“Umari Kanako, . . . ug Ako Magapalagsik Kaninyo”

“Bantayi Ninyo ang Panon sa Diyos”

“Kamo anaa kanunay aron sa pagpamati ug pagpaambit ug mga pulong gikan sa Bibliya nga makapadasig kanamo.”—Pamela.

“Salamat sa tanan ninyong gibuhat alang kanamong tanan. Dako kinig epekto nganhi kanamo.”—Robert.

SI Pamela ug Robert natukmod sa pagsulat niining mga pulonga agig pagpasalamat sa Kristohanong mga ansiyano sa ilang tagsatagsa ka kongregasyon. Ang uban taliwala sa mga alagad sa Diyos sa tibuok kalibotan mapasalamaton usab sa mapinadayonong pagpaluyo ug pag-atiman nga ilang nadawat gikan niadtong ‘nagabantay sa panon sa Diyos.’ (1 Pedro 5:2) Sa pagkatinuod, mapasalamaton ang katawhan ni Jehova tungod sa daghang butang nga nahimo sa mga ansiyano alang kanila ug sa paagi sa ilang paghimo niana.

“Puliki”

Ang Kristohanong mga ansiyano gipiyalan ug daghang responsibilidad. (Lucas 12:48) Sila mag-andam ug mga pakigpulong alang sa mga tigom sa kongregasyon ug makig-ambit sa publikong pagsangyaw sa maayong balita sa Gingharian sa Diyos. Ang ilang buluhaton naglakip sa mga pagduaw sa isigkamagtutuo isip magbalantay. Ang mga ansiyano maggahin ug panahon alang niadtong nanginahanglag linaing pagtagad—mga tigulang ug uban pang nanginahanglan—ug bisan pa nianang tanan wala magpabaya sa espirituwal ug materyal nga kaayohan sa kaugalingon nilang mga pamilya. (Job 29:12-15; 1 Timoteo 3:4, 5; 5:8) Ang pipila ka ansiyano motabang sa pagtukod ug mga Kingdom Hall. Ang uban nag-alagad sa mga Hospital Liaison Committee o maoy mga membro sa mga Patient Visitation Group. Ug ubay-ubay kanila ang mohimog boluntaryong buluhaton panahon sa mga asembliya ug mga kombensiyon. Oo, ang mga ansiyano “puliki diha sa buluhaton sa Ginoo.” (1 Corinto 15:58) Dili ikatingala nga ang kugihang mga ansiyano gipasalamatan gayod niadtong gipiyal kanila!—1 Tesalonica 5:12, 13.

Ang mga ansiyano nga regular nga moduaw sa mga isigka-Kristohanon sa balay o bisan diin aron magpalig-on kanila sa espirituwal maoy tuboran sa pagdasig. “Kon dili pa tungod sa mahigugmaong pagpaluyo ug pagdasig sa mga ansiyano,” matod ni Thomas, kinsa nagdako nga walay amahan diha sa balay, “basin wa tingali ko karon mag-alagad kang Jehova ingong bug-os-panahong ministro.” Giila sa ubay-ubayng batan-on nga gimatuto sa usay-ginikanan nga mga pamilya nga ang pagtagad nga ilang nadawat gikan sa mga ansiyano nakatabang kanila sa pag-ugmad ug personal nga relasyon uban sa Diyos.

Ang mga pagduaw isip mga magbalantay gipabilhan usab sa mga tigulang diha sa kongregasyon. Human maduaw sa duha ka ansiyano ang magtiayong misyonaryo nga nag-edad ug mga 85, sila misulat: “Buot kaming magpasalamat sa inyong makapalig-ong pagduaw.  Sa inyong pagbiya, gibasa namo pag-usab ang mga teksto nga inyong gihisgotan uban namo. Dili gayod namo malimtan ang inyong mga pulong sa pagdasig.” Usa ka 70-anyos nga balo misulat sa mga ansiyano: “Kanunay kong mag-ampo kang Jehova alang sa tabang, ug siya nagpadala ninyong duha ka ansiyano nganhi sa akong balay. Ang inyong pagduaw maoy panalangin gikan kang Jehova!” Nakabenepisyo ka ba di pa dugay gikan sa pagduaw nga gihimo sa mga ansiyano sa inyong kongregasyon? Tino nga kitang tanan mapasalamaton sa ilang mga paningkamot sa pagbantay sa panon nga gipiyal kanila!

Mga Magbalantay nga Nagsundog sa Diyos ug Kang Kristo

Si Jehova maoy usa ka mahigugmaong Magbalantay. (Salmo 23:1-4; Jeremias 31:10; 1 Pedro 2:25) Si Jesu-Kristo usab maoy usa ka talagsaong espirituwal nga Magbalantay. Gani, siya gitawag nga “maayong magbalantay,” “dakong magbalantay,” ug “ang pangulong magbalantay.” (Juan 10:11; Hebreohanon 13:20; 1 Pedro 5:4) Giunsa pagtratar ni Jesus kadtong buot mahimong iyang mga tinun-an? Siya mihatag kanila ug mainitong imbitasyon: “Umari kanako, kamong tanang nabudlayan ug nabug-atan, ug ako magapalagsik kaninyo.”—Mateo 11:28.

