabuhi diha niana, ug nakadawat ug mga serbisyo gikan niana. (Juan 17:11, 15, 16) Busa kita adunay mga obligasyon niining kalibotana. Unsa man kini? Gitubag ni apostol Pedro kanang pangutanaha. Sa hapit nang malaglag ang Jerusalem, misulat siya ngadto sa mga Kristohanon sa Asia Minor, ug ang usa ka bahin sa maong sulat motabang kanato sa pagbaton ug timbang nga relasyon sa kalibotan.
12. Sa unsang paagi ang mga Kristohanon maoy “mga langyaw ug temporaryong mga pumoluyo,” ug kay ingon niana, gikan sa unsa nga sila mag-ayad?
12 Una, si Pedro miingon: “Mga hinigugma, ako nagtambag kaninyo ingong mga langyaw ug temporaryong mga pumoluyo nga magpadayon kamo sa pag-ayad sa unodnong mga tinguha, nga maoy nagapakigsangka batok sa kalag.” (1 Pedro 2:11) Sa espirituwal nga diwa, ang matuod nga mga Kristohanon maoy “mga langyaw ug temporaryong mga pumoluyo” tungod kay ang tinuod nga panguna sa ilang kinabuhi mao ang paglaom sa kinabuhing walay kataposan—ang mga dinihogan sa espiritu didto sa langit ug ang “ubang mga karnero” sa umaabot nga yutan-ong paraiso. (Juan 10:16; Filipos 3:20, 21; Hebreohanon 11:13; Pinadayag 7:9, 14-17) Apan, unsa ang unodnong mga tinguha? Naglakip kini sa mga butang sama sa tinguha nga mahimong dato, sa tinguha nga mainila, sa imoral nga seksuwal nga mga tinguha, ug sa mga tinguha nga gihubit ingong “kasina” ug “hakog nga pangibog.”—Colosas 3:5; 1 Timoteo 6:4, 9; 1 Juan 2:15, 16.
13. Sa unsang paagi ang unodnong mga tinguha “dunay pakig-away batok sa [atong] kalag”?
13 Ang maong mga tinguha sa pagkatinuod “dunay pakig-away batok sa [atong] kalag.” Gidaot niini ang atong relasyon uban sa Diyos ug sa ingon gipameligro ang atong Kristohanong paglaom (atong “kalag,” o kinabuhi). Pananglitan, kon ugmaron nato ang kaikag sa imoral nga mga butang, sa unsang paagi nato ikatanyag ang atong kaugalingon ingong “halad nga buhi, balaan, dalawaton sa Diyos”? Kon mahulog kita sa lit-ag sa materyalismo, sa unsang paagi nato ‘mauna pagpangita ang gingharian’? (Roma 12:1, 2; Mateo 6:33; 1 Timoteo 6:17-19) Ang mas maayong dalan mao ang pagsunod sa panig-ingnan ni Moises, talikdan ang mga panghaylo sa kalibotan, ug unahon diha sa atong kinabuhi ang pag-alagad kang Jehova. (Mateo 6:19, 20; Hebreohanon 11:24-26) Hinungdanon kana sa pagkab-ot ug timbang nga relasyon uban sa kalibotan.
‘Hupti ang Maayong Panggawi’
14. Nganong kita ingong mga Kristohanon maningkamot nga mahuptan ang maayong panggawi?
14 Ang laing hinungdanong giya makaplagan diha sa sunod nga gipamulong ni Pedro: “Hupti ninyo ang maayong panggawi taliwala sa mga nasod, aron nga, sa butang nga ilang gisulti batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita maghimaya sa Diyos sa adlaw sa iyang pagsusi.” (1 Pedro 2:12) Ingong mga Kristohanon, kita maningkamot nga mahimong maayong ehemplo. Sa eskuylahan kita kugihang magtuon. Sa atong trabahoan, kita kugihan ug matinud-anon—bisan pag ang atong amo morag dili makataronganon. Diha sa nabahin nga panimalay, ang bana o asawa nga magtutuo mohimog linaing paningkamot sa pagsunod sa Kristohanong mga prinsipyo. Dili gayod kini sayon, apan kita nahibalo nga ang atong sulondang panggawi makapahimuot kang Jehova ug kasagarang adunay maayong epekto diha sa mga dili-Saksi.—1 Pedro 2:18-20; 3:1.
15. Sa unsang paagi kita nahibalo nga ang taas nga sukdanan sa panggawi sa mga Saksi ni Jehova kaylap nga giila?
15 Ang kalamposan sa kadaghanan sa mga Saksi ni Jehova sa paghupot ug sulondang mga sukdanan makita diha sa mga komento bahin kanila nga napatik latas sa katuigan. Pananglitan, ang Il Tempo sa Italya nagtaho: “Ang mga tawo nga dunay mga kauban sa trabaho nga mga Saksi ni Jehova naghubit kanila ingong matinud-anong mga trabahador, kombinsido kaayo sa ilang pagtuo nga morag mao na lay gisigean nilag hunahuna; bisan pa niana, sila takos tahoron tungod sa ilang moral nga integridad.” Ang Herald sa Buenos Aires, Argentina, nag-ingon: “Latas sa katuigan ang mga Saksi ni Jehova napamatud-ang kugihan, seryoso, madaginoton, ug mahinadlokon-sa-Diyos nga mga molupyo.” Ang Rusong eskolar nga si Sergei Ivanenko nag-ingon: “Ang mga Saksi ni Jehova ilado sa tibuok kalibotan ingong mga tawo nga masinundanon kaayo sa balaod ug ilabina sa ilang maayong tinamdan sa pagbayad ug mga buhis.” Ang manedyer sa usa ka pasilidad sa Zimbabwe nga gigamit sa mga Saksi ni Jehova alang sa ilang kombensiyon nag-ingon: “Nakita nako ang pipila ka Saksi nga namunit ug papel ug nanglimpiyo sa mga kasilyas. Ang dapit nga pasundayaganan gibiyaan nga mas hinlo kay sa una. Ang inyong mga tin-edyer deprinsipyo. Maayo untag ang tibuok kalibotan mapuno sa mga Saksi ni Jehova.”
Kristohanong Pagpasakop
16. Unsay atong relasyon sa sekular nga mga awtoridad, ug ngano?
16 Si Pedro naghisgot usab bahin sa atong relasyon sa sekular nga mga awtoridad. Siya miingon: “Tungod sa Ginoo magpasakop kamo sa tanang tawhanong linalang: kon sa hari man ingong maoy labaw o sa mga gobernador ingong maoy mga pinadala niya aron sa pagpahamtang ug silot sa mga mamumuhat ug daotan apan sa pagdayeg sa mga mamumuhat ug maayo. Kay maoy kabubut-on sa Diyos, nga pinaagi sa pagbuhat ug maayo inyong mapahilom ang walay alamag nga mga sulti sa dili-makataronganong mga tawo.” (1 Pedro 2:13-15) Mapasalamaton kita sa mga benepisyo nga madawat gikan sa hapsay nga gobyerno, ug giniyahan sa gisulti ni Pedro, kita mosunod sa mga balaod niini ug mobayad sa atong mga buhis. Bisan tuod giila nato ang hinatag-sa-Diyos nga katungod sa mga gobyerno sa pagsilot sa mga malinapason sa balaod, ang pangunang rason nga kita magpasakop sa sekular nga awtoridad maoy “tungod sa Ginoo.” Kabubut-on kini sa Diyos. Dugang pa, dili nato buot nga mapasipalahan ang ngalan ni Jehova tungod kay gisilotan kita gumikan sa pagbuhat ug daotan.—Roma 13:1, 4-7; Tito 3:1; 1 Pedro 3:17.
17. Sa dihang ang “dili-makataronganong mga tawo” mosupak kanato, sa unsa kita makasalig?
17 Ikasubo, ang ubang “dili-makataronganong mga tawo” nga anaa sa awtoridad naglutos kanato o nagsupak kanato sa ubang mga paagi—sama sa pagpakaylap ug bakak nga mga sugilanon batok kanato. Bisan pa niana, sa gitakdang panahon ni Jehova, ang ilang mga bakak kanunayng mayagyag, ug ang ilang “walay alamag nga mga sulti” mapahilom. Ang atong rekord sa Kristohanong panggawi maoy magpadayag kon kinsay nagsulti sa tinuod. Mao nga ang matinud-anong mga opisyal sa gobyerno kasagarang nagdayeg kanato ingong mga mamumuhat sa maayo.—Roma 13:3; Tito 2:7, 8.
Mga Ulipon sa Diyos
18. Ingong mga Kristohanon, sa unsang mga paagi nga dili nato maabusohan ang atong kagawasan?
18 Dayon si Pedro nagpasidaan: “Manig-ingon sa mga tawong may kagawasan, apan hupti ang inyong kagawasan, dili ingong takoban sa pagkadaotan, kondili ingong mga ulipon sa Diyos.” (1 Pedro 2:16; Galacia 5:13) Karon, ang atong kahibalo sa kamatuoran sa Bibliya nagpagawas kanato gikan sa bakak nga relihiyosong mga pagtulon-an. (Juan 8:32) Dugang pa, kita dunay kagawasan sa pagpili, ug kita makapili. Bisan pa niana, dili nato abusohan ang atong kagawasan. Sa dihang magpili ug mga kauban, sinina, panghindik, lingawlingaw—bisan sa pagkaon ug ilimnon—atong hinumdoman nga ang matuod nga mga Kristohanon maoy mga ulipon sa Diyos, nga dili magpahimuot sa ilang kaugalingon. Mopili kita sa pag-alagad kang Jehova ug dili mahimong mga ulipon sa atong kaugalingon nga unodnong mga tinguha o sa mga uso sa kalibotan.—Galacia 5:24; 2 Timoteo 2:22; Tito 2:11, 12.
19-21. (a) Unsaon nato paglantaw kadtong dunay mga posisyon sa sekular nga awtoridad? (b) Sa unsang paagi ang pipila nagpakita ug “gugma alang sa tibuok kapunongan sa mga igsoon”? (c) Unsa ang atong labing hinungdanong responsibilidad?
19 Si Pedro nagpadayon sa pag-ingon: “Pasidunggi ang tanang matang sa mga tawo, pagbaton ug gugma alang sa tibuok kapunongan sa mga igsoon, magmahadlokon sa Diyos, magpasidungog sa hari.” (1 Pedro 2:17) Tungod kay gitugotan ni Jehova nga Diyos ang mga tawo nga maghupot ug lainlaing mga posisyon sa awtoridad, atong ipakita sa maong mga tawo ang angayng pasidungog. Mag-ampo pa gani kita bahin kanila, sa tuyo nga kita tugotan sa pagpadayon sa atong ministeryo diha sa kalinaw ug uban ang diyosnong pagkamahinalaron. (1 Timoteo 2:1-4) Apan, sa samang higayon kita ‘magbaton ug gugma alang sa tibuok kapunongan sa mga igsoon.’ Kanunay kitang magtinguha sa kaayohan, dili sa kadaotan, sa atong Kristohanong mga igsoon.
20 Pananglitan, sa dihang ang usa ka nasod sa Aprika nabahin tungod sa kapintasan tali sa minoriya, ang Kristohanong panggawi sa mga Saksi ni Jehova nadayag. Ang mantalaang Reformierte Presse sa Switzerland nagtaho: “Sa 1995, ang Aprikanhong mga Katungod . . . nakapamatuod sa kalabotan sa tanang relihiyon [diha sa panagbangi] gawas lang sa mga Saksi ni Jehova.” Sa dihang ang balita bahin sa makapasubong mga hitabo nakaabot sa laing mga nasod, ang mga Saksi ni Jehova sa Uropa nagpadala dayon ug pagkaon ug medikal nga tabang ngadto sa ilang mga igsoon ug sa uban pa nianang gisakit nga yuta. (Galacia 6:10) Ilang gituman ang giingon sa Proverbio 3:27: “Ayaw ihikaw ang maayo gikan kanila nga takos niini, sa dihang anaa sa gahom sa imong kamot ang pagbuhat niini.”
21 Apan, adunay mas hinungdanong responsibilidad kay sa pasidungog nga utang nato sa bisan unsang sekular nga awtoridad ug bisan sa gugma nga utang nato sa atong mga igsoon. Unsa man kana? Si Pedro miingon: “Magmahadlokon sa Diyos.” Mas dako ang atong utang kang Jehova kay sa atong utang kang bisan kinsang tawo. Sa unsang paagi tinuod kana? Ug sa unsang paagi mabalanse nato ang atong mga obligasyon sa Diyos uban nianang atong utang sa sekular nga mga awtoridad? Kining mga pangutanaha tubagon sa sunod nga artikulo.
Nahinumdom Ka Ba?
• Unsang mga responsibilidad ang nabatonan sa mga Kristohanon sulod sa pamilya?
• Sa unsang paagi ikapakita nato ang mahinatagong tinamdan diha sa kongregasyon?
• Unsay atong mga responsibilidad niining kalibotana?
• Unsa ang pipila ka benepisyo nga madawat gumikan sa atong paghupot ug taas nga sukdanan sa panggawi?
[Mga Pangutana sa Pagtuon]
[Hulagway sa panid 9]
Sa unsang paagi ang Kristohanong pamilya mahimong tinubdan sa dakong kalipay?
[Mga hulagway sa panid 10]
Nganong ang mga Saksi ni Jehova nahigugma sa usag usa?
[Mga hulagway sa panid 10]
Ikapakita ba nato ang atong gugma alang sa atong mga igsoon bisan pag dili nato sila kaila?