Mga Pangutana Gikan sa mga Magbabasa

Daotan ba ang pagpanugal bisag gamay rang kantidad ang ipusta?

Ang Pulong sa Diyos wala maghisgot nga detalyado bahin sa pagpanugal, apan aduna kiniy gisulti nga igong magpakita nga ang tanang matang sa pagpanugal maoy supak sa mga prinsipyo sa Bibliya. a Pananglitan, kaylap nang gidawat nga ang pagpanugal magpukaw sa kadalo. Kanang kamatuorana mismo angayng tagdon sa mga Kristohanon, tungod kay ang Bibliya nag-ingon nga ang “mga tawong dalo” dili makapanunod sa Gingharian sa Diyos ug nagklasipikar sa hakog nga pangibog uban sa idolatriya.—1 Corinto 6:9, 10; Colosas 3:5.

Ang pagpanugal magpukaw usab sa pagpaimportante sa kaugalingon ug sa dili maayong espiritu sa kompetisyon, usa ka kusganong tinguha nga makadaog. Si apostol Pablo nagpasidaan batok sa maong mga butang sa dihang siya misulat: “Dili kita magpaimportante sa kaugalingon, nga mag-aghat ug pag-indigay sa usag usa, nga magsinahay sa usag usa.” (Galacia 5:26) Dugang pa, ang pagpanugal nagdasig sa usa ka matang sa matuotuohong pagsalig sa suwerte. Ang mga sugarol nagmugnag tanang matang sa patuotuo, nga naglaom nga ang suwerte mopabor kanila. Nagpahinumdom kini kanato sa dili-matinumanong mga Israelinhon nga “nag-andam ug usa ka lamesa alang sa diyos sa Suwerte ug kadtong nagpuno ug sinagolan nga bino alang sa diyos sa Kapalaran.”—Isaias 65:11.

Mangatarongan tingali ang uban nga lingawlingaw ra man ang pagpusta ug gamayng kantidad samtang nakigdula ug baraha o ahedres uban sa mga paryente o suod nga mga higala. Tinuod nga kon mopusta lang ang usa ug gamayng kantidad dili tingali niya isipon ang iyang kaugalingon nga dalo, nagpaimportante sa kaugalingon, nakig-indig, o matuotuohon. Bisan pa niana, unsay epekto sa iyang pagpanugal ngadto sa mga tawo nga iyang gikasugal? Daghang lunod-patay nga mga sugarol ang nagsugod pinaagi sa pagpusta ug ginagmayng kantidad ‘aron lang malingaw.’ (Lucas 16:10) Ang morag inosenteng lingawlingaw nahimo na hinuong mas pang makadaot sa ilang kahimtang.

Tinuod gayod kana diha sa mga bata. Daghang kabataan ang mibatig kahinam nga nakadaog sa gamayng kantidad nga gipusta ug busa natental sa pagpustag dakodako. (1 Timoteo 6:10) Ang usa ka dugay nga pagtuon nga gipatik didto sa Tinipong Bansa sa Arizona Council on Compulsive Gambling nagpamatuod nga daghang giyanon sa sugal ang nagsugod sa bata pa “pinaagi sa pagpustag gamayng kantidad diha sa mga bangga sa esports o sa pagdulag baraha uban sa mga higala o mga paryente.” Lain pang taho nag-ingon nga “ang mga bata nagsugod sa pagpanugal diha sa balay, kasagaran diha sa mga dula sa baraha kauban ang pamilya ug mga higala.” Ang taho midugang nga “trayenta porsiyento sa mga bata nga nanugal misugod sa pagpanugal sa wala pay onse anyos.” Daghang tin-edyer nga mga sugarol ang mihimog krimen ug imoralidad aron masuportahan ang ilang pagkagiyan sa sugal, matod sa pagtuon nga Why Do People Gamble Too Much—Pathological and Problem Gambling. Pagkamakapasubong sangpotanan sa butang nga morag di-makadaot sa sinugdan!

Tungod kay kita nagkinabuhi sa kalibotan nga duna nay daghan kaayong lit-ag ug mga tentasyon, nganong iladlad man nimo ang imong kaugalingon sa lain pang lit-ag? (Proverbio 27:12) Ang pagpanugal—anaa man o wala ang mga bata, ginagmay o dinagko nga mga pusta—magpameligro sa espirituwalidad ug kinahanglang likayan. Mas maayo alang sa mga Kristohanon nga gustong magdula ug ahedres o baraha ingong lingawlingaw, nga isulat na lang ang mga puntos o magdula aron lang malingaw nga dili na iphon ang puntos. Ang maalamong mga Kristohanon nga mahunahunaon sa ilang espirituwalidad maingon man sa espirituwalidad sa ilang mga higala ug pamilya maglikay sa pagpanugal—bisag gamayng kantidad lang ang ipusta.

[Footnote]