Ang mga ansiyano karon naningkamot usab nga mahimong tuboran sa kahupayan ug panalipod sa panon. Ang maong mga lalaki “mahimong sama sa usa ka tagoanang dapit gikan sa hangin ug usa ka salipdanang dapit gikan sa bagyo, sama sa mga sapa sa tubig sa usa ka walay-tubig nga yuta, sama sa landong sa usa ka dako kaayong bato sa usa ka umaw nga yuta.” (Isaias 32:2) Ang maong malulotong mga tigpanalipod magdalag kahupayan, makaanig pagtahod sa panon, ug makaangkon sa pag-uyon sa Diyos.—Filipos 2:29; 1 Timoteo 5:17.

Bililhong Tabang Gikan sa Ilang mga Asawa

Mapasalamaton ang katawhan sa Diyos tungod sa Kristohanong mga ansiyano ug tungod sa mahigugmaong tabang nga naangkon niining mga lalakiha gikan sa ilang mga asawa. Ang pagkahimong matinabangon kasagarang nagkinahanglag pagsakripisyo sa bahin sa maong mga babaye. Usahay, sila magpabilin sa balay samtang ang ilang mga bana nag-atiman sa kongregasyon o mihimog mga pagduaw isip magbalantay. Sa ubang panahon, mahimong ioktaba ang maayong-pagkaplano nga personal nga mga kalihokan tungod sa dinaliang problema nga mitungha sa kongregasyon. “Bisan pa niana,” matod ni Michelle, “sa dihang akong makita kon unsa ka puliki ang akong bana sa pagpangandam alang sa mga tigom o sa paghimog mga pagduaw isip magbalantay, akong hunahunaon kanunay nga ang iyang gibuhat iya ni Jehova, ug gipaningkamotan nakong magmatinabangon kutob sa akong maarangan.”

Si Cheryl, usa usab ka asawa sa ansiyano, miingon: “Ako nasayod nga ang mga igsoong lalaki ug babaye sa kongregasyon nagkinahanglag mga ansiyano nga ikasulti, ug buot nakong ipabati kanila nga mahimo nilang duolon ang akong bana bisan kanus-a kon ilang gikinahanglan siya.” Ang matinabangong mga asawa, sama kang Michelle ug Cheryl, kinabubut-ong mohimog mga sakripisyo aron maatiman sa ilang mga bana ang mga karnero sa Diyos. Gipabilhan gayod ang mga asawa sa mga ansiyano tungod sa ilang matinabangong espiritu.

Bisan pa niana, kinahanglang bantayan sa usa ka puliking ansiyano ang espirituwal ug uban pang mga panginahanglan sa iyang asawa ug mga anak. Ang minyong ansiyano kinahanglang “walay akusasyon, bana sa usa ka asawa, may mga anak nga magtutuo nga walay ikasumbong sa unodnong pagpatuyang ni sa pagkamasupilon.” (Tito 1:6) Kinahanglan niyang atimanon ang iyang pamilya diha sa diyosnong paagi sumala sa gikinahanglan sa Kasulatan alang sa Kristohanong mga ansiyano.—1 Timoteo 3:1-7.

Alang sa usa ka puliking ansiyano, ang matinabangong asawa maoy bililhon kaayo! Mao kanay gibati sa mahunahunaong minyo nga mga ansiyano. Sama kini sa giingon sa Bibliya: “Nakakaplag ba ang usa ug usa ka maayong asawa? Siya nakakaplag ug usa ka maayong butang.” (Proverbio 18:22) Sa pulong ug sa buhat, gipakita sa maong mga ansiyano nga kinasingkasing nilang gipabilhan ang ilang mga asawa. Gawas pa sa tim-os nga pag-ampo ug makapahimuot nga pagtuon nga tingob, kining maong Kristohanong mga magtiayon naggahin ug panahon sa pagtagamtam sa mga butang sama sa paglakawlakaw diha sa baybayon, sa kakahoyan, o sa parke. Oo, ang mga ansiyano makakaplag ug kalipay sa paghatag sa ilang mga asawa ug mahigugmaong pag-atiman.—1 Pedro 3:7.

Ang mga ansiyano nga dili mahakogon sa pagbantay sa panon sa Diyos maoy tuboran sa espirituwal nga kahupayan alang sa katawhan ni Jehova. Sa pagkatinuod, sila maoy “mga gasa nga mga lalaki,” usa ka panalangin ngadto sa kongregasyon!—Efeso 4:8, 11-13.