“Ang Tulo ka Hari” Kinsa Sila?

Ang mga Belen kasagarang naghulagway sa tulo ka lalaki nga tag-as ug besti uban sa ilang mga kamelyo, nga nangabot sa usa ka kuwadra diin ang masuso nga si Jesus naghigda sa usa ka pasungan. Ang nindot ug besti nga mga bisita gitawag sa kadaghanan nga ang tulo ka hari. Unsay gisulti sa Bibliya bahin kanila?

Sumala sa Bibliya, ang gitawag nga tulo ka hari maoy “gikan sa sidlakang mga bahin,” ug didto nila nahibaloan ang bahin sa pagkatawo ni Jesus. (Mateo 2:1, 2, 9) Lagmit dugaydugay ang panaw niining mga lalakiha paingon sa Judea. Sa dihang sa kataposan nakaplagan nila si Jesus, dili na siya usa ka bag-ong natawo nga masuso diha sa kuwadra. Hinunoa, ang mga lalaki nakakaplag kang Maria ug sa “bata” nga nagpuyo sa balay.—Mateo 2:11.

Ang Bibliya nagtawag niining maong mga lalaki nga mga mago, o “mga astrologo,” ug wala kini mag-ingon kon pila sila ka buok. Ang The Oxford Companion to the Bible nagpatin-aw: “Ang koneksiyon tali sa salamangka ug astrolohiya gibanaag diha sa kaikag sa mga bisita sa bituon nga naggiya kanila paingon sa Betlehem.” Ang Bibliya tin-awng nagsaway sa tanang matang sa salamangka ug sa Babilonyanhong batasan sa pagkuhag impormasyon gikan sa mga bituon.—Deuteronomio 18:10-12; Isaias 47:13.

Ang impormasyon nga gipasa ngadto niining mga lalakiha wala makahatag ug bisan unsang maayong resulta. Nakapukaw kini sa mapangabughoon nga kasuko sa daotang Haring Herodes. Sa baylo, kini miresulta sa pagkalagiw ni Jose, Maria, ug ni Jesus ngadto sa Ehipto ug sa pagpamatay sa tanang bata nga lalaki sa Betlehem “gikan sa duha ka tuig ang panuigon paubos.” Maampingong gitino ni Herodes ang panahon sa pagkatawo ni Jesus sumala sa iyang nahibaloan gikan sa mga astrologo. (Mateo 2:16) Tungod sa tanang problema nga gipahinabo sa ilang pagbisita, makataronganon ang paghinapos nga ang bituon nga ilang nakita ug ang mensahe bahin sa “usa nga natawong hari sa mga Hudiyo” naggikan sa kaaway sa Diyos, si Satanas nga Yawa, kinsa buot mopatay kang Jesus.—Mateo 2:1, 2.