Paghatag ug Labaw kay sa Maarangan

“TAWGA ko nga makililimos; dili ko masuko. Ako nagpakilimos alang kang Jesus.” Ang maong madayganong mga pulong sa usa ka ministrong Protestante nagpasiugda sa kontrobersiya may kalabotan sa paghatag ug pinansiyal nga tabang sa relihiyon. Mopatim-aw nga makapadayon lamang sa paglungtad ang organisadong relihiyon kon kini makadawat ug dakong pinansiyal nga tabang. Dunay mga suweldo nga kinahanglang bayran, mga templo nga kinahanglang tukoron ug mentinahon, mga kampanya sa pag-ebanghelyo nga kinahanglang suportahan sa pinansiyal. Asa man kuhaon ang gikinahanglang salapi?

Alang sa daghang relihiyon, ang tubag mao ang ikapulo. a “Ang paghatag ug ikapulo mao ang paagi sa Diyos aron ang Iyang gingharian dinhi sa yuta masuportahan sa pinansiyal,” matod sa ebanghelisador nga si Norman Robertson. “Mao kini ang Iyang sistema sa ekonomiya aron ikawali ang Ebanghelyo.” Wala mag-ukon-ukon sa pagpahinumdom sa iyang mga sumusunod bahin sa ilang responsabilidad sa paghatag, siya puwersadong miingon: ‘Ang paghatag ug ikapulo dili usa ka butang nga imong himoon tungod kay ikaw makaarang niini. Kini maoy usa ka buhat sa pagkamatinumanon. Ang dili paghatag ug ikapulo maoy pagsupak sa mga sugo sa Diyos. Pagpangdispalko kini.’—Tithing—God’s Financial Plan.

Lagmit mouyon ka gayod nga ang paghatag angayng mahimong bahin sa Kristohanong pagsimba. Apan, ikaw ba wala makaangay, o tingali nasuko pa gani niining way-puas nga paghangyo ug kuwarta? Giakusar sa teologong taga-Brazil nga si Inácio Strieder ang mga relihiyon nga sila naggamit sa ikapulo sa “pagsulbad sa mga problema sa ilang organisasyon” ug nagtawag sa maong mga buhat nga “ilegal, maabusohon, ug paglapas sa teolohikal nga pagtulon-an.” Ang resulta, matod niya, mao nga kadtong “mga tawong walay trabaho, mga balo, mga molupyo sa eskuwater, ug kadtong dili makahimog makataronganong paghunahuna makahinapos nga sila gitalikdan sa Diyos ug nga sila obligado sa paghatag ug dako kaayo ngadto sa ‘magwawali’ hangtod sa punto nga ang ilang kaugalingong pamilya magutman.”

Tingali ikaw maghunahuna: ‘Ang mga relihiyong nagpatuman sa ikapulo nagpadapat kaha sa Kasulatan sa hustong paagi? O dili kaha gigamit lang sa pipila ka relihiyon ang kahadlok nga silotan sa Diyos aron sila makapanikas sa panon? Ang Diyos nagdahom ba gayod kanato sa paghatag ug labaw kay sa atong maarangan?’

[Footnote]