Mga Pangutana Gikan sa mga Magbabasa

Angay bang tumanon gayod ang mga panaad ngadto sa Diyos?

Sa Kasulatan, ang panaad maoy solemneng saad ngadto sa Diyos nga adunay butang nga himoon, nga motanyag ug usa ka halad, mosulod sa usa ka matang sa pag-alagad o kahimtang, o molikay sa pipila ka butang nga sa kaugalingon dili supak sa balaod. Adunay mga asoy diha sa Bibliya bahin sa mga panaad nga kondisyonal sa pagkaagi nga kini naglangkit sa usa ka pagsaad nga himoon ang gipahayag nga buhat kon may himoon usa ang Diyos. Pananglitan, si Ana, ang inahan sa propetang si Samuel, ‘nanaad ug miingon: “Oh Jehova sa mga panon, kon . .  . ikaw dili mahikalimot sa imong ulipong babaye ug maghatag gayod sa imong ulipong babaye ug usa ka anak nga lalaki, akong ihatag siya kang Jehova sa tanang adlaw sa iyang kinabuhi, ug walay labaha nga modapat sa iyang ulo.”’ (1 Samuel 1:11) Gibatbat usab sa Bibliya nga ang mga panaad maoy boluntaryo. Angay bang tumanon gayod ang Kasulatanhong mga panaad?

‘Sa dihang ikaw manaad ug saad ngadto sa Diyos,’ nag-ingon si Haring Solomon sa karaang Israel, “ayaw pagpanuko sa pagbayad niini.” Siya nagdugang: “Kon unsay imong gipanaad, bayri. Mas maayo pa nga dili ka manaad kay sa manaad ka ug dili mobayad.” (Ecclesiastes 5:4, 5) Ang Balaod nga gihatag sa Israel pinaagi ni Moises nag-ingon: “Kon manaad ka ug saad kang Jehova nga imong Diyos, dili ka maglangan sa pagbayad niini, tungod kay si Jehova nga imong Diyos sa walay pakyas maningil kanimo niini, ug sa pagkatinuod kini mahimong sala kanimo.” (Deuteronomio 23:21) Tin-aw, ang paghimog panaad ngadto sa Diyos maoy seryosong butang. Angay nga himoon kini uban ang maayong motibo, ug ang nanaad angay nga dili magduhaduha bahin sa iyang katakos sa pagbayad kon unsay iyang gisaad. Kay kon siya dili makabayad, mas maayo pa nga dili siya manaad. Bisan pa niana, sa dihang mahimo na ang panaad, angay bang tumanon ang tanang panaad?

Komosta na man kon ang usa ka panaad mag-obligar sa usa ka tawo sa pagbuhat sa usa ka butang nga sa ulahi nasayrang dili diay uyon sa kabubut-on sa Diyos? Pananglitan kon kana maoy panaad diin ang imoralidad mahimong malangkit sa matuod nga pagsimba? (Deuteronomio 23:18) Dayag na lang, ang maong panaad dili angayng tumanon. Dugang pa, ubos sa Moisesnong Balaod, ang panaad nga gihimo sa usa ka babaye mahimong nulohon sa iyang amahan o iyang bana.—Numeros 30:3-15.

Tagda usab ang kaso sa usa ka tawo nga nakapanaad sa Diyos nga magpabiling tagsaanon apan karon siya nag-atubang ug lisod nga desisyon. Tungod sa iyang panaad siya nabutang sa kahimtang diin siya nagtuo nga ang pagtuman niana magdala kaniya duol sa punto nga ang balaang mga sukdanan bahin sa moralidad mahimong malapas. Angay bang tinguhaon gihapon niya ang pagtuman sa iyang panaad? Dili ba mas maayo nga iyang panalipdan ang iyang kaugalingon gikan sa pagkasad-an sa imoralidad pinaagi sa dili pagtuman sa iyang panaad ug sa kapulihay sa pagpangaliyupo sa kaluoy sa Diyos ug sa pagpangayog pasaylo? Siya lamang ang makahukom niana. Walay laing tawo nga makahimo sa desisyon alang kaniya.

Unsa na man kon ang usa ka tawo manaad apan sa ulahi siya makaamgo nga dinaliang nahimo kadto? Angay bang tinguhaon gihapon niya ang pagtuman sa panaad? Dili masayon kang Jepte ang pagtuman sa iyang panaad sa Diyos, apan sumala sa diktar sa iyang konsensiya kadto iyang gituman. (Maghuhukom 11:30-40) Ang kapakyasan sa usa ka tawo sa pagbayad sa usa ka panaad mahimong mosangpot nga ang Diyos ‘masuko pag-ayo’ ug makaguba kon unsay nabuhat sa tawo.  (Ecclesiastes 5:6) Ang dili pagtagad sa usa ka panaad mahimong mosangpot nga mawad-an ka sa pag-uyon sa Diyos.

Si Jesu-Kristo miingon: “Himoa lang ang inyong pulong nga Oo magkahulogan ug Oo, ang inyong Dili, Dili; kay ang kapin niini nagagikan sa usa nga daotan.” (Mateo 5:37) Ang Kristohanon kinahanglang mabalaka dili lamang bahin sa pagbayad sa mga panaad ngadto sa Diyos kondili bahin usab sa pagpamatuod nga siya kasaligan sa tanan niyang mga pulong—ngadto sa Diyos ug sa mga tawo. Unsa na man kon iyang nadiskobrehan nga siya nasulod sa lisod nga suliran kay nakigsabot sa laing tawo nga sa sinugdan morag maayo apan sa pagsusi nasayran nga dili maalamon? Dili angay nga dili siya magbalebale niana. Apan tungod sa ugdang nga panaghisgot, ang laing tawo basin mohukom nga siya ipahigawas sa obligasyon.—Salmo 15:4; Proverbio 6:2, 3.

Kon bahin sa mga panaad ug sa tanang ubang butang, unsay angay nga mas kabalak-an nato? Kanunay natong tinguhaon nga magpadayon ang atong maayong relasyon uban kang Jehova nga Diyos.

[Mga hulagway sa panid 30, 31]

Si Ana wala magpanuko sa pagbayad sa iyang panaad

[Mga hulagway sa panid 30, 31]

Bisan pag kadto lisod, gibayran ni Jepte ang iyang panaad