Gidalit Diha sa Lamesa sa Kapitan

ANG makaiikag nga mga tawo, lamiang pagkaon, ug makalingawng kabildohay mao ang makapalipay sa pagpangaon diha sa lamesa sa kapitan samtang nagsakay sa barko. Apan ang panaghisgot diha sa lamesa ni Kapitan Robert G. Smith, sa barko sa White Star Line, nagpadayag sa usa ka espirituwal nga bangkete.—Isaias 25:6.

Sa 1894, sa edad nga 24, si Robert mao ang nagdumala sa barko nga Kinclune of Dundee aron mohimo sa iyang unang biyahe libot sa kalibotan. Sa ulahi siya nahimong kapitan sa mga barko sa White Star, sama sa Cedric, Cevic, ug sa Runic. a Samtang naglawig sa Atlantiko gikan sa New York paingon sa Liverpool, Inglaterra, sa usa niining mga barkoha, si Robert mao ang nag-abiabi kang Charles Taze Russell diha sa lamesa sa kapitan. Tungod sa pagpakig-estorya kang Russell nahaling ang interes ni Robert sa mensahe sa Bibliya, ug aron matabangan pa siya nga makakat-on ug dugang, malipayon niyang gidawat ang mga kopya sa Studies in the Scriptures gikan kang Russell.

Si Russell kanunayng nagsulat kaniya, ug tungod niana, mitubo ang interes ni Robert sa mensahe sa Bibliya. Gipaambit ni Robert ang bag-o niyang nakaplagan nga kahibalo sa iyang asawa. Sa wala madugay silang duha nahimong aktibong mga Estudyante sa Bibliya, sumala sa pag-ila sa mga Saksi ni Jehova kaniadto. Sa ulahi, si Robert nakapribilehiyo sa paghatag ug mga pakigpulong sa Bibliya. Pananglitan, sa Brisbane, Australia, gihatag niya ang pakigpulong nga “Ang Balsamo sa Galaad” ug gipakita kon sa unsang paagi naundan ang Pulong sa Diyos ug mensahe nga “makasulbad sa tanang suliran sa yuta.” Balik sa Inglaterra, ang iyang asawa ug gagmayng mga anak mitabang sa pagpasundayag sa “Photo-Drama of Creation,” nga nagpatokar sa narekord nga mga komentaryo ni Russell samtang gipasalida ang mga eslayd.

Si Robert nagpasa ngadto sa iyang mga anak sa panulondon sa kamatuoran sa Gingharian nga iyang nadawat. Karon, lima ka kaliwatan sa ulahi, 18 ka membro sa pamilya ang puliki nga nagapaambit sa maayong balita ngadto sa uban, nga mapasalamaton niadtong gidalit diha sa lamesa sa kapitan.

Pinaagi sa ilang mga publikasyon ug sa ilang edukasyonal nga buluhaton bahin sa Bibliya, ang mga Saksi ni Jehova nagtabang sa mga tawo sa tibuok kalibotan aron makakat-on sa mensahe sa Bibliya nga nakapainteres kang Kapitan Smith. Mahibaloan usab nimo kon unsay nakapaikag kaayo diha sa lamesa sa kapitan.

[Footnote]

[Hulagway sa panid 8]

Si Robert G. Smith

[Hulagway sa panid 8]

Si Charles T. Russell