Mga Pangutana Gikan sa mga Magbabasa

Angay ba kitang mohinapos sumala sa Pinadayag 20:8 nga dunay daghan kaayong tawo nga mapahisalaag ni Satanas panahon sa kataposang pagsulay?

Ang Pinadayag 20:8 naghubit sa kataposang pag-atake ni Satanas sa mga tawo nga nagpuyo sa yuta sa kataposan sa usa ka libo ka tuig nga pagmando sa Mesiyanikong Gingharian. Maylabot kang Satanas, ang bersikulo nag-ingon: “Siya mogula sa pagpahisalaag sa kanasoran sa upat ka suok sa yuta, ang Gog ug Magog, sa pagtigom kanila alang sa gubat. Ang ilang gidaghanon ingon sa balas sa dagat.”

Bisan pa sa mga pag-uswag sa siyentipikanhong mga pamaagi ug paggamit sa mga kahimanan, wala gihapon masayri ang gidaghanon sa “balas sa dagat.” Busa, ikaingon nga ang maong pamulong naghulagway sa wala mahibaloi o wala maihap nga gidaghanon. Apan nagpasabot ba kini ug usa ka dako kaayo, dili mahanduraw nga gidaghanon, o kini ba maoy wala hisayri apan igoigo nga gidaghanon?

Sa Bibliya, ang ekspresyong “ingon sa balas sa dagat” gigamit sa daghang paagi. Pananglitan, sa Genesis 41:49, atong mabasa: “Si Jose nagpadayon sa pagtapok sa mga lugas nga hilabihan ka daghan, sama sa balas sa dagat, hangtod nga sa kataposan mihunong na sila sa pag-ihap, tungod kay kini dili na maihap.” Gipasiugda dinhi ang pagkadili-maihap. Sa samang paagi, si Jehova nag-ingon: “Ingon nga ang panon sa kalangitan dili maihap, ni masukod ang mga balas sa dagat, sa ingon usab akong padaghanon ang binhi ni David nga akong alagad.” Tungod kay seguradong dili maihap ang mga bituon sa langit ug ang balas sa dagat, seguradong tumanon usab ni Jehova ang iyang saad kang David.—Jeremias 33:22.

Kasagaran ang ekspresyong “balas sa dagat” nagtumong sa butang nga may igoigong gidaghanon o gidak-on. Ang mga Israelinhon sa Gilgal nabalaka pag-ayo tungod sa kasundalohan nga mga Filestihanon nga nagkatigom sa Mikmas, nga “ingon ka daghan sa mga lugas sa balas nga anaa sa baybayon.” (1 Samuel 13:5, 6; Maghuhukom 7:12) Ug “ang Diyos nagpadayon paghatag kang Solomon sa kaalam ug pagsabot sa dako kaayong sukod ug kalapad sa kasingkasing, sama sa balas nga anaa sa baybayon.” (1 Hari 4:29) Bisan pag ang gihisgotan sa matag kaso maoy igoigong gidaghanon, kini matino gihapon.

Ang “balas sa dagat” mahimong magpasabot usab ug wala mahibaloing gidaghanon, nga wala magsugyot nga dako kini. Giingnan ni Jehova si Abraham: “Ako magpanalangin gayod kanimo ug ako tinong magpadaghan sa imong binhi sama sa mga bituon sa kalangitan ug sama sa mga lugas sa balas nga anaa sa baybayon.” (Genesis 22:17) Sa pagsubli niining saara ngadto sa apo ni Abraham nga si Jacob, gigamit ni Jehova ang ekspresyong “mga lugas sa abog sa yuta,” nga gisubli ni Jacob ingong “mga balas sa dagat.” (Genesis 28:14; 32:12) Sumala sa nahitabo, gawas kang Jesu-Kristo, ang “binhi” ni Abraham may gidaghanong 144,000, nga gitawag ni Jesus nga “gamayng panon.”—Lucas 12:32; Galacia 3:16, 29; Pinadayag 7:4; 14:1, 3.

Unsay atong makat-onan gikan niining maong mga pananglitan? Nga ang ekspresyong “ingon sa balas sa dagat” wala magkahulogan kanunay ug usa ka dili maihap nga gidaghanon, dili mahanduraw nga gidaghanon; ni kanunay kining gigamit sa paghubit ug usa ka butang nga hilabihan ka dako. Kasagarang naghawas kini sa wala mahibaloi apan igoigo nga gidaghanon. Busa, makataronganon ang pagtuo nga ang masuklanong panon sa katawhan nga magpaluyo kang Satanas sa iyang pangataposang pag-atake batok sa katawhan sa Diyos maoy dili hilabihan ka dako, kondili may igoigong gidaghanon ug may igong gidak-on nga makahatag ug kapeligrohan. Apan, ang gidaghanon wala gihapon mahibaloi sa pagkakaron.