Mga Magmamantala sa Gingharian Nagtaho

Mga Kingdom Hall Bukas Alang sa Tanan

SAMTANG nagbansay sa iyang mga tinun-an alang sa publikong ministeryo, si Jesu-Kristo nagdasig kanila sa ‘pagwali gikan sa mga atop.’ (Mateo 10:27) Oo, ilang buhaton ang ilang Kristohanong ministeryo sa dayag, nga makita sa tanan. Sa pagtuman niini nga tambag, ang kalihokan sa mga Saksi ni Jehova ginahimo usab sa dayag. Kini nga pagkadayag nagpaarang sa mga Saksi sa pagbuntog sa pagsupak ug sa pagbaton ug paborableng pagtagad.

Bisan pag ang mga tigom sa kongregasyon sa mga Saksi ni Jehova bukas alang sa publiko, tungod sa pagpihig ang pipila ka tawo magpanuko pagsulod sa Kingdom Hall. Ingon niana ang kahimtang didto sa Pinlandia. Ang uban magpanuko sa pag-adto sa bag-ong mga lugar. Sa dihang tukoron ang usa ka bag-ong Kingdom Hall o ayohon ang usa ka tigomanan, kasagaran dunay himoong open house. Tingali himoon ang linaing paningkamot sa pagdapit sa mga silingan sa pagduaw sa Kingdom Hall ug masinati sa kalihokan sa mga Saksi ni Jehova.

Diha sa usa ka dapit, ang mga Saksi naghikay ug kampanya sa magasin sa samang adlaw nga ilang gihimo ang open house sa ilang bag-ong Kingdom Hall. Nahimamat sa duha ka Saksi ang usa ka edarang lalaki nga nag-ingon nga nalipay siya sa pagbasa sa mga magasing Bantayanang Torre ug Pagmata! Gipahibalo siya sa mga igsoon bahin sa open house ug gidapit siya sa pagkuyog sa Kingdom Hall. Ang lalaki miingon nga malipay siya sa pag-uban kanila. Ang iyang asawa, kay naminaw sa ilang panaghisgot, miingon, “Mokuyog ko!”

Sa pagsulod sa Kingdom Hall, ang lalaki mitan-aw sa palibot ug miingon: “Dili man lagi ngiob dinhi. Nindot man diay ug hayag. Ingon nila ngiob kono ang Kingdom Hall!” Medyo dugaydugay nga nagpabilin ang magtiayon ug mihangyo sa pipila ka literatura nga gidispley.

Buot nga ianunsiyo sa usa ka kongregasyon diha sa lokal nga mantalaan ang open house sa okasyon sa dedikasyon sa ilang Kingdom Hall. Sa dihang nadawat ang pahibalo alang sa maong okasyon, ang pangulong editor misugyot nga isulat ang usa ka artikulo bahin sa maong ulohan. Misugot ang mga igsoon, ug wala madugay, ang usa ka positibo, tunga-sa-panid nga artikulo migula sa mantalaan, nga naghisgot sa okasyon ug naghubit sa mga kalihokan sa lokal nga kongregasyon sa mga Saksi ni Jehova.

Human mapatik ang artikulo, usa ka edaran nga Saksi nakahimamat ug silingan nga misulti kaniya: “Dihay nindot nga artikulo bahin sa mga Saksi ni Jehova sa mantalaan karong adlawa!” Nakasangyaw ang igsoon kaniya ug sa ulahi nakapahimutang ug brosyur nga Jehovah’s Witnesses in the Twentieth Century.

Gawas nga natul-id ang pipila ka sayop nga mga pagsabot bahin sa mga Saksi ni Jehova, ang maong mga kahikayan may kalabotan sa mga open house ug mga programa sa dedikasyon sa bag-ong mga Kingdom Hall nakadasig sa mga magmamantala pinaagi sa pagpalihok kanila sa pagdapit ug mas daghang tawo sa pagtambong sa mga tigom. Oo, diha sa daghang nasod, lakip sa Pinlandia, nasayran sa mga tawo nga ang mga Kingdom Hall sa mga Saksi ni Jehova bukas alang sa tanan